တႄႇလိူၼ်မေႊ ပီ 2025 ၼၼ်ႉမႃး ၵူၼ်းၼႂ်းမိူင်းထႆးလႄႈ မိူင်းမၢၼ်ႈ ဢွၼ်ၵၼ်တိတ်းၸပ်းတၢင်းပဵၼ် ၶူဝ်ႊဝိတ်ႉ 19 ၸိူဝ်ႉသၢႆၽၼ်းမႂ်ႇ လၢမ်းၽႄႈၸူးၵၼ်မႃးၶိုၼ်း ႁၢဝ်ႈႁႅင်း။
ႁွင်ႈၵၢၼ် ၽွင်းလူင် ၾၢႆႇပၢႆးယူႇလီ တႂ်ႈသိုၵ်းမၢၼ်ႈ ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ် ၼႂ်းႁူဝ်လိူၼ်ၵျုၼ်ႊၼႆႉ ထူပ်းႁၼ်ၵူၼ်းၸပ်းတၢင်းပဵၼ်ၸိူဝ်ႉမႅင်း ၶူဝ်းဝိတ်ႉ 19 ၼႂ်းမိူင်းမၢၼ်ႈ မီးၵႂႃႇ 31 ၵေႃႉ၊ ၵူၼ်းၸိူဝ်းၺႃး ထၢင်ႇထိူမ်ဝႃႈ ၸပ်းတၢင်းပဵၼ်ၼႆၼၼ်ႉသမ်ႉ မီးၵႂႃႇ 2,100 ၵေႃႉပၢႆ ဝႃႈၼႆ။
ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉၼႆႉ ၵမ်ႈၼမ်ပဵၼ်ၵူၼ်းမိူင်း ၸိူဝ်းယူႇသဝ်းၼႂ်းတိူင်းတႃႈၵုင်ႈ။ တႄႇဝၼ်းတီႈ 25/05/2025 တေႃႇထိုင်ဝၼ်းတီႈ 01/06/2025 ၼႆႉ ထူပ်းႁၼ် ၵူၼ်းၸပ်းၸိူဝ်ႉမႅင်း ၶူဝ်ႊဝိတ်ႉ မီး 17 ၵေႃႉ ဝႃႈၼႆ။
ၼႂ်းမိူင်းမၢၼ်ႈထုင်ႉပဵင်းၼႆႉ ၵူၼ်းၸိူဝ်းဢၼ်မၵ်းမၼ်ႈလႆႈဝႃႈ တိတ်းၸပ်းတၢင်းပဵၼ်ၶူဝ်ႊဝိတ်ႉ ၼမ်ၶိုၼ်ႈ မႃး ၵူႈမိုဝ်ႉဝၼ်းသေတႃႉ ႁၢၼ်ႉတေႃႇထိုင်ယၢမ်းလဵဝ် ယင်းပႆႇႁၼ် သိုၵ်းမၢၼ်ႈ ႁၢင်ႈႁႅၼ်း တႃႇသမ်းၶဵမ်ႁႄႉၵင်ႈတၢင်းပဵၼ်ၶူဝ်ႊဝိတ်ႉသင်သေလွင်ႈ ၼႆယဝ်ႉ။
ယၢမ်းလဵဝ် ႁူဝ်ၼပ်ႉၵူၼ်းၸပ်းတၢင်းပဵၼ်ၶူဝ်ႊဝိတ်ႉ မီးၵႂႃႇ 1.44 % ယဝ်ႉလႄႈ ၼင်ႇႁိုဝ် တေႁႄႉၵင်ႈလႆႈ တၢင်းပဵၼ်ၶူဝ်ႊဝိတ်ႉၼၼ်ႉ ထုၵ်ႇလီဝႄႈၵၢၼ်ၸူႉတုမ်ၵၼ်၊ ပေႃးဢွၵ်ႇတၢင်းၼွၵ်ႈ ထုၵ်ႇလီသႂ်ႇၶိုၼ်း ၽႃႈတူမ်းသူပ်း (Mask) ၊ တေလႆႈၵႆႉလၢင်ႉသုၵ်ႈသီပၼ်မိုဝ်း ႁႂ်ႈပေႃးသႅၼ်ႈသႂ်၊ ၵေႃႉၼိုင်ႈလႄႈ ၵေႃႉၼိုင်ႈ ထုၵ်ႇလီယူႇႁၢင်ႇၵႆၵၼ် 6 ထတ်း ၸဵမ်ၸိူဝ်း ၼႆႉ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ