ဝၼ်းတီႈ 10/06/2025 ၼႆႉ ၾၢႆႇလူင်ပွင်ၸိုင်ႈၽွမ်ႉႁူမ်ႈၸိူဝ်ႉၸၢတ်ႈ (NUG)  တူၵ်ႇတၵ်ႉလၢတ်ႈၵႂႃႇ ၼႂ်းပၢင်ဢုပ်ႇၶႆႈလွင်ႈၵူၼ်းမိူင်းလႄႈ ၶေႃႈၵႂၢမ်းၾၢၵ်ႇထိုင်မိူင်းၼွၵ်ႈၼၼ်ႉဝႃႈ ႁၢင်ႈႁႅၼ်းဝႆႉ တႃႇၵေႃႇသၢင်ႈ ႁူင်းယႃတႂ်ႈလိၼ် ဢၼ်ၶၢမ်ႇလႆႈတၢမ်ႇမၢၵ်ႇလူင် ၼႂ်းၼႃႈတီႈၶဝ်ၵုမ်းၵမ်ယူႇၼၼ်ႉ တႃႇ 8 လင် ၼႂ်းၼၼ်ႉ တႃႇသွင်လင် ပဵၼ်ၽွင်းတိုၵ်ႉၵေႃႇသၢင်ႈဝႆႉ ဝႃႈၼႆ။

ဝၢႆးလင် သိုၵ်းမၢၼ်ႈယိုတ်းသိမ်းဢႃႇၼႃႇၸိုင်ႈမိူင်းမႃး ၾၢႆႇသိုၵ်းမၢၼ်ႈ ယိူင်းၸူးႁူင်းႁဵၼ်း၊ ႁူင်းယႃ၊ ႁွင်ႈ ယႃ ၸိူဝ်းၼႆႉသေ ၸႂ်ႉတိုဝ်းမၢၵ်ႇလူင်ပွႆႇသႂ်ႇ ၼႂ်းၼႃႈတီႈသိုၵ်းၸၢဝ်းၶိူဝ်းၵုမ်းၵမ်ဝႆႉလႄႈ ႁဵတ်းႁႂ်ႈၵူၼ်းမိူင်း ၸိူဝ်းယူႇၼႂ်းပိုၼ်ႉတီႈၼၼ်ႉ ယၢပ်ႇၽိုတ်ႇ လွင်ႈယူတ်းယႃတူဝ် တႃႇပၢႆးယူႇလီ ၸဝ်ႈၵဝ်ႇ။

ဢူးၼေႇၾူင်းလုၼ်ႇ ၽူႈၶၢၼ်ပၢၵ်ႇ လုမ်းၽွင်းတၢင် NUG တွပ်ႇလၢတ်ႈၵႂႃႇတီႈသိုဝ်ႇၶၢဝ်ႇဝႃႈ -“ၼင်ႇႁိုဝ် လုၵ်ႈဢွၼ်ႇၸိူဝ်းယူႇၼႂ်းၼႃႈတီႈသိုၵ်းၸၢဝ်းၶိူဝ်းၵုမ်းၵမ် ပေႃးတေဢမ်ႇလုတ်ႈႁၢမ်းသုၼ်ႇလႆႈ သွၼ်လိၵ်ႈလၢႆးၼၼ်ႉ လူဝ်ႇလႆႈမီးဢွင်ႈပႅပ်ႉယူႇ ႁႂ်ႈပေႃးၶၢမ်ႇလႆႈ ႁႅင်းမၢၵ်ႇဢၼ်သိုၵ်းမၢၼ်ႈတေဢဝ်မႃးပွႆႇၼၼ်ႉ ၵူၺ်းဢမ်ႇၵႃး တေလႆႈမီးပႃး ၶိူင်ႈပၼ်ၾၢင်ႉၶိုတ်းတၼ်း ၽွင်းသိုၵ်းမၢၼ်ႈ တေဢဝ်မၢၵ်ႇမႃးပွႆႇသႂ်ႇၼၼ်ႉယူႇ။ တွၼ်ႈတႃႇၵူၼ်းမိူင်း တေမီးတီႈယူတ်းယႃတူဝ်လႆႈ ႁႂ်ႈပေႃးမီးလွင်ႈႁူမ်ႇလူမ်ႈၼၼ်ႉၵေႃႈ ၾၢႆႇ NUG တေၶတ်း ၸႂ်ၵႂႃႇ”- ဝႃႈၼႆ။

မိူဝ်ႈဝၼ်းတီႈ 25 လိူၼ်မေႊၼၼ်ႉၵေႃႈ လူင်ပွင်ၸိုင်ႈၽွမ်ႉႁူမ်ႈၸိူဝ်ႉၸၢတ်ႈ (NUG) ပိုၼ်ၽၢဝ်ႇဝႆႉ ႁႂ်ႈႁူင်း ႁဵၼ်း ၸိူဝ်းယူႇတႂ်ႈႁူမ်ႇငမ်း NUG  ၵိုတ်းယင်ႉဝႆႉၸူဝ်ႈၶၢဝ်း တင်းသဵင်ႈ ၼႆယဝ်ႉ။

တႄႇၵၢင်လိူၼ်မေႊမႃး သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်းသေ ယိူင်းပွႆႇမၢၵ်ႇသႂ်ႇ ၸွမ်းႁူင်းႁဵၼ်း ၼႂ်းၼႃႈတီႈ သိုၵ်းၸၢဝ်းၶိူဝ်း ၵုမ်းၵမ် ၼႂ်းမိူင်းမၢၼ်ႈထုင်ႉပဵင်း။ မီးလုၵ်ႈႁဵၼ်းလႄႈ မေႃသွၼ် လူႉတၢႆၵႂႃႇၸွမ်း 24 ၵေႃႉ မၢတ်ႇၸဵပ်းၵႂႃႇ 100 ၵေႃႉပၢႆ။

ၸုမ်းၶူၼ်ႉၶႂႃႉ ၺၢၼ်ႇလိၼ်းတိတ်ႉၵေႃႈ ဢွၵ်ႇၽိုၼ်လိၵ်ႈႁၢႆးငၢၼ်းၵႂႃႇ မိူဝ်ႈဝၼ်းတီႈ 8 လိူၼ်ၵျုၼ်ႊ ၼႆႉဝႃႈ – တႄႇဢဝ် ဝၼ်းတီႈ 30/05/2025 တေႃႇထိုင် ဝၼ်းတီႈ 05/06/2025 ၶၢဝ်းတၢင်းၼိုင်ႈဝူင်ႈၵူၺ်း သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်းသေ ပွႆႇမၢၵ်ႇသႂ်ႇ ၼႂ်းတိူင်းဝဵင်းလိူဝ်ႇလႄႈ တိူင်းၸႄႈၵႅင်း ၸိူဝ်းၼႆႉ ဢေႇသုတ်း မီးယူႇ 10 ပွၵ်ႈ၊ ၵူၼ်းမိူင်းမၢတ်ႇၸဵပ်းၵႂႃႇ 9 ၵေႃႉ၊ တၢႆၵႂႃႇ 5 ၵေႃႉ ဝႃႈၼႆ။

တႅမ်ႈ – ၽူၺ်းၼုမ်ႇ