သိုၵ်းမၢၼ်ႈ ယိုတ်းမိူင်း ၸႂ်ႉၶိူင်ႈၸၢၵ်ႈ PSMS သေ ၵူတ်ႇထတ်းၵူၼ်းၸိူဝ်းႁဵတ်း CDM လႄႈ ၵူၼ်းၸိူဝ်း ၺႃးမၢႆမီႈမတ်ႉတႃ 505 (က) ၸိူဝ်းၼႆႉႁၢဝ်ႈႁႅင်း ၼႂ်းမိူင်းတႆးလၢႆလၢႆတီႈ။
ဝၢႆးသေ သိုၵ်းမၢၼ်ႈ ဢွၵ်ႇသဵၼ်ႈၸိုဝ်ႈ ၵူၼ်းၸိူဝ်းသၢၼ်ၶတ်းၶဝ်ယဝ်ႉၼၼ်ႉ ၵူၼ်းမိူင်းဢၼ်ႁဵတ်း CDM ၸိူဝ်းၼၼ်ႉ ၺႃးတီႉၺွပ်းၵုမ်းတူဝ်ဝႆႉတင်းၼမ်။ မိူၼ်ၼင်ႇ တီႈၵဵတ်ႉလၢၼ်ႇ သိုၵ်းမၢၼ်ႈ ဢၼ်တင်ႈဝႆႉ ၼႂ်းၵႄႈဝဵင်းပၢင်လူင် – မိူင်းၼွင်လႄႈ တီႈၶူဝ်တႃႈၵေႃႈ ၸိူဝ်းၼႆႉ ၶဝ်ၵူတ်ႇထတ်းမၢႆၾၢင် ၵူၼ်းဢွၵ်ႇၶၢဝ်း တၢင်းႁၢဝ်ႈႁႅင်း ႁဵတ်းႁႂ်ႈၵူၼ်းမိူင်းထူပ်းတၢင်းယၢပ်ႇၽိုတ်ႇ။
ၵူၼ်းဢွၵ်ႇတၢင်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၵဵတ်ႉသိုၵ်းမၢၼ်ႈ ဢၼ်တင်ႈယူႇတီႈၼႃႈၸၼ်ႉ ၸွမ်ပၢင်လူင်ၼၼ်ႉ ၶဝ်ထတ်းမၢႆၾၢင် ၵူၼ်းဢွၵ်ႇတၢင်းႁၢဝ်ႈႁႅင်း။ ပိူင်လူင် ၶဝ်ၵူတ်ႇထတ်း ၵူၼ်းႁဵတ်း CDM လႄႈ ၵူၼ်းၸိူဝ်းၺႃးမတ်ႉတႃ (505) ၸိူဝ်းၼႆႉ။ ဢမ်ႇဝႃႈ လုၵ်ႈဢွၼ်ႇၵူၼ်းလူင် ပေႃးမီးမၢႆၾၢင် ၵေႃႈ ၶဝ်ဢဝ်ၵႂႃႇသႂ်ႇၼႂ်းၸၢၵ်ႈသေ ၵူတ်ႇထတ်းတူၺ်း တေႁိုင်မွၵ်ႈ 1 ၸူဝ်ႈမူင်းၼႆႉဢေႃႈ”- ဝႃႈၼႆ။
ၵူၺ်းၵႃႈ ပေႃးပဵၼ်ၵူၼ်းၸၢဝ်းၶႄႇသမ်ႉ ပလိၵ်ႈသိုၵ်းမၢၼ်ႈၶဝ် တေယွၼ်းငိုၼ်း တေႃႇၵေႃႉလႂ် 4 – 5 မိုၼ်ႇ ပျႃးသေ ပွႆႇတူဝ်ၵႂႃႇ ဝႃႈၼႆ။
“ၸၢဝ်းၶႄႇ ဢၼ်ယူႇတၢင်းၼႃႈႁဝ်းၼၼ်ႉ ႁၼ်ၶဝ်ၵဵပ်းငိုၼ်း ၼိုင်ႈၵေႃႉလႂ် 4 မိုၼ်ႇပျႃးထိုင် 5 မိုၼ်ႇပျႃး ဢၼ်ၼႆႉ ႁၼ်သိုဝ်ႈၼႃႈတၼ်းတႃ ၵမ်းလဵဝ်ယဝ်ႉ။ ပေႃးပဵၼ်ၸၢဝ်းၶိူဝ်းၼႂ်းမိူင်းတႄႉ ဢမ်ႇလႆႈ ၶဝ်ၵူတ်ႇ ထတ်းၸႅတ်ႈထၢမ်ႁၢဝ်ႈႁႅင်းၼႃႇ”- ၵူၼ်းဢွၵ်ႇတၢင်း ၵေႃႉၼိုင်ႈ သိုပ်ႇလၢတ်ႈၼႄၼင်ႇၼႆ။
မိူဝ်ႈႁၢင်လိူၼ်မေႊၼၼ်ႉၵေႃႈ လုၵ်ႈႁဵၼ်းၸၼ်ႉၸွမ်ပၢႆးၸၢၵ်ႈ ၵေႃႉၼိုင်ႈ ၺႃးသိုၵ်းမၢၼ်ႈ မၢပ်ႇၼႄးဝႃႈ မၼ်းၼၢင်း ပဵၼ်ၵူၼ်းဢၼ်ၺႃးၸွႆးတြႃးဝႆႉ မတ်ႉတႃ (505) ၼႆသေ သိုၵ်းမၢၼ်ႈၶဝ် တီႉၺွပ်းၵုမ်း တူဝ် မၼ်းၼၢင်းၵႂႃႇ ၼႂ်းၵႄႈသဵၼ်ႈတၢင်းလူင်ၼမ်ႉၸၢင် – တူၼ်ႈတီး။
ၼႂ်းလိူၼ်မေႊၼၼ်ႉၵူၺ်း ၼင်ႇၵဝ်ႇ မေႃယႃယိင်းၵေႃႉၼိုင်ႈ ဢၼ်ႁဵတ်း CDM ဝႆႉ ၼႂ်းမိူင်းတႆးပွတ်းႁွင်ႇ ၼၼ်ႉၵေႃႈ ဢွၵ်ႇၶၢဝ်းတၢင်း တေၵႂႃႇတၢင်းမိူင်းတႆးပွတ်းဢွၵ်ႇၼႆသေ ၺႃးသိုၵ်းမၢၼ်ႈ တီႉၺွပ်းၵုမ်းတူဝ်လႆႈ တီႈၶူဝ်တႃႈၵေႃႈ (ၶူဝ်ၼမ်ႉၶူင်း) ။
လိူဝ်သေၼၼ်ႉ လႆႈၶၢဝ်ႇဝႃႈ ၾၢႆႇသိုၵ်းမၢၼ်ႈ လႆႈဢဝ်ၸိုဝ်ႈ ၵူၼ်းၸိူဝ်းႁဵတ်း CDM ၊ ၵူၼ်းၸိူဝ်း ၺႃးမၢႆႁူဝ် (Blacklist) လႄႈ ၵူၼ်းၸိူဝ်းၺႃးဢဝ်လိူင်ႈ လူၺ်ႈမတ်ႉတႃ 505 (က) ၸိူဝ်းၼၼ်ႉ သႂ်ႇၼႂ်းၶိူင်ႈၸၢၵ်ႈ PSMS ၶဝ် ဢမ်ႇယွမ်း 5 မိုၼ်ႇၵေႃႉယဝ်ႉ ဝႃႈၼႆ။
တႅမ်ႈ – ၸၢႆးႁၢၼ်မၢဝ်း
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ