သိုၵ်းမၢၼ်ႈ ဢွၵ်ႇလိၵ်ႈပိုၼ်ၽၢဝ်ႇ ႁၢမ်ႈၼၢင်းမေႃယႃလုမ်းလႃး (Nurse) မိူင်းမၢၼ်ႈ တွပ်ႇလိၵ်ႈ တႃႇၵႂႃႇႁဵတ်းၵၢၼ်မိူင်းသိင်ႊၵပူဝ်ႊ ၾၢႆႇတၢင်းသိုၵ်းမၢၼ်ႈ တေဢမ်ႇဢွၵ်ႇပၼ်ဝႂ် Transcript Letter လႃးလႃးယဝ်ႉၼႆလႄႈ ႁဵတ်းႁႂ်ႈ ၼၢင်းမေႃယႃ ၸိူဝ်းႁၢင်ႈႁႅၼ်း တႃႇဢွၵ်ႇႁဵတ်းၵၢၼ် ၼွၵ်ႈမိူင်းၼၼ်ႉ ထူပ်းတၢင်းယၢပ်ႇၽိုတ်ႇ ဝႃႈၼႆ။
ၼၢင်းမေႃယႃလုမ်းလႃး ဢၼ်လႆႈႁပ်ႉဝႂ် Diploma လႄႈ Bachelor ပွႆႉမိူင်းမၢၼ်ႈဝႆႉၼၼ်ႉ ပေႃးၵႂႃႇ ႁဵတ်းၵၢၼ် တီႈမိူင်းသိင်ႊၵပူဝ်ႊၼႆ တေလႆႈပဵၼ်ၵူၼ်းၸွႆႈၼၢင်းမေႃယႃလုမ်းလႃး မိူင်းၼၼ်ႉ ဢွၼ်တၢင်း 2 ပီ။ ဝၢႆးၼၼ်ႉ တေလႆႈသိုပ်ႇႁဵၼ်းလိၵ်ႈတွပ်ႇလိၵ်ႈထႅင်ႈ 2 ပီ။ တႃႇတွပ်ႇလိၵ်ႈ 2 ပီၼၼ်ႉ တၵ်းလႆႈမီးလိၵ်ႈ Transcript Letter ဢၼ်ၾၢႆႇတၢင်းမိူင်းမၢၼ်ႈ ဢွၵ်ႇပၼ်။ ဝၢႆးလင် တွပ်ႇ လိၵ်ႈယဝ်ႉ လူင်ပွင်ၸိုင်ႈမိူင်းသိင်ႊၵပူဝ်ႊ ၸင်ႇႁပ်ႉပဵၼ်ၼၢင်းမေႃယႃလုမ်းလႃး မိူင်းသိင်ႊၵပူဝ်ႊ ပဵၼ်တၢင်းၵၢၼ်။
သိုၵ်းမၢၼ်ႈၼႆႉ ၼွၵ်ႈလိူဝ်ဢမ်ႇဢွၵ်ႇဝႂ် Transcript Letter ပၼ်ယဝ်ႉ ယင်းဢွၵ်ႇၶေႃႈၸီႉသင်ႇဝႃႈ လုမ်းတၢင်မၢၼ်ႈ ဢၼ်ၵႂႃႇမီးၼွၵ်ႈမိူင်း ႁၢမ်ႈတေႃႇဢႃယုဝႂ်ၶၢမ်ႈမိူင်း ပၢတ်ႉသပွတ်ႇ ၼၢင်းမေႃယႃ လုမ်းလႃးမိူင်းမၢၼ်ႈ ၸိူဝ်းၵႂႃႇမီးၼွၵ်ႈမိူင်းၼၼ်ႉ။ သင်ဝႃႈ ၶႂ်ႈတေႃႇဢႃယုဝႂ်ၶၢမ်ႈမိူင်း တၵ်းလႆႈပွၵ်ႈမႃးမိူင်းမၢၼ်ႈသေ မႃးယိုၼ်ႈယွၼ်းလိၵ်ႈၵမ်ႉတီႈႁွင်ႈၵၢၼ် ၽွင်းလူင် ၾၢႆႇပၢႆးယူႇလီသေ ၸင်ႇ တေလႆႈၶိုၼ်းယိုၼ်ႈဝႂ်ၶၢမ်ႈမိူင်းမႂ်ႇမႂ်ႇၼႆ ယူႇတီႈ လုမ်းတၢင်ၵေႃႈ လႆႈပၼ်ၾၢင်ႉ ၼၢင်းမေႃယႃ လုမ်းလႃးမိူင်းမၢၼ်ႈ ၸိူဝ်းႁွတ်ႈထိုင်ႁဵတ်းၵၢၼ်ဝႆႉ တီႈၼွၵ်ႈမိူင်းဝႆႉၼင်ႇၼႆ။
ယၢမ်းလဵဝ် ၵူၼ်းႁဵတ်းၵၢၼ် ၾၢႆႇပၢႆးယူႇလီ မိူင်းမၢၼ်ႈ ထုၵ်ႇသိုၵ်းမၢၼ်ႈ ၵမ်ၵိၼ်းလွင်ႈဝတ်းဝႂ် ၶၢမ်ႈမိူင်း တႃႇတေဢွၵ်ႇၼွၵ်ႈမိူင်းဝႆႉႁၢဝ်ႈႁႅင်း။ ၸိူဝ်းတေၵႂႃႇႁဵတ်းဝႂ်ၶၢမ်ႈမိူင်းမႂ်ႇမႂ်ႇ ၵႂႃႇယိုၼ်ႈတၢင်ႇ ယွၼ်းယင်းဢမ်ႇလႆႈ – လႆႈႁူႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ