ၸွမ်ၸိုင်ႈမိူင်းဢမေႊရိၵၼ်ႊ ၻူဝ်ႊၼေႃႊ ထရမ်ႉ ဢွၵ်ႇၶၢဝ်းတၢင်းၵႂႃႇ မိူင်းသေႃႇတီႇဢႃႇ ရေးပီႊယႃး (Saudi Arabia) ပွၵ်ႈၼႆႉ လႆႈၶေႃႈတူၵ်းလူင်း တႃႇတေၶၢႆၶိူင်ႈယိပ်းၵွင်ႈၵၢင်ႇပၼ် မိူင်းသေႃႇတီႇ ၵိုင်ႇငိုၼ်းဢမေႊရိၵၼ်ႊတေႃႊလႃႊ 142 ပီႊလီႊယႅၼ်ႊ ဝႃႈၼႆ။

ၶၢဝ်းတၢင်းၸွမ်ၸိုင်ႈ ထရမ်ႉ ပွၵ်ႈၼႆႉ ယိူင်းဢၢၼ်း တႃႇတေလႆႈၶေႃႈတူၵ်းလူင်း လွင်ႈယုၵ်ႉမုၼ်း ၵၢၼ်လူင်းတိုၼ်းလၢင်း ၼႂ်းၵႄႈၵၢင်မိူင်းဢမေႊရိၵၼ်ႊလႄႈတင်း ၸိုင်ႈမိူင်းၸိူဝ်းမၢၵ်ႈမီး။

ႁိူၼ်းႁေႃၶၢဝ် မိူင်းဢမေႊရိၵၼ်ႊ ပိုၼ်ၽၢဝ်ႇဝႆႉဝႃႈ – ၸွမ်ၸိုင်ႈ ထရမ်ႉ လႆႈလူင်းမိုဝ်း တႃႇၶၢႆၶိူင်ႈယိပ်းၵွင်ႈၵၢင်ႇၵၼ်တင်း ၸဝ်ႈၸၢႆး မူဝ်ႇႁႃႇမႅတ်ႉ ပိၼ်ႇသႄႇလ်မႅၼ်ႇ (Mohammed bin Salman) မိူင်းသေႃႇတီႇ။ လိူဝ်ၼၼ်ႉ မုင်ႈမွင်းဝႆႉ တႃႇတေလူင်းတိုၼ်းလၢင်းထႅင်ႈ တႃႇငိုၼ်း 1 ထရီႊလီႊယႅၼ်ႊ ဢမေႊရိၵၼ်ႊတေႃႊလႃႊ ဝႃႈၼႆ။

မိူဝ်ႈၽွင်း ထရမ်ႉ ၶိုၼ်ႈပဵၼ်ၸွမ်ၸိုင်ႈ မိူင်းဢမေႊရိၵၼ်ႊ ပွၵ်ႈၵမ်းၼိုင်ႈၼၼ်ႉၵေႃႈ လႆႈဢွၵ်ႇၶၢဝ်းတၢင်းၼွၵ်ႈမိူင်း ၵႂႃႇတီႈမိူင်းသေႃႇတီႇ ဢွၼ်တၢင်းသုတ်း။

ၽွင်းၼၼ်ႉ လႆႈၶၢႆၶိူင်ႈယိပ်းၵွင်ႈၵၢင်ႇပၼ် မိူင်းသေႃႇတီႇ ၵိုင်ႇငိုၼ်းဢမေႊရိၵၼ်ႊတေႃႊလႃႊ 110 ပီႊလီႊယႅၼ်ႊလႄႈ ၶေႃႈတူၵ်းလူင်းတႃႇႁဵတ်းသၢင်ႈ ၵၢၼ်ပၢႆးမၢၵ်ႈမီး ၵိုင်ႇငိုၼ်း ဢမေႊရိၵၼ်ႊတေႃႊလႃႊ 450 ပီႊလီႊယႅၼ်ႊပၢႆ ၼႆယဝ်ႉ။

ၼႂ်းၶၢဝ်းတၢင်း ၸွမ်ၸိုင်ႈ ထရမ်ႉ ၵႂႃႇမိူင်းဝၼ်းဢွၵ်ႇၵၢင် ပွၵ်ႈၼႆႉ မီးပႃးၸဝ်ႈၵၢၼ် ပၢႆးမၢၵ်ႈမီး လူင် ၼႂ်းမိူင်းဢမေႊရိၵၼ်ႊ မိူၼ်ၼင်ႇ ၽူႈမၢၵ်ႈမီးလူင် ဢီႊလုၼ်ႊမၢၵ်ႉ ၊ သႅမ်ႇဢႄးမၢၼ်း Sam Altman ၽူႈၸတ်းၵၢၼ်လူင် OpenAI ၊ လႄႇလီႇၾိင်ႉ Larry Fink ၽူႈၸတ်းၵၢၼ်လူင် BlackRock လႄႈ Jensen Huang ၽူႈၸတ်းၵၢၼ်လူင် Nvidia ၸိူဝ်းၼႆႉၵႂႃႇ ၸွမ်း – သိုဝ်ႇၶၢဝ်ႇ The Irrawaddy ဢွၵ်ႇဝႆႉၼင်ႇၼႆ။