ဝၢႆးၵူၼ်းပၢႆႈၽေးသိုၵ်း တီႈဝတ်ႉၶဵဝ်ၶမ်း ၺႃးသင်ႇၶၢႆႉဢွၵ်ႇယဝ်ႉၼၼ်ႉ ယၢမ်းလဵဝ် တီႈဝတ်ႉၼႆႉ ဢမ်ႇမီး ၽႂ်ပႂ်ႉယဝ်ႉလႄႈ ယူႇတီႈ ၸဝ်ႈၶူးတင်း တၵ်ႉၵႃႇၶဝ် ဢွၼ်ၵၼ်မႆႈၸႂ် ၵူဝ်ၶူဝ်းၶွင်ဢၼ်ၵိုတ်းဝႆႉၸိူဝ်းၼၼ်ႉ ႁၢႆလၢႆလူႉသုမ်း ဝႃႈၼႆ။

ဝၼ်းတီႈ 21/05/2025 ၼႆႉ ၵူၼ်းပၢႆႈၽေးသိုၵ်း ၸိူဝ်းမႃးသွၼ်ႈယူႇတီႈဝတ်ႉၶဵဝ်ၶမ်း ဢိူင်ႇတၢင်းၽႄ ဢုမ်ႇတီး ၸႄႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇၼႆႉ ထုၵ်ႇသိုၵ်းတဢၢင်း TNLA ဢွၵ်ႇၶေႃႈပူင်ၸီႉသင်ႇ ႁႂ်ႈၶၢႆႉ ဢွၵ်ႇတင်းမူတ်း တေႃႇထိုင်ဝၼ်းတီႈ 27 ၼႆႉ ႁႂ်ႈယဝ်ႉ ဝႃႈၼႆ။

ၵူၼ်းပိုၼ်ႉတီႈ ဝဵင်းၼွင်ၶဵဝ် လၢတ်ႈတီႈၽူႈတွႆႇႁွၵ်ႈဝႃႈ – “ၵျွင်းၼႆႉ မၼ်းမီးၽြႃးဢိၼ်းသၢၼ်ဝႆႉ 2 သူႇ ၵူဝ် ၶဝ်ယႃႉပႅတ်ႈၵူၺ်းၶႃႈယဝ်ႉ။ လိူဝ်ၼၼ်ႉ ၵျွင်းသဝ်လဵဝ်ၵေႃႈ ၵူဝ်ၶဝ်ဢဝ်ၾႆးၽဝ်ပႅတ်ႈၵူၺ်းယဝ်ႉ ယွၼ်ႉၵျွင်းသဝ်လဵဝ်ၼၼ်ႉသမ်ႉ ဢဝ်မႆႉပႅၼ်ႈႁဵတ်းဝႆႉ။ ၶူဝ်းၶွင်ၼႂ်းၵၢၼ်ႇၼႂ်းၵျွင်း တီႈႁုင်တီႈမိုဝ်ႉမေႃႇဝၢၼ်ႇ ၸိူဝ်းၼႆႉ ၵူဝ်ၶဝ် ၽဵဝ်ႈသိမ်းၵႂႃႇပႅတ်ႈမူတ်းမူတ်းသေ တွႆၵွႆၵူၺ်းယဝ်ႉ လႆႈမႆႈၸႂ်ၶႃႈဢေႃႈ”- ဝႃႈၼႆ။

လိူဝ်ၼၼ်ႉ မႆႈၸႂ်ပႃးထႅင်ႈ ၵူဝ်သိုၵ်းမၢၼ်ႈၶဝ် မႃးပွႆႇမၢၵ်ႇသေ ၵူဝ်ဝိႁၢရ်ၵၢၼ်ႇၵျွင်းလူႉၵွႆၸွမ်း။ ယွၼ်ႉဝႃႈ ထမ်ႇမယူင်ႇ ၸိူဝ်းၼႆႉၵေႃႈ တိုၵ်ႉၵေႃႇသၢင်ႇဝႆႉ ဢၼ်ၶႅမ်ႉမၼ်းၵူၺ်း။ ယဝ်ႉၵေႃႈ ၶူဝ်းၶွင်ပီႈၼွင်ႉပၢႆႈၽေး ၵေႃႈ တိုၵ်ႉၵိုတ်းဝႆႉတီႈဝတ်ႉထႅင်ႈ ၵမ်ႈၽွင်ႈယူႇ။

သိုၵ်းတဢၢင်း TNLA ၼႆႉ မၵ်းၶၢၼ်းၶၢဝ်းယၢမ်း 2 ထိုင် 3 ဝၼ်းသေ ၸႂ်ႉၶၢႆႉဢွၵ်ႇဝတ်ႉႁႂ်ႈယဝ်ႉမူတ်းၼႆ လႄႈ ၵူၼ်းမိူင်းၵမ်ႈၽွင်ႈ ဢမ်ႇတၼ်းလႆႈတေႃႉၶူဝ်းဢွၵ်ႇ မၢင်ၵေႃႉ တေႃႉ ဢွၵ်ႇယဝ်ႉသေတႃႉ ဢမ်ႇၸၢင်ႈ ဢဝ်ၶူဝ်းၶွင်ၵႂႃႇဝႆႉတီႈလႂ် ယွၼ်ႉလႆႈၼႅတ်ႈတေႃႉပၢႆႈၵၼ် ၼႆယဝ်ႉ။

“ၵူၼ်းငိူင်ႉဝႄႈဝႆႉၼၼ်ႉ ၵမ်ႈၽွင်ႈၵႂႃႇဝႆႉၶူဝ်းၶွင် တီႈၼႂ်းဝတ်ႉသေ ဢမ်ႇလႆႈမႃးတေႃႉဢဝ်ၵႂႃႇၵေႃႈမီး ၵမ်ႈ  ၽွင်ႈပၢႆႈၵႂႃႇဝဵင်းလိူဝ်ႇ၊ ပၢင်ႇဢူႈလူင်၊ ၼမ်ႉၸၢင် ထုင်ႉပၢင်ႇလႅင်းသႂ် ၸိူဝ်းၼႆႉ။ ယွၼ်ႉယူႇၵႆသေ ဢမ်ႇမီး ၶၢဝ်းယၢမ်းပွၵ်ႈမိူဝ်းဢဝ်ၶူဝ်းၶွင် ယွၼ်ႉၶဝ်ပၼ်ၶၢဝ်းယၢမ်း 2-3 ဝၼ်းၵူၺ်းလႄႈ ႁဝ်းၶႃႈ မႆႈၸႂ်ဢေႃႈတင်း  ႁိူၼ်းယေးတႄႉ”- ၵူၼ်းပၢႆႈၽေးသိုၵ်း ဝဵင်းၼွင်ၶဵဝ် လၢတ်ႈတီႈၽူႈတွႆႇႁွၵ်ႈၼင်ႇၼႆ။

ၵူၼ်းပၢႆႈၽေးသိုၵ်း ၸိူဝ်းၼႆႉ ၵမ်ႈၽွင်ႈ ပၢႆႈၵႂႃႇတၢင်ႇဝဵင်း မၢင်ၸိူဝ်းဢမ်ႇပွင်ႇပဵၼ်လႆႈသေ ပၢႆႈယူႇၸွမ်းၼႂ်း ႁႆႈၼႂ်းသူၼ်ၵေႃႈမီး။ ယၢမ်းလဵဝ်သမ်ႉ ပဵၼ်ၶၢဝ်းလူဝ်ႇဢဝ်လုၵ်ႈဢွၼ်ႇ ၶိုၼ်းႁူင်းႁဵၼ်းယဝ်ႉလႄႈ မၢင်ၸိူဝ်း လႆႈဢဝ်လုၵ်ႈဢွၼ်ႇပၢႆႈၵႂႃႇတၢင်းဝဵင်းပၢင်ႇဢူႈလူင်လႄႈ မိူင်းတႆးပွတ်းၸၢၼ်း ၸိူဝ်းၼႆႉ တႃႇလုၵ်ႈဢွၼ်ႇ တေလႆႈၶိုၼ်ႈႁူင်းႁဵၼ်း ၼႆယဝ်ႉ။

“ၶူဝ်းၶွင်ႁိူၼ်းယေး ဢၼ်ဢမ်ႇၸၢင်ႈဢဝ်မႃးသမ်ႉ ၵိုတ်းဝႆႉၸၢၵ်ႈထႆသူၼ်၊ ထူဝ်ႈ၊ ၵႃးလူင်တၢင်ႇဢွႆႈ ၸိူဝ်းၼႆႉ။ ဢၼ်ႁဝ်းၶႃႈ ပၢႆႈမႃးၼႆႉ လႆႈမႃးၶူဝ်းၸႂ်ႉဢိတ်းဢွတ်းၵူၺ်း။ ယဝ်ႉၵေႃႈ ႁဝ်းမီးလုၵ်ႈဢွၼ်ႇ ၶိုၼ်ႈၵျွင်းထႅင်ႈလႄႈ လႆႈၶၢႆႉပၢႆႈမႃးယူႇဝႆႉတၢင်းပွတ်းၸၢၼ်းၼႆႉဢေႃႈ”- ၵူၼ်းပၢႆႈၽေးသိုၵ်း ၼၢင်းယိင်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈၼင်ႇၼႆ။

တႃႇတေပၢႆႈၼိုင်ႈၵမ်းၼႆႉ ၵူၼ်းပၢႆႈၽေးၶဝ် လႆႈၸႂ်ႉငိုၼ်းႁူဝ်သႅၼ်ပျႃးမၼ်း ၸဵမ်ၵႃႈၼမ်ႉမၼ်းရူတ်ႉၵႃး ၵႃႈၵိၼ်ယႅမ်ႉ ၸိူဝ်းၼႆႉ။ ၽွင်းၶၢဝ်းၼႆႉသမ်ႉ ပဵၼ်ၶၢဝ်းၾူၼ်လႄႈ တႃႇတေပၢႆႈၵႂႃႇ တၢင်ႇဝၢၼ်ႈတၢင်ႇဝဵင်းၵေႃႈ ဢမ်ႇငၢႆႈယဝ်ႉလႄႈ ၵမ်ႈၽွင်ႈ ဢွၼ်ၵၼ်ထူပ်းလွင်ႈယၢပ်ႇဝႆႉၵေႃႈမီး။

“မၼ်းလူဝ်ႇမီးငိုၼ်းႁူဝ်သႅၼ် တႃႇၵႃႈၸရိတ်ႈတၢင်းလႄႈ ၵၢၼ်ၵိၼ်ယႅမ်ႉ မႃးၶၢဝ်းတၢင်းၵႆၵႃႈႁိုဝ်ၵေႃႈ မၼ်းတိူဝ်းသဵင်ႈၼမ်ႉမၼ်းၸၢၵ်ႈၼမ် လိူဝ်သေၼၼ်ႉ မီးၵဵတ်ႉလၢၼ်ႇထႅင်ႈ ၼိုင်ႈတီႈလႂ် လႆႈပၼ် 4-5 ႁဵင် 1 မိုၼ်ႇ ၸိူဝ်းၼႆႉ။ လႆႈပၼ်ၵူႈၸုမ်းယဝ်ႉ မၼ်းတိုၼ်းဢမ်ႇလွတ်ႈလႆႈ။ ၽိူဝ်ႇမႃးထိုင်တီႈလိုဝ်ႈၵေႃႈ လႆႈ ပၼ်ၵေႃႈ ၵႃႈၶၢတ်ႈႁိူၼ်းထႅင်ႈ 2-3 သႅၼ် တေႃႇလိူၼ် ယၢပ်ႇၽိုတ်ႇဢေႃႈ”- ၵူၼ်းပၢႆႈၽေး ဝဵင်းၼွင်ၶဵဝ် ၵေႃႉၼိုင်ႈလၢတ်ႈ။

သၢႆသဵၼ်ႈတၢင်း ၵူၼ်းပၢႆႈၽေးသိုၵ်း တီႈဝဵင်းၼွင်ၶဵဝ် ဢၼ်ပၢႆႈၵႂႃႇတၢင်းပၢင်ႇဢူႈလူင်ၼၼ်ႉ တေဢွၼ် ၵၼ်မႃးတၢင်း ဢုမ်ႇတီး တီႈၼၼ်ႈသမ်ႉ ၺႃးသိုၵ်းမၢၼ်ႈ ၸႅတ်ႈထၢမ်ႁၢဝ်ႈႁႅင်း တီႈႁိမ်းၵဵတ်းသိုၵ်းမၢၼ်ႈ ၼၼ်ႉ မီးဝႆႉဝၢၼ်ႈၵုင်းလူင်လႄႈ ၵူၼ်းပၢႆႈၽေးၶဝ် လႆႈၸၢင်ႈရူတ်ႉၵႃး ၵူၼ်းဝၢၼ်ႈၼၼ်ႉသေ တေႃႇသူင်ႇလတ်းၽၢၼ်ႇၵဵတ်ႉသိုၵ်းမၢၼ်ႈ ၼင်ႇႁိုဝ် တေ ဢမ်ႇၺႃးၸႅတ်ႈထၢမ် ၼႆယဝ်ႉ။