တႄႇဝၼ်းတီႈ 17/05/2025 ၼႆႉမႃးတေႃႇထိုင်ဝၼ်းမိူဝ်ႈၼႆႉ သိုၵ်းမၢၼ်ႈတင်း ပျီႇတူႉၸိတ်ႉပဢူဝ်း PNO ႁူမ်ႈၵၼ်ပိုတ်းယိုဝ်းၵၼ်တင်း ၸုမ်းၵႅတ်ႇၶႄႇၵူၼ်းမိူင်း PDF ႁၢဝ်ႈႁႅင်း ၼႂ်းၵႄႈၸႄႈဝဵင်းပၢင်လွင်း – ၸႄႈဝဵင်းၾၢႆၶုၼ် တီႈဝၢၼ်ႈသွင်းပျွင်း ၾၢႆႇတင်းသိုၵ်းမၢၼ်ႈ ၽဝ်ႁိူၼ်းၵူၼ်းပိုၼ်ႉတီႈလူႉသုမ်းပႃး။
ၼၢင်းယိင်း ၵူၼ်းဝၢၼ်ႈသွင်းပျွင်း လၢတ်ႈၽူႈတွႆႇႁွၵ်ႈဝႃႈ – “ၸဵမ်လႂ် PNO ႁၢမ်ႈၵူၼ်းမိူင်းဢွၵ်ႇၼွၵ်ႈႁိူၼ်း ယေး။ ၵူၺ်းၾၢႆႇၼိုင်ႈၵေႃႈ သိုၵ်းမၢၼ်ႈသမ်ႉ ဢဝ်ၶိူင်ႈမိၼ်မႃးယိုဝ်းသႂ်ႇ၊ တိူဝ်ႉသႂ်ႇႁိူၼ်းယေး ၵူၼ်းမိူင်း ၾႆးမႆႈလူႉၵွႆ။ ပေႃးဢမ်ႇပၢႆႈၵေႃႈတေတၢႆ။ တေႃႇထိုင်ယၢမ်းလဵဝ် ႁိူၼ်းယေးဢၼ်ၾႆးမႆႈ လူႉၵွႆၼၼ်ႉ တေ မီးလၢႆလင်ယဝ်ႉလႄႈ တေလူႉသုမ်းၸိူင်ႉႁိုဝ် ပႆႇႁူႉလႆႈႁူဝ်ယွႆႈတႅတ်ႈတေႃး။ ၸုမ်းယိပ်းၵွင်ႈၶဝ်ၶဝ်ႈဝၢၼ်ႈသေ သွၵ်ႈတဝ်ဢဝ်ၶူဝ်းႁိူၼ်းၵူၼ်းဝၢၼ်ႈၵႂႃႇၵေႃႈမီးတင်းၼမ်”- ဝႃႈၼႆ။
ၼႂ်းပၢင်တိုၵ်းၼႆႉ ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ်မႃးပွႆႇမၢၵ်ႇသႂ်ႇၵူႈဝၼ်းလႄႈ ၵူၼ်းမိူင်း ၸိူဝ်းယူႇႁိမ်းႁွမ်း ၼၼ်ႉ ဢမ်ႇၸၢင်ႈယူႇၸၢင်ႈသဝ်း။ ၵူၼ်းဝၢၼ်ႈလွႆၵဵင်ႈ၊ ဝၢၼ်ႈႁူဝ်ဝူဝ်း၊ ဝၢၼ်ႈသွင်းပျွင်း၊ ဝၢၼ်ႈၼွၵ်ႇဝူဝ်း၊ ဝၢၼ်ႈသေႃလမ်၊ ဝၢၼ်ႈၼမ်ႉၽႃမူလႄႈ ဝၢၼ်ႈမႂ်ႇ လႆႈပၢႆႈၽေးသိုၵ်းဝႆႉ လူဝ်ႇတၢင်းၸွႆႈထႅမ်တင်းၵိၼ်တင်း ယႅမ်ႉတီႈယူႇတၼ်းသဝ်းဝႆႉ ဝႃႈၼႆ။
ၼၢင်းယိင်း ပၢႆႈၽေးသိုၵ်း လၢတ်ႈၽူႈတွႆႇႁွၵ်ႈဝႃႈ -“ၼႅတ်ႈဢဝ်ၶူဝ်းပၢႆႈမႃးၵူၺ်းလႄႈ တႃႇတင်းၵိၼ်တင်း ယႅမ်ႉယၢပ်ႇၸႂ်ဝႆႉ၊ မိူဝ်ႈပၢင်တိုၵ်း ပီ 2024 ၼၼ်ႉၵေႃႈ ၵူၼ်းဝၢၼ်ႈ လႆႈပၢႆႈၽေးသိုၵ်းယဝ်ႉပွၵ်ႈၼိုင်ႈ။ ၵူၼ်း ပၢႆႈၽေးဢၼ်ပႆႇပွၵ်ႈၶိုၼ်းၼၼ်ႉၵေႃႈ တိုၵ်ႉမီးၼမ် လင်ႁိူၼ်းမီးၸမ် 600 ပၢႆၼႆႉ တေႃႈလဵဝ်သမ်ႉ လႆႈပၢႆႈ ၽေးသိုၵ်းထႅင်း၊ ၵူၼ်းၼႂ်းဝၢၼ်ႈ ဢၼ်ဢမ်ႇပၢႆႈၽေးသိုၵ်းၵေႃႈ မီးယူႇၵမ်ႈၽွင်ႈ ၊ ထိုင်မိူဝ်ႈၼႆႉ ၶဝ်တိုၵ်ႉ ယိုဝ်းၵၼ်ဝႆႉယူႇ”- ဝႃႈၼႆ။
လိူဝ်ၼၼ်ႉၸုမ်းပျီႇတူႉၸိတ်ႉ PNO ၶဝ်ၶဝ်ႈၼႂ်းဝၢၼ်ႈဢဝ်ၶူဝ်းၸႂ်ႉသွႆႈၵူၼ်းပိုၼ်ႉတီႈ မိူၼ်ၼင်ႇ ၸၢၵ်ႈထႆ သူၼ် ၊ ရူတ်ႉၶိူင်ႈလႄႈ ၸၢၵ်ႈ ၸိူဝ်းၼႆႉသေ ဢဝ်ၵႂႃႇၶၢႆၵိၼ်ၼႂ်းဝဵင်း – ၵူၼ်းပိုၼ်ႉတီႈလၢတ်ႈ။
ၵူၼ်းဝၢၼ်ႈ ၸိူဝ်းထူပ်းၽေးသိုၵ်း ဢွၼ်ၵၼ်ပၢႆႈၵႂႃႇယူႇတၢင်းဝဵင်းၸၢမ်ၵႃး ၊ ဝၢၼ်ႈမွၵ်ႇပီ (မေႃႇပီႇ)၊ ဝၢၼ်ႈပၢင်ၶုၼ် (ပင်ခွန်)၊ ၼမ်ႉထႃး(နန်းထာ) လႄႈ ဝၢၼ်ႈဝႃးလီး ၸိူဝ်းၼႆႉၵေႃႈမီး ဝႃႈၼႆ။
ဢွင်ႈတီႈ ဢၼ်ပၢင်တိုၵ်းတႄႉ ယၢၼ်ၵႆၵၼ်တင်းဝဵင်းၾၢႆၶုၼ်မွၵ်ႈ 5 လၵ်း။ မီးတီႈလႅၼ်ၶႅၼ်ႈပၢင်လွင်း – ၾၢႆၶုၼ် တိတ်းၸပ်းၵၼ်။
တႄႇဢဝ်ၵၢင်လိူၼ်ၵျုၼ်ႊ ပီ 2024 ပူၼ်ႉမႃးၼၼ်ႉသေ ၾၢႆႇသိုၵ်းမၢၼ်ႈထႅမ်ႁႅင်း ၵႂႃႇတၢင်းဝဵင်းၾၢႆၶုၼ်၊ ၽွင်းႁွတ်ႈထိုင် တီႈဝၢၼ်ႈသွင်းပျွင်း ယၢၼ်ၵႆဝဵင်းၾၢႆၶုၼ် မွၵ်ႈ 11 လၵ်းၼၼ်ႉ ၸုမ်းလုၵ်ႉၽိုၼ်ႉၶဝ် ႁႅၼ်းသိုၵ်းလေႃႇတိုၵ်းသေ သိုပ်ႇပဵၼ်ပၢင်တိုၵ်းၵၼ်မႃးႁၢဝ်ႈႁႅင်း ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ