ပၢင်ၵုမ် ၸိၵ်းၸွမ် ASEAN ပွၵ်ႈၵမ်း 46 ပိုၼ်ၽၢဝ်ႇဢွၵ်ႇမႃး လွင်ႈတၢင်းၵဵဝ်ႇၵပ်းတင်းပၼ်ႁႃမိူင်း မၢၼ်ႈ 9 ၶေႃႈ။

ယူႇတီႈ ၸုမ်းသိုၵ်းမၢၼ်ႈ တင်းၾၢႆႇလုၵ်ႉၽိုၼ်ႉ ႁႂ်ႈသိုပ်ႇတေႃႇၶၢဝ်းယၢမ်း ၵိုတ်းတိုၵ်းၵၼ်ထႅင်ႈသေ ASEAN ၵေႃႈ တေတေႃႇဢႃယုပုၼ်ႈၽွၼ်း ၶွင်တူဝ်တႅၼ်း ASEAN ႁႂ်ႈယၢဝ်းထိုင်သၢမ်ပီ ၸဵမ်ၸိူဝ်း ၼႆႉ တေပဵၼ်လွင်ႈတၢင်းဢၼ်မႂ်ႇသေ လိူဝ်ၼႆႉသမ်ႉ ပဵၼ်ဢၼ်လိုမ်ႉၶိုၼ်း ၶေႃႈႁူမ်ႈတူၵ်းလူင်း 5 ၶေႃႈ ဢၼ်မိၼ်းဢွင်ႇလႅင်ႇ လူင်းလၢႆးၸွမ်းသေ ပႆႇပႃႈႁဵတ်းပဵၼ်ၼမ်ႉပဵၼ်တူဝ်သေၶူတ်း ၼၼ်ႉယဝ်ႉ။

ႁႂ်ႈၵိုတ်းပႅတ်ႈ လိူင်ႈပိုတ်းယိုဝ်းႁဵတ်းႁၢႆႉတီႈၵၼ်ဝႃႇ၊ ႁႂ်ႈႁႃလၢႆးၵၢၼ်ႁပ်ႉတၢင်းၸွႆႈ ဢၼ်ၵူၼ်းၼင်ႇၵၼ် တူၺ်းထိုင်ၵၼ် တႃႇၽႄႈထိုင်တီႈၵူၼ်းမိူင်း ၸိူဝ်းလႆႈပဵၼ်ယိူဝ်ႇသိုၵ်းဝႃႇ၊ ႁႂ်ႈႁႃလၢႆးႁူပ်ႉထူပ်း ဢုပ်ႇ ဢူဝ်းၵၼ် ၵူႈပႃႈၾၢႆႇဝႃႇၸိူဝ်းၼႆ ၼႂ်းၶၢဝ်းတၢင်းသီႇပီမိူင်းဢမ်ႇႁၼ် ၽုတ်းမီးပဵၼ်ၵၢၼ်မႃးလႃးလႃး ၼႆႉ မိူၼ်တင်းပၼ်ၾၢင်ႉဝႃႈ လူဝ်ႇလႆႈပိၼ်ႇလႅၵ်ႈလၢႆးၵၢၼ်မၼ်းယဝ်ႉ။

ထႃႈဝႃႈ မိၼ်းဢွင်ႇလႅင်ႇ ဢၢၼ်းႁပ်ႉႁဵတ်းၸွမ်းတႄႉတႄႉပႄႇ မွၵ်ႈႁပ်ႉတၢင်းၸွႆႈ တႃႇၵူၼ်းထူပ်းၽေး သိုၵ်းသိူဝ်ၼၼ်ႉတႄႉ လီလႆႈပဵၼ်ၵၢၼ်မႃးယေႈပွတ်းယေႈတွၼ်ႈယူႇ။

လွင်ႈၼႆႉ ASEAN ဢမ်ႇၼပ်ႉႁၼ်လႆႈၼႆ ၸွင်ႇၸႂ်ႈတႄႉႁိုဝ်၊ တၢမ်တူဝ် ASEAN ဢၼ်ဢမ်ႇပေႃး ပဵၼ်ၶေႃႈလဵဝ်သဵင်လဵဝ်ၵၼ်ၼႆႉ ပေႃးၵဵဝ်ႇလိူင်ႈမိူင်းမၢၼ်ႈမႃး တိုၵ်ႉႁပ်ႉႁၼ်မိူၼ်ၵၼ်ဝႃႈ “ၸုမ်းသိုၵ်း မၢၼ်ႈၼႆႉ ႁဝ်းတၵ်းတေသူၼ်းႁူၺ်းလႆႈယူႇ” ၼႆၼၼ်ႉ ၵိုင်ႇလီယွမ်းၽိတ်းယဝ်ႉသႄႈ။

ၶေႃႈဢဵၼ်းဢၢၼ်း ဢၼ်ဢၢင်ႈၶိုင်ႁႂ်ႈၸုမ်းသိုၵ်းမၢၼ်ႈ ၵိုတ်းတိုၵ်း၊ ယွမ်းဢုပ်ႇၼႆႉ လီတႄႉယူႇ၊ ၵူၺ်း ၵႃႈ ၸုမ်းသိုၵ်းမၢၼ်ႈၼႆႉ ပွႆႇဝႆႉၸိူင်ႉၼႆၵူၺ်း မၼ်းတေလုၵ်ႉႁဵတ်းဢမ်ႇၸႂ်ႈ ဢၼ်ဝႃႈၼၼ်ႉ ယူဝ်ၶႄး ASEAN တေဢမ်ႇပွင်ႇၸႂ်။

ဢၼ်ႇဝႃႇဢီႇပရႃႇႁမ်ႇ ၸွမ်ၽွင်းလူင်မိူင်းမလေး ၵေႃႉႁၼ်ထိုင်ဝႃႈ ၸုမ်းသိုၵ်းမၢၼ်ႈၼႆႉ လူဝ်ႇလႆႈ တိုတ်ႉၸၼ်ၶဝ်ႈပႃး ၼိူဝ်ႁၢၼ်ႉၵၢၼ်မိူင်းၼၼ်ႉၵေႃႈ တေလႆႈဝႃႈ မၼ်းပႆႇပႃႈႁၼ်ထိုင် တူၼ်ႈၸႂ်လိုၵ်ႉ ၼႂ်းၶဝ်ၵွၼ်ႇသႄႈ။

ၽွင်းတူဝ်တႅၼ်းၶဝ် တိုၵ်ႉၵႂႃႇၶဝ်ႈႁူမ်ႈၸွမ်း ပၢင်ၵုမ်ၸိၵ်းၸွမ် ASEAN ယူႇၼၼ်ႉ ၸုမ်းသိုၵ်းမၢၼ်ႈ ၸႂ်ႉၶိူင်ႈမိၼ်ပွႆႇမၢၵ်ႇတႅၵ်ႇသႂ်ႇၵူၼ်းမိူင်း 30 ပၢႆ တၢႆထိုင်တီႈၵမ်းလဵဝ်ၼၼ်ႉလႂ်၊ ပိုၼ်ၽၢဝ်ႇၵိုတ်းတိုၵ်းမႃး ၸဵမ်မိူဝ်ႈ လိူၼ်ဢေႊပရိူဝ်ႊ 2 ဝၼ်းၼၼ်ႉသေတႃႉ ၵၢၼ်ၸႂ်ႉၶိူင်ႈမိၼ်ပွႆႇမၢၵ်ႇတူၵ်းတႅၵ်ႇသႂ်ႇၼႆႉ ဢမ်ႇ ထၢတ်ႇဢမ်ႇဝၢႆးၼၼ်ႉလႂ် ယူႇတီႈႁူဝ်ပဝ်ႈ ASEAN တိုၼ်းဢမ်ႇႁူႉငိၼ်းတႄႉလႄႈ မၼ်းၸင်ႇဝႃႈ ၵၢၼ် ဢုပ်ႇဢူဝ်း ၵဵဝ်ႇလွင်ႈၵႄႈၶႆပၼ်ႁႃမိူင်းမၢၼ်ႈၼႆႉ မီးလွင်ႈၶိုပ်ႈၼႃႈယူႇႁိုဝ်။

ႁွႆးဝႃႈ ၸုမ်းသိုၵ်းမၢၼ်ႈၼႆႉ ႁဵတ်းၽီလၢႆၼႃႈ ၽႃႉလၢႆၶူမ်းတေႃႇၶဝ်မႃးၸဵမ်ပိုင်း ႁၢၼ်ႉတေႃႇယၢမ်းလဵဝ် ၼႆ ယူဝ်ၶဝ်တေဢမ်ႇႁူႉတႄႉႁိုဝ်၊ ဢမ်ႇၼၼ် လိူင်ႈမိူင်းမၢၼ်ႈၼႆႉ ASEAN ဝႆႉပဵၼ်ၼွၵ်ႈလႅၵ်ႈၼႃႈ ၵၢၼ်ႁုၼ်ႈမုၼ်း ASEAN တင်းလုမ်ႈၼၼ်ႉႁိုဝ်ၼႆ ပဵၼ်ၶေႃႈထၢမ်ဝႆႉယဝ်ႉ။

ဢမ်ႇၼၼ် ၸိုင်ႈမိူင်းလႂ် ၽႂ်မၼ်း ၵႃႈလႆႈတူၺ်းတေႃႇၼႃႈၵၢၼ်မၢၵ်ႈမီး ဢၼ်လႆႈၵိၼ်လီသႆႉပူၺ်ႇ ၸွမ်း ၸုမ်းသိုၵ်းမၢၼ်ႈၼၼ်ႉလႄႈ ၸင်ႇဢမ်ႇၽၢၼ်ႉႁႃ လၢႆးၵမ်ၵိၼ်းမိပ်ႇငႅၼ်းသေ ပွႆႇလွင်ႈလႆ ၸွမ်းၼမ်ႉၸွမ်းလူမ်းယူႇ ၵူၺ်းႁိုဝ်ၼႆၵေႃႈ ယင်းၸၢင်ႈပဵၼ်တီႈလီထၢင်ႇထိူမ်ယဝ်ႉ။

ၸုမ်းသိုၵ်းမၢၼ်ႈၼႆႉ ၶဝ်ဢမ်ႇတူၺ်းတေႃႇၼႃႈမိူင်း၊ မၢၼ်ႈမိူင်းလီႁိုဝ်ၸႃႉ ၶဝ်ဢမ်ႇဢိူဝ်လိူဝ်၊ ပိူဝ်ႈတႃႇ လႆႈဢႃႇၼႃႇၵူၺ်း ပဵၼ်ၼဵၼ်လမ်ႇလွင်ႈသုတ်းတႃႇၶဝ်ဢၼ်ဝႃႈၼၼ်ႉ ၵႃႈၸူဝ်ႈပႆႇယွမ်းႁပ်ႉႁၼ်ၸႅင်ႈ တေပႆႇၽၢၼ်ႉသွၵ်ႈႁၼ်လႆႈယႃႈၵႄႈမၼ်း။

ထႅင်ႈၾၢႆႇ ႞ သင်တေၽႃႇမႆႉဢမ်ႇဝႄႈတႃၼႆ ပေႃးၵဵဝ်ႇၵပ်းလိူင်ႈမိူင်းမၢၼ်ႈမႃး ၵူႈမိူင်းမိူင်းဢမ်ႇ ႁတ်း ယုမ်ႇယမ်ၼိူဝ် လွင်ႈၽွမ်ႉႁူမ်ႈ ၶွင်ၸိူဝ်းၸုမ်းၶတ်းၶၢၼ်ႉလုၵ်ႉၽိုၼ်ႉ ၼႆႉၵေႃႈ ပဵၼ်ပၼ်ႁႃလူင်ယၢင်ႇ ႞ ယဝ်ႉ။

ၶေႃႈထီႉ ႞ ၸိူဝ်းၸုမ်းလုၵ်ႉၽိုၼ်ႉ တေတိုၵ်းပေႉၸုမ်းသိုၵ်းမၢၼ်ႈယိုတ်းမိူင်းၼႆ ၵူႈမိူင်းမိူင်းဢမ်ႇႁတ်း ယုမ်ႇ၊ ၶေႃႈထီႉသွင် ၸိူဝ်းၸုမ်းၸၢဝ်းလုၵ်ႉၽိုၼ်ႉ ဢွမ်ႇလွမ်ႈၽွမ်ႉသဵင်ပဵင်းပၢၵ်ႇၵၼ်ဢိူဝ်ႈၼႆ ၵူႈမိူင်း မိူင်းဢမ်ႇႁတ်းယုမ်ႇ။

ၶေႃႈထီႉသၢမ် တေႃႈဝႃႈတိုၵ်းပေႉ SAC ၵႂႃႇၵေႃႈ ၸိူဝ်းၸုမ်းၶတ်းၶၢၼ်ႉလုၵ်ႉၽိုၼ်ႉၼႆႉ တေပူၵ်းတင်ႈ လႆႈ institutions သေ တေၵုမ်းၵမ်မၢၼ်ႈမိူင်းၵႂႃႇ လႆႈၼိမ်တဵင်ႈလီငၢမ်းၼႆ ၵူႈမိူင်းမိူင်းဢမ်ႇႁတ်းယုမ်ႇ။

ၵွပ်ႈၼႆ ၼႂ်းၶၢဝ်းတၢင်းသီႇပီပၢႆၼႆႉ NUG ဢၼ်ယိုၼ်ပဵၼ်လူင်ပွင်ၸိုင်ႈၶတ်းၶၢၼ်ႉၼၼ်ႉ ၶတ်းၸႂ် သူၼ်းႁူၺ်းၶၢႆသဵင်တေႃႇၵူႈမိူင်းမိူင်းမႃး ဢမ်ႇထၢတ်ႇဢမ်ႇဝၢႆးသေတႃႉ ၽွၼ်းၵၢၼ်ၼႄႉၼွၼ်း ၸင်ႇ ဢမ်ႇပေႃးမီးသင်ယဝ်ႉ။

ပိၵ်ႉသမ်ႉၶဝ်ပိုၼ်ၽၢဝ်ႇဝႃႈ ၶဝ်ပဵၼ်ၸုမ်းလူင်ပွင်ၸိုင်ႈ ၶွတ်ႇလိူတ်ႈၸၢဝ်းၶိူဝ်းၼႆၵေႃႈယႃႇ ၼႂ်းသၢႆတႃ ၵူႈမိူင်းမိူင်းတႄႉ တိုၼ်းႁၼ်ပဵၼ်ၸုမ်းၶတ်းၶၢၼ်ႉၼင်ႇပိူၼ်ႈတင်းၼမ်ၼၼ်ႉ ၸုမ်း ႞ ၵူၺ်း၊ ၶဝ်ၼႆႉ ဢမ်ႇတၢင်တူဝ်လႆႈၸိူဝ်းၸုမ်းၸၢဝ်းလုၵ်ႉၽိုၼ်ႉတင်းသဵင်ႈၼႆ ၵူႈမိူင်းမိူင်းၼပ်ႉႁၼ်ဝႆႉယူႇယဝ်ႉ။

ၸင်ႇၼၼ် လွင်ႈၵမ်ႉယၼ်ပၼ်ႁႅင်းၼႆႉ ဢမ်ႇမိူၼ်ၸႂ်မိူၼ်ၶေႃးမႃးသေပွၵ်ႈ၊ လၢႆး ႞ ၵေႃႈ တေလႆႈဝႃႈ လွင်ႈၵူႈမိူင်းမိူင်း ၵမ်ႉယၼ်ပၼ်ႁႅင်းၼႆႉ ဢမ်ႇမႃးသုမ်ႇငုမ်းပုင်ႈၽၢင်ႈသႂ်ႇ SAC လႃးလႃး ၼၼ်ႉယဝ်ႉ။

မၢႆထိုင်ဝႃႈ ၸိူဝ်းၸုမ်းၶတ်းၶၢၼ်ႉလုၵ်ႉၽိုၼ်ႉၼႆႉ ပႆႇပႃႈမေႃပၢႆးၼႄ Narrative ၽူးၸိူင်းတူဝ်ၵဝ်ႇ ႁႂ်ႈ ပိူၼ်ႈပေႃးႁၼ်ၸႂ်ယုမ်ႇယမ်၊ တၢင်းလိူၵ်ႈလၢႆးမႂ်ႇ Alternative ၵေႃႈပႆႇပႃႈမီး။

ၽိူဝ်ႇတေၼႄလွင်ႈၶွတ်ႇလိူတ်ႈၵၼ် သမ်ႉၵုမ်ႇသၢင်ႈတႃႇၸုမ်းတူဝ်ၵဝ်ႇ ပဵၼ်ၵီးပဵၼ်မင်း၊ ၽိူဝ်တေ ၶတ်းၸႂ်ၼႄလၢႆးပွင်မိူင်း သမ်ႉၵုမ်ႇၼႄလၢႆးၶႂ်ႈႁိမ်ႁဵတ်းလူင်ပွင်ၸိုင်ႈ၊ ၸင်ႇဝႃႈဢမ်ႇမီးမိူင်းလႂ် ယုမ်ႇ ယမ်ႁၼ်လီသေ ၸွႆႈတႄႉၸွႆႈဝႃႈ ၼၼ်ႉယဝ်ႉ။

ပေႃးတူၺ်းၾၢႆႇ SAC ဢၼ်ပဵၼ်ၽူႈၶဵၼ် တႃႇၵူၼ်းမိူင်းၼၼ်ႉၼႆ ႁူမ်ႈဝႃႈဢမ်ႇမီးၽႂ်လႆႈၸႂ်ၼိူဝ်မၼ်း သေတႃႉ ယွၼ်ႉမၼ်းဝၵ်ႉလႆႈဝႆႉ သုၼ်ႇၸႂ်ႉတိုဝ်းၽၼ်ႇတႃႇ ၸဵမ်ႁႅင်းပွင်ၸိုင်ႈမိူင်းသေ ႁူမ်ႈဝႃႈဢမ်ႇ မႅၼ်ႈၸွမ်း လွင်ႈပဵၼ်ထမ်းၵေႃႈ မၼ်းသိူဝ်းလႆႈၸႂ်ႉၸၢႆႇ ၶုတ်းၶၢႆ ၵႆႈလႅၵ်ႈ ယဵတ်ႈမွၼ်လူင်ၵႂႃႇ ၵႃႈၼင်ႇ ၸႂ်မီးၵေႃႈတၢင်း ႞ ။

ၼႂ်းၶၢဝ်းတၢင်းသီႇပီမိူင်း ဢမ်ႇႁၼ်ၸိူဝ်းၸုမ်းၸၢဝ်းလုၵ်ႉၽိုၼ်ႉ ပဵၼ်မုၵ်ႉလဵဝ်ၽုင်လဵဝ်သေတိုၵ်း၊ ဢမ်ႇႁၼ်ၶွၼ်ႈႁႅင်းဢွၵ်ႇသဵင်လဵဝ်ၵၼ်ၶိုၼ်ႈၼႃႈ … ၸဵမ်ၸိူဝ်းၼႆႉ ပဵၼ်ဝႆႉလွၵ်းၸုတ်ႈ ၾၢႆႇၶတ်း ၶၢၼ်ႉယူႇယဝ်ႉ။

ၽိူဝ်ႇတေႁႃလၢႆးၶဝ်ႈဢွၵ်ႇၸူး ၸိုင်ႈမိူင်းႁိမ်းႁွမ်း ၸိူင်ႉၼင်ႇၶႄႇလႄႈ ဢိၼ်ႊတီႊယိူဝ်ႊ သမ်ႉၵူၺ်း ၵုမ်ႇလႅၼ်ႈၸူး US လႄႈ ၸိူဝ်းမိူင်းဝၼ်းတူၵ်းၼၼ်ႉၵေႃႈ လႅပ်ႈတေပဵၼ်တီႈၸုတ်ႈယွမ်း ၸိူဝ်းၾၢႆႇ ၶတ်းၶၢၼ်ႉလွင်ႈ ႞ ယူႇ။

ၼႂ်းဝူင်ႈဝၢင်ႈၼႆႉ လႆႈႁၼ် PDF ၵမ်ႈၽွင်ႈ ႁုၼ်ႉဢွၵ်ႇသဵင်မႃးဝႃႈ တၵ်းလႆႈၸိတ်းၼဵၼ်မိူင်းၶႄႇ ဢၼ် ၸုၵ်းမၼ်ႈပၼ်ႈၵႅၼ်ႇတဝ်ႉလင်ပၼ် SAC ၼႆသေ ၶဝ်ႈတိုၵ်းယိုတ်းၵမ် ပၢင်သဝ်းသိုၵ်း SAC ဢၼ် ႁူမ်ႇလူမ်ႈၸွမ်း တေႃႈလွတ်ႇၵႅတ်ႉသ်ၼၼ်ႉတီႈ ႞ ။  

လွင်ႈၼႆႉၼႃႇ ဢမ်ႇၸႂ်ႈလွၵ်းလဵၼ်ႈမိူင်းၶႄႇလူင် ဢၼ်ၶိုင်ႁႃၶေႃႈဢၢင်ႈ တႃႇသူင်ႇတပ်ႉမၼ်း ၶဝ်ႈမႃး ပဵၼ်တၢင်းၵၢၼ်ႁႃႉၼႆ တႃႉလီၶႆႈၸႂ်ပႃးယူႇ။

ၶွင်လၵ်းၶဝ် ပိုၼ်ၽၢဝ်ႇဝႆႉဝႃႈ တေတူၺ်းထိုင်ၸွႆႈထႅမ် တႃႇပဵၼ်ပၢင်လိူၵ်ႈတင်ႈၼႆလူး၊ ၽွင်းမိူဝ်ႈၵူၼ်း ၼမ် ပၵ်းၸႂ် ၸူမ်းၸွမ်း လွင်ႈဢွင်ႇမၢၼ် AA ယူႇၼၼ်ႉ ၼႂ်းမိူင်းပင်းပလႃးတဵတ်ႉၶျ် ပဵၼ်ႁိုဝ်ၵႂႃႇ၊ ယူႊ ၼုတ်ႉၵေႃႉ  ႁပ်ႉႁဵတ်းႁူဝ်ၼႃႈၸူဝ်ႈၶၢဝ်းၼၼ်ႉ ထိုင်တီႈၺႃးၸွမ်ပွင်ၵၢၼ်သိုၵ်းၶဝ် သၢၼ်ၶတ်းပၼ် ၾၢင်ႉဝႃႈ ယႃႇႁႂ်ႈႁပ်ႉႁဵတ်းၵၢၼ်ၸွႆႈထႅမ်ဢၼ်တေလႆႈၽၢၼ်ႇၸုမ်း AA သေ သူင်ႇၸူးမိူင်းမၢၼ်ႈ၊ ယဝ်ႉ ၵေႃႈ ႁႂ်ႈလႆႈၸတ်းႁဵတ်းပၢင်လိူၵ်ႈတင်ႈ ၼႂ်းပီၼႆႉၵမ်းလဵဝ် ၼႆယဝ်ႉလူး။

ဢမ်ႇႁိုင်သင် ၸွမ်ပွင်ၵၢၼ်သိုၵ်းၼႆႉ တေမီးၶၢဝ်းတၢင်းၵႂႃႇလႄႇမိူင်းၶႄႇ ဢၼ်ဝႃႈၼၼ်ႉၵေႃႈ ပဵၼ်တီႈ လီၶႆႈၸႂ်ၸွမ်း ပၢႆးမိူင်းလၢႆး ၽွင်းတၢင်ၶဝ်ယူႇယဝ်ႉ။

တီႈၼႆႈ ယင်းမီးၵႂၢမ်းမၢႆဝႃႈ ၸူဝ်ႈၸႃႈၸွမ်ၸိုင်ႈဢမေႊရိၵၼ်ႊ ဢမ်ႇသႂ်ႇ ၸႂ်ယုၵ်ႉမုၼ်းတီႇမူဝ်ႇၶရေႇ ၸီႇလႄႈ သုၼ်ႇလႆႈသုၼ်ႇပဵၼ်ၵူၼ်းၼႆႉ ယိုင်ႈၾၢႆႇၶတ်းၶၢၼ်ႉသုတ်ႉ ၸူးမိူင်းတၢင်းတူၵ်း ယိုင်ႈႁဵတ်းႁႂ်ႈ မိူင်းတၢင်းဢွၵ်ႇ ပူင်ၸႂ်ၵမ်ႉၸွႆႈ SAC ယဝ်ႉ ၼႆၵွၼ်ႇဢေႃႈ။

ၸင်ႇၼၼ် ၸိူဝ်းၶတ်းၶၢၼ်ႉလုၵ်ႉၽိုၼ်ႉမႃး သိုဝ်ႈၽႂ်တၼ်းမၼ်း 5-6-7 သိပ်းပီလႄႈသင်၊ ၸိူဝ်းၸင်ႇ တႄႇလုၵ်ႉၽိုၼ်ႉမႃး ပႆႇပေႃးႁိုင်လႄႈသင် ပေႃးၵူၺ်းၸႂ်ယႂ်ႇၵၢၼ်တိုၵ်းပိူင်လဵဝ်သေ ဢမ်ႇၼပ်ႉလဵၼ်ႈ ပႃးၵၢၼ်မိူင်းတင်းလုမ်ႈၸိုင် ထိုင်ၼႃႈၼႅၼ်ႈမႃး ၸၢင်ႈၺႃးယၢင်ႈၶႃႇပႅတ်ႈၼႆ တူၺ်းတီႈၸုမ်းၸၢဝ်း ၶိူဝ်းဢွၼ်ႇ ပေႉၵၢၼ်တိုၵ်း ဢမ်ႇပႃးလၢႆးၵၢၼ်မိူင်းၼၼ်ႉသေ တၵ်းလႆႈၾၢင်ႉတိူၼ်းၵၼ် ယူႇယဝ်ႉ။

ပၢၼ်မိူင်းယၢမ်းလဵဝ် ၵူႈမိူင်းမိူင်းတိုတ်ႉတၢႆးၶိုတ်းၶွႆႈၵၼ်သဵင်ႈ၊ ၵွင်ႉၵၢႆႇထွင်ထိုင်ၵၼ်သဵင်ႈလႄႈ ထႃႈ ဢမ်ႇၼပ်ႉပႃး သၢႆငၢႆငဝ်းလၢႆးတင်းလုမ်ႈသေ ၵဝ်ႈၵေႃႉႁဵတ်းၵဝ်ႈၵႄႇယူႇၽႂ်မၼ်းတႄႉ ၵမ်းလိုၼ်းႁႃ ၽိုၼ်းသႄႇၵူၼ်ႈမေႃႈ ယင်းတေဢမ်ႇမီးၵွၼ်ႇ။

ပေႃးၶႂ်ႈႁႂ်ႈၵူႈမိူင်းမိူင်း ယုမ်ႇယမ်ဢိူဝ်လိူဝ်တေႃႇႁဝ်းၵေႃႈ ႁဝ်းၼႆႉတၵ်းလႆႈသုတ်ႉႁႃၶဝ်ႈၸူး ၵူႈမိူင်းမိူင်း ယဝ်ႉ၊ မိူဝ်ႈလႂ်ၵူႈမိူင်းမိူင်း ႁၼ်ၸႂ်တူၺ်းထိုင်ၵမ်ႉယၼ်ၸင်ႇ လွင်ႈထၢင်ႇႁၢင်ႈလွတ်ႈလႅဝ်းတူဝ်ၵဝ်ႇၼႆႉ တေမၼ်ႈၸႄႇ ၼိမ်တဵင်ႈလႆႈယဝ်ႉဢေႃႈ။