ယၢမ်လဵဝ်ၼႆႉ ၸုမ်းသိုၵ်းမၢၼ်ႈၶႂၢၵ်ႈမိူင်းၶဝ် တီႇထႆမႄးၵုမ်းမႄႇၶႂၢၵ်ႈဝၢင်း ႁိူဝ်းမိၼ်သိုၵ်းၶဝ် တီႈဝဵင်းၼမ်ႉၸၢင် ယူႇဢမ်ႇထၢတ်ႇဢမ်ႇဝၢႆးတိၵ်းတိၵ်း။ တွၼ်ႈတႃႇ ဢဝ်ႁဵတ်းငဝ်ႈငုၼ်းတပ်ႉလူမ်း ဢၼ်ယႂ်ႇၵႂၢင်ႈသုတ်းၼႂ်းမိူင်းတႆး (ဢမ်ႇၼၼ်) ဢၼ်ယႂ်ႇၵႂၢင်ႈသုတ်း ၼႃႈတၢင်းဢွၵ်ႇ ၼႂ်းမိူင်ႁူမ်ႈတုမ်မိူင်းမၢၼ်ႈ ယူႇယဝ်ႉ။ ၸိုင်ဝႃႈ ၸုမ်းၵိုတ်းသိုၵ်းဢဝ်လွင်ႈယဵၼ်မီးၼမ်မႃးတိၵ်း ၵူၺ်းဢမ်ႇၵႃး ၸုမ်း MTA ၶုၼ်သႃႇၶဝ်ၵေႃႈ သမ်ႉပေႃးယွမ်းတူဝ်ဝၢင်းၶိူင်ႈၵႂႃပႅတ်ႈသဵင်ႈယဝ်ႉလႃႇ?။ ၸိုင်ဝႃႈ ဢမ်ႇၶႂ်ႈၵိုတ်းၸုမ်းယိပ်း ၵွင်ႈၵၢင်ႇၸုမ်းလႂ်ယဝ်ႉလႃႇ?။

ပေႃးၼၼ်ၵေႃႈ – ၵွပ်ႈသင် ၸုမ်းသိုၵ်းမၢၼ်ႈၶဝ်သမ်ႉ ၵေႃႇသၢင်ႈပူၵ်းပွင်ထႅမ်ႁႅင်းသိုၵ်းၶဝ် ယူႇၵူႈၾၢႆႇတိၵ်းတိၵ်း ဢမ်ႇလိုဝ်ႈဢမ်ႇသဝ်းလႃႇ?။

ပုၼ်ႈတႃႇၶဝ်ၼႆႉ ဢႃႇၼႃႇဢဵၼ်ႁႅင်း ၸင်ႇပဵၼ်တြႃးထုၵ်ႇမႅၼ်ႈၸိုဝ်ႈၸႂ်ႈ (MIGHT IS RIGHT) ၼၼ်ႉယဝ်ႉ။ မိုဝ်းၶွၼ် ႞ ယိပ်းၶဝ်ႈမုၼ်းၵျေႃးလုၵ်ႈဢွၼ်ႇလႄႈ မိုဝ်းၶွၼ် ႞ ယိပ်း ၶွၼ်ႉပွတ်းလွၵ်ႇ လုၵ်ႈဢွၼ်ႇ ၼၼ်ႉ မၢၼ်ႈၶဝ်ၵူၺ်းမီးၶဝ်ႈမုၼ်းဢွၼ်ႇ မွၵ်ႈႁူဝ်မႄႈမိုဝ်း ႞ ၵူၺ်းသေ ၶွၼ်ႉပွတ်းသမ်ႉ ဢဝ်မႆႉသၢင်း တၼ်လူင်ပေႃးၶႂ်ႈမီးပဵၼ်ဝႃး ၼၼ်ႉယဝ်ႉ။

ပုၼ်ႈတႃႇ ၸုမ်းဢဵၼ်ႁႅင်းၸိူဝ်ႉၸၢတ်ႈႁဝ်းသမ်ႉ တၵ်းလႆႈယိပ်းမၼ်ႈၸုၵ်းၼိူဝ် တီႈဢၼ်ဢဝ်လွင်ႈတြႃးထုၵ်ႇမႅၼ်ႈၸိုဝ်ႈၸႂ်ႈၼၼ်ႉ တႅပ်းတတ်းၵေႃႇသၢင်ႈပူၵ်းပွင်ဢႃႇၼႃႇဢဵၼ်ႁႅင်း (RIGHT IS MIGHT) ၵႂႃႇတိၵ်းတိၵ်းယူႇယဝ်ႉ။ ယွၼ်ႉပိူဝ်ႈဝႃႈ လွင်ႈႁဝ်းၸုၵ်းသဝ်းမီးဝႆႉ ၾၢႆႇဢၼ်ထုၵ်ႇမႅၼ်ႈၸိုဝ်ႈၸႂ်ႈ ဢၼ်ဝႃႈၼၼ်ႉ – 1) သိူၵ်ႈပိုၼ်းမီးသၢၵ်ႈသေႇလၵ်းထၢၼ် ၸိၼႄယိပ်းၵမ်လႆႈတႅၵ်ႇလႅင်း။ 2) ၵၢင်ၸႂ်ၵူၼ်းမိူင်းႁဝ်းၵေႃႈ တိုၼ်းတုၵ်းယွၼ်းမုင်ႈမွင်း လွင်ႈထၢင်ႇႁၢင်ႈလွတ်ႈလႅဝ်း။ 3) ၵမ်ႇၽႃႇလုမ်ႈၾႃႉၵေႃႈ ႁူႉၸွမ်းသိူၵ်ႈပိုၼ်းႁဝ်းၽွင်ႈသေ ႁၼ်ထိုင်ၼိူဝ် ငဝ်းလၢႆးလွင်ႈတူင်ႉၼိုင်ႁဝ်း ၵမ်ႈၽွင်ႈ ၼၼ်ႉယဝ်ႉ။

ၵွပ်ႈၼႆသေ ပုၼ်ႈၽွၼ်းၼၵ်းၼႃလူင် ပုၼ်ႈတႃႇၽူႈႁၵ်ႉၸၢတ်ႈတင်းလၢႆ ဝၼ်းမိူဝ်ႈၼႆႉ –

1 – ယွၼ်ႇယၢၼ်းၶဝ်ႈႁႃ ဢွမ်ႇလွမ်ႈၽွမ်ႉၸႂ် ၶွၼ်ႈႁႅင်းၵၼ်ဝႆးဝႆး။

2 – သိူၵ်ႈပိုၼ်းသၢၵ်ႈသေႇလၵ်းထၢၼ် သုၼ်ႇလႆႈသုၼ်ႇပဵၼ် ၸိူဝ်ႉၸၢတ်ႈႁဝ်းၼၼ်ႉ ၶတ်းၸႂ် ႁဵတ်းႁႂ်ႈၵမ်ႇၽႃႇႁူႉႁၼ်တုင်းႁပ်ႉၼမ်ႉတွၼ်းမႃးလိူဝ်ၵဝ်ႇ။

3 – ငဝ်းလၢႆးၵၢင်ၸႂ် တၢင်းမုင်ႈမွင်းၵူၼ်းမိူင်းႁဝ်းလႄႈ လွင်ႈတူင်ႉၼိုင် ၵၢၼ်ၸိူဝ်ႉၸၢတ်ႁဝ်းၼၼ်ႉ ၶတ်းၸႂ်ႁဵတ်းၼႄ ႁႂ်ႈပဵၼ်ၼမ်ႉပဵၼ်တူဝ် ႁႂ်ႈၼႂ်းမိူင်းၼွၵ်ႈမိူင်း ႁၼ်ၸႅင်ႈလႅင်းလိူဝ်တွၼ်းသေၵဝ်ႇ။

4 – တီႈဢၼ်ၶတ်းသၢင်ႈႁၢင်ႈပွင်ၵၢၼ်ငၢၼ်းသမ်ႉ သႅၼ်ပိူင်ၼၼ်ႉဢဝ်ၼမ်ႉ 4 ၼမ်ႉ (ၼမ်ႉၸႂ်၊ ၼမ်ႉၵတ်ႉ၊ ၼမ်ႉၼၵ်း၊ ၼမ်ႉတွၼ်း) ဝႆႉ ပဵၼ်တွၼ်ႈၶိုၵ်ႉယႂ်ႇလမ်ႇလွင်တႃႇသေႇ။

ငဝ်းလၢႆးမၢၼ်ႈလႄႈ ၵၢၼ်ထၢၼ်ႈႁဝ်း၊ ယႃႇငမ်းငဝ်းထတ်းႁၼ်ထုၵ်ႇမႅၼ်ႈ၊ ၸႅၵ်ႇၶႅၼ်ႈၽႄႁူႉႁၼ်ပွင်ႇၸႂ်၊ ၸင်ႇလႅင်းသႂ်ပွင်ႇပိုင်ႈ၊ ၸင်ႇၸၢင်ႈတိုင်ႈၶိုၼ်ႈၼႃႈၶိုတ်းတၼ်းပိူၼ်ႈယဝ်ႉ။

တႅမ်ႈ ၸၢႆးဢၢႆႈငဵဝ်ႇ – မင်းသႅင် 31/03/1996

ၶေႃႈမုလ်း – ပပ်ႉၵွၼ်းၶေႃ မၢႆ 141 ပီ 1996