ၾၢႆႇႁႄႉၵင်ႈတၢင်းပဵၼ်ၶူဝ်ႊဝိတ်ႉ ၼႂ်းမိူင်းထႆး ပိုၼ်ၽၢဝ်ႇၼႂ်းဝူင်ႈၼႆႉ မိူဝ်ႈဝၼ်းတီႈ 11/06/2025 ပူၼ်ႉမႃး ၼႆႉဝႃႈ – ၼႂ်းၶၢဝ်းတၢင်း 6 လိူၼ် ပီ 2025 ၼႆႉၵူၺ်း ၵူၼ်းၸပ်းတၢင်းပဵၼ်ၶူဝ်ႊဝိတ်ႉ ၶိုၼ်းမီး 4 သႅၼ်ပၢႆ ယဝ်ႉ ဢၼ်တိတ်းၸပ်းၼမ်သုတ်းပဵၼ်ၼႂ်းဝဵင်းလူင် မိူင်းၵွၵ်ႇ (ၵုင်းထဵပ်ႈ) ဝႃႈၼႆ။

တင်ႈတႄႇ ဝၼ်းတီႈ 01/01/2025 မႃး ႁူဝ်ၼပ်ႉၵူၼ်းၸပ်းတၢင်းပဵၼ်တင်းမူတ်း ၼႂ်းမိူင်းထႆးမီး 439,527 ၵေႃႉသေ ဢၼ်တၢႆယွၼ်ႉတၢင်းပဵၼ်ၶူဝ်ႊဝိတ်ႉမီး 130 ၵေႃႉယဝ်ႉ။ ဢၼ် ၸပ်းၵၼ်ၼမ်သုတ်း ပဵၼ်ၼႂ်း ၸႄႈတွၼ်ႈၵုင်းထဵပ်ႈ၊ ၼၶွၼ်ႊရၢတ်ႉၶျသီမႃး၊ သူႇၽၼ်းပူႊရီႊ၊ ၶျူၼ်ႊပူႊရီႊလႄႈ ၶွၼ်ၵႅၼ်ႇလႄႈ ၵဵင်းမႂ်ႇ – ၾၢႆႇပၢႆးယူႇလီ မိူင်းထႆး ပိုၼ်ၽၢဝ်ႇဝႆႉၼင်ႇၼႆ။

ၵွပ်ႈၼႆလႄႈ ၼႂ်းပိုၼ်ႉတီႈ ဢၼ်လၢတ်ႈမႃးၸိူဝ်းၼၼ်ႉ ႁႂ်ႈလုမ်းလႃးတူၺ်းထိုင်ပၼ် လုၵ်ႈဢွၼ်ႇလဵၵ်ႉ၊ ၵူၼ်းထဝ်ႈ ဢႃယု 60 ၶိုၼ်ႈၼိူဝ်၊ ၵူၼ်းမီးတၢင်းပဵၼ်ၶၢဝ်းယၢဝ်း၊ မႄႈမၢၼ်း 3 လိူၼ်ၶိုၼ်ႈၼိူဝ် ၸိူဝ်းၼႆႉ လီလီ၊ ၸိူဝ်းၶဝ်ပဵၼ်ၼႂ်းသႅၼ်းၵူၼ်းၸပ်းတၢင်းပဵၼ်ငၢႆႈ – ၾၢႆႇပၢႆးယူႇလီ ပိုၼ်ၽၢဝ်ႇဝႆႉၼင်ႇၼႆ။

သင်ဝႃႈ ၸဝ်ႈၵဝ်ႇ ပဵၼ်မႃးတၢင်းပဵၼ်ၼၢဝ်၊ ၵူၼ်ႉၶိုၼ်ႈ၊ ဢႆ၊ ၶေႃးၸဵပ်း၊ ပဵၼ်ဝတ်း၊ ၼမ်ႉမုၵ်ႈလႆ ၸိူဝ်းၼႆႉ မႃးၸိုင် ႁႂ်ႈၼႅတ်ႈတိုဝ်းၽႃႈတူမ်းသူပ်း၊ ႁႂ်ႈၵူတ်ႇထတ်းတၢင်းပဵၼ်တူၺ်းၵမ်းလဵဝ်လႄႈ ၼႅတ်ႈၵႂႃႇဢဝ်ယႃႈ ယႃတီႈမေႃယႃ မႃးၵမ်းလဵဝ်သေ မႃးၵၵ်းၶင်တူဝ်ၵဝ်ႇဝႆႉၵိုၵ်းႁိူၼ်းတီႈၵေႇသုတ်း 7 ဝၼ်းၼႆ – ၾၢႆႇပၢႆးယူႇလီ တိုၵ်းသူၼ်းဝႆႉၼင်ႇၼႆ။

ၶူဝ်ႊဝိတ်ႉ ဢၼ်ၽႄႈလၢမ်းတိတ်းၸပ်းၵၼ်ယူႇယၢမ်းလဵဝ်ၼႆႉ ပဵၼ်သၢႆၽၼ်းဢၼ်မီးၸိုဝ်ႈဝႃႈ  XBB.1.16 ဢမ်ႇၼၼ်  Arcturus (ဢၢၵ်ႇၶ်ထူးရၢတ်ႉသ်) လႆႈႁူႉၼင်ႇၼႆ။