ၼႂ်းပီ 2026 ၼႆႉ ၶႄႇ လႄႈ ၵူၼ်းႁဵတ်းၵၢၼ်ၵျႃႊၽျႅၼ်ႉ ၼႂ်းၸႄႈဝဵင်းမိူင်းသၢတ်ႇ လႄႈ မိူင်းတူၼ် ၼမ်ၶိုၼ်ႈမႃးႁႅင်းလိူဝ်ၵဝ်ႇတေႉတေႉဝႃႈဝႃႈ တီႈမိူင်းတႆးပွတ်းဢွၵ်ႇ ဝႃႈၼႆ။

ၵူၼ်းႁဵတ်းၵၢၼ်ၵျႃႊၽျႅၼ်ႉ ၸၢဝ်းၶိူဝ်းၶႄႇ ဢၼ်မီးယူႇၼႂ်းၸႄႈဝဵင်းမိူင်းသၢတ်ႇၼၼ်ႉ လုၵ်ႉတၢင်းဝဵင်းတႃႈၶီႈလဵၵ်း ၶၢႆႉၵႂႃႇတင်ႈတူဝ် ႁဵတ်းၵၢၼ်လွၵ်ႇလႅၼ်ၵိၼ်ငိုၼ်းယူႇၼႆ ၵူၼ်း မိူင်းပိုၼ်ႉတီႈ လၢတ်ႈၼင်ႇၼႆ။

ၵူၼ်းမိူင်းၵေႃႉယူႇၼႂ်းပိုၼ်ႉတီႈလၢတ်ႈဝႃႈ “မိူဝ်ႈလဵဝ်ၶႄႇၵေႃႈၼမ်မႃးႁႅင်းတေႉတေႉ။ ပေႉလုၵ်ႉတၢင်းလႂ်ၶၢႆႉ မႃးၵေႃႈဢမ်ႇႁူႉယဝ်ႉ။ ပလိၵ်ႈ (ယႄး) လႄႈ သိုၵ်းၸိူဝ်းၼႆႉၵေႃႈ ဢမ်ႇတီႉဢမ်ႇၺွပ်းသင်။ ၵူၼ်းၶႄႇၸိူဝ်းမႃး ယူႇတၢင်းမိူင်းသၢတ်ႇၼႆႉ ၼိုင်ႈၵေႃႉ မီးၾူၼ်း သီႇႁႃႈလုၵ်ႈ၊ မီးၶွမ်းႁႄ။ တူၺ်းၾၢင်ႁၢင်ႈၶဝ်တႄႉ ပဵၼ်ၵျႃႊၽျႅၼ်ႉလၢႆလၢႆယဝ်ႉ။ တႃႇဢဝ်ပၼ်လွင်ႈႁူမ်ႇလူမ်ႈၶဝ်သမ်ႉ ၸႂ်ယႂ်ႇသိုၵ်းပျီႇတူႉၸိတ်ႉဢၼ်မီးယူႇ ၼႂ်းပိုၼ်ႉတီႈၼၼ်ႉၼႃႇ” ဝႃႈၼႆ။

လႆႈႁူႉဝႃႈ ၵူၼ်းႁဵတ်းၵျႃႊၽျႅၼ်ႉ ၵၢၼ်လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆႊၼႆႉ ၸမ်ၸႂ်ၵၼ်တင်း သိုၵ်းမၢၼ်ႈ၊ ပလိၵ်ႈသေ ၽူႈမီးပုၼ်ႈၽွၼ်းၶဝ်ၵေႃႈ ႁပ်ႉငိုၼ်းယဵတ်ႈမွၼ်ဝႆႉတီႈၵူၼ်းၸၢဝ်းၶႄႇဝႆႉ ၼႆယဝ်ႉ။

လိူဝ်ၼၼ်ႉ ၵူၼ်းႁဵတ်းၵၢၼ်ၵျႃႊၽျႅၼ်ႉၼႂ်းမိူင်းသၢတ်ႈၼၼ်ႉ တင်ႈၸႂ်ႁႃလၢႆးတၢင်းမိုတ်ႈၵိုဝ်းၸမ်ၸႂ်ၵၼ် တင်း ၼၢင်းယိင်းၼႂ်းပိုၼ်ႉတီႈသေ ၶျေႃးလႅၼ်ႁႂ်ႈလဵၼ်ႈၵဵမ်း ဢၼ်လႆႈ ၸႂ်ႉငိုၼ်းတေႉသေလဵၼ်ႈၼၼ်ႉ ၵူၺ်း ၼႆ ၵူၼ်းမိူင်းပိုၼ်ႉတီႈလၢတ်ႈ။

ၵူၼ်းမိူင်းတွမ်းၵေႃႉၼိုင်ႈ လၢတ်ႈၼႄဝႃႈ “ဢွၼ်တၢင်းသုတ်းၶဝ်မႃးၶျေႃး မႃးလၢတ်ႈႁႂ်ႈတဵၵ်းၶလိပ်ႉဢၼ် ၼိုင်ႈ ပေႃးတဵၵ်းၶလိပ်ႉႁိုဝ် လိင်ႉဢၼ်ၼၼ်ႉၵမ်းလဵဝ်ၵူၺ်းၵေႃႈ တေလႆႈငိုၼ်းတိူဝ်းၼမ်မႃး။ ၶျေႃးႁႂ်ႈပိူၼ်ႈ လူင်းတိုၼ်းသႂ်ႇငိုၼ်းၼမ်ယဝ်ႉၵေႃႈ လႅၼ်ဢဝ်ငိုၼ်းၵႂႃႇတင်းသသဵင်ႈၼၼ်ႉၼႃႇ။ မိူဝ်ႈလဵဝ် တီႈၼႂ်းဝဵင်းမိူင်းသၢတ်ႇၼႆႉ ၶႄႇဢၼ်ပဵၼ်ၵူၼ်းမိူင်း ၶႄႇ ၶဝ်ႈမႃးယူႇဝႆႉ ၼမ်ၼႃႇယဝ်ႉ” ဝႃႈၼႆ။

ပလိၵ်ႈမၢၼ်ႈ ႁူမ်ႈၵၼ်တင်း သိုၵ်းမၢၼ်ႈယိုတ်းမိူင်းသေ ႁႃၸွမ်းသွၵ်ႈတီႉၺွပ်းၵူၼ်းမိူင်းၶႄႇ ၸိူဝ်းမီးယူႇၼႂ်း ဝဵင်းၼမ်ၼႃႇလႄႈ ၶႄႇၸိူဝ်းမီးယူႇၼႂ်းဝဵင်းတႃႈၶီႈလဵၵ်း ဢွၼ်ၵၼ်ဢဝ် ၶေႃႈဢၢင်ႈဝႃႈ တေၵႂႃႇႁဵတ်းၵၢၼ်ၶုတ်းၶမ်း ၶုတ်းႁႄႈ ၾၢႆႇၼွၵ်ႈဝဵင်းၼႆသေ ပူၼ်ႉၶဝ်ႈၵႂႃႇယူႇဝႆႉၶိုၼ်းၸွမ်းဝၢၼ်ႈႁူဝ်ပၢင်ႇ၊ ႁူဝ်ယွတ်ႈ ၸႄႈဝဵင်းမိူင်းသၢတ်ႇ လႄႈ ၸႄႈဝဵင်းမိူင်းတူၼ် ၸဵမ်ၸိူဝ်းၼႆႉ ၼႆယဝ်ႉ။