တႄႇသိုၵ်းမၢၼ်ႈ ၶဝ်ႈၵုမ်းၶိုၼ်း ၼႂ်းဝဵင်းလႃႈသဵဝ်ႈၼႆႉ ၵူၼ်းမိူင်းၸိူဝ်းၶၢႆၵုၼ်ႇ ယူႇၼႂ်းၵၢတ်ႇလူင်လႄႈ ပိုတ်ႇႁၢၼ်ႉၶၢႆၵုၼ်ႇယွႆႈ၊ ၽၵ်းယိူဝ်ႈၼၢင်းၶဵဝ်၊ ၶဝ်ႈၽၵ်းသုၵ်း ဢွၼ်ၵၼ်ၶင်းပွင်ႉဝႃႈ ဢမ်ႇၶၢႆလီ မိူၼ်ဢွၼ်တၢင်း ႁဵတ်းႁႂ်ႈတုမ်ႉတိူဝ်ႉၵူၼ်းမိူင်းလႃႈသဵဝ်ႈ ၸိုင်ႈတႆးပွတ်းႁွင်ႇ ႁူပ်ႉတၢင်းယၢပ်ႇၽိုတ်ႇလၢႆလွင်ႈ။

ၵူၼ်းၶၢႆၶူဝ်းၵုၼ်ႇ ၼႂ်းၵၢတ်ႇလူင် ဝဵင်းလႃႈသဵဝ်ႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“မၢင်ဝၼ်း ယင်းဢမ်ႇလႆႈႁူဝ်မၢၼ်မၼ်းၵွၼ်ႇ။ ၶၼ်ၵုၼ်ႇၵေႃႈ သမ်ႉၶိုၼ်ႈၼႃႇ။ ၵၢၼ်ၵေႃႈႁႃယၢပ်ႇႁႄၼႆ ၵူၼ်းသိုဝ်ႉၶူဝ်း၊ ၵူၼ်းလႄႇၵၢတ်ႇၼႆႉ မီးၼမ်ယူႇၵေႃႈ ပိူၼ်ႈဢမ်ႇပေႃးၸၢႆႇငိုၼ်းမိူၼ်မိူဝ်ႈဢွၼ်တၢင်း။ မိူဝ်ႈလဵဝ် ၼႂ်းၵၢတ်ႇလူင်လႃႈသဵဝ်ႈၼႆႉ ပဵၼ်ၶူဝ်းမိူင်းၶႄႇ ပေႃးတဵမ်ၵႂႃႇသဵင်ႈ။ ၶူဝ်းၵုၼ်ႇမိူင်းမၢၼ်ႈၼႆႉ ဢေႇလိူဝ်ၶူဝ်းမိူင်းၶႄႇယဝ်ႉ”- ဝႃႈၼႆ။

ယၢမ်းလဵဝ် ၼႂ်းဝဵင်းလႃႈသဵဝ်ႈၼႆႉ သိုၵ်းမၢၼ်ႈၵုမ်းၵမ်ဝႆႉသေ တႄႇႁူဝ်လိူၼ်မေႊမႃး ၶႃႈႁၢပ်ႇၵၢၼ်ၶုၼ် ၾၢႆႇၵုမ်းရူတ်ႉၵႃးလႄႈ သိုၵ်းမၢၼ်ႈ ႁူမ်ႈၵၼ်ပႂ်ႉတီႉၺွပ်း ရူတ်ႉၵႃး ၸိူဝ်းဢမ်ႇတၢင်ႇမၢႆၾၢင် (လၢႆႊသိၼ်ႊ) ဝႆႉလႄႈ ယိင်ႈၶႅၼ်းႁဵတ်းႁႂ်ႈၵူၼ်းမိူင်း ႁဵတ်းၵၢၼ်ၵႃႉၶၢႆ ယၢပ်ႇၽိုတ်ႇမႃးလိူဝ်ၵဝ်ႇ ထႅင်ႈၼႆ – ၼၢင်းယိင်း ဢႃယု 45 ပီ ၵေႃႉၶၢႆၵုၼ်ႇယူႇၼႂ်းၵၢတ်ႇလူင် ဝဵင်းလႃႈသဵဝ်ႈ လၢတ်ႈတီႈၽူႈ တွႆႇႁွၵ်ႈၼင်ႇၼႆ။

“မိူဝ်ႈလဵဝ် ႁႃငိုၼ်းယၢပ်ႇပေႃးတေတၢႆ။ ၵူၼ်းမိူင်းၼႆႉ မီးၼမ်ႉၵတ်ႉ တႃႇသိုဝ်ႉၵႃး ဝိတ်ႉတွၵ်ႉႁႄ ၸႂ်ႉၵူၺ်းဢိူဝ်ႈ။ ၵမ်ႉဝႃႈ တေလႆႈပၼ်ၶွၼ်ႇၸုမ်းၼၼ်ႉ၊ ၸုမ်းၼႆႉဝႃႇၼႆထႅင်ႈႁႄ ၵွၼ်ႇ။ ၶၼ်ငိုၼ်း မၢၼ်ႈၵေႃႈ မိူဝ်ႈလဵဝ် တမ်ႉဢမ်ႇမီးၵႃႈၶၼ်။ ၼိုင်ႈမိုၼ်ႇဝႃႇ သိုဝ်ႉၼမ်ႉမၼ်းၵိၼ်ၼိုင်ႈတဝ်ႈ တမ်ႉဢမ်ႇပေႃး။ တႃႇတၢင်ႇၶူဝ်းတေႃႉၵုၼ်ႇႁဝ်းၼႆႉ လႆႈပိုင်ႈဢိင် ၵႃးဝိတ်ႉတွၵ်ႉၵူၺ်းလႄႇ။ မိူဝ်ႈလဵဝ် ၶဝ်မႃးၺွပ်း ၸိူင်ႉၼႆႁဵတ်းႁႂ်ႈႁဝ်း ၵႂႃႇသိုဝ်ႉၵုၼ်ႇ၊ ၵႂႃႇၶၢႆၵုၼ်ႇယၢပ်ႇ။ ပေႃးၼိူင်းၵၼ်တင်း မိူဝ်ႈၵူႈ ပွၵ်ႈၼႆ မိူဝ်ႈလဵဝ် ဢမ်ႇပဵၼ်ၵၢၼ်သင်။ တေႃႉတႄႉပေႃးယူႇၵႂႃႇၵိၼ်ၵႂႃႇ ဝၼ်းလႂ်ဝၼ်းၼၼ်ႉၵူၺ်း။ ဢမ်ႇလႆႈၸူႉလႆႈႁွမ်မိူၼ်ၵူႈပွၵ်ႈ”။

ဝၢႆးလင် ပဵၼ်ၽႅၼ်ယၼ်ႇသိုၵ်း 1027 ၵူၼ်းမိူင်းၸိူဝ်းယူႇၼႂ်းၸႄႈဝဵင်းလႃႈသဵဝ်ႈ၊ သႅၼ်ဝီ၊ ၵူတ်ႉၶၢႆ၊ ၵုၼ်လူင်၊ ႁူဝ်ပၢင်ႇ၊ လၢဝ်ႇၵၢႆးလႄႈ ၸိူဝ်းယူႇတႂ်ႈသိုၵ်းၸၢဝ်းၶိူဝ်းၵုမ်းၵမ်ၼၼ်ႉ ႁူပ်ႉပၼ်ႁႃ ၵၢၼ်ပၢႆးမၢၵ်ႈမီးတူၵ်းသေ ယၢပ်ႇၽိုတ်ႇၵိၼ်းၸႂ် တႃႇႁႃၵိၼ်လဵင်ႉတွင်ႉ။

တႅမ်ႈ – ၽူၺ်းၼုမ်ႇ