ဢီႊလုၼ်ႊမၢၵ်ႉသ် ၽူႈမၢၵ်ႈမီးသုင်သုတ်း ၼႂ်းလုမ်ႈၾႃႉ ဢၼ်ဢွၼ်ႁူဝ် ႁွင်ႈၵၢၼ် (DOGE) လူင်ပွင်ၸိုင်ႈ မိူင်းဢမေႊရိၵၼ်ႊၼၼ်ႉ ယိုၼ်ယၼ်လၢတ်ႈဝႃႈ ၼႂ်းဢမ်ႇႁိုင်သင်ၼႆႉ တေၵိုတ်းလိုဝ်ႈ ၼႃႈၵၢၼ်ပုၼ်ႈၽွၼ်းသေ ဢွၵ်ႇယၢၼ်ႁိူၼ်းႁေႃၶၢဝ် ၸွမ်ၸိုင်ႈဢမေႊရိၵၼ်ႊၵႂႃႇယဝ်ႉ ဝႃႈၼႆ။

မၼ်းၸၢႆးတႅမ်ႈတၢင်ႇဝႆႉတီႈၼိူဝ် သိုဝ်ႇတူင်ႇဝူင်း X သုၼ်ႇတူဝ်မၼ်းဝႃႈ – ၶၢဝ်းယၢမ်း ဢၼ်လႆႈ ႁပ်ႉပုၼ်ႈၽွၼ်းပဵၼ် ၽူႈႁၢပ်ႇၵၢၼ်ၶိုၵ်ႉတွၼ်း လူင်ပွင်ၸိုင်ႈ တေသုတ်းသဵင်ႈယဝ်ႉလႄႈ ၶွပ်ႈၸႂ် ထိုင်ၸွမ်ၸိုင်ႈ ထရမ်ႉ ဢၼ်ပၼ်တိုဝ်ႉတၢင်းလႆႈလူတ်းယွမ်း ငိုၼ်းၵႃႈၸႂ်ႉၸၢႆႇလူင်ပွင်ၸိုင်ႈ ၸိူဝ်းဢမ်ႇမီးၽွၼ်းလီ။ သင်လွင်ႈႁဵတ်းသၢင်ႈ ႁွင်ႈၵၢၼ် DOGE ၶဝ်ႈပႃးၵႂႃႇၼႂ်း ပိူင်ၵၢၼ်ႁဵတ်းသၢင်ႈ လူင်ပွင်ၸိုင်ႈယဝ်ႉၸိုင် ဢဵၼ်ႁႅင်းတေတိူဝ်းၵႅၼ်ႇၶႅင်မႃးလိူဝ်ၼႆႉယူႇ ဝႃႈၼႆ။

ၶၢဝ်းယၢမ်း ႁၢပ်ႇၵၢၼ်ပဵၼ် ၽူႈႁၢပ်ႇၵၢၼ်ၶိုၵ်ႉတွၼ်းလူင်ပွင်ၸိုင်ႈ မိူင်းဢမေႊရိၵၼ်ႊ (Special Government Employee) ၼႆႉ ၼိုင်ႈပီ မၵ်းမၼ်ႈဝႆႉတႃႇၶၢဝ်းတၢင်း 130 ဝၼ်း။ သင်ဝႃႈ ၶၢဝ်းယၢမ်းႁၢပ်ႇၵၢၼ်သုတ်းသဵင်ႈၵႂႃႇၸိုင် သိုပ်ႇယိုတ်ႈၶၢဝ်းယၢမ်းၵႂႃႇလႆႈထႅင်ႈ။ ၵူၺ်းၵႃႈ ဢီႊလုၼ်ႊမၢၵ်ႉသ် ဢမ်ႇသိုပ်ႇတေႃႇၶၢဝ်းယၢမ်းထႅင်ႈသေ တေၵိုတ်းလိုဝ်ႈၵႂႃႇ။

သင်ၼပ်ႉ တႄႇဢဝ်ၻူဝ်ႊၼေႃႊ ထရမ်ႉ ၶိုၼ်ႈႁပ်ႉတၼ်းႁဵင်းပဵၼ်ၸွမ်ၸိုင်ႈမႃး ၼႂ်းဝၼ်းတီႈ 20 လိူၼ်ၵျႅၼ်ႊၼိဝ်ႊရီႊမႃးၸိုင် ၶၢဝ်းယၢမ်း ဢီႊလုၼ်ႊမၢၵ်ႉသ် ႁပ်ႉပုၼ်ႈၽွၼ်းပဵၼ်ၽူႈႁၢပ်ႇၵၢၼ် ၶိုၵ်ႉတွၼ်း လူင်ပွင်ၸိုင်ႈၼႆႉ တေသုတ်းယဝ်ႉ ၼႂ်းလိူၼ်မေႊၼႆႉ။

ဢီႊလုၼ်ႊမၢၵ်ႉသ် တွပ်ႇလၢတ်ႈၵႂႃႇ ၽွင်းငဝ်းႁၢင်ႈသဵင် CBS တွင်ႈထၢမ်ၼၼ်ႉဝႃႈ – မၼ်းၸၢႆး သဵင်ႈၸႂ်ၼိူဝ် လွင်ႈၸွမ်ၸိုင်ႈ ထရမ်ႉ လူတ်းယွမ်းလွင်ႈၵဵပ်းၶွၼ်ႇလႄႈ တိူဝ်းၽိူမ်ႉထႅမ်ၵႃႈ ၸႂ်ႉၸၢႆႇ ၾၢႆႇၵၢၼ်သိုၵ်း။ လွင်ႈၼႆႉ တေႁဵတ်းႁႂ်ႈတုမ်ႉတိူဝ်ႉၵၢၼ်ငၢၼ်း ဢၼ်ႁွင်ႈၵၢၼ် DOGE လႆႈႁဵတ်း သၢင်ႈယဝ်ႉတူဝ်ႈမႃးၼၼ်ႉ ဝႃႈၼႆ။

ဢီႊလုၼ်ႊမၢၵ်ႉသ်ၼႆႉ ပဵၼ်ၸဝ်ႈတႃႇၼလူင် ပႃႊတီႊ ရီႊပၢတ်ႉပရီႊၵၼ်ႊ (Republican Party) ၵေႃႉၼိုင်ႈ သေဢမ်ႇၵႃး ပဵၼ်ပႃးၽူႈၵိူဝ်းၵုမ် ၸမ်ၸႂ်ၵၼ်တင်း ၸွမ်ၸိုင်ႈထရမ်ႉ။ မိူဝ်ႈၽွင်းမၼ်း ၸၢႆးဢွၼ်ႁူဝ် ႁွင်ႈၵၢၼ် DOGE လူင်ပွင်ၸိုင်ႈယူႇၼၼ်ႉ ၼမ်ႉမႅတ်ႈၼမ်ႉတွၼ်းၼႂ်းၶွမ်ႊပၼီႊ ရူတ်ႉၵႃး(Tesla) မၼ်းၸၢႆး ပဵၼ်ဢၼ်တူၵ်းလူင်းၵႂႃႇႁႅင်း။ ၵွပ်ႈၼၼ် တီႈၼႂ်းပၢင်ၵုမ် သျႄႊယႃႊ ၼႂ်းလိူၼ်ပူၼ်ႉမႃးၼႆႉၵေႃႈ မၼ်းၸၢႆး ယၢမ်ႈလၢတ်ႈဝႃႈ တေလူတ်းယွမ်းပုၼ်ႈၽွၼ်းတီႈႁွင်ႈၵၢၼ် DOGE သေ ၶိုၼ်းပၼ်ၶၢဝ်းယၢမ်း ၼႂ်းၵၢၼ်ၶွမ်ႊပၼီႊ (Tesla) – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။