ပၢင်ၵုမ်လူင် ၺီႇလႃႇၶၢမ်ႇ မႁႃႇသတိပထၢၼ်ႇ ၵမ်မထၢၼ်း သင်ႇၶႃႇၸဝ်ႈ ပွၵ်ႈၵမ်း 61 တေၸတ်းႁဵတ်းတီႈဝဵင်းမိူင်းသၢတ်ႇ ၸိုင်ႈတႆးပွတ်းဢွၵ်ႇ ဝႃႈၼႆ။

ပၢင်ၵုမ်လူင် ၺီႇလႃႇၶၢမ်ႇ မႁႃႇသတိပထၢၼ်ႇ ၵမ်မထၢၼ်း ပွၵ်ႈၵမ်း 60 ၼႆႉတႄႉ ပီႈၼွင်ႉၵူၼ်းမိူင်းဢိူင်ႇၼမ်ႉသၢႆး ႁပ်ႉပဵၼ်ၸဝ်ႈတႃႇၼယႂ်ႇသေ ၸတ်းႁဵတ်းၵႂႃႇဝၼ်းတီႈ 31/1/2026 ထိုင် ဝၼ်းတီႈ 4/2/2026 ၶၢဝ်းတၢင်း 5 ဝၼ်း တီႈတိူၵ်ႈၵမ်မထၢၼ်း ၼမ်ႉသၢႆး ၸႄႈဝဵင်းလၢင်းၶိူဝ်းၸိုင်ႈတႆးပွတ်းၸၢၼ်း ။

တီႈပၢင်ၵုမ်လူင်ၼႆႉ တူဝ်တႅၼ်းတိူၵ်ႈၵမ်မထၢၼ်း မႁႃသတိပထၢၼ်ႇ ပတ်းပိုၼ်ႉၸိုင်ႈတႆး မႃးၶဝ်ႈႁူမ်ႈဢုပ်ႇၵုမ်ၵၼ် မိူၼ်ၼင်ႇ – လွင်ႈၼႃႈၵၢၼ်တႃႇငၢၼ်း ဢၼ်လႆႈ ႁဵတ်းသၢင်ႈမႃး ၶၢဝ်းတၢင်းၼိုင်ႈပီလႄႈ ၵၢၼ်ဝၢင်းၽႅၼ်မိူဝ်းၼႃႈ ၸဵမ်ၸိူဝ်းၼႆႉ။

ၵူၼ်းပိုၼ်ႉတီႈ ဢိူင်ႇၼမ်ႉသၢႆးလၢတ်ႈဝႃႈ – ပီၼႆႉ ၵျွင်းၵမ်မထၢၼ်းၼမ်ႉသၢႆးၵေႃႈၶွပ်ႈတဵမ် 75 ပီ လႄႈ လႆႈႁူမ်ႈၸတ်းႁဵတ်းပၢင်လူႇတၢၼ်းၵိုၵ်းၸွမ်းၵၼ်တင်းပၢင်ၵုမ်လူင်ၺီႇလႃႇၶၢမ်ႇ ၵမ်မထၢၼ်း ပွၵ်ႈၵမ်း 60။ ၵူၼ်းၵိုၼ်းလီၼႃႇၶႃႈ။ ၸဝ်ႈတူၼ်ၶူးထမ်ႇမသႃႇမိ ၸဝ်ႈၶူးသုၶမ်းၶဝ်ၸဝ်ႈၵေႃႈ မႃးမဵတ်ႉတႃႇထမ်းတြႃးပၼ်တၵ်ႉၵႃႇၸိူဝ်းမႃးၶဝ်ႈပၢင်ပွႆး။ ၼွၵ်ႈလိူဝ်ၼၼ်ႉ ၸိူဝ်းပဵၼ်ၸဝ်ႈၼႃႈတီႈၼႂ်းသိုၵ်းတႆးႁဝ်းၵေႃႈ သူင်ႇတူဝ်တႅၼ်းမႃးၶဝ်ႈႁူမ်ႈလူႇတၢၼ်းၸွမ်းယူႇဢေႃႈ- ဝႃႈၼႆ။

တိူၵ်ႈၵမ်မထၢၼ်း ဢိူင်ႇၼမ်ႉသၢႆးၼႆႉ မီးၵျွင်းယေႃးၵီႇ 40 လင် ။ ပိုတ်ႇပၼ်ၵူၼ်းမိူင်းမႃးတိုဝ်းၵမ်သိၼ်ထမ်းၼႂ်းၶၢဝ်းလိူၼ် ၸဵင်ၵူႈပီ။

ပၢင်ၵုမ်လူင် ၺီႇလႃႇၶၢမ်ႇ ၵမ်မထၢၼ်း ပွၵ်ႈၵမ်း 61 တႄႉ တေၸတ်းတီႈဝဵင်းမိူင်းသၢတ်ႇ ၼႂ်းပီတေမႃး 2027 ၼႆႉ လႆႈႁူႉၼင်ႇၼႆ။

ဢွင်ႈတီႈတိုဝ်းၵမ်တြႃး တိူၵ်ႈၵမ်မထၢၼ်း မူႇလမိၼ်းၵုၼ်းၼႆႉ ၼႂ်းမိူင်းတႆးပတ်းပိုၼ်ႉ မီး 37 ဢွင်ႈ။ ၼႂ်းၼၼ်ႉ တိူၵ်ႈၵမ်မထၢၼ်း တီႈဝဵင်းလၢင်းၶိူဝ်း ပဵၼ်တိူၵ်ႈငဝ်ႈ၊ တီႈတႄႇပၢင်တိုဝ်းၵမ် – ၵမ်မထၢၼ်း ပွၵ်ႈဢွၼ်တၢင်းသုတ်း တင်ႈတႄႇပီၶရိတ်ႉ 1947 (ပီၵေႃးၸႃႇ 1309 ၼီႈ) မႃး တေႃႇယၢမ်းလဵဝ်။ ပီၼႆႉ ယွၼ်ႉငဝ်းလၢႆး ၼႂ်းပိုၼ်ႉတီႈဢမ်ႇၼိမ်သဝ်းလႄႈ ဢွင်ႈတီႈ ဢမ်ႇလႆႈပိုတ်ႇပၢင်တြႃးမႃး မီးယူႇသွင် သၢမ်ဝဵင်း ၼႂ်းၼၼ်ႉ တေပဵၼ်ဝဵင်းၸေႊလၢၼ်ႉလႄႈ ဝဵင်းၼမ်ႉတူႈ ၸိူဝ်းၼႆႉ။