ၸဝ်ႈသြႃႇလႄႈ ၸဝ်ႈသၢင်ႇဢွၼ်ႇ 8 တူၼ် တီႈၵျွင်းၼမ်ႉမေႃႇဝၢၼ် ဝၢၼ်ႈဝဵင်းၵွင်း ဝဵင်းမိူင်းသၢတ်ႇ ၸိုင်ႈတႆးပွတ်းဢွၵ်ႇ ၵိုင်ႉၵၢင်ႉ ပဵၼ်တၢင်းပဵၼ် ၶီႈႁၢၵ်ႈသွင်ႁူၼ်  ထိုင်တီႈလႆႈၶိုၼ်ႈႁူင်းယႃ  ။

ဝၼ်းတီႈ 15/6/2026 ယၢမ်းၵၢင်ၼႂ် 9 မူင်း ၽွင်းသင်ႇၶၸဝ်ႈ 9 တူၼ် လႄႈ ပူႇၵျွင်း သုင်းသွမ်းၵိၼ် ၶဝ်ႈၼႂ် ၶဝ်ႈမၼ်းၵႆႇယဝ်ႉၼၼ်ႉ ၵိုင်ႉၵၢင်ႉပဵၼ် တၢင်းပဵၼ်ၶီႈႁၢၵ်ႈသွင်ႁူၼ် လႆႈသူင်ႇၶိုၼ်ႈႁူင်းယႃဝႆႉ တီႈဝဵင်းမိူင်းသၢတ်ႇ ၊ ၸဝ်ႈသၢင်ႇဢွၼ်ႇသၢမ်ပႃး ပဵၼ်ႁၢဝ်ႈႁႅင်းဝႆႉ ၼႆယဝ်ႉ ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ပဵၼ်သွမ်းၼႂ် ၊ သုင်းသွမ်းၼႂ် 6 မူင်းယဝ်ႉ ပဵၼ်မွၵ်ႈ 9 မူင်းၼႆႉ ဢွၼ်ၵၼ်ပဵၼ်တၢင်းပဵၼ်သေၸူဝ်းၵၼ်ၵႂႃႇႁူင်းယႃၵူၼ်းမိူင်းတီႈမိူင်းသၢတ်ႇ ၊ ၸဝ်ႈသၢင်ႇပႃးလဵၵ်ႉ 3 ပႃး ဢႃယု 9 -10 ၶူပ်ႇၼႆႉ ပဵၼ်ႁႅင်းဝႆႉ ၊ တႃႇပႃးၼိုင်ႈၼႆႉ ယၢမ်းလဵဝ် ၽၢႆႈၼွႆႉ ၽၢႆႈလူင် ဢွၵ်ႇလိူတ်ႈဝႆႉ ၊ ထႅင်ႈပႃးၼိုင်ႈသမ်ႉ ၶူႈၼင်ႈၵေႃႈဢွၵ်ႇလိူတ်ႇဝႆႉ”- ဝႃႈၼႆ ။

ယၢမ်းလဵဝ် ၸဝ်ႈၼႃႈတီႈၾၢႆႇပၢႆးယူႇလီၼႂ်းပိုၼ်ႉတီႈလႄႈ  ၊ ၽူႈမီးပုၼ်ႈၽွၼ်း ၶဝ်ႈၵူတ်ႇထတ်းလွင်ႈ သင်ႇၶၸဝ်ႈ ပဵၼ်တၢင်းပဵၼ်ၼၼ်ႉဝႆႉယူႇဝႃႈၼႆသေတႃႉ  ပဵၼ်ယွၼ်ႉသင်ၼႆၼၼ်ႉတႄႉ ၊ ပႆႇလႆႈၶေႃႈ တွပ်ႇမၼ်း – ၵူၼ်းပိုၼ်ႉတီႈလၢတ်ႈ ။ 

မၼ်းၸၢႆးသိုပ်ႇလၢတ်ႈထႅင်ႈဝႃႈ -“ ၵိၼ်ၽိတ်း ၵူၺ်းၼင်ႇၵဝ် ၊ မၼ်းၵေႃႈဢမ်ႇမီးလၢႆမဵဝ်း ပဵၼ်ၶဝ်ႈမၼ်းၵႆႇၵူၺ်း ၊  လႅပ်ႈတေၽိတ်းၼႆႉပဵၼ်ၼိူဝ်ႉၵႆႇဢၼ်ပႃးၼႂ်းၶဝ်ႈမၼ်းၵႆႇၼၼ်ႉၶႃႈဢိူဝ်ႈ။လႅပ်ႈ ပိူၼ်ႈသႂ်ႇယႃ ႁိုဝ်ၵေႃႈဢမ်ႇႁူႉ ၊ ၶဝ်ႈမၼ်းၵႆႇဢၼ်ၵိၼ်တႄႉ ဢမ်ႇမဵၼ်လူမ်းၼင်ႇၵဝ်ႇ”- ဝႃႈၼႆ ။

လႆႈႁူႉဝႃႈ တီႈၵျွင်းၼမ်ႉမေႃႇဝၢၼ် သင်ႇၶၸဝ်ႈဢၼ်ၵိၼ်ၶဝ်ႈမၼ်းၵႆသေ ပဵၼ်ၶီႈႁၢၵ်ႈသွင်ႁူၼ်ၼႆႉ မီး9 တူၼ်လႄႈ ပူႇၵျွင်းၵေႃႉၼိုင်ႈ ထိုင်ယၢမ်းလဵဝ် လႆႈယူတ်းယႃတူဝ်ဝႆႉတီႈႁူင်းယႃ ။ ဢၼ်ဢမ်ႇလႆႈၶိုၼ်ႈ ႁူင်းယႃၼၼ်ႉ မီးဝႆႉ သွင်ပႃး ၼႆယဝ်ႉ  ။

ၾၢႆႇပၢႆးယူႇလီတႄႉတႅမ်ႈတၢင်ႇပိုၼ်ၽၢဝ်ႇဝႆႉဝႃႈ – ၵိၼ်ၶဝ်ႈမၼ်းၵႆႇသေယဝ်ႉပဵၼ်ၶီႈႁၢၵ်ႈသွင်ႁူၼ်ၼႆႉၸၢင်ႈပဵၼ်ယွၼ်ႉ 3 လွင်ႈ။ လွင်ႈ 1 ၼႆႉပဵၼ်ယွၼ်ႉ ၵႆႇဢမ်ႇၼၼ်ၶဝ်ႈ ဢၼ်တေဢဝ်မႃးႁုင်ၼၼ်ႉ ဢမ်ႇပေႃးၶႆႈလီ၊ မီးမႅင်းမူၼ်းတုမ်ႁႅင်း၊ ဢမ်ႇမူတ်းသႂ် ၊ မီးၸိူဝ်ႉမႅင်းၶဝ်ႈ၊ ဢမ်ႇၼၼ် ပဵၼ်ယွၼ်ႉသႂ်ႇဝႆႉယႃႈယႃႁႂ်ႈမၼ်းၼၢၼ်းမဵၼ်သူမ်ႈ ၼၢၼ်းၼဝ်ႈ။

2- ပဵၼ်ယွၼ်ႉ သႂ်ႇၼမ်ႉမၼ်းၼမ်ႁႅင်း ႁဵတ်းႁႂ်ႈယိူဝ်ႇဢမ်ႇယၢႆႈသေ ဢေႃႉဢေႃႉႁၢၵ်ႈႁၢၵ်ႈ။

3-ၾိင်ႈၾႃႉမႆႈႁႅင်းသေ ႁဵတ်းႁႂ်ႈတၢင်းၵိၼ်လူႉ – ၸဵမ်ၸိူဝ်းၼႆႉ။

သင်ၸိူဝ်ႉဝႃႈပဵၼ်ၶီႈႁၢၵ်ႈသွင်ႁူၼ်မႃးၸိုင် ထုၵ်ႇလီၵိၼ်ၼမ်ႉၵိူဝ်(ထၢတ်ႈသႃး) ၼမ်ၼမ်၊ ယႃႇၽူမ်ႈၵိၼ်ဢၼ်လႆႈၵဵဝ်ႉ။ ၵိၼ်ၼမ်ႉၼမ်ၼမ် — ဝႃႈၼႆဝႆႉ။