တၢင်းပဵၼ်ၶူဝ်ႊဝိတ်ႉ – 19 ၽႄႈလၢမ်းၶိုၼ်ႈသုင်ၶိုၼ်း ၼႂ်းပိုၼ်ႉတီႈဢေႊသျႃႊ၊ ပိူင်လူင် ပဵၼ်ၼႂ်းမိူင်းၶႄႇ၊ မိူင်းႁွင်ႊၵွင်ႊ၊ မိူင်းထႆး၊ မိူင်းသိင်ႊၵပူဝ်ႊ ၸိူဝ်းၼႆႉ ယွၼ်ႉၼၼ် ႁွင်ႈၵၢၼ် ၽွင်းလူင်ၾၢႆႇ ပၢႆးယူႇလီ မိူင်းမလေးသျႃးၵေႃႈ လႆႈပၵ်းတႃပႂ်ႉတူၺ်းၸွမ်း ငဝ်းလၢႆးတၢင်းပဵၼ်ၶူဝ်ႊဝိတ်ႉ ၼႂ်းမိူင်းၼွၵ်ႈမိူင်းဝႆႉယူႇ ဝႃႈၼႆ။

ၼႂ်းၶၢဝ်းတၢင်းၼိုင်ႈဝူင်ႈ ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ – 19 တီႈမိူင်းမလေးသျႃး မီးမွၵ်ႈ 600 ၵေႃႉ။ ၵူၺ်းၵႃႈ ပႆႇထိုင်တီႈလႆႈပိုၼ်ၽၢဝ်ႇ ပဵၼ်ငဝ်းလၢႆးၶိုၵ်ႉၶၵ်ႉၼႆ – ၽွင်းလူင်ၾၢႆႇပၢႆးယူႇလီ မိူင်းမလေးသျႃးလၢတ်ႈ။

ၼႂ်းပီ 2025 ၼႆႉ ၵူၼ်းလူႉတၢႆ ယွၼ်ႉတိတ်းၸပ်းတၢင်းပဵၼ် ၶူဝ်ႊဝိတ်ႉ – 19 တီႈမိူင်းမလေးသျႃးၼၼ်ႉ ပႆႇမီးသေၵေႃႉ။ တေႃႇထိုင်ဝၼ်းတီႈ 10 လိူၼ်မေႊၼႆႉတႄႉ တူဝ်ႈမိူင်းပတ်းပိုၼ်ႉ မီးၵူၼ်း တိတ်းၸပ်း 11,727 ၵေႃႉ ဝႃႈၼႆ။

တီႈမိူင်းထႆးတႄႉ ၼႂ်းပီ 2025 ၼႆႉ ၵူၼ်းတိတ်းၸပ်းတၢင်းပဵၼ် ၶူဝ်ႊဝိတ်ႉ – 19 ၵိုင်ႉၵၢင်ႉပုင်ႈၶိုၼ်ႈသုင်မႃးၶိုၼ်း။ တႄႇဢဝ်ဝၼ်းတီႈ 1 လိူၼ်ၵျႅၼ်ႊၼိဝ်ႊရီႊတေႃႇထိုင် ဝၼ်းတီႈ 16 လိူၼ်မေႊၼႆႉ မီးၵူၼ်းတိတ်းၸပ်းတၢင်းပဵၼ် 91,448 ၵေႃႉ၊ ၵူၼ်းလူႉတၢႆ မီး 24 ၵေႃႉ ဝႃႈၼႆ။

ဢၼ်မီးၵူၼ်းတိတ်းၸပ်းၼမ်လိူဝ်ပိူၼ်ႈသမ်ႉ ပဵၼ်ၼႂ်းၸႄႈတွၼ်ႈမိူင်းၵွၵ်ႇ၊ ၶျူၼ်းပူးရီးလႄႈ ရယွင်း ၸိူဝ်းၼႆႉ။

ယၢမ်းလဵဝ် ယွၼ်ႉတႄႇၶဝ်ႈမႃးၼႂ်းၶၢဝ်းၾူၼ်၊ ႁူင်းႁဵၼ်းၵေႃႈ ပိုတ်ႇၶိုၼ်း၊ မိူဝ်ႈၶၢဝ်းသွၼ်းၼမ်ႉသမ်ႉ ၵူၼ်းၶွၼ်ႈတုမ်ၵၼ်ၼမ်၊ ၶႅၵ်ႇဢႅဝ်ႇလႄႇတွင်ႈတဵဝ်းၵေႃႈၼမ်လႄႈ ၸင်ႇႁဵတ်း ႁႂ်ႈႁူဝ်ၼပ်ႉ ၵူၼ်းတိတ်းၸပ်းတၢင်းပဵၼ် ၼမ်ၶိုၼ်ႈမႃး။ ပိူင်လူင် လုၵ်ႈဢွၼ်ႇၸိူဝ်းတိုၵ်ႉၵိူတ်ႇ တေႃႇထိုင် ဢႃယု 4 ၶူပ်ႇလႄႈ ၵူၼ်းလူင်ၼႂ်းၵႄႈဢႃယု 20 – 39 ပီ ၸိူဝ်းၼႆႉ တိူဝ်းတိတ်းၸပ်းတၢင်းပဵၼ်ၼမ်ဝႆႉၼႆ ႁွင်ႈၵၢၼ်ၾၢႆႇပၢႆးယူႇလီမိူင်းထႆး ပိုၼ်ၽၢဝ်ႇဝႆႉၼင်ႇၼႆ။  

ဢၢင်ႈဢိင် – DVB