တႄႇႁူဝ်လိူၼ်မေႊၼႆႉမႃး သိုၵ်းၵဝ်ႈၵၢင်ႉ မႄးၵုမ်းႁဵတ်းသၢင်ႈမႂ်ႇၶိုၼ်း ၶူဝ်လူင်ဝဵင်းသႅၼ်ဝီ ဢၼ်မီးၼိူဝ် သဵၼ်ႈတၢင်းလူင်ႁၢႆးဝေး ၵႂႃႇမႃးဝဵင်းလႃႈသဵဝ်ႈ – ဝဵင်းမူႇၸေႊ ၸိုင်ႈတႆးပွတ်းႁွင်ႇ။

မိူဝ်ႈၼႆႉ ဝၼ်းတီႈ 29/05/2025 ယၢမ်းၵၢင်ၼႂ်ၸဝ်ႉၼႆႉ သိုၵ်းၵဝ်ႈၵၢင်ႉ (MNDAA) ယိုဝ်းၵွင်ႈပၼ်ၾၢင်ႉ ႁႂ်ႈပဵၼ်မိၵ်ႇမၢႆ ပိုတ်ႇၶူဝ်လူင် ၶၢမ်ႈၼမ်ႉတူႈ ဝဵင်းသႅၼ်ဝီ ၸိုင်ႈတႆးပွတ်းႁွင်ႇ။

ၵူၼ်းမိူင်းပိုၼ်ႉတီႈ ဝဵင်းသႅၼ်ဝီ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၶူဝ်လူင်ၼႆႉ မၼ်းႁၵ်းၵႂႃႇသွင် တွၼ်ႈ။ ၵိုတ်းဝႆႉတွၼ်ႈၵၢင်မၼ်းၵူၺ်း။ ဝၼ်းၼၼ်ႉတႄႉ ၶဝ်ဢဝ်လဵၵ်းႁႄ မႄးၵၢႆႇဝႆႉပၼ်ၵူၺ်း။ ၵႃးလူင် တၢင်ႇၼၵ်းတႄႉတႄႉဢမ်ႇလတ်းလႆႈ။ ၵမ်းၼႆႉတႄႉ ၶဝ်ၶိုၼ်းဢဝ်သၢႆး/ လိၼ်ပုၼ် (ဘိလပ်မြေ) ႁႄ ႁဵတ်းႁႂ်ႈမိူၼ်ၵဝ်ႇၶိုၼ်း”- ဝႃႈၼႆ။

ၶူဝ်လူင်ဝဵင်းသႅၼ်ဝီၼႆႉ ၺႃးၸုမ်းယိပ်းၵွင်ႈၵၢင်ႇ ပွႆႇမၢၵ်ႇသႂ်ႇသေ လူႉၵွႆၵႂႃႇ ၽွင်းၽႅၼ်ယၼ်ႇသိုၵ်း 1027 လွပ်ႈၼိုင်ႈၼၼ်ႉသေ ဝၢႆးလင် သိုၵ်းၵဝ်ႈၵၢင်ႉတင်း ၸုမ်းဢူၺ်းလီ ယိုတ်းဢဝ်လႆႈတပ်ႉသိုၵ်းမၢၼ်ႈ ၵုမ်း ၵမ်လႆႈဝဵင်းသႅၼ်ဝီယဝ်ႉဢမ်ႇႁိုင် ၼင်ႇႁိုဝ် တေၵႂႃႇမႃးလႆႈငၢႆႈၼၼ်ႉ လႆႈမႄးၵုမ်းမႃးၶိုၼ်း ၵမ်းၶၵ်ႉၵမ်းတွၼ်ႈၼႆ ၸဝ်ႈၵႃး လႃႈသဵဝ်ႈ – သႅၼ်ဝီၵေႃႉၼိုင်ႈ လၢတ်ႈၼႄၼင်ႇၼႆ။

“ၽွင်းၶဝ်မႄးၶိုၼ်းၶူဝ်ၼၼ်ႉ ၶဝ်ႁဵတ်းပၼ်ၶူဝ်ဢွၼ်ႇ တႃႇတေလတ်းၶၢမ်ႈၼမ်ႉၵႂႃႇမႃးလႆႈၸူဝ်ႈၶၢဝ်း တီႈ ၾၢႆႇတႂ်ႈၶၢင်ႈၶူဝ်လူင်ၼၼ်ႉ။ မိူဝ်ႈလဵဝ်သမ်ႉ ထိုင်ၶၢဝ်းၾူၼ်ယဝ်ႉၼႃႇ ၼမ်ႉၵေႃႈ ၼမ်မႃးၵမ်းလွႆးလွႆး ယဝ်ႉ။ ႁိမ်းၾင်ႇၼမ်ႉ တီႈၶဝ်ႁဵတ်းၶူဝ်ၶၢမ်ႈၸူဝ်ႈၶၢဝ်းၼၼ်ႉ ၽင်ႇႁိုၵ်းမၼ်းသမ်ႉ ပေႃးယူတ်ႇလူင်းၵႂႃႇ ဢိတ်းၼိုင်ႈယဝ်ႉ။ ၵွပ်ႈၼၼ် ၶဝ်ၸင်ႇႁိပ်ႈၼႅတ်ႈမႄးၶိုၼ်းၶူဝ်ႁႂ်ႈယဝ်ႉဝႆးဝႆး။ ပေႃးၼမ်ႉၼွင်းမႃး ၵူဝ်ဢမ်ႇၸၢင်ႈၶၢမ်ႈၼၼ်ႉၼႃႇ”။

မိူဝ်ႈၽွင်းၽႅၼ်ႇယၼ်ႇသိုၵ်း 1027 ၼႆႉ သိုၵ်းမၢၼ်ႈ၊ သိုၵ်းၵဝ်ႈၵၢင်ႉတင်း ၸုမ်းဢူၺ်းလီၶဝ် လၢႆလၢႆၸုမ်း ပဵၼ်ပၢင်တိုၵ်းၵၼ်ႁၢဝ်ႈႁႅင်း။ ၸုမ်းယိပ်းၵွင်ႈၵၢင်ႇတင်းသွင်ၾၢႆႇ ပွႆႇမၢၵ်ႇယႃႉၶူဝ်တႆႇ လူႉၵွႆ ၼႂ်းမိူင်းတႆးပွတ်းႁွင်ႇ။ ၵူၼ်းမိူင်း ဢွၵ်ႇၶၢဝ်းတၢင်းၵႂႃႇမႃး တေႃႉၶူဝ်းၵုၼ်ႇ ႁဵတ်းၵၢၼ်ၵႃႉၶၢႆ ယၢပ်ႇၽိုတ်ႇႁႅင်းသေ ႁဵတ်းႁႂ်ႈၶၼ်ၵုၼ်ႇ ၼႂ်းမိူင်းတႆးပွတ်းႁွင်ႇ ပုင်ႈ ၶိုၼ်ႈသုင်ၵႂႃႇလိူဝ်ၵဝ်ႇ မွၵ်ႈ 5 ပုၼ်ႈ။

တႅမ်ႈ – ၽူၺ်းၼုမ်ႇ