မိူဝ်ႈၼႆႉ ဝၼ်းတီႈ 11/06/2025 ယၢမ်းၵၢင်ၼႂ်မွၵ်ႈ 10 မူင်းပၢႆ ၸုမ်းၵူၼ်းၼုမ်ႇၾၢႆၶုၼ် ပိုၼ်ၽၢဝ်ႇ ဢွၵ်ႇဝႃႈ လွင်ႈသိုၵ်းမၢၼ်ႈတင်း ၸုမ်းပျီႇတူႉၸိတ်ႉပဢူဝ်း PNO ႁေႃႈလိုပ်ႈၵူၼ်းဝၢၼ်ႈ ထုင်ႉၼွင်ထဝ် 6,000 ၵေႃႉ ၼႂ်းၸႄႈဝဵင်းသီႇသႅင်ႇၼႆႉ ပဵၼ်ၵၢၼ်လူလၢႆၵူၼ်းမိူင်းလႄႈ ပူၼ်ႉပႅၼ်သုၼ်ႇလႆႈသုၼ်ႇပဵၼ်ၵူၼ်း၊ ပဵၼ်ပိူင် ၾၢင်ႁၢင်ႈၵေႃႇၵၢၼ်ႁၢႆႉ ၼႆယဝ်ႉ။

ၼႂ်းထုင်ႉၼွင်ထဝ်ၼႆႉ မီးဝၢၼ်ႈတႆးလႄႈ ဝၢၼ်ႈၸၢဝ်းပဢူဝ်းယူႇသဝ်းဝႆႉသေ ပဵၼ်ၶၢဝ်းၽုၵ်ႇသွမ်ႈလႄႈ ၵူၼ်းမိူင်းႁူပ်ႉတၢင်းယၢပ်ႇၽိုတ်ႉ ၵၢၼ်ႁႃၵိၼ်လဵင်ႉတွင်ႉ ယွၼ်ႉၺႃးတဵၵ်း ၶၢႆႉဢွၵ်ႇဝၢၼ်ႈသေ ၵူၼ်းမိူင်း တုၵ်ႉၸႂ် ပဵၼ်ၼမ်ႉႁူၼမ်ႉတႃၵၼ်ယူႇၼႆ ၸုမ်းၵူၼ်းၼုမ်ႇၾၢႆၶုၼ် လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“မိူဝ်ႈလဵဝ် သဵင်ၵွင်ႈပႆႇတႅၵ်ႈသေတႃႉ ၾၢႆႇၸုမ်းသိုၵ်းလုၵ်ႉၽိုၼ်ႉၶဝ် ထူဝ်းသိုၵ်းၶဝ်ႈမႃးလႄႈ ၾၢႆႇသိုၵ်း မၢၼ်ႈတင်း ပျီႇတူႉၸိတ်ႉပဢူဝ်းၵေႃႈ တဵၵ်းတဵင်ၵူၼ်းမိူင်း ဢဝ်ၵူၼ်းမိူင်းပဵၼ် ႁူဝ်တမ်ႇတိူင်းသိုၵ်းဝႆႉ။ ၵူၼ်းမိူင်းၵိၼ်းၶၢၼ်ၸႂ်ၼႃႇတႄႉၶႃႈ။ မိူဝ်ႈလဵဝ် တင်းသွင်ၾၢႆႇၶဵင်ႈၶႅင်ၵၼ်ဝႆႉယူႇ။ တူၺ်းငဝ်းလၢႆးမၼ်းတႄႉ ဢမ်ႇႁိုင်သင်ၼႆႉၵူၺ်း သဵင်ၵွင်ႈတေၸၢင်ႈတႅၵ်ႇထႅင်ႈယူႇ”

လႆႈႁူႉဝႃႈ တႄႇပီ 2022 လိူၼ်ၵျုၼ်ႊမႃး ၾၢႆႇသိုၵ်းယၢင်းလႅင် လၢမ်းၶဝ်ႈထိုင် ၼႂ်းမိူင်းတႆးပွတ်းၸၢၼ်းသေ ပဵၼ်ပၢင်တိုၵ်းၵၼ်တင်း သိုၵ်းမၢၼ်ႈလႄႈ ၸုမ်းပျီႇတူႉၸိတ်ႉပဢူဝ်း။ ႁၢၼ်ႉတေႃႇထိုင်ယၢမ်းလဵဝ် ၵူၼ်းမိူင်းၼႂ်းၸႄႈဝဵင်းၾၢႆၶုၼ်၊ ပၢင်လွင်း၊ သီႇသႅင်ႇ၊ ယွင်ႁူၺ်ႈၸိူဝ်းၼႆႉ တိုၵ်ႉလႆႈၶၢမ်ႇတၢမ်ႇ ၽေးပၢင်တိုၵ်းသေ မၢင်ၸိူဝ်းလႆႈပၢႆႈဢွၵ်ႇဝၢၼ်ႈ ၸဵမ်ၸိူဝ်းၼႆႉ။

တႄႇဢဝ် ဝၼ်းတီႈ 02-30/05/2025 ၼၼ်ႉၵေႃႈ သိုၵ်းမၢၼ်ႈတင်း ပျီႇတူႉၸိတ်ႉပဢူဝ်း ၸႂ်ႉတိုဝ်းမၢၵ်ႇလူင်သေ ပွႆႇသႂ်ႇၸွမ်း ၼႂ်းဝၢၼ်ႈၵူၼ်းမိူင်း၊ ဢဝ်ၾႆးၽဝ်ႁိူၼ်းၵူၼ်းမိူင်း ၼႂ်း ၸႄႈဝဵင်းပၢင်လွင်း၊ ၸႄႈဝဵင်းယွင်ႁူၺ်ႈ လူႉၵွႆၵႂႃႇတႃႇ 31 လင်။ လိူဝ်ၼၼ်ႉ သိုၵ်းမၢၼ်ႈ ပွႆႇမၢၵ်ႇလူင်သႂ်ႇဝတ်ႉၵျွင်းလိၼ်ပူၵ်ႇတႅၵ်ႇ ဢိူင်ႇလိၼ်လမ်ၸၢၼ်း လူႉၵွႆၵႂႃႇ လင်ၼိုင်ႈ။

မိူၼ်ၼင်ႇ ႁိူၼ်းဝၢၼ်ႈၵူၼ်းမိူင်း တၢင်းဝၢၼ်ႈသွင်းပျွင်း ၸႄႈဝဵင်းမိူင်းပၢႆးၼၼ်ႉၵေႃႈ ၺႃးသိုၵ်းမၢၼ်ႈ ဢဝ်ၾႆးၽဝ်ၵႂႃႇ ဢမ်ႇယွမ်း 6 လင်ၼႆ ၸုမ်းၵူၼ်းၼုမ်ႇၾၢႆၶုၼ်ၶဝ် ၵဵပ်းသဵၼ်ႈမၢႆသေ ႁၢႆးငၢၼ်းဝႆႉၼင်ႇၼႆ။

တႅမ်ႈ – ၽူၺ်းၼုမ်ႇ