တင်ႈတႄႈဝၼ်းထိ 05/01/1996 မႃးတေႃႇထိုင် 26/01/1996 ၼႆႉ ၸုမ်းယိပ်းၵွင်ႈၵၢင်ႇ MTA (ဢၼ်ဢဵၼ်ႁႅင်းယႂ်ႇလိူဝ်ပိူၼ်ႈသုတ်း ၼႂ်းၸိုင်ႈတႆးလႄႈ ၼႂ်းမိူင်းႁူမ်ႈတုမ် ၵႃႈၵွၼ်ႇပူၼ်ႉမႃး) လႆႈယွမ်းတူဝ် ဝၢင်းၶိူင်ႈပၼ် ၸုမ်းသိုၵ်းၼဝတမႃး တီႈၼိုင်ႈယဝ်ႉတီႈၼိုင်ႈ ၸုပ်ႈၼိုင်ႈယဝ်ႉ ၸုပ်ႈၼိုင်ႈၸုမ်းၼိုင်ႈယဝ်ႉ။ ၸုမ်းၼိုင်ႈႁူမ်ႈတင်းသဵင်ႈ တေမီးႁႅင်းၵူၼ်းႁႅင်းၵွင်ႈမိုၼ်ႇပၢႆပၢႆယူႇယဝ်ႉ။
ၵူၺ်းၵႃႈ ၸိူဝ်းဢၼ် ဢမ်ႇၶၢမ်ႇၶႂ်ႈယွမ်းတူဝ်ဝၢင်းၶိူင်ႈပၼ်မၢၼ်ႈလႃးလႃးၵေႃႈ သမ်ႉမီးလႄႈ မိူဝ်ႈဝၼ်းထိ 30/01/1996 ပူၼ်ႉမႃးၼႆႉ ဢၼ်ပဵၼ် ၸဝ်ႈႁၢၼ်ယွတ်ႈသိုၵ်း ဢွၼ်ႁူဝ်ႁႅင်းသိုၵ်း မွၵ်ႈ 7-8 ပၢၵ်ႇ လုၵ်ႉတီႈၼႂ်းၼမ်ႉပွတ်းလိၼ် တွၼ်ႈၾၢႆႇဢွၵ်ႇၶူင်း တၢင်းမိူင်းထႃးမိူင်းၼႅၼ်သေ လႆႈသွတ်ႉသႅတ်ႉ သွင်ႉဢိဝ် ဢွၵ်ႇပူၼ်ႉၼႂ်းတူင်ႇသိုၵ်းမၢၼ်ႈ (ဢၼ်ဢဝ်တီႈယူႇပၵ်းသဝ်း မီးၸွတ်ႇတူဝ်ႈမၢၵ်ႇမိူဝ်လူင် ၵႂႃႇၼႂ်းၼႃႈတီႈပူတ်းပွႆႇၶွင် MTA ၵူႈပွၵ်ႈ) လွမ်လႅမ်ၶၢမ်ႈၶူင်း ၵႂႃႇယဝ်ႉလႆႈႁူႉငိၼ်းၶၢဝ်ႇငၢဝ်းမိူဝ်ႈ 02/02/1996 ဝႃႈၼင်ႇၼႆ။
ၸုမ်းသိုၵ်း ဢၼ်ဢမ်ႇယွမ်းဝၢင်းၶိူင်ႈပၼ်မၢၼ်ႈသေ သွင်ႉဢိဝ်ဢွၵ်ႇၵႂႃႇၼႆႉ တေၵႂႃႇတၢင်းလႂ် မီးယူႇတီႈလႂ် ဢမ်ႇလႆႈႁူႉၸွမ်းသေတႃႉ ၸွမ်းၼင်ႇဢၼ်ၵူၼ်း ၵမ်ႈၼမ် လၢမ်းထၢင်ႇ ၼၼ်ႉတႄႉ လႅပ်ႈတေၵႂႃႇၵပ်းသိုပ်ႇၶဝ်ႈၸူးႁူမ်ႈႁွမ်း ၸုမ်းသိုၵ်း ၸဝ်ႈၸၢႆးယီႈ (တပ်ႉသိုၵ်းၸိူဝ်ႉၸၢတ်ႈ ၸိုင်ႈတႆး SSNA) ၶဝ် တၢင်းပွတ်းတွၼ်ႈၵဵင်းလူမ်း ၵဵင်းၶမ်း ၶူဝ်လမ် ၵဵင်းတွင်း မိူင်းပၼ်ႇ ၸိူဝ်းၼႆယဝ်ႉ။
လွင်ႈတၢင်းဢၼ်ၶဝ်လႆႈၽၢတ်ႇဢွၵ်ႇသွင်ႈၵိဝ်ၵႂႃႇၼႆႉ လႅပ်ႈတေၵွပ်ႈဝႃႈ ဢမ်ႇၶႂ်ႈႁႂ်ႈၸိူဝ်ႉၽၼ်းလၢႆး လုၵ်ႉၽိုၼ်ႉယိပ်းၵွင်ႈၵၢင်ႇႁၢႆလၢႆ ၸူဝ်ႈယိူင်းမၢႆၸိူဝ်ႉၸၢတ်ႈ ပႆႇႁွတ်ႈသူႇတဝ်ႈ၊ ၵွပ်ႈဢမ်ႇၵမ်ႉထႅမ်ႇပၼ် လႆႈၸွမ်းၼင်ႇသဵၼ်ႈတၢင်းလၢႆးႁဵတ်း MAT သေ ႁၼ်ထိုင်ယုမ်ႇယမ်ဝႃႈ MAT ဢမ်ႇၸႂ်ႈၸုမ်းတၢင်တူဝ် မိူင်းတႆးယဝ်ႉ၊ ၵွပ်ႈထုၵ်ႇလႆႈယိပ်းမၼ်ႈသိုပ်ႇ ပုတ်ႈႁဵတ်းၸွမ်းသဵၼ်ႈတၢင်းယိူင်းမၢႆ ၶွင်ၸွမ်ပွင်ၸိုင်ႈ ၸဝ်ႈၵွၼ်းၸိူင်းၸိူဝ်း ၼႆႉယဝ်ႉ။
ဢဵၼ်းဢၢၼ်းၽႅၼ်ၵၢၼ် ပေႃႇလသီႇၶဝ် တေပဵၼ်သင်မီးသင်ဢၼ်ဝႃႈၼၼ်ႉ ဢမ်ႇပႆႇလႆႈႁူႉငိၼ်းတႅတ်ႈတေႃး တဵမ်ထူၼ်ႈလီငၢမ်းသေတႃႉၵေႃႈ ဢၼ်လၢမ်းထၢင်ႇၼပ်ႉႁၼ်တႄႉ လႅပ်ႈတေဢမ်ႇပူၼ်ႉ သေၶေႃႈမၢႆပႃႈတႂ်ႈၸိူဝ်းၼႆႉႁိုဝ် ဢမ်ႇႁူႉ …….
- ၵႂႃႇႁႃၵပ်းသိုပ်ႇ ၵူႈမူႇၵူႈၸုမ်း ဢၼ်ပဵၼ်ၸုမ်းဢဵၼ်ႁႅင်းၸိူဝ်ႉၸၢတ်ႈၵူၼ်းမိူင်းတႆးၵူႈ ၸၢဝ်း ၶိူဝ်း – လႄႈၶတ်းၸႂ် ၵေႃႇသၢင်ႈလွင်ႈၽွမ်ႉႁူမ်ႈၸိူဝ်ႉၸၢတ်ႈထႅင်ႈ။
- ပူၵ်းတင်ႈလွၵ်းပိူင်တီႇမူဝ်ႇၶရေႇသီႇလႄႈ လွင်ႈႁူမ်ႈႁွမ်းၵၼ် ဢွၼ်ႁူဝ်ဢိၵ်ႇ တင်းၵႅတ်ႇၶႄ ပႂ်ႉပႃးထိင်းသိမ်းလွင်ႈသုၼ်ႇလႆႈၵူၼ်း။
- ၵမ်ႉထႅမ်ၶဝ်ႈပႃးလႆႈၸႂ်ၸွမ်း လွင်ႈၵမ်ႇၽႃႇသၢၼ်ၶတ်းၽဵဝ်းမူၺ်ႉယႃႈမဝ်းၵမ်။
- ၵုၺ်ႉပိုတ်ႇငၢင်ႉၼႄလႄႈ ထုၵ်းယွၼ်းတိုၵ်းဢဝ်ၶုၼ်းသုၼ်ႇလႆႈ လိၵ်ႈႁူမ်ႈမၢႆပၢင်လူင်။
- ၵၢၼ်ပူၵ်းပွင်ၽဝႃႉလွင်ႈယူႇၵိၼ်ၵူၼ်းမိူင်းႁႂ်ႈၶႅၼ်းၸႂ်ၶိုၼ်ႈယႂ်ႇ။
- ၸိုင်ႈတႆးတင်းတွၼ်ႈဢေးသျႃးၸဵင်ႇၸၢၼ်းဝၼ်းဢွၵ်ႇလႄႈ လုမ်ႈၾႃႉႁႂ်ႈၵတ်းယဵၼ်။
(ၶေႃႈမုလ်း ပပ်ႉၵွၼ်းၶေႃ မၢႆ – 139 ပီ 1996)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ