ၵူၼ်းမိူင်းၼႂ်းၸႄႈဝဵင်းၼွင်ၶဵဝ် ၸိူဝ်းပၢႆႈၽေးပၢင်တိုၵ်းၵႂႃႇသေႃႉယူႇ ၼႂ်းၸႄႈဝဵင်းၵျွၵ်ႉမႄး ႁႅင်းၵူၼ်း 1,000 ပၢႆၼၼ်ႉ ၵိုင်ႉၵၢင်ႉလူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်းၵိၼ် ၼႂ်းငဝ်းလၢႆးၶိုၵ်ႉၶၵ်ႉ ၸိူင်ႉၼႆ ဝႃႈၼႆ။
တႄႇႁၢင်လိူၼ်ဢေႊပရိူဝ်ႊမႃး သိုၵ်းမၢၼ်ႈ ၸႂ်ႉႁႅင်းၵူၼ်းသိုၵ်းလႄႈ ၶိူင်ႈတရူၼ်ႊ ပွႆႇမၢၵ်ႇလေႃႇတိုၵ်း သႂ်ႇသိုၵ်းတဢၢင်း (TNLA) တင်း ၸုမ်းဢူၺ်းလီၶဝ်သေ ၵူၼ်းမိူင်းၸိူဝ်းယူႇၼႂ်းဝၢၼ်ႈသူၺ်ႇမုတရေႃး၊ မႆႉပူၵ်ႇ၊ ၼွင်လႅင်၊ ၼႃးသဵဝ်ႈ၊ ၽႃသူၼ်း၊ ၵၢၼ်ႇၵျီး ၾၢႆႇဢွၵ်ႇႁူၺ်ႈၵုတ်ႈ ၸႄႈဝဵင်းၼွင်ၶဵဝ် ၸင်ႇလႆႈပၢႆႈဢွၵ်ႇၵႂႃႇ သေႃႉယူႇတီႈ ၼႂ်းၸႄႈဝဵင်းၵျွၵ်ႉမႄး။
ယၢမ်းလဵဝ် ၵူၼ်းဝၢၼ်ႈၸိူဝ်းလႆႈပၢႆႈၽေးပၢင်တိုၵ်းယူႇ မွၵ်ႈ 700 ၵေႃႉၼႆႉ လႆႈၵႂႃႇသေႃႉယူႇဝႆႉ တီႈၼႂ်းဝၢင်း ႁူင်းႁဵၼ်းၸၼ်ႉသုင် ၼႂ်းထုင်ႉၼွင်ပိင် ၸႄႈဝဵင်းၵျွၵ်ႉမႄးၼႆႉ လူဝ်ႇတၢင်းၵမ်ႉၸွႆႈ ၶဝ်ႈၼမ်ႉ တၢင်းၵိၼ် ႁၢဝ်ႈႁႅင်းယူႇၵူၺ်းဢမ်ႇၵႃး ၵူၼ်းဝၢၼ်ႈလုၵ်းပႃ၊ ၵုင်းၺွင်ႇ ၸိူဝ်းၼၼ်ႉၵေႃႈ လႆႈပၢႆႈၵႂႃႇယူႇဝႆႉ တီႈၵျွင်းမုၼ် ၸဝ်ႈ ဝႃႈၼႆ။
ၵူၼ်းမိူင်းၼႂ်းပိုၼ်ႉတီႈ ၸႄႈဝဵင်းၼွင်ၶဵဝ် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“ၵူၼ်းၸိူဝ်း ႁွတ်ႈဝႆႉတီႈ ၵျွင်းသွၼ်လိၵ်ႈ တီႈၼွင်ပိင်ၼႆႉ မီးယူႇမွၵ်ႈ 650 ၵေႃႉ။ ၵမ်ႈၼမ် ပဵၼ်ၵူၼ်းၾၢႆႇဢွၵ်ႇႁူၺ်ႈၵုတ်ႈ။ ပဵၼ် ၵူၼ်းဝၢၼ်ႈၸၢဝ်းထၼုၶဝ်။ တၢင်းဝၢၼ်ႈတွင်းၶမ်းၼႆႉ ပဵၼ်ပၢင်တိုၵ်းၵၼ်မႃး ၶႂ်ႈမီးပဵၼ်ၶၢဝ်းတၢင်းၼိုင်ႈ ပီယဝ်ႉ။ ၵမ်ႈၼမ် ဢမ်ႇၸၢင်ႈပၢႆႈဢွၵ်ႇၵမ်းလဵဝ်။ ဢၼ်လူဝ်ႇယူႇမိူဝ်ႈလဵဝ်ၼႆႉ ပဵၼ်တႃႇၵိၼ်တႃႇယႅမ်ႉ ၼၼ်ႉယဝ်ႉၶႃႈ”- ဝႃႈၼႆ။
ၵူၼ်းၸိူဝ်းပၢႆႈၽေးမႃးၼႆႉ ၵမ်ႈၼမ်ပဵၼ်ၼၢင်းယိင်း၊ လုၵ်ႈဢွၼ်ႇ၊ ၵူၼ်းထဝ်ႈၵူၼ်းၵႄႇၸိူဝ်းၼႆႉ။ ၾၢႆႇ ၼိုင်ႈၵေႃႈ ပဵၼ်ၶၢဝ်းၾူၼ်ဝႆႉလႄႈ လူဝ်ႇတၢင်းၵမ်ႉၸွႆႈ သုတ်းတႃႇၵင်မိူဝ်ႈၼွၼ်း ဢိၵ်ႇပႃး ၽႃႈႁူမ်ႇ ၶူဝ်းၼွၼ်း ၸဵမ်ၸိူဝ်းၼႆႉၼႆ ၵူၼ်းမိူင်း ၼႂ်းၸႄႈဝဵင်းၵျွၵ်ႉမႄး ၵေႃႉၼိုင်ႈ လၢတ်ႈၼႄၼင်ႇၼႆ။
“ၶဝ်လႆႈၵိုင်ႉၵၢင်ႉပၢႆႈဢွၵ်ႇမႃးလႄႈ ဢမ်ႇတၼ်းလႆႈသင်။ မၢင်ၸိူဝ်းလႆႈဢဝ်ထေႃႈလႃႈၵျီႈၵႂႃႇၵိုတ်းဝႆႉ ၼႂ်းဝၢင်းၵျွင်းမုၼ်ၸဝ်ႈယဝ်ႉ ဢဝ်ၽႃႈယၢင်မုင်း ယႃႇႁႂ်ႈၾူၼ်ႁူဝ်ႈႁႄ ၼွၼ်း ၵႂႃႇၼိူဝ်ထေႃႈၸိူင်ႉ ၼၼ်ၵူၺ်း”။
မိူဝ်ႈပူၼ်ႉမႃး ဝၼ်းတီႈ 29/05/2025 ၼၼ်ႉၵေႃႈ ၾၢႆႇသိုၵ်းမၢၼ်ႈႁႅၼ်းသိုၵ်းလေႃႇတိုၵ်းၶိုၼ်း သိုၵ်းတ ဢၢင်းသေ ၾၢႆႇသိုၵ်းမၢၼ်ႈ တီႉၺွပ်းဢဝ် ၵူၼ်းဝၢၼ်ႈၵႂႃႇ တႃႇ 40 ၵေႃႉ။ ႁၢၼ်ႉတေႃႇထိုင် ယၢမ်းလဵဝ်ၵေႃႈ ယင်းပႆႇလႆႈႁူႉၶၢဝ်ႇငၢဝ်းသင်ၸွမ်း။ ၵူၼ်းၸိူဝ်းၺႃးတီႉၺွပ်းၵႂႃႇၼၼ်ႉ ပဵၼ်ၵူၼ်းၸၢႆးၼုမ်ႇ၊ ယိင်းၼုမ်ႇလၢႆလၢႆ ဝႃႈၼႆ။
လႆႈႁူႉဝႃႈ ယၢမ်းလဵဝ် သိုၵ်းမၢၼ်ႈၼႆႉ ႁွတ်ႈၽႅဝ်ဝႆႉႁိမ်းဝဵင်းယၢၼ်ၵႆၵၼ်တင်း ဝဵင်းၼွင်ၶဵဝ် မွၵ်ႈ 10 လၵ်းၵူၺ်း။ ႁွတ်ႈထိုင်ဝႆႉတီႈဝၢၼ်ႈမၢၵ်ႇဢူဝ်းၸဵမ်း (ရှောက်ချို) ယဝ်ႉသေ ၾၢႆႇသိုၵ်းတဢၢင်း လႆႈထွႆ ပၼ်ၶိုၼ်းတီႈ ဝၢၼ်ႈသူၺ်ႇမုတရေႃး၊ ၼွင်လႅင်လႄႈ မႆႉပူၵ်ႇ ၸိူဝ်းၼႆႉ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ