ယၢမ်းလဵဝ် တိုၵ်ႉထိုင်ၶၢဝ်းႁူဝ်ၾူၼ်ၵူၺ်း တီႈလႅၼ်လိၼ်တႆး – ထႆး ဝဵင်းတႃႈၶီႈလဵၵ်းၼႆႉ ၵူၼ်းမိူင်းထူပ်းၽေးၼမ်ႉထူမ်ႈ ဢမ်ႇယွမ်း 3 ပွၵ်ႈယဝ်ႉ။

မိူဝ်ႈၼႆႉ ဝၼ်းတီႈ 24/05/2025 ယၢမ်းၵၢင်ၼႂ် ၾူၼ်တူၵ်းႁႃႇယႂ်ႇလႄႈ ၼမ်ႉလုပ်ႇၼွင်းထူမ်ႈ တီႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း ႁၢဝ်ႈႁႅင်း။

ၵူၼ်းပိုၼ်ႉတီႈ ဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ -“တၢင်းပွၵ်ႉသၼ်သၢႆးၼၼ်ႉၵေႃႈ ၼမ်ႉၼႆႉ လႆႈဝႃႈထူမ်ႈႁႅင်းပဵၼ်တီႈဝႆႉဢေႃႈ။ ဢၼ်ပဵၼ်ပိုၼ်ႉတီႈတႅမ်ႇသေ ၼမ်ႉထူမ်ႈၼမ်ၼႆႉ ပဵၼ်တၢင်းပွတ်း တႃႈလေႃႉ၊ ပုင်းထုၼ်၊ မၢၵ်ႇၵႃႇႁူဝ်ၶမ်း ၸိူဝ်းၼႆႉ။ ဢၼ်ၼမ်ႉထူမ်ႈပွၵ်ႈၼႆႉ ပဵၼ်ယွၼ်ႉၾူၼ်မႃး ပွၵ်ႈၼိုင်ႈၵႅပ်ႈၼိုင်ႈၵူၺ်းဢေႃႈၼႆႉ။ သင်ဝႃႈ ၾူၼ်သိင်းတင်းဝၼ်းတင်းၶိုၼ်း မိူၼ်ၼင်ႇၵူႈပွၵ်ႈတႄႉ ၶႃႈၶဝ်ယင်းလွမ်မႆႈၸႂ်ၵူဝ်ဝႆႉဢေႃႈ ပေႃးပဵၼ်ၸိူင်ႉၼၼ်မႃးတႄႉ”- ဝႃႈၼႆ။

ဢၼ်ၼမ်ႉထူမ်ႈပွၵ်ႈၼႆႉ တုမ်ႉတိူဝ်ႉပႃးၵၢၼ်ၶၢမ်ႈလႅၼ်လိၼ် ၸိူဝ်းၼႆႉ ယွၼ်ႉဝႃႈ ၼမ်ႉမႄႈသၢႆၼွင်း ၶိုၼ်ႈထိုင်ၶူဝ်လႄႈ ယင်းလႆႈပိၵ်ႉဢိုတ်းၵၢၼ်လတ်းၶၢမ်ႈၵႂႃႇမႃးယူႇ ၵႅပ်ႉၼိုင်ႈ။

“မိူဝ်ႈဢွၼ်တၢင်းၼၼ်ႉ ၼမ်ႉၼႆႉ ပေႃးမၼ်းၶိုၼ်ႈၵေႃႈ မၼ်းဢမ်ႇထိုင်ၶူဝ် ပွၵ်ႈၼႆႉသမ်ႉ ၼမ်ႉၼႆႉ သမ်ႉပေႃးမႃးတဵမ်ဝႆႉတီႈ ၾၢႆႇၵၢင်တွင်ႉၶူဝ်လူင်ၼၼ်ႉၵမ်းလဵဝ်ၼႃႇ။ ဢဝ်ၼမ်ႉၼႆႉ ၵၼ်ႈပႅတ်ႈသေ ၸင်ႇပိၵ်ႉၽၵ်းတူလႅၼ်လိၼ်ဝႆႉၵမ်းၼိုင်ႈဢေႃႈ။ ဢၼ်ၶဝ်ပိၵ်ႉၼႆႉ ပဵၼ်ယွၼ်ႉယုၵ်းယၢၵ်း မႃးၶၢမ်ဝႆႉ တီႈၶူဝ်။ ပႃးၸဵမ်ပုတ်းမႆႉပုတ်းတွၵ်ႇ ၸိူဝ်းၼႆႉ။ ၵွပ်ႈပိူဝ်ႈလူဝ်ႇဢဝ်ၸိူဝ်းၼၼ်ႉဢွၵ်ႇလႄႈ ပေႃးဢဝ်ဢွၵ်ႇယဝ်ႉ ၸင်ႇၶိုၼ်းပိုတ်ႇၶၢမ်ႈလႅၼ်လိၼ်ၶိုၼ်း မိူဝ်ႈလဵဝ်တႄႉ ပိုတ်ႇၶိုၼ်းပၼ်ၵူၼ်းၶၢမ်ႈၵႂႃႇမႃးလႆႈယဝ်ႉ ၵူၺ်းၵႃႈ ရူတ်ႉၵႃးတႄႉ ပႆႇလႆႈ ၵမ်းလဵဝ်”- ၵူၼ်းပိုၼ်ႉတီႈ ဝဵင်းတႃႈၶီႈလဵၵ်း သိုပ်ႇလၢတ်ႈၼင်ႇၼႆ။

ဝဵင်းတႃႈၶီႈလဵၵ်းၼႆႉ ပဵၼ်ဝဵင်းတိတ်းၸပ်းလႅၼ်လိၼ် ၵၢၼ်ႁႃၵိၼ်လဵင်ႉတွင်ႉလိူင်ႇၼမ်သေတႃႉ ယွၼ်ႉထူပ်းၽေးၼမ်ႉထူမ်ႈၵူႈပီလႄႈ တုမ်ႉတိူဝ်ႉၵၢၼ်ပၢႆးမၢၵ်ႈမီး ၵူၼ်းမိူင်းပိုၼ်ႉတီႈၶဝ်တင်းၼမ် လွင်ႈၼႆႉ ၾၢႆႇၸဝ်ႈၼႃႈတီႈတင်းသွင်ၾင်ႇၵေႃႈ ဢမ်ႇၵႄႈလိတ်ႈပၼ်ႁႂ်ႈထိုင်တီႈထိုင်လႅၼ် – ဝႃႈၼႆ။

ၵူၼ်းၼုမ်ႇပိုၼ်ႉတီႈ ဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ – “ၵၢၼ်ၵႃႉတၢင်းၶၢႆၸိူဝ်းၼႆႉ လႆႈမႆႈ ၸႂ်ဢေႃႈ ပေႃးၶၢႆတဵမ်မိူၼ်ၵၢတ်ႇတႃႈလေႃႉၼႆႉ မၼ်းယၢပ်ႇၼႃႇ။ လူင်ပွင်ၸိုင်ႈၶဝ်ၵေႃႈ ႁဵတ်းယူႇမိူဝ်ႈ ၼႃႈၾူၼ်ၼႆႉ ၶဝ်တေႁႄႉဝႆႉၼမ်ႉ ႁဵတ်းတႅၼ်ႈႁႄႉၼမ်ႉတင်းသွင်ၾၢႆႇ။ ဢၼ်ႁၼ်ၼမ်ႉႁၼ်တူဝ် မၼ်းတႄႉ မီးဢၼ်ၼႆႉၵူၺ်း။ ၼမ်ႉမႄႈသၢႆၼႆႉ တိုၼ်ႈႁႅင်းၼႃႇယဝ်ႉလႄႈ တေမႄးၶုတ်းၶိုၼ်းၼႆၵေႃႈ ဢမ်ႇႁၼ်ၶဝ်ၶုတ်းၵႃႈႁိုဝ် ၶႃႈဝူၼ်ႉဝႃႈလၢႆးၵႄႈၶၢႆမၼ်းတႄႉ ပႆႇထုၵ်ႇ”- ဝႃႈၼႆ။

ၼႂ်းပီၼႆႉၵူၺ်း တီႈဝဵင်းတႃႈၶီႈလဵၵ်းၼႆႉ ထူပ်းၽေးၼမ်ႉထူမ်ႈ မိူဝ်ႈႁၢင်လိူၼ်ဢေႊပရိူဝ်ႊလႄႈ မိူဝ်ႈဝၼ်းတီႈ 21/05/2025 ၼႆႉမႃးသွင်ပွၵ်ႈယဝ်ႉ သင်ႁူမ်ႈပႃး မိူဝ်ႈၼႆႉ ဝၼ်းတီႈ 24 ၸိုင် မီးသၢမ်ပွၵ်ႈယဝ်ႉ။

မိူဝ်ႈလိူၼ်သႅပ်ႊထႅမ်ႊပိူဝ်ႊ ပီ 2024 ၼၼ်ႉၵေႃႈ ယွၼ်ႉၾူၼ်တူၵ်းထပ်ၵၼ်လၢႆဝၼ်းသေ ၼမ်ႉလုပ်ႇၼွင်းထူမ်ႈႁႅင်း ၵူၼ်းမိူင်းလူႉသုမ်းၶူဝ်းၶွင်ႁိူၼ်းယေးတင်းၼမ်လၢႆ တေႃႇထိုင်ယၢမ်းလဵဝ် ၵမ်ႈၽွင်ႈ ယင်းပႆႇလႆႈပူၵ်းပွင်လုမ်းလႃးၶိုၼ်း။ ယွၼ်ႉၼၼ် ၶၢဝ်းၾူၼ်ပီၼႆႉ ၵူၼ်းပိုၼ်ႉတီႈတႄႉ ဢွၼ်ၵၼ်မႆႈ ၸႂ်ၵူဝ်ၼမ်ႉထူမ်ႈႁႅင်းလိူဝ်ပီၵၢႆ ၼႆယဝ်ႉ။