ဝၼ်းတီႈ 27/05/2025 ယၢမ်းၵၢင်ၶမ်ႈ ၸဝ်ႈၼႃႈတီႈထႆး ၾၢႆႇတပ်ႉပႂ်ႉလႅၼ်လိၼ် မၢႆ 335 ၵူတ်ႇ ထတ်းတီႉၺွပ်းလႆႈ ယႃႈမႃႉ 2 လၢၼ်ႉပၢႆ တီႈသဵၼ်ႈတၢင်းထိူၼ်ႇ ဝၢၼ်ႈမႄႈၸၼ်းၼိူဝ် ဝဵင်းၵဵင်း လၢဝ် ၸႄႈတွၼ်ႈၵဵင်းမႂ်ႇ ၸိုင်ႈထႆး ဝႃႈၼႆ။

ဝၼ်းၼၼ်ႉ ယၢမ်းၵၢင်ၶမ်ႈ ၼိူဝ်သၼ်လွႆ ႁိမ်းဝၢၼ်ႈမႄႈၸၼ်းၼိူဝ်ၼၼ်ႉ တပ်ႉပႂ်ႉလႅၼ်လိၼ် ႁၼ်ႁွႆးတိၼ် ၵူၼ်းၸုမ်းၼိုင်ႈ၊ ဝၢႆးၼၼ်ႉ လွမ်ပႂ်ႉတူၺ်းငဝ်းလၢႆးၼႂ်းပိုၼ်ႉတီႈ။ ထိုင်မႃး ယၢမ်း  ၵၢင်ၶမ်ႈ မွၵ်ႈ 9 မူင်း ၵူၼ်းၸုမ်းၼိုင်ႈ မီးႁႅင်းၵူၼ်းမွၵ်ႈ 10 ၵေႃႉ တဵင်ႇထူင်ၸၢၼ်ႈ လူင်းလွႆမႃး၊ ဝၢႆးၸဝ်ႈၼႃႈတီႈဢၢင်ႈတေတီႉၺွပ်း ၸိူဝ်းၶဝ်တၼ်းလႅၼ်ႈပၢႆႈ ပူၼ်ႉလွတ်ႈၵႂႃႇ၊ ၽွင်းၸဝ်ႈၼႃႈ တီႈၵူတ်ႇထတ်းႁိမ်းႁွမ်းၼၼ်ႉ ထူပ်းႁၼ်ထူင်ၸၢၼ်ႈ 15 ထူင် သႂ်ႇဝႆႉယႃႈမႃႉ 2 လၢၼ်ႉ 3 သႅၼ်မဵတ်ႉၼႆ – သိုဝ်ႇၶၢဝ်ႇ MAESAIPRESS ဢွၵ်ႇဝႆႉၼင်ႇၼႆ။

ၼႂ်းဝၼ်းၼၼ်ႉယၢမ်းၵၢင်ၼႂ် တီႈမိူင်းထႆးၵေႃႈ ၸတ်းႁဵတ်းပၢင်ဢုပ်ႇဢူဝ်းၽႅၼ်ၵၢၼ် ၾၢႆႇၽဵဝ်ႈမူၺ်ႉယႃႈမဝ်းၵမ် တီႈငဝ်ႈငုၼ်းၾၢႆႇၵုမ်းထိင်းယႃႈမဝ်းၵမ် ONCB ၊ တီႈပၢင်ၼၼ်ႉ ၸွမ်ၽွင်းလူင်ၵဝ်ႇ ထၵ်းသိၼ် သျိၼ်ႊၼဝတ်း လၢတ်ႈဝႃႈ – ၵူၼ်းႁဵတ်းဢွၵ်ႇယႃႈမဝ်းၵမ် ၵမ်ႈၼမ်ၼႆႉ ယူႇတႂ်ႈတပ်ႉသိုၵ်းဝႃႉ UWSA သေ ပၼ်ႇၵၢၼ်ဝႆႉ။ ပၼ်ႁႃ လွင်ႈႁဵတ်းဢွၵ်ႇယႃႈမဝ်းၵမ်ၼႆႉ ပဵၼ်ၶၵ်ႉၵၢၼ် ထုၵ်ႇလီၵႄႈလိတ်ႈၶိုၵ်ႉၶၵ်ႉ။ တႃႇတေယိပ်းၵမ်လွင်ႈၼႆႉ ဢမ်ႇထုၵ်ႇလီဢီးလူၽူႈၶဵၼ် – ဝႃႈၼႆ။  

ၸုမ်းတူဝ်တႅၼ်းၵႃႉၶၢႆယႃႈမဝ်းၵမ်ၼႂ်းမိူင်းထႆး မိူဝ်ႈၵူႈပွၵ်ႈၼၼ်ႉ ယၢမ်းလဵဝ် ၶဝ်ႈၵႂႃႇယူႇတႂ်ႈတပ်ႉ သိုၵ်ႉဝႃႉသေ သိုပ်ႇပၼ်ႇၵၢၼ်ဝႆႉ၊ တႃႇၵၢၼ်ၵႃႉၶၢႆယႃႈမဝ်းၵမ်ၼႆႉ ၼွၵ်ႈလိူဝ်သဵၼ်ႈတၢင်း ၼမ်ႉ မႄႈၶူင် မီးဝႆႉထႅင်ႈလၢႆလၢႆသဵၼ်ႈ၊ ဢိင်ၼိူဝ်လွင်ႈၼႆႉ ၽူႈမီးပုၼ်ႈၽွၼ်းဢၼ်ၵဵဝ်ႇၶွင်ႈၶဝ် ထုၵ်ႇလီတိူဝ်းထႅမ်ႁႅင်းၵူတ်ႇထတ်းၵႂႃႇၼႆ တိုၵ်းသူၼ်းလၢတ်ႈပႃးဝႆႉ – သိုဝ်ႇၶၢဝ်ႇ The Nation Thailand ဢွၵ်ႇဝႆႉၼင်ႇၼႆ။

ထၵ်းသိၼ် သျိၼ်ႊၼဝတ်းၼႆႉ ႁပ်ႉဝႆႉပုၼ်ႈၽွၼ်း ပဵၼ်ၽူႈၵိူဝ်းၵုမ် တႃႇႁူဝ်ပဝ်ႈဢႃႊသီႊယၼ်ႊ။ တႄႇႁူဝ်ပီ 2025 ၼႆႉမႃး တီႈလႅၼ်လိၼ်ထႆး – မၢၼ်ႈၼႆႉ ၾၢႆႇၸဝ်ႈၼႃႈတီႈထႆး ၵူတ်ႇထတ်းတီႉ ၺွပ်းလႆႈ ယႃႈမဝ်းၵမ် တိူဝ်းၼမ်မႃးႁႅင်း၊ ထိုင်တီႈလႆႈပိုတ်းယိုဝ်းၵၼ်တင်း ၸုမ်းတေႃႉယႃႈ။

လိူဝ်ၼၼ်ႉ ၼႂ်းႁၢင်ပီ 2024 ပူၼ်ႉမႃးၼႆႉ သိုၵ်းထႆး ၸႂ်ႉသိုၵ်းဝႃႉ ထွႆဢွၵ်ႇတပ်ႉပၢင်သဝ်း 9 တီႈ ဢၼ်မီးတီႈလႅၼ်လိၼ်ထႆး၊ သွင်ၾၢႆႇ ယၢမ်ႈမီးလွင်ႈၶဵင်ႈၶႅင်ၵၼ်မႃး။