တႄႇႁူဝ်လိူၼ်ၵျုၼ်ႊမႃး သိုၵ်းၵဝ်ႈၵၢင်ႉ MNDAA ႁွင်ႉဢဝ်ၵၢင်ႉၵႄႇ ၼႂ်းၸႄႈဝဵင်းသႅၼ်ဝီ ၸိုင်ႈတႆးပွတ်းႁွင်ႇ ႁဵတ်းပၢင်ၵုမ်သေ တဵၵ်းၶၢၼ်းယွၼ်းၵူၼ်းမိူင်း ၵူႈပွၵ်ႉၵူႈဝၢၼ်ႈၵူႈဢိူင်ႇ ႁႂ်ႈၶဝ်ႈႁၢပ်ႇထၢမ်း ၵၢၼ်သိုၵ်း ၼိုင်ႈဝၢၼ်ႈလႂ် ဢေႇသုတ်း သွင်ၵေႃႉ တိုၼ်းတေလႆႈႁႃပၼ်ႁႂ်ႈလႆႈ။
ဝၢႆးလင် ၽႅၼ်ယၼ်ႇသိုၵ်း 1027 သိုၵ်းၵဝ်ႈၵၢင်ႉ ၶဝ်ႈၵုမ်းၵမ် ဝဵင်းသႅၼ်ဝီသေ ပၼ်ႇၵၢၼ်ၾၢႆႇဢုပ်ႉပိူင်ႇၽွင်းငမ်းယဝ်ႉ တဵၵ်းၶၢၼ်းယွၼ်းၵူၼ်းသိုၵ်းမႂ်ႇ တီႈၵၢင်ႉၵႄႇၵူႈပွၵ်ႉၵူႈဢိူင်ႇၸိူင်ႉၼႆ မီးၵႂႃႇ 3 ပွၵ်ႈယဝ်ႉ – ၼၢင်းဢိၼ်ႇ ၵူၼ်းမိူင်းၼႂ်းၸႄႈဝဵင်းသႅၼ်ဝီ ၵေႃႉၼိုင်ႈ လၢတ်ႈၼႄၼင်ႇၼႆ။
“တီႈဝၢၼ်ႈႁဝ်းၼႆႉ တေလႆႈႁႃပၼ်ၶဝ်ပဵၼ် သၢမ်ၵေႃႉ။ မၢင်ဝၢၼ်ႈ ပေႃးဝၢၼ်ႈယႂ်ႇ လင်ႁိူၼ်းၵူၼ်းၼမ်ၼႆ ၶဝ်ယွၼ်းပဵၼ် သီႇၵေႃႉ ၸိူဝ်းၼႆႉၵွၼ်ႇ။ မိူဝ်ႈတႄႇၶဝ်တိုၵ်းဢဝ်လႆႈႁႄ ၵုမ်းလႆႈဝဵင်းတႄႉ ၶဝ်ယၢမ်ႈပိုၼ်ၽၢဝ်ႇဝႃႈ တေဢမ်ႇၵဵပ်းသိုၵ်း။ ဢမ်ႇယွၼ်းၵူၼ်းဝၢၼ်ႈသင်ၼႆလူး။ ၵမ်းၼႆႉႁမ်ႉ ၵႃႈၶွၼ်ႇၵူႈမဵဝ်းမဵဝ်းၵေႃႈ လႆႈပၼ်။ ၵူၼ်းၵေႃႈ ယွၼ်း။ ၶဝ်ဢမ်ႇႁဵတ်း ၸွမ်းၵႂၢမ်းလၢတ်ႈၶဝ်လူင်။ ၶဝ်ၽိတ်းၵႂၢမ်းမၼ်ႈ တေႃႇၵူၼ်းမိူင်းဢေႃႈ။ ႁႂ်ႈၵူၼ်းမိူင်းယူႇသႃႇၼႆ ၶဝ်တမ်ႉဢမ်ႇဝူၼ်ႉႁႄ ႁဵတ်းပၼ်သေလွင်ႈ။ ၵုမ်ႇမိုင်ႉၵဵပ်းမိုင်ႉယွၼ်း တဵၵ်းႁႂ်ႈႁဝ်း ၵူၼ်းမိူင်း ႁဵတ်းပၼ်ၶဝ်ဢၼ်ၼၼ်ႉ ဢၼ်ၼႆႉၼႆယူႇတိၵ်းတိၵ်းၵူၺ်း”။
လႆႈႁူႉဝႃႈ ဢၼ်သိုၵ်းၵဝ်ႈၵၢင်ႉ တဵၵ်းၶၢၼ်းႁႂ်ႈၵူၼ်းမိူင်းၼႂ်းၸႄႈဝဵင်းသႅၼ်ဝီ ၶဝ်ႈႁၢပ်ႇထၢမ်းၵၢၼ်သိုၵ်းၼႆႉ ပွၵ်ႈၼႆႉပဵၼ် ၵမ်းထီႉ 3 ယဝ်ႉ။ ပွၵ်ႈၵမ်းၼိုင်ႈ ပဵၼ်ၽွင်းတိုၵ်ႉၶဝ်ႈၵုမ်းၵမ်ဝဵင်းဢမ်ႇႁိုင်သေ ၵွၼ်ႇၼႃႈ တေၶဝ်ႈတိုၵ်းဝဵင်းလႃႈသဵဝ်ႈၼၼ်ႉ၊ ပွၵ်ႈၵမ်းသွင် ပဵၼ်ၼႂ်းလိူၼ်မၢတ်ႊၶျ် ပီ 2025 ဝူင်ႈထီႉသွင်။ တိုၼ်းတေလႆႈႁႃပၼ်ၵူၼ်းၸၢႆး ဢႃယု 18 တေႃႇထိုင် 35 တႃႇၶဝ်ႈႁဵတ်းသိုၵ်းႁႂ်ႈလႆႈ ဝႃႈၼႆ။
ၸဵမ်မိူဝ်ႈသိုၵ်းၵဝ်ႈၵၢင်ႉ တႄႇၵဵပ်းသဵၼ်ႈမၢႆႁူဝ်ၼပ်ႉၵူၼ်းၼႂ်းၸႄႈဝဵင်းသႅၼ်ဝီသေ ၸီႉသင်ႇႁႂ်ႈၵၢင်ႉၵႄႇ ၼႂ်းပွၵ်ႉၼႂ်းဢိူင်ႇ ၵဵပ်းၵူၼ်းၼုမ်ႇၼႂ်းဝၢၼ်ႈၶဝ်ႈႁၢပ်ႇထၢမ်းၵၢၼ်သိုၵ်းၼၼ်ႉ ၵူၼ်းၼုမ်ႇၵမ်ႈၼမ် ၼႂ်းၸႄႈ ဝဵင်းသႅၼ်ဝီ ဢွၼ်ၵၼ်ငိူင်ႉဢွၵ်ႇပၢႆႈ ၵႂႃႇယူႇတၢင်ႇဝၢၼ်ႈတၢင်ႇမိူင်း ႁၢၼ်ႉတေႃႇထိုင်ယၢမ်းမိူဝ်ႈလဵဝ်။ ၵိုတ်းဝႆႉၵူၼ်းၶၢဝ်ႉၵူၼ်းၵႄႇ တႃႇၵူၼ်းပႂ်ႉႁိူၼ်း မွၵ်ႈၼၼ်ႉၵူၺ်းလႄႈ မၢင်ဝၢၼ်ႈထိုင်တီႈ လႆႈပၼ်ငိုၼ်းၸၢင်ႈ ၵၼ်ၵႂႃႇၶဝ်ႈႁဵတ်းသိုၵ်း။ မၢင်ဝၢၼ်ႈၼႆႉ ၼိုင်ႈႁိူၼ်းလႆႈပၼ်ၵႃႈ ၸၢင်ႈယူႇ ဢေႇသုတ်း ၼိုင်ႈသႅၼ်ပျႃးတေႃႇ 3 သႅၼ်ပျႃး ဝႃႈၼႆ။
တင်ႈတႄႇသိုၵ်းၵဝ်ႈၵၢင်ႉ MNDAA ၶဝ်ႈၵုမ်းၵမ် ၼႂ်းၸႄႈဝဵင်းသႅၼ်ဝီမႃးၼႆႉ ပၼ်သုၼ်ႇလႆႈ တိုဝ်ႉတၢင်း ၸဝ်ႈငိုၼ်းသႃးၶဝ် ပိုတ်ႇပၢင်တေႃႇလွင်း ပဵၼ်တၢင်းၵၢၼ်၊ တဵၵ်းႁႂ်ႈၵူၼ်းဝၢၼ်ႈၶၢတ်ႈပၼ်သူၼ်ႁႆႈၼႃး တွၼ်ႈတႃႇ ၸဝ်ႈငိုၼ်းသႃးၸၢဝ်းၶိူဝ်းၶႄႇ၊ ယႃႉပႅတ်ႈၵၢၼ်ႇလူင် (ၵၢတ်ႇၵဝ်ႇ) ၵၢင်ဝဵင်းသႅၼ်ဝီ၊ တဵၵ်းႁႂ်ႈ ၵူၼ်းမိူင်းၵႂႃႇႁဵတ်းဝႂ်ၶပ်းရူတ်ႉၶပ်းၵႃးၵူၺ်းဢမ်ႇၵႃး ယွၼ်းပႃးၶွၼ်ႇၵႃႈထေႃႈၵႃႈၵႃး ပႃးၸဵမ်ၵႃႈယုၵ်းယၢၵ်း၊ တဵၵ်းႁႂ်ႈၵူၼ်းမိူင်း လႅၵ်ႈပၢႆႉႁၢၼ်ႉတၢင်းၶၢႆ မွတ်ႇပႅတ်ႈလိၵ်ႈတႆး၊ လိၵ်ႈဢိင်းၵလဵတ်ႈသေ ၸႂ်ႉတိုဝ်းလိၵ်ႈၶႄႇၵူၺ်း။ သင်ၶႂ်ႈသႂ်ႇပႃးလိၵ်ႈမၢၼ်ႈၸိုင် ၸိမ်သႂ်ႇလေႃးလႆႈယူႇဢိတ်းဢီႈ ဝႃႈၼႆ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ