လႅၼ်လိၼ်တႆး – ထႆး တီႈဝဵင်းတႃႈၶီႈလဵၵ်းၼႆႉ လွင်ႈၽူႈလၵ်ႉၸၵ်ႉၶုတ်ႈ ၶႃႈႁႅမ်ၵၼ် လိူင်ႇၼမ်မႃးၶိုၼ်း ၵူႈဝၼ်းလႄႈ ၸွမ်းသဵၼ်ႈတႃႈသၢႆတၢင်း ၾၢႆႇၼွၵ်ႈဝဵင်းၸိူဝ်းၼႆႉၵေႃႈ ၵႆႉမီးလွင်ႈပိုတ်းယိုဝ်းၶႃႈႁႅမ်ၵၼ် ၼႆယဝ်ႉ။

ဝၼ်းတီႈ 06/06/2025 ပူၼ်ႉမႃးၼႆႉ ၼႂ်းၵႄႈဝၢၼ်ႈႁူၺ်ႈလူႉ(ဟွေလု) လႄႈ ဝၢၼ်ႈၽၵ်းႁီႉ တီႈၵူၼ်းၵႂႃႇ မႃးႁၢင်ႇတီႈၼိုင်ႈ ၼႂ်းၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၼႆႉ ထူပ်းႁၼ်တူဝ်တၢႆ ၼၢင်းယိင်း ၵေႃႉ ၼိုင်ႈ ၺႃးယိုတ်းတၢႆ ၵိုၵ်းၵႃး ၼႆယဝ်ႉ။

ၵူၼ်းမိူင်းပိုၼ်ႉတီႈ ဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်ၶဝ်ႁႅမ်ၵၼ်ၼႆႉ တေပဵၼ်တီႈႁိမ်း ဝၢၼ်ႈဢႃးၶႃႇ ပဵၼ်သဵၼ်ႈတၢင်းလတ်း မႃးပွင်ႇတၢင်းမိူင်းၽူင်းသေ ၶဝ်ႈမႃးတီႈတႃႈၶီႈလဵၵ်းၼႆႉ လႆႈႁူႉဝႃႈ ၶဝ်ဢဝ်ၵွင်ႈယၢဝ်းသေယိုဝ်းၼႆဢေႃႈ။ တေပဵၼ်လွင်ႈၵႃႉၶၢႆႁိုဝ် လွင်ႈၼီႈလွင်ႈၶွတ်ႇႁိုဝ်ၼႆတႄႉ ဢမ်ႇပႆႇႁူႉ တႅတ်ႈတေႃးၶႃႈ”- ဝႃႈၼႆ။

ၼၢင်းယိင်းၵေႃႉဢၼ် ထုၵ်ႇၶႃႈႁႅမ်တၢႆၼႆႉ ဢႃယု တေမီးမွၵ်ႈ 30 ပီ ပဵၼ်ၵူၼ်းဝၢၼ်ႈဝေႇလေႇလၼ်ႇ ဢိူင်ႇမိူင်းၽူင်း။ ၵူၺ်းၵႃႈ လွင်ႈတၢင်းဢၼ်ထုၵ်ႇၶႃႈႁႅမ်တၢႆၼႆႉ ပဵၼ်ယွၼ်ႉသင် ဢမ်ႇလႆႈႁူႉၼႆသေတႃႉ လႆႈ ႁၼ်ဝႆႉၶွပ်ႇမၢၵ်ႇၵွင်ႈ ဢၼ်ၵိုတ်းဝႆႉတႄႉ ပဵၼ်သႅၼ်းၵွင်ႈၵၢင်ႇ AK-47 သေ ထုၵ်ႇပိုတ်းယိုဝ်း ဢမ်ႇယွမ်း 10 ၵမ်း ၼႆယဝ်ႉ။

မိူၼ်ၼၼ်ၼင်ႇၵဝ်ႇ ၼႂ်းႁၢင်လိူၼ်မေႊ ပီ2025 ၼႆႉၵေႃႈ တီႈပွၵ်ႉသၢၼ်သၢႆးလိုဝ်ႉ ဝဵင်းတႃႈၶီႈလဵၵ်း မီး ၵူၼ်းၸၢႆးၵေႃႉၼိုင်ႈ ထုၵ်ႇၵူၼ်းႁၢႆႉဢဝ်ၵွင်ႈယိုဝ်းလၢႆၵမ်း ထိုင်တီႈလႆႈလူႉတၢႆထင်တီႈ။

ဝၢႆးသိုၵ်းမၢၼ်ႈယိုတ်းမိူင်းမႃးၼႆႉ တီႈဝဵင်းတႃႈၶီႈလဵၵ်း ၵႆႉမီးလွင်ႈပိုတ်းယိုဝ်း ၶႃႈႁႅမ် ၸူၼ်ၵၼ် ၸိူဝ်းၼႆႉ ၵူၺ်းဢမ်ႇၵႃး ဢၼ်တီႉၺွပ်းႁဵတ်းပဵၼ်တူဝ်ယိူဝ်ႇၸိူဝ်းၼၼ်ႉၵေႃႈ မီးထႅင်ႈတင်းၼမ်။ လွင်ႈၵႃႉၶၢႆယႃႈ မဝ်းၵမ်လႄႈ ၵၢၼ်လႅၼ်ၵိၼ်ငိုၼ်း ၵျႃးၽႅၼ်ႉၵေႃႈ လိူင်ႇၼမ်။

ယဝ်ႉၵေႃႈ တီႈဝဵင်းတႃႈၶီႈလဵၵ်းၼႆႉ ပဵၼ်ပိုၼ်ႉတီႈ ၵူၼ်းမိူင်းလၢၵ်ႇလၢႆ မႃးႁဵတ်းၵၢၼ်ႁႃၵိၼ်လဵင်ႉတွင်ႉ ၵူၺ်းဢမ်ႇၵႃး ၵၢၼ်ၵႃႉၶၢႆ ဢၼ်ဢမ်ႇထုၵ်ႇမႅၼ်ႈၸွမ်းပၵ်းပိူင်ၸိူဝ်းၼႆႉၵေႃႈ လိူင်ႇၽႄႈၼမ် – ၽူႈလဵပ်ႈ ႁဵၼ်းၵၢၼ်မိူင်းၶဝ် ထတ်းသၢင်ဝႆႉၼင်ႇၼႆ။