ဝၢႆးလင် ႁၢင်ႈလၢဝ်ထဵမ်းဢွၵ်ႇမႃး ပိုၼ်ႉတီႈသိုၵ်းဝႃႉလႄႈ သိုၵ်းမၢၼ်ႈ ႁူမ်ႈၵၼ်ၶုတ်းႁိၼ်ႁႄႈ ၼႂ်းမိူင်းတႆး ပွတ်းဢွၵ်ႇ ႁိမ်းလႅၼ်လိၼ်ထႆးၼၼ်ႉသေ ၵူၼ်းမိူင်းထႆးပွတ်းၼိူဝ် ပဵၼ်ဢၼ်တူၵ်းၸႂ်မႆႈၸႂ်တႃႇမိူဝ်းၼႃႈ လႄႈ ၼႅတ်ႈသူင်ႇလိၵ်ႈၸူး လုမ်းတၢင်မိူင်းၶႄႇလႄႈ မိူင်းမၢၼ်ႈ ႁႂ်ႈႁၢမ်ႈပၼ်လွင်ႈၼႆႉဝႆးဝႆး ဝႃႈၼႆ။

ဝၼ်းတီႈ 19/05/2025 ၸုမ်းၾၢႆႇတူင်ႇဝူင်းၵူၼ်း၊ ၾၢႆႇႁၵ်ႉသႃသိင်ႇဝႅတ်ႉလွမ်ႉ၊ ၸဝ်ႈပၢႆးမၢၵ်ႈမီး ၼႂ်းၸႄႈ တွၼ်ႈၵဵင်းႁၢႆး မိူင်းထႆး တွၼ်ႈၼိူဝ် ႁူပ်ႉထူပ်းဢုပ်ႇဢူဝ်းၵၼ် လွင်ႈထၢတ်ႈဢႃႊသိၼ်းၼိၵ်ႉ ၸိုမ်းၶဝ်ႈဝႆႉ ၼႂ်းၼမ်ႉမႄႈၵူၵ်း ၊ ၼမ်ႉမႄႈသၢႆ ၊ ၼမ်ႉမႄႈႁူၵ်ႈလႄႈ ၼမ်ႉမႄႈၶွင် (ၼမ်ႉၶူင်) ၸိူဝ်းၼႆႉ။  

ဢုပ်ႇဢူဝ်းလႆႈၸႂ်ၵၼ်ဝႃႈ ၼႂ်းဝၼ်းတီႈ 05/06/2025 ၼႆႉတူၵ်းမႅၼ်ႈဝၼ်းႁၵ်ႉသႃသိင်ႇဝႅတ်ႉလွမ်ႉ လုမ်ႈ ၾႃႉလႄႈ ၵူၼ်းမိူင်းထႆးတွၼ်ႈၼိူဝ် မွၵ်ႈမိုၼ်ႇၵေႃႉ တေႁူမ်ႈၵၼ်ၼႄၵၢင်ၸႂ်တေႃႇ လွင်ႈၼႆႉ။ ၾၢႆႇတၢင်း ၸုမ်းႁၵ်ႉသႃသိင်ႇဝႅတ်ႉလွမ်ႉ ၸႄႈတွၼ်ႈၵဵင်းႁၢႆးၵေႃႈ တေႁူမ်ႈမိုဝ်းၵၼ်တင်း ၸုမ်း UNDP ၊ UNICEF ၸၢတ်ႈၸိုင်ႈလုမ်ႈၾႃႉသေ ႁဵတ်းသၢင်ႈလွင်ႈၼႆႉၵႂႃႇထႅင်ႈ ၸဵမ်ၸိူဝ်းၼႆႉ။

လွင်ႈၼႆႉ ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆးၵေႃႈ ဢွၵ်ႇလိၵ်ႈၽိုၼ်ႁၢႆးငၢၼ်း မိူဝ်ႈဝၼ်းတီႈ 15/05/2025 ဝႆႉဝႃႈ – ၵၢၼ်ၶုတ်းႁိၼ်ႁႄႈ ၼႂ်းၸႄႈဝဵင်းမိူင်းသၢတ်ႇၼၼ်ႉ ပွႆႇၼမ်ႉၵွင်ႉငူၼ်ႉလူင်းၼႂ်းၼမ်ႉၵူၵ်းသေ ႁဵတ်းႁႂ်ႈဝူၺ်ႇႁင်း။ မိူဝ်ႈၵွၼ်ႇ ယွၼ်ႉၵၢၼ်ၶုတ်းၶမ်းသေၵေႃႈ ယင်းဝူၺ်ႇႁင်ႈဝႆႉယူႇယဝ်ႉ။ ၵမ်းၼႆႉ ယိင်ႈ ၶႅၼ်းတေဝူၺ်ႇႁင်ႈလိူဝ်ၵဝ်ႇ။ လွင်ႈၼႆႉ ႁဵတ်းႁႂ်ႈတုမ်ႉတိူဝ်ႉပၢႆးယူႇလီၵူၼ်းမိူင်း – ဝႃႈၼႆဝႆႉ။

ဢၼ်တေၶုတ်းႁိၼ်ႁႄႈၼႆႉ တေပဵၼ်ၼႂ်းမိူင်းယွၼ်း မီးၾၢႆႇၸၢၼ်းဝဵင်းမိူင်းသၢတ်ႇ မွၵ်ႈ 25 ၵီႊလူဝ်ႊမီႊ တႃႊ။ ဢိင်ၼိူဝ်ၼမ်ႉဝူၺ်ႇႁင်ႈ ၼမ်ႉၵွင်ႉငူၼ်ႉတီႈၶုတ်းၶမ်းၼႆႉ လႆလူင်းၼႂ်းၼမ်ႉၵူၵ်းသေ ထၢတ်ႈဢႃႊ သိၼ်ႊၼိၵ်ႉ မီးၼႂ်းၼမ်ႉၵူၵ်းၼမ်ႁႅင်း ၵုင်ႈ ႁွႆ ပူ ပႃ ၼႂ်းမႄႈၼမ်ႉၵေႃႈ ၸပ်းတၢင်းပဵၼ်သေတၢႆၼမ်။ ၵူၼ်းၵေႃႈ ၵိၼ် ပူ ပႃသေပဵၼ်တၢင်းပဵၼ်ၸွမ်း။