သိုၵ်းမၢၼ်ႈ ယိုတ်းမိူင်းၼႆႉ ဢဝ်ဢွင်ႈတီႈႁူင်းႁဵၼ်း၊ ႁူင်းယႃ၊ ဢွင်ႈတီႈၵူၼ်းၸူႉတုမ်ၵၼ် ဝႆႉပဵၼ် ပဝ်ႉမၢႆသိုၵ်းသေ ၸႂ်ႉၶိူင်ႈမိၼ်ပွႆႇမၢၵ်ႇယိုဝ်းတိုၵ်းႁၢဝ်ႈႁႅင်းလႄႈ ၵၢၼ်ပိုတ်ႇႁူင်းႁဵၼ်း ပၢႆးပၺ်ႇၺႃႇ ၸူဝ်ႈၵၢင် ဢၼ်ယူႇတီႈႁွင်ႈၵၢၼ်ပၢႆးပၺ်ႇၺႃႇ လူင်ပွင်ၸိုင်ႈၽွမ်ႉႁူမ်ႈၸိူဝ်ႉၸၢတ်ႈ NUG ပိုတ်ႇဝႆႉၼၼ်ႉ တေပိၵ်ႉဢိုတ်းဝႆႉ ၸူဝ်ႈၶၢဝ်း ဝႃႈၼႆ။

ႁူင်းႁဵၼ်းပၢႆးပၺ်ႇၺႃႇ ပိုၼ်ႉထၢၼ်၊ ႁူင်းႁဵၼ်းပၢႆးပၺ်ႇၺႃႇၸၼ်ႉသုင်လႄႈ ႁူင်းႁဵၼ်းပၢႆးပၺ်ႇ ၺႃႇ ၵၢၼ်ႁႃၵိၼ်လဵင်ႉတွင်ႉ ဢၼ်ယူႇတီႈ NUG ပိုတ်ႇဝႆႉၸိူဝ်းၼၼ်ႉ တေၵိုတ်းယင်ႉဝႆႉတင်း သဵင်ႈ။ လွင်ႈၼႆႉ ၼင်ႇႁိုဝ် လုၵ်ႈဢွၼ်ႇလုၵ်ႈႁဵၼ်း၊ မေႃသွၼ်လႄႈ ၵူၼ်းမိူင်းတေဢမ်ႇမီးလွင်ႈ မၢတ်ႇၸဵပ်းလူႉတၢႆၼၼ်ႉ ၸင်ႇလႆႈၵိုတ်းယင်ႉဝႆႉၼႆ – ပိုၼ်ၽၢဝ်ႇဢွၵ်ႇဝႆႉ ပဵၼ်တၢင်းၵၢၼ်ၼင်ႇ ၼႆ။

ဝၢႆးလင် သိုၵ်းမၢၼ်ႈ ယိုတ်းမိူင်းမႃးၼႆႉ ၼင်ႇႁိုဝ် လုၵ်ႈဢွၼ်ႇလုၵ်ႈႁဵၼ်း တေဢမ်ႇႁၢမ်းသုၼ်ႇ ၵၢၼ်ႁဵၼ်းပၢႆးပၺ်ႇၺႃႇၼၼ်ႉ ယူႇတီႈ ႁွင်ႈၵၢၼ်ပၢႆးပၺ်ႇၺႃႇ တႂ်ႈ NUG ၸႂ်ႉလွၵ်းလၢႆး လၢႆသႅၼ်း သေ ပူင်သွၼ်ပၼ်လုၵ်ႈႁဵၼ်းလုၵ်ႈဢွၼ်ႇမႃး။

ယၢမ်းလဵဝ် သိုၵ်းမၢၼ်ႈယိုတ်းမိူင်းၼႆႉ ၸႂ်ႉၶိူင်ႈမိၼ်တိုၵ်း၊ ၶိူင်ႈၵွင်ႈလူင်သေ ဢဝ်ၵူၼ်းမိူင်းဝႆႉ ပဵၼ်ပဝ်ႉမၢႆသိုၵ်း ယိုဝ်းတိုၵ်း၊ လွင်ႈၼႆႉ ပဵၼ်လွင်ႈပူၼ်ႉပႅၼ် ပိူင်သိုၵ်း War crimes against humanity ႁၢဝ်ႈႁႅင်းယဝ်ႉ။

ၼႂ်းလိူၼ်မေႊၼႆႉၵူၺ်း သိုၵ်းမၢၼ်ႈ ၸႂ်ႉၶိူင်ႈမိၼ် ပွႆႇမၢၵ်ႇသႂ်ႇ ႁူင်းႁဵၼ်း တီႈဝဵင်းမိၼ်းၵိၼ်းလႄႈ တီႇပႄးယိၼ်း လုၵ်ႈႁဵၼ်းလုၵ်ႈဢွၼ်ႇ မၢတ်ႇၸဵပ်းလူႉတၢႆ ၼပ်ႉႁူဝ်သိပ်းၵေႃႉ ႁူင်းႁဵၼ်းလႄႈ ႁိူၼ်းယေးၵေႃႈ လူႉၵွႆတင်းၼမ်။