တင်ႈတႄႇ တပ်ႉသိုၵ်းၵဝ်ႈၵၢင်ႉ MNDAA ၶဝ်ႈမႃးၵုမ်းၵမ်ယူႇၸွမ်းပိုၼ်ႉတီႈ ၼႂ်းၸႄႈဝဵင်းသီႇပေႃႉမႃး ၶၢဝ်းတၢင်း 5 လိူၼ်ပၢႆၼႆႉ သိုၵ်းၶဝ်ပၼ်ၶႂၢင်ႉပိုတ်ႇပၢင်တေႃႇလွင်း ၸွမ်းဝၢၼ်ႈလၢႆတီႈလႄႈ ႁဵတ်းႁႂ်ႈၵူၼ်းမိူင်း တုမ်ႉတိူဝ်ႉၵၢၼ်ပၢႆးမၢၵ်ႈမီး ၵမ်ႈၽွင်ႈ ၾိင်ႈယၢမ်ႈလူႉ ၵၢမ်ႉၶူဝ်းၶွင်ႁိူၼ်းယေး ရူတ်ႉၵႃး ၸိူဝ်းၼႆႉထႅင်ႈ။

ၵူၼ်းပိုၼ်ႉတီႈ ဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းတၢင်းဝၢၼ်ႈႁဝ်းၼႆႉ ၵမ်ႈၽွင်ႈ တေႃႇ လွင်းသုမ်းမွၵ်ႈ 4-5 သႅၼ်ၼႆႉဢိူဝ်ႈ။ မွၵ်ႈ 10 သႅၼ်ၵေႃႈမီးယဝ်ႉ။ မိူဝ်ႈဢွၼ်တၢင်း ၶဝ်ပိုတ်ႇၸွမ်းဝၢၼ်ႈပၢင်ၼိဝ်ႉ ၸိူဝ်းၼၼ်ႉ။ မိူဝ်ႈၼၼ်ႉၵေႃႈ ၵူၼ်းၵႂႃႇလွင်ႈသုမ်း ထိုင်တီႈလႆႈၵၢမ်ႉရူတ်ႉ ပွင်ႇၶူဝ်း ႁိူၼ်းယေး ၸိူဝ်းၼႆႉၵေႃႈမီး။ ပေႃးမီးပၢင်တေႃႇလွင်းၵေႃႈ ၽူႈလၵ်ႉၸၵ်ႉၶုတ်ႈၼႆႉ တိုၼ်းၼမ်မႃးၶႃႈယဝ်ႉ။ မၼ်းတေပဵၼ်ၽွၼ်းႁၢႆႉ တွၼ်ႈတႃႇၵူၼ်းမိူင်းႁဝ်းၵူၺ်း။ ၵူၼ်းလၵ်ႉၸိူဝ်းၼၼ်ႉ ပေႃးလွင်းသုမ်းယဝ်ႉ ၵႂႃႇႁႃလၵ်ႉႁႃၸူၼ်ပိူၼ်ႈ တေမီးမႃးၸိူင်ႉၼႆယဝ်ႉ”- ဝႃႈၼႆ။

ယူႇတီႈ သိုၵ်းၵဝ်ႈၵၢင်ႉၶဝ်သေ ပိုတ်ႇမႃးပၢင်တေႃႇလွင်းမႃးၼႆႉ တင်ႈတႄႇၶူဝ်လူင်ဝဵင်းသီႇပေႃႉ တေႃႇထိုင် ဝဵင်းလႃႈသဵဝ်ႈၼၼ်ႉ သဵၼ်ႈၼိုင်ႈ။ ယဝ်ႉၵေႃႈ တင်ႈတႄႇ ဝဵင်းသီႇပေႃႉ – သႅင်ၵႅဝ်ႉ – မိူင်းယႆၼႆႉထႅင်ႈ သဵၼ်ႈၼိုင်ႈ။ မိူဝ်ႈၽွင်းသိုၵ်းမၢၼ်ႈ ၶဝ်ႈဝဵင်းလႃႈသဵဝ်ႈမႃးၼၼ်ႉ ပၢင်တေႃႇလွင်း မၢင်တီႈၸိူဝ်းၼၼ်ႉ ပိၵ်ႉၶိုၼ်းသေတႃႉ ယၢမ်းလဵဝ်တႄႉ ပိုတ်ႇၶိုၼ်းမူတ်းယဝ်ႉ။

“တၢင်းၵႂႃႇၶူဝ်လဵၵ်း တီႈႁိမ်းၼွင်ဢိူင်ႇၼၼ်ႉၵေႃႈ မီးပၢင်တေႃႇလွင်းထႅင်ႈ။ တီႈၶူဝ်လဵၵ်းၼႆႉ ၶဝ်တိုၵ်ႉပိုတ်ႇမႃးမွၵ်ႈ 2 ဝူင်ႈၼႆႉၵူၺ်း။ တီႈသွင်ၵႄးၵေႃႈ ပိုတ်ႇယူႇ 2-3 ယူင်ႇ။ မိူဝ်ႈတႄႇမၼ်းတႄႉ ဢမ်ႇမီးၵူၼ်းမႃးလဵၼ်ႈ ၶဝ်ၶိုၼ်းပိၵ်ႉၵႂႃႇ ၸင်ႇႁႃမႃးပိုတ်ႇၶိုၼ်း ၼႂ်းၶၢဝ်းတၢင်း 10 ဝၼ်းပၢႆၼႆႉၵူၺ်း။ ၸွမ်းသဵၼ်ႈတၢင်းသီႇပေႃႉတႄႉ ငိၼ်းဝႃႈ တၢင်းဝၢၼ်ႈပၢင်ၸဝ်ႈမိူင်း၊ ဝဵင်းၵဝ်ႇ ၸိူဝ်းၼၼ်ႉတႄႉ မီးပၢင်တေႃႇလွင်းၼမ်။ တီႈၼွင်ဢိူင်ႇၵေႃႈမီး တီႈႁိမ်းႁူင်းယႃမူႇဝၢၼ်ႈၼၼ်ႉၵေႃႈမီးၼႆၶႃႈဢေႃႈ ပၢင်တေႃႇလွင်းၼႆႉ”- ၵူၼ်းပိုၼ်ႉတီႈ ဝဵင်းသီႇပေႃႉ လၢတ်ႈၼႄၼင်ႇၼႆ။

ၽွင်းၵၢၼ်ႁႃၵိၼ်လဵင်ႉတွင်ႉယၢပ်ႇၽိုတ်ႇ ၸိူင်ႉၼႆၼႆႉ ၵူၼ်းမိူင်းတႄႉ ဢွၼ်ၵၼ်မႆႈၸႂ် ၵူဝ်ပၢင်တေႃႇ လွင်းလိူင်ႇၼမ်သေ တေၸၢင်ႈႁဵတ်းႁႂ်ႈၵူၼ်းမိူင်းတုၵ်ႉယၢၵ်ႈ ၵွတ်းၽၢၼ်လႄႈ ၽူႈလၵ်ႉၸၵ်ႉၶုတ်ႈၵေႃႈ တေၸၢင်ႈလိူင်ႇၼမ်မႃး ၼႆယဝ်ႉ။

“ၸူဝ်ႈၵဝ်ႈၵၢင်ႉၶဝ်ႈမႃးၼႆႉ တႃႇတေႁႃၵၢၼ်ပၢႆးမၢၵ်ႈမီးၶဝ်တႄႉ ၸွမ်းၼင်ႇၶဝ်ႁဵတ်းပွင်ပဵၼ်လႆႈ ၶဝ်တိုၼ်းႁဵတ်းၵႂႃႇမူတ်းမူတ်းယဝ်ႉ။ မိူဝ်ႈသိုၵ်းတႆးမီးတႄႉ ၶဝ်ဢမ်ႇပၼ်ၶႂၢင်ႉပိုတ်ႇ။ ပေႃးသိုၵ်းၵဝ်ႈၵၢင်ႉ တိုၵ်ႉမီးယူႇတႄႉ ပၢင်တေႃႇလွင်းၼႆႉ တိုၼ်းတေမီးၼမ်ယဝ်ႉ”- ၵူၼ်းပိုၼ်ႉတီႈ ဝဵင်းသီႇပေႃႉလၢတ်ႈ။

ၵွပ်ႈၼႆလႄႈ ၵူၼ်းမိူင်းတႄႉ ဢွၼ်ၵၼ်မႆႈၸႂ် သင်ဝႃႈ မီးပၢင်တေႃႇလွင်းၼႆ တေၸၢင်ႈမီးပၼ်ႁႃ ၼႂ်းမုင်ႉႁေႃႁိူၼ်း ၽူဝ်မေးၽိတ်းမေႃးၵၼ် ၸၢင်ႈႁဵတ်းႁႂ်ႈၼႃႈႁိူၼ်းတႅၵ်ႇယၢႆႈ ၸိူဝ်းၼႆႉ။ ယဝ်ႉၵေႃႈ ၽူႈလၵ်ႉၸၵ်ႉၶုတ်ႈ တေလိူင်ႇၼမ် သင်ဢမ်ႇမီးငိုၼ်းမႃး ၵူဝ်လႃႈလီႈႁဵတ်းႁွတ်းတေႃႇၵၼ် ၼႆၸိူဝ်းၼႆႉ။  

ဢွင်ႈတီႈဢၼ်မီးပၢင်တေႃႇလွင်း ၼႂ်းၸႄႈဝဵင်းသီႇပေႃႉၼႆႉ ပဵၼ်ၸွမ်းဝၢၼ်ႈၼွၵ်ႈၼႃးပၢင်ႈ မိူၼ်ၼင်ႇ ၼႂ်းဢိူင်ႇၼႃးမၢၵ်ႇၶေႃ၊ သွင်ၵႄးလႄႈ သီႇထွၵ်ႈ ၸိူဝ်းၼႆႉ။ ဝၢႆးၽႅၼ်ယၼ်ႇသိုၵ်း 1027 ႁွပ်ႈသွင်ၼႆႉ တပ်ႉသိုၵ်းတဢၢင်း TNLA ၶဝ်ႈၵုမ်းၵမ်ၼႂ်းဝဵင်းသီႇပေႃႉသေတႃႉ ၸွမ်းပိုၼ်ႉတီႈသၢပ်ႇဝဵင်း ၸွမ်းဝၢၼ်ႈလၢႆတီႈ ၸိူဝ်းၼႆႉ။ တပ်ႉသိုၵ်းၵဝ်ႈၵၢင်ႉ MNDAA ၶဝ်ၵုမ်းၵမ်ဝႆႉ။ မိူၼ်ၼင်ႇ ၸွမ်းမူႇဝၢၼ်ႈ ၸိူဝ်းဢၼ် မီးႁိမ်းၾင်ႇတၢင်း ၼႂ်းၵႄႈဝဵင်းၼမ်ႉလၼ်ႈလႄႈ မိူင်းယႆ ၸိူဝ်းၼႆႉ။