တႄႇၵၢင်လိူၼ်မေႊၼႆႉမႃး ၵူၼ်းမိူင်းၸိူဝ်းၵႃႉၶၢႆ သူႇသမ်းယႃႈမဝ်းၵမ် ၺႃးပလိၵ်ႈၾၢႆႇသိုၵ်းတဢၢင်း တီႉၺွပ်းၵႂႃႇ ဢမ်ႇယွမ်း 20 ၵေႃႉ တီႈၸႄႈဝဵင်းမိူင်းၵုတ်ႈ ၼႂ်းတိူင်းဝဵင်းလိူဝ်ႇ (မၼ်းတလေး)။

တႄႇဢဝ် ဝၼ်းတီႈ 15-26/05/2025 ၼႂ်းၶၢဝ်းတၢင်းဝူင်ႈပၢႆၼႆႉ တီႉၺွပ်းလႆႈ ယႃႈမ 56 ထူင်လႄႈ 561 မဵတ်ႉ၊ ယႃႈၾိၼ်ႇၽိူၵ်ႇ တႃႇ 5 ၵွၵ်းသပ်ႉပျႃႇ၊ ယႃႈလမ် 3 ၸွႆႉလႄႈ ငိုၼ်းမၢၼ်ႈ တႃႇ 40 သႅၼ်ပျႃးၼႆ ႁွင်ႈၵၢၼ် ၾၢႆႇပလိၵ်ႈ တပ်ႉသိုၵ်းတဢၢင်းၶဝ် ပိုၼ်ၽၢဝ်ႇဢွၵ်ႇဝႆႉၼင်ႇၼႆ။

ၵူၼ်းမိူင်းၵေႃႉယူႇ ၼႂ်းမိူင်းၵုတ်ႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်သိုၵ်းၶဝ်လႄႇႁႃၺွပ်းယူႇ ၼႆႉၵေႃႈ ႁဵတ်းဢဝ်ႁၢင်ႈမၼ်းၵူၺ်း။ ႁူႉၵၼ်ယူႇလူးဝႃႈ ၽႂ်ၵိၼ်ၽႂ်ၶၢႆ ႁူဝ်မၼ်းပဵၼ်ၽႂ်ၼႆၵေႃႈ ႁူႉယူႇၼႃႇ။ ၾၢႆႇသိုၵ်းလွႆ (တဢၢင်း) ၶဝ် ဢမ်ႇၸတ်းၵၢၼ်ပၼ်သင်တႄႉတႄႉ။ မိူဝ်ႈလဵဝ် ယူႇၵေႃႈဢမ်ႇမီးလွင်ႈႁူမ်ႇ လူမ်ႈတႄႉတႄႉ။ ၽူႈလၵ်ႉၵေႃႈၼမ်မႃးၶိုၼ်း”- ဝႃႈၼႆ။

လႆႈႁူႉဝႃႈ ၵူၼ်းၸိူဝ်းၵႃႉၶၢႆ သူႇသမ်းယႃႈမဝ်းၵမ် ဢၼ်ၺႃးသိုၵ်းတဢၢင်း ၺွပ်းယဵတ်ႈသႂ်ႇၶွၵ်ႈၼႆႉ ပဵၼ်ၸၢဝ်းၶိူဝ်းမၢၼ်ႈ ၼမ်လိူဝ်ပိူၼ်ႈသုတ်း။ ၼႂ်းၸႄႈဝဵင်းမိူင်းၵုတ်ႈၼႆႉ မီးဝႆႉၸၢဝ်းၶိူဝ်းတႆး၊ မၢၼ်ႈ၊ ၶၢင်၊ တဢၢင်း(ပလွင်ႈ) ၸိူဝ်းၼႆႉ ယူႇသဝ်းဝႆႉသေ ယၢမ်းလဵဝ် ပဵၼ်ၸုမ်းသိုၵ်းတဢၢင်း TNLA ၵုမ်းၵမ်ဝႆႉ။

ဝၢႆးလင် ၽႅၼ်ယၼ်ႇသိုၵ်း 1027 မႃး ၼႂ်းၸႄႈဝဵင်းမိူင်းၵုတ်ႈၼႆႉ မီးၸုမ်းယိပ်းၵွင်ႈၵၢင်ႇၸၢဝ်းၶိူဝ်း ယူႇ သဝ်းဝႆႉလၢႆလၢႆၸုမ်းသေ ပႂ်ႉၵဵပ်းၶွၼ်ႇၸွမ်းသဵၼ်ႈတၢင်းၵႂႃႇမႃး ဝဵင်းလိူဝ်ႇ – မိူင်းၵုတ်ႈ – မူႇၸေႊ ၸဵမ်ၸိူဝ်းၼႆႉ။

တႅမ်ႈ – ၽူၺ်းၼုမ်ႇ