ဝၢႆးသေ ၸဝ်ႈၶုၼ်သႃႇ လုၵ်ႉႁူဝ်မိူင်းဢွၵ်ႇမိူဝ်းၵႂႃႇတႃႈၵုင်ႈ မိူဝ်ႈဝၼ်းထိ 08/03/1996 ယဝ်ႉ လုၵ်ႈၸၢႆးၵေႃႉထိ 2 မၼ်းၸဝ်ႈ ၸဝ်ႈၸၢမ်ႇႁိူင်း (ဢၼ်ယိပ်းၵုမ်းၸတ်းၵၢၼ် ၾၢႆႇမၢၵ်ႈမီးၵမ်ႉၸွႆႈ) ၵေႃႈ မိူဝ်းၸွမ်းတၢင်းလင် မိူဝ်ႈဝၼ်းထိ 14/03/1996 ယဝ်ႉ။ ၵူၺ်းၵႃႈ မိူဝ်းၵႂႃႇၸူဝ်ႈၶၢဝ်းမွၵ်ႈၽၢၵ်ႇလိူၼ်ၵူၺ်း သေပွၵ်ႈမႃးၶိုၼ်းယဝ်ႉ ဝႃႈၼႆ။

ဝၢႆးသေ ပေႃႈမၼ်းၸဝ်ႈၶုၼ်သႃႇ လႆႈမိူဝ်းၵႂႃႇတႃႈၵုင်ႈယဝ်ႉသေ မိူဝ်ႈၼႃႈမၼ်း ၸဝ်ႈတေဢၢင်ႈ မိူဝ်း ၸွမ်းၾၢႆႇလင်ၼၼ်ႉ မၼ်းၸဝ်ႈလႆႈသပ်းလႅင်း ၶႆႈၼႄၶေႃႈၶမ်ၸႂ် တၢင်းႁၼ်ထိုင်မၼ်းတီႈ လုၵ်ႈၼွင်ႉ  ၸမ်ၸႂ် ၵူၼ်းယူႇႁိမ်းႁွမ်းမၼ်းဝႃႈ – လွင်ႈသိုၵ်းမၢၼ်ႈ SLORC ၶဝ်ဢႃးထမ်ႇမၸဵၵ်းႁွင်ႉႁႂ်ႈ “ၸဝ်ႈဢူႈ” ၵႂႃႇတႃႈၵုင်းၼႆႉ သၢႆငၢႆလွင်ႈဢမ်ႇလီလႄႈ လွင်ႈလီၸၢင်ႈပဵၼ်လႆႈ 4 ဢၼ် ၼႆယဝ်ႉ။

1 – မၢင်ၽဝ်ႇမၢၼ်ႈ SLORC ၶဝ်ၸၢင်ႈဢဝ်သူင်ႇပၼ် USA ၵေႃႈၸၢင်ႈပဵၼ်လႆႈ (ဢမ်ႇလၢမ်း ႁူႉလႆႈၸွမ်းၸႂ်မူၸႂ်မႃၶဝ်၊ ၵွပ်ႈၶဝ်ၵႆႉၵႆႉလၢတ်ႈမဵဝ်း ႞ ႁဵတ်းမဵဝ်း ႞ ၊ ဢိင်ၼိူဝ် လွင်ႈမီးၼမ်ႉ တွၼ်းၽွၼ်းလီသေ ၶဝ်ၸၢင်ႈလႅၵ်ႈလၢႆႈႁဵတ်းႁၢတ်းၵႃႈပဵၼ်။)

2 – ဢဝ်ၼႃႈတိူဝ်ႈဝႃႈ လုမ်းလႃးယူတ်းယႃပၼ်ၼႆသေ ၸၢင်ႈလၵ်ႉလွမ်သမ်းပၼ်ဢီႈယႃ ဢၼ်ပဵၼ်ၵွင်ႉငူၼ်ႉ – ႁႂ်ႈၸဵဝ်းတၢႆဝႆး (ပႅၵ်ႉသမ်ႉဝႃႈ ၶုၼ်သႃႇ ပႃးမေႃယႃၸၢႆးမျိၼ်ႉ – မေႃ ယႃ ၵႅမ်တူဝ်ၵႂႃႇၵေႃႈလီ)။

3 – ၼႄလွင်ႈတၢင်းၵူႈပိူင်ပိူင်သေ ၸၢင်ႈၵုမ်းၶင်သႂ်ႇၶွၵ်ႈဝႆႉၶၢဝ်းယၢဝ်း (မၢင်ၽဝ်ႇဢဝ်ၶင် ၶွၵ်ႈတေႃႇၸူဝ်ႈ)။

4 – သင်ဝႃႈ ၵၢမ်ႇသုၼ်ႇမုၼ်တေႃႇၵုသူဝ်ႇလီၵေႃႈ -ၸၢင်ႈပွႆႇမႃးၶိုၼ်း။ ၼႆႉပဵၼ်တၢင်းမုင်ႈ လိုၼ်းသုတ်း။

(ၵွပ်ႈဝႃႈ ဝၼ်းဢၼ်ၶုၼ်သႃႇ ဢွၵ်ႇႁူဝ်မိူင်း တေၵႂႃႇၶိုၼ်ႈႁိူဝ်းမိၼ်ၼၼ်ႉသိုၵ်း မၢၼ်ႈၶဝ်ၵူတ်ႇသွၵ်ႈ ငုမ်းငၢမ်း ၶူၼ်ႉတဝ်ၸွမ်းတူဝ်မၼ်း မိူဝ်ႈၼႃႈတေၶိုၼ်ႈႁိူဝ်းမိၼ်ၼၼ်ႉ မၼ်းၽိတ်းၸႂ်ၸဵပ်းၸႂ်ၼႃႇ ၼမ်ႉတႃပေႃးလႆဝၢႆးမၼ်း – ႁႄႈဝႃႈၼႆယဝ်ႉ။)

ၵွပ်ႈပိူဝ်ႈၼၼ်သေ တင်ႈတႄႇလႆႈငိၼ်းၵႂၢမ်း ‘တၵ်ႉၼၢႆ’ ၼၼ်ႉမႃးယဝ်ႉ ၵူၼ်းႁူဝ်မိူင်းၵမ်ႈၽွင်ႈ တင်းၼမ်ၵေႃႈ ဢွၼ်ၵၼ်ၶႂ်ႈလွမ်ယုပ်းၽၢၼ်ႈၵူဝ်ႁႄ တူၵ်းၸႂ်လႂ်တိုၼ်ႇမႃးယဝ်ႉ။

ၵူၼ်းၵမ်ႈၽွင်ႈ ထိုင်တီႈၶၢင်းမေႃးပွင်ဝႃႈ – ၵၼ်ႈၵႅၼ်ႈယိူၼ်ႉယူႇၵႂႃႇတူၺ်းတီႈႁိုင်သုတ်းထႅင်ႈမွၵ်ႈ 3 လိူၼ်သေ ပေႃးငဝ်းလၢႆးႁၢႆႉ ၸႃႉၵပ်ႉၵိၼ်းယၢပ်ႇၽိုတ်ႇမႃး လိူဝ်ၵဝ်ႇတိၵ်းတိၵ်း ၵေႃႈ ႁူႉတေလႆႈႁႃႁူး ဢွၵ်ႇတၢင်းၵႂႃႇယူႇယဝ်ႉ – ဝႃႈၼႆ။

ၸဝ်ႈၶႂၢၼ်မိူင်း ဢၼ်ပဵၼ်ၽူႈၼမ်းၼႂ်း CEC/SSRC ၵဝ်ႇၵဝ်ႇၼၼ်ႉၵေႃႈ လႆႈၶၢႆၵႃး TOYOTA HILUX PICKUP TRUCK ဢၼ်ၶုၼ်သႃႇပၼ်မၼ်းၸႂ်ႉၵၢၼ်ဝႆႉၸဵမ်မိူဝ်ႈ 1992 ၼၼ်ႉ 40,000 ဝၢတ်ႉလႄႈ ၶၢႆၵွင်ႈပွတ်းမၼ်း 12,000 ဝၢတ်ႇသေ ဢွၵ်ႇမိူဝ်ႈဝၼ်ထိ 06/03/1996 ဝႃႈၼႆယဝ်ႉ။

ၼႃႈၶုၼ်သႃႇၵႂႃႇၼၼ်ႉ ၸႂ်ႉၵူၼ်းဢဝ်ငိုၼ်းမႃးပၼ်မၼ်းဢဝ်ၸေႈႁေႃႇပူၵ်ႉဝႆႉႁေႃႇ ႞ ၼႃမွၵ်ႈၶိုပ်ႈ (ႁူႉလႅပ်ႈပဵၼ်ငိုၼ်းမၢၼ်ႈၵူၺ်း) သေလၢတ်ႈဝႃႈ “ပေႃးၶႂ်ႈမိူဝ်းၵေႃႈမိူဝ်းလႆႈယဝ်ႉ၊ ပေႃးၶႂ်ႈၵႂႃႇႁႃၸွမ်ပွင် သိုၵ်းၵေႃႈ တီႈတႃႈၵုင်ႈတႄႉယႃႇပေၵႂႃႇႁႃ၊ ႁႂ်ႈၵႂႃႇၵပ်းသိုပ်ႇတီႈႁိူၼ်းၶုၼ်ၶမ်းလႅင် (ၸိုဝ်ႈထႆး ပီႈဢၢႆႈ ၶုၼ်သႅင်ဢၢဝ်ၶုၼ်သႃႇ) တီႈတွင်ႇၵျီးၵေႃႈလႆႈ” ၼႆယဝ်ႉ။ ၸဝ်ႈၶႂၢၼ်မိူင်းၵေႃႈ ႁူႉဝႃႈ “ဢေႃႈ ၶဝ်သိုဝ်ႉၵဝ်ပွႆႇပႅတ်ႈၵူၺ်းလူင်ၼႆႉ”ၼႆသေ ယူႇႁူဝ်မိူင်းထႅင်ႈ 2-3 ဝၼ်းၵေႃႈ သွင်ႉမိူဝ်းတၢင်းၵႃးပႅတ်ႈယူႇယဝ်ႉ။

ၵူၼ်းလူင် ဢၼ်ၶုၼ်သႃႇတူၺ်းထိုင်ၸွႆႈထႅမ်ငိုၼ်းတွင်း ၵမ်ႈၽွင်ႈဢိတ်းဢီႈ (မိူၼ်တင်းသိုဝ်ႉပွႆႇပႅတ်ႈ) ၸိူင်ႉၼင်ႇၸဝ်ႈၶႂၢၼ်မိူင်းၼႆႉ (လိူဝ်သေ ၸုမ်းၵဝ်ႇၵဝ်ႇ SUA ၶဝ်ၼၼ်ႉ) ဢမ်ႇငိၼ်းဝႃႈ မီးၽႂ်သေၵေႃႉ လႃးလႃး၊ ၵူၼ်းတင်းၼမ် လႆႈၶၢမ်ႇတင်းပိုၼ်ႉပွႆႇပႅတ်ႈ မိူၼ်မႃၵၢင်လၢႆၵူၺ်းယူႇယဝ်ႉ။ မိူၼ်ၵၼ်တင်း ဝႆႉၸႂ်ဝႃႈ- “ၵဝ်ႁဵတ်းဢမ်ႇပဵၼ် ဢမ်ႇလႆႈယဝ်ႉၵေႃႈ ယႃႇႁႂ်ႈၽႂ် လႆႈမႃးသိုပ်ႇပုတ်ႈဢဝ်ၶွင်ၵဝ်ႁဵတ်း လႃးလႃး” ၼႆသေ ဢဝ်တင်းၸဵပ်းၸႂ်တေႃးသ မႃႇၼႁဵတ်းႁတ်းၵႂႃႇၵူၺ်းယဝ်ႉ။

ၶေႃႈမုလ်း – ပပ်ႉၵွၼ်းၶေႃ မၢႆ 141 ပီ 1996