တပ်ႉသိုၵ်းဝႃႉ UWSA ဢၼ်တူင်ႉၼိုင်ယူႇတၢင်း မိူင်းတႆးပွတ်းၸၢၼ်း ၼႃႈလိၼ်သိုၵ်း 171 ၶိုၼ်းၶွတ်ႇၽွတ်ႈမႂ်ႇ တပ်ႉၸုမ်း 713 သေ မႃးပၵ်းသဝ်း တူင်ႉၼိုင်ယူႇၼႂ်းၸႄႈဝဵင်းတၢင်ႉယၢၼ်း ႁိမ်းႁွမ်းသူၼ်ၶွမ်ႊ ပၼီႊႁူင်ပင်းၼၼ်ႉ ၸီႉသင်ႇယွၼ်းၵူၼ်းမႂ်ႇ ၼပ်ႉႁူဝ်ပၢၵ်ႇၵေႃႉ ၼႂ်းမိူင်းတႆးပွတ်းႁွင်ႇ။

တႄႇႁူဝ်လိူၼ်မေႊၼႆႉမႃး ၽူႈၵွၼ်းၼႃႈလိၼ်သိုၵ်း 171 ဢွၵ်ႇၶေႃႈပူင် ၸီႉသင်ႇတေႃႇၵူၼ်းမိူင်းၼႂ်းၸႄႈ ဝဵင်းတၢင်ႉယၢၼ်း ၵူႈပွၵ်ႉၵူႈဢိူင်ႇၵူႈဝၢၼ်ႈ ႁႂ်ႈႁႃပၼ်ၵူၼ်းၼုမ်ႇ ပိူဝ်ႈတႃႇၶဝ်ႈႁၢပ်ႇၵၢၼ် ၼႂ်းတပ်ႉၸုမ်း 713 ၼၼ်ႉ ၼိုင်ႈဝၢၼ်ႈလႂ် ဢေႇသုတ်း 2 ၵေႃႉၼႆ – ၵူၼ်းမိူင်းပိုၼ်ႉတီႈ ၼႂ်းဝဵင်းတၢင်ႉယၢၼ်းၵေႃႉၼိုင်ႈ လၢတ်ႈၼႄၼင်ႇၼႆ။

“ၸႂ်ႈယဝ်ႉၶႃႈ။ ၶဝ်ယွၼ်းၵူၼ်းမႃး ၵူႈပွၵ်ႉၵူႈဝၢၼ်ႈၵူႈဢိူင်ႇတႄႉၶႃႈဢေႃႈ။ ၼိုင်ႈႁိူၼ်းလႂ် ၼိုင်ႈၵေႃႉႁႃႉ၊ ၼိုင်ႈဝၢၼ်ႈ လႂ်သိပ်းၵေႃႉႁႃႉၼႆၼၼ်ႉတႄႉၵေႃႈ ပႆႇတႅတ်ႈတေႃး။ ယူႇတီႈ ၵူၼ်းမိူင်းတႄႉ ဢမ်ႇႁၼ်လီ ဢမ်ႇလႆႈၸႂ်လႄႈ ဢမ်ႇၵမ်ႉထႅမ်ၶႃႈ။ ယွၼ်ႉဝႃႈ တေလႆႈႁၢပ်ႇၼၵ်းၼႃလၢႆၵၢၼ်းလႄႈ မၼ်းတေၼၵ်း တွၼ်ႈတႃႇၵူၼ်းမိူင်း”။

လႆႈႁူႉဝႃႈ သင်ၽူႈယႂ်ႇၵူၼ်းလူင် ၼႂ်းပွၵ်ႉၼႂ်းဢိူင်ႇ ဢမ်ႇၸတ်းႁႃပၼ်လႆႈ ၵူၼ်းမႂ်ႇ တႃႇၶဝ်ႈႁၢပ်ႇၵၢၼ် သိုၵ်းၼႆၸိုင် တေလႆႈၵႂႃႇၵႄႈလိတ်ႈပၼ်ႁႃၵၼ် ၼႂ်းသူၼ်ၶွမ်ႊပၼီႊႁူင်ပင်း ဢွင်ႈတီႈတပ်ႉၸုမ်း 713 ၼႃႈလိၼ်သိုၵ်း 171 တူင်ႉၼိုင် ဢဝ်ႁူမ်ႇလူမ်ႈဝႆႉၼၼ်ႉ ၼႆယဝ်ႉ။

ၼႂ်းၸႄႈဝဵင်းတၢင်ႉယၢၼ်းၼႆႉ ၸဵမ်မိူဝ်ႈပူၼ်ႉမႃး ပီယၢဝ်းၶၢဝ်းႁိုင် မီးပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်း ၸိုင်ႈတႆး SSPP/ SSA တူင်ႉၼိုင်ၵႂႃႇမႃး ပၵ်းတပ်ႉပၢင်သဝ်းဝႆႉ ႁိုင်ၼၢၼ်း ၵေႃႈပိူင်ၼိုင်ႈ၊ ၾၢႆႇၼိုင်ႈၵေႃႈ ယွၼ်ႉပဵၼ်ၸုမ်းဢၼ်မီးလွင်ႈၸမ်ၸႂ်ၵၼ်တင်း တပ်ႉသိုၵ်းဝႃႉ UWSA ၵေႃႈပိူင်ၼိုင်ႈလႄႈ ၵူၼ်းမိူင်းဢိၵ်ႇ ၽူႈမီးပုၼ်ႈၽွၼ်း ၼႂ်းၸႄႈဝဵင်းတၢင်ႉယၢၼ်း ၸင်ႇလႆႈႁူမ်ႈၵၼ် တႅမ်ႈလိၵ်ႈသူင်ႇၸူး ႁႂ်ႈၸွႆႈၶဝ်ႈ ၵႄႈၵၢင်ဢုပ်ႇဢူဝ်းၵႄႈလိတ်ႈပၼ်ႁႃၵႂႃႇၼႆ ၵူၼ်းမိူင်းဝဵင်းတၢင်ႉယၢၼ်း ၵေႃႉၼိုင်ႈ သိုပ်ႇလၢတ်ႈၼႄတီႈ ၽူႈတွႆႇႁွၵ်ႈၼင်ႇၼႆ။

“ယူႇတီႈၼႂ်းဝၢၼ်ႈၼႂ်းဢိူင်ႇတႄႉ တႅမ်ႈလိၵ်ႈႁႄ ယိုၼ်ႈထိုင်တီႈ ပႃႇတီႇမႂ်ႇသုင်ၸိုင်ႈတႆး။ ႁႂ်ႈၵႄႈလိတ်ႈပၼ် ၼင်ႇႁိုဝ် ၵူၼ်းမိူင်း ယႃႇပေႁႂ်ႈလႆႈမီးလွင်ႈလႆႈႁၢပ်ႇသွင်မႃႇသွင်ၵၢၼ်း။ ၾၢႆႇတၢင်းၸႄႈဝဵင်းတၢင်ႉယၢၼ်း ၼႆႉၵေႃႈ ပဵၼ်ၼႃႈတီႈ ၶဝ်ၵုမ်းၵမ်မႃး ပီယၢဝ်းၶၢဝ်းႁိုင်။ ၵမ်းၼႆႉ သိုၵ်းဝႃႉသမ်ႉ မႃးယွၼ်းထႅင်ႈၼႆ ၸင်ႇဝႃႈ တုၵ်းယွၼ်းႁႂ်ႈၵႄႈလိတ်ႈပၼ်”။

ၵဵဝ်ႇၵပ်းလူၺ်ႈ လွင်ႈဢၼ်ၵူၼ်းမိူင်းဢိၵ်ႇ ၽူႈမီးပုၼ်ႈၽွၼ်း ၼႂ်းၸႄႈဝဵင်းတၢင်ႉယၢၼ်း တႅမ်ႈလိၵ်ႈလူင်း လၢႆးမိုဝ်း သူင်ႇၸူးထိုင် ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး SSPP ၼၼ်ႉသေ ၽူႈၸမ်ၸႂ်ၼႂ်း SSPP ၵေႃႉ ၼိုင်ႈတႄႉ လၢတ်ႈၼႄတီႈၽူႈတွႆႇႁွၵ်ႈဝႃႈ – ၾၢႆႇငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး တုမ်ႉတွပ်ႇမႃးၶိုၼ်း ဝႃႈ တေဢမ်ႇပၼ်ပဵၼ် ဢမ်ႇပၼ်မီး ၼင်ႇႁိုဝ် ၵူၼ်းမိူင်းတေဢမ်ႇလႆႈႁၢပ်ႇသွင်မႃႇသွင်ၵၢၼ်းၼၼ်ႉ တေဝႆႉ ၼမ်ႉၼၵ်းႁႄၵႄႈလိတ်ႈပၼ်ၵႂႃႇယူႇ – ဝႃႈၼႆ။

မိူဝ်ႈပီ 2024 လိူၼ်ၵျူႊလၢႆႊ ဝူင်ႈလိုၼ်းသုတ်းၼၼ်ႉ တပ်ႉသိုၵ်းဝႃႉ UWSA ဢၼ်ပၵ်းသဝ်းယူႇတၢင်းၼႃႈ လိၼ်သိုၵ်း 171 မိူင်းတႆးပွတ်းၸၢၼ်းၼၼ်ႉ ဢဝ်ႁႅင်းသိုၵ်း မွၵ်ႈ 2,000 ၵေႃႉသေ ၸတ်းငႃးသိုၵ်းပဵၼ် 2 ငႃး ၶၢမ်ႈၶူင်း မႃးပၵ်းတပ်ႉပၢင်သဝ်း ၼႂ်းဢွင်ႈတီႈပူဝ်ႇမူၼ်း ၸုမ်းပျီႇတူႉၸိတ်ႉမၢၼ်ႈပၢင်ႇၵုမ်းၵမ်ယူႇဝႆႉ ၼႂ်းၸႄႈဝဵင်းတၢင်ႉယၢၼ်း မိူင်းတႆးပွတ်းႁွင်ႇ။ ထိုင်ယၢမ်းလဵဝ်ၵေႃႈ ယင်းပႆႇႁၼ်ငဝ်းလၢႆး တႃႇထွႆႇဢွၵ်ႇ ၶိုၼ်းၼႆ ၵူၼ်းမိူင်းၼႂ်းပိုၼ်ႉတီႈ ၵေႃႉယူႇသဝ်းဝႆႉ ၼႂ်းဝဵင်းတၢင်ႉယၢၼ်းၵေႃႉၼိုင်ႈ လၢတ်ႈၼႄၼင်ႇၼႆ။

“ပေႃးတူၺ်းၵၢၼ်ႁၢင်ႈႁႅၼ်းၶဝ်တႄႉ လႅပ်ႈတေဢမ်ႇမီး ၵၢၼ်တႃႇတေထွႆ။ သီႇၾၢႆႇၼႃႈမိူင်းတၢင်ႉယၢၼ်း ၼႆႉ ၶဝ်ပၵ်းတပ်ႉၶဝ် မီးၵူႈၼႃႈမိူင်း။ ၼႃႈတၢင်းႁွင်ႇ၊ ၼႃႈတၢင်းၸၢၼ်း၊ ၼႃႈတၢင်းတူၵ်း၊ ၼႃႈတၢင်းဢွၵ်ႇ ၸိူဝ်းၼႆႉ ၶဝ်ပၵ်းတပ်ႉၶဝ် ဝႆႉလၢႆလၢႆတီႈဢေႃႈ။ ၶဝ်တင်ႈၵဵတ်ႉတင်ႈလၢၼ်ႇဝႆႉႁႄ ၵူတ်ႇထတ်းတွင်ႈထၢမ် ၵူၼ်းမိူင်းၵႂႃႇမႃးယူႇတႃႇသေႇ”။

သိုၵ်းဝႃႉ ဢၼ်ပၵ်းသဝ်းတူင်ႉၼိုင်ယူႇၼႂ်းၸႄႈဝဵင်းတၢင်ႉယၢၼ်းၼႆႉ ပဵၼ်တပ်ႉၸုမ်း 713 တႂ်ႈၵုမ်းၵမ် ၼႃႈလိၼ်သိုၵ်း 171 ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇ (ပေႃးဢဝ်ပိူင်ၶွတ်ႇၽွတ်ႈတပ်ႉသိုၵ်းဝႃႉ ဝႃႈၸိုင် 171 ၼႆႉ ယူႇဝႆႉၼႂ်းၸိုင်ႈတႆးပွတ်းၸၢၼ်း ဝႃႈၼႆဝႆႉ) ဢၼ်ၶွတ်ႇၽွတ်ႈမႃး ဝၢႆးလင်ၽႅၼ်ယၼ်ႇသိုၵ်း 1027 ႁွပ်ႈသွင်။ ႁဵတ်းၶေႃႈ တူၵ်းလူင်းၵၼ်တင်း သိုၵ်းမၢၼ်ႈသေ ဢဝ်ႁႅင်းသိုၵ်းၶၢမ်ႈၶူင်း ၶဝ်ႈမႃးယူႇၼႂ်းၸႄႈ ဝဵင်းတၢင်ႉယၢၼ်း ၸိုင်ႈတႆးပွတ်းႁွင်ႇ။

လႆႈႁူႉဝႃႈ ဢၼ်တပ်ႉသိုၵ်းဝႃႉ ၼႃႈလိၼ်သိုၵ်း 171 ၵဵပ်းသိုၵ်းမႂ်ႇၼႂ်းၸႄႈဝဵင်းတၢင်ႉယၢၼ်းၼႆႉ မီးၵႂႃႇသွင်ပွၵ်ႈယဝ်ႉ။ ပွၵ်ႈၵမ်းၼိုင်ႈၼႆႉ လႆႈၵူၼ်းၵႂႃႇ 600 ပၢႆ။ ပွၵ်ႈၵမ်းသွင်သမ်ႉ ၸႂ်ႉတိုဝ်းၸိုဝ်ႈသဵင်ပျီႇတူႉၸိတ်ႉသေ ႁွင်ႉႁူၺ်း ၵဵပ်းဢဝ်ၵူၼ်းမိူင်းၵႂႃႇၾိုၵ်းၵၢၼ်ယဝ်ႉ ႁႂ်ႈၶဝ်ႈႁၢပ်ႇထၢမ်းၵၢၼ်သိုၵ်း ၼႂ်းတပ်ႉသိုၵ်းဝႃႉ ၼႆယဝ်ႉ။

တႅမ်ႈ – ၽူၺ်းၼုမ်ႇ