ဝၼ်းတီႈ 20/05/2025 ၼၼ်ႉ ၶိူင်ႈမိၼ်သိုၵ်းမၢၼ်ႈ တေႃႉၶူဝ်းၶွင်ၵႂႃႇသူင်ႇတပ်ႉသိုၵ်းမၢၼ်ႈ ၼႂ်းၸႄႈဝဵင်းမၢၼ်ႈမေႃႈ ၸႄႈမိူင်းၶၢင်ၼၼ်ႉ ၺႃးသိုၵ်းၶၢင် KIA ယိုဝ်းတူၵ်းၵွႆလမ်းၼိုင်ႈ၊ သိုၵ်းမၢၼ်ႈၶိုၼ်းတွပ်ႇဝႃႈ ဢမ်ႇၸႂ်ႈၺႃးယိုဝ်း ယွၼ်ႉၸၢၵ်ႈမၼ်းလူႉၵွႆလႄႈ ယၢတ်ႇတူၵ်းၵူၺ်း ဝႃႈၼႆ။
ၶိူင်ႈမိၼ်တၢင်ႇၶူဝ်း သိုၵ်းမၢၼ်ႈၼႆႉ တူၵ်းႁိမ်းဝၢၼ်ႈသီႇငၢၼ်း ဢၼ်မီးၸဵင်ႇၸၢၼ်းဝၼ်းတူၵ်း ဝဵင်းမၢၼ်ႈမေႃႈ ယၢၼ်ၵႆ 14,000 မီႊတႃႊ။
သိုၵ်းၶၢင်ပိုၼ်ၽၢဝ်ႇဝႃႈ – ၶိူင်ႈမိၼ်သိုၵ်းမၢၼ်ႈ ၶိုၼ်ႈမႃးသူင်ႇၶူဝ်း 3 လမ်း။ ယိုဝ်းတူၵ်းတီႈႁိမ်း ၸၵၶ 21 မၢၼ်ႈမေႃႈၼၼ်ႉ လမ်းၼိုင်ႈ။ ထႅင်ႈလမ်းၼိုင်ႈတႄႉ တိူဝ်ႉမၢၵ်ႇၵွင်ႈသေ မိူဝ်းလူင်း ၶိုၼ်းတီႈတႃႈႁိူဝ်းမိၼ်ၼမ်ႉပွင်ႈ ဝဵင်းၸေႊၼႃး(မျိတ်ႉၵျီးၼႃး)။ ထႅင်ႈလမ်းၼိုင်ႈတႄႉ ပွၵ်ႈမိူဝ်းလူင်းၶိုၼ်းတီႈတပ်ႉလူမ်း သူၺ်ႇၵူႇ ဝႃႈၼႆ။
ၼႂ်းၶိူင်ႈမိၼ်ဢၼ်တူၵ်းၵွႆၼၼ်ႉ ပႃးၵူၼ်းသိုၵ်းၸွမ်း 7 ၵေႃႉ။ ၼႂ်းၼၼ်ႉ ပႃးၽူႈမီးၸၼ်ႉတပ်ႉ သိုၵ်းမၢၼ်ႈ ၵေႃႉၼိုင်ႈ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ