မိူဝ်ႈဝႃး ဝၼ်းတီႈ 18/05/2025 ယၢမ်းၵၢင်ၼႂ် 10 မူင်း 40 မိၼိတ်ႉ ၵူၼ်းပၢႆႈၽေးသိုၵ်း တီႈၵျွင်းၶဵဝ်ၶမ်း ဢၼ်မီးတီႈတၢင်းၽႄ ဢိူင်ႇဢုမ်ႇတီး ၸႄႈဝဵင်းၼွင်ၶဵဝ်ၼၼ်ႉ ၺႃးယိုဝ်းတၢႆၵေႃႉၼိုင်ႈ ၵူၼ်းပိုၼ်ႉတီႈလၢတ်ႈဝႃႈ ပဵၼ်သိုၵ်းတဢၢင်း TNLA ယိုဝ်း ဝႃႈၼႆ။

သိုၵ်းတဢၢင်း TNLA ၼႆႉ ပိူဝ်ႈတႃႇလေႃႇတိုၵ်းလႄႈ ႁပ်ႉတိုၵ်းသိုၵ်းမၢၼ်ႈၼႆသေ ဢဝ်ၼႃႈတီႈယူႇဝႆႉၼႂ်း ၸႄႈဝဵင်းၼွင်ၶဵဝ်။ ယၢမ်းလဵဝ် ၵမ်ၵိၼ်းလႄႈ ပေႉၵိၼ်လူလၢႆတေႃႇ ၵူၼ်းမိူင်းၸိူဝ်းၵိုတ်းၶမ်ဝႆႉ ၼႂ်းပိုၼ်ႉ တီႈပဵၼ်ပၢင်တိုၵ်းၼၼ်ႉၼႆ – ၵူၼ်းမိူင်းၼႂ်းၸႄႈဝဵင်းၼွင်ၶဵဝ်ၵေႃႉၼိုင်ႈ လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“မိူဝ်ႈလဵဝ်ၼႆ သိုၵ်းလွႆၶဝ်မိူၵ်ႈၼႃႇၶႃႈ။ ၽွင်းၵေႃႉၼၼ်ႉ (ၵေႃႉၺႃးယိုဝ်းတၢႆၼၼ်ႉ) တိုၵ်ႉတေၵႂႃႇၼူဝ်း ၸၢၵ်ႈထေႃႈ ၶဝ်ၵႂၢႆးတေဢွၵ်ႇဝၢင်းၵျွင်းၵႂႃႇၼႃး သိုၵ်းလွႆၶဝ်ႁမ်ႉ ဢဝ်ၵွင်ႈယိုဝ်း ၶဝ်ႈမႃးၼႂ်းၵျွင်း။ မၢၵ်ႇၵွင်ႈ တိူဝ်ႉၺႃးၼၼ်ႉႁႄ တၢႆၵႂႃႇၼႂ်းၵျွင်းၵမ်းလဵဝ်။ ဢမ်ႇတၼ်းဢဝ်ၵႂႃႇယႃတီႈလႂ်။ ၶဝ်ဢမ်ႇၶႂ်ႈပၼ်ၵူၼ်းမိူင်း ဢွၵ်ႇၵႂႃႇတၢင်းလႂ်ႁႄ တင်ႈၸႂ်ယိုဝ်းၶဝ်ႈမႃး ၼႂ်းၵျွင်းၼၼ်ႉၼႃႇ”။

ၵေႃႉၺႃးယိုဝ်းတၢႆၼႆႉ ပဵၼ်ၸၢႆးဢၢႆႈလႅင်ႇ ဢႃယု 34 ပီ ။ ယိုဝ်းတၢႆတီႈဝၢၼ်ႈတၢင်းၽႄ ဢိူင်ႇဢုမ်ႇတီး ။

မိူဝ်ႈပူၼ်ႉမႃး ဝၼ်းတီႈ 14/05/2025 ယၢမ်းၵၢင်ၼႂ် 9 မူင်းၼၼ်ႉၵေႃႈ သိုၵ်းတဢၢင်း TNLA ယိုဝ်းၵူၼ်းမိူင်း ဝၢၼ်ႈၶူၵ်ႉၼမ်ႉ ၸႄႈဝဵင်းၼွင်ၶဵဝ် သွင်ၵေႃႉ မၢၵ်ႇၵွင်ႈတိူဝ်ႉၺႃး တီႈၼႃႈ ဢူၵ်း ၵေႃႉၼိုင်ႈသေ လူႉတၢႆၵႂႃႇ ၵမ်းလဵဝ် ပဵၼ်ၸၢႆးၺုၼ်ႉ ဢႃယု 62 ပီ။ ထႅင်ႈၵေႃႉၼိုင်ႈသမ်ႉ ပဵၼ်ၸၢႆးဢေး မၢၵ်ႇၵွင်ႈတိူဝ်ႉၺႃးဢႅဝ်လႄႈ ႁဵတ်းႁႂ်ႈမၢတ်ႇၸဵပ်းၵႂႃႇႁၢဝ်ႈႁႅင်းထုၵ်ႇသိုၵ်းတဢၢင်း ႁွင်ႉၵႂႃႇဝႆႉတီႈဝဵင်းၵူတ်ႉၶၢႆ ယၢမ်းလဵဝ် ၾၢႆႇ ပီႈၼွင်ႉၸိူဝ်ႉၶိူဝ်း ၵပ်းသိုပ်ႇတိတ်းတေႃႇ ဢမ်ႇလႆႈယဝ်ႉ ဝႃႈၼႆ။

ၵူၼ်းဝၢၼ်ႈတႄႉ ယိုၼ်ယၼ်လၢတ်ႈဝႃႈ – ပဵၼ်သိုၵ်းလွႆၵေႃႉယိုဝ်းၼႆသေတႃႉ သိုဝ်ႇၶၢဝ်ႇ မႃးၼၵႃးတႄႉ တႅမ်ႈတၢင်ႇလၢတ်ႈဝႆႉဝႃႈ – ဢၼ်ယိုဝ်းၵူၼ်းပၢႆႈၽေးသိုၵ်းတၢႆၼႆႉ ပဵၼ်သိုၵ်းမၢၼ်ႈ ဝႃႈၼႆဝႆႉ။

လွင်ႈၵူၼ်းပၢႆႈၽေးသိုၵ်း ထုၵ်ႇယိုဝ်းၼႆႉ ယူႇတီႈၽူႈတွႆႇႁွၵ်ႈ ၶတ်းၸႂ်ၵပ်းသိုပ်ႇၸူး ၽူႈၶၢၼ်ပၢၵ်ႇ TNLA ယူႇၵေႃႈတိတ်းတေႃႇဢမ်ႇလႆႈ- တီႈၼႃႈလိၵ်ႈၾၢႆႇပွင်ႇၶၢဝ်ႇၶဝ်ၵေႃႈ ပႆႇတႅမ်ႈတၢင်ႇ လွင်ႈၼႆႉဝႆႉဝႃႈႁိုဝ်။

ယွၼ်ႉသိုၵ်းတဢၢင်း TNLA တင်း သိုၵ်းမၢၼ်ႈ ပဵၼ်ပၢင်တိုၵ်းၵၼ် ယင်းပႆႇယဝ်ႉတူဝ်ႈႁၢၼ်ႉတေႃႇထိုင် ဝၼ်းမိူဝ်ႈၼႆႉ။ ၾၢႆႇၼိုင်ႈၵေႃႈ သိုၵ်းတဢၢင်း TNLA ဢမ်ႇပၼ်ၵူၼ်းမိူင်းဢွၵ်ႇၵႂႃႇႁဵတ်းသူၼ်ႁႆႈၼႃးလႄႈ ႁဵတ်းႁႂ်ႈၵူၼ်းမိူင်းႁူပ်ႉတၢင်းယၢပ်ႇၽိုတ်ႇၵိၼ်းႁႅင်းသေ လူဝ်ႇတၢင်းၵမ်ႉၸွႆႈ ၶဝ်ႈၼမ်ႉတၢင်းၵိၼ်ဝႆႉယူႇ။

ၵူၼ်းမိူင်းၸႄႈဝဵင်းၼွင်ၶဵဝ် ၸိူဝ်းၵိုတ်းၶမ်ဝႆႉ ၼႂ်းပိုၼ်ႉတီႈပဵၼ်ပၢင်တိုၵ်းၼၼ်ႉ မီးယူႇမွၵ်ႈ 100 ၵေႃႉပၢႆ ဢွၼ်ၵၼ်ပၢႆႈ ၵႂႃႇယူႇဝႆႉ ၼႂ်းၵျွင်းၶဵဝ်ၶမ်း ႁိမ်းတၢင်းၽႄ ဢိူင်ႇဢုမ်ႇတီးၼၼ်ႉ မီးၵႂႃႇၶၢဝ်းတၢင်း ၼိုင်ႈပီပၢႆ။ ၵျွင်းၶဵဝ်ၶမ်းၼႆႉ မီးဝႆႉၸဵင်ႇၸၢၼ်းဝၼ်းတူၵ်း ဝဵင်းၼွင်ၶဵဝ်သေ ယၢၼ်ၵႆၵၼ်တင်းဝဵင်းမွၵ်ႈ 10 လၵ်းပၢႆ၊ ႁၢင်ႇၵႆၵၼ်တင်း ဝၢၼ်ႈတွင်းၶမ်း 18 လၵ်းပၢႆ ယူႇဝႆႉၵႄႈၵၢင်ႈ ဝၢၼ်ႈသၢမ်သိူဝ်လႄႈ ဢုမ်ႇတီး ၼႆယဝ်ႉ။

တႅမ်ႈ – ၽူၺ်းၼုမ်ႇ