ဝၼ်းတီႈ 14/05/2025 ယၢမ်းၵၢင်ၼႂ် 8 မူင်း တပ်ႉသိုၵ်းဝႃႉ UWSA ပၼ်တၢမ်ႇတၢႆ ၵူၼ်းသိုၵ်းဝႃႉၶဝ် ၵေႃႉလၵ်ႉဢဝ်ၶိူင်ႈၵွင်ႈၵၢင်ႇၵႂႃႇၶၢႆၼၼ်ႉ တီႈဝဵင်းပၢင်သၢင်း ၼႂ်းထုင်ႉတပ်ႉသိုၵ်းဝႃႉၵုမ်းၵမ် ၸိုင်ႈတႆးပွတ်းႁွင်ႇ။

ၵဵဝ်ႇလူၺ်ႈလွင်ႈၼႆႉ ၾၢႆႇပွင်ၵၢၼ်တပ်ႉသိုၵ်းဝႃႉ UWSA ပိုၼ်ၽၢဝ်ႇဢွၵ်ႇဝႃႈ – တီႈပၢင်ပၼ်တူတ်ႈတၢမ်ႇ တၢႆၵူၼ်းသိုၵ်းၼၼ်ႉ ႁႂ်ႈလုၵ်ႈႁဵၼ်း ၼႂ်းႁူင်းႁဵၼ်းသွၼ်လိၵ်ႈ ဢၼ်မီးၼႂ်းဝဵင်းပၢင်သၢင်းတင်းသဵင်ႈလႄႈ ပေႃႈမႄႈၵူၼ်းမိူင်းမႃးၶဝ်ႈႁူမ်ႈ တူၺ်းၸွမ်းၵႂႃႇ ပိူဝ်ႈတႃႇပဵၼ်တွၼ်ႈသွၼ်မိူဝ်းၼႃႈ – ဝႃႈၼႆ။

ၼႂ်းသိုဝ်ႇၶၢဝ်ႇတူင်ႇဝူင်းၵူၼ်းတႄႉ ဢွၼ်ၵၼ်ႁူင်လိုဝ်းၵၼ်ဝႃႈ – ၵူၼ်းသိုၵ်းသွင်ၵေႃႉၼႆႉ လၵ်ႉဢဝ်ၶိူင်ႈ ၵွင်ႈၵၢင်ႇ ၼႂ်းတပ်ႉသိုၵ်းဝႃႉ UWSA ဢၼ်ပႃးမၢၵ်ႇၵွင်ႈ ၼိုင်ႈတိူၵ်ႈလႂ် 800 လုၵ်ႈ တႃႇ 40 တိူၵ်ႈသေ ၵႂႃႇၶၢႆပၼ်တပ်ႉသိုၵ်းတဢၢင်း TNLA တႃႇငိုၼ်းၶႄႇ 400,000 ယႂၼ်ႊ ဝႃႈၼႆ။

ၵူၼ်းၼႂ်းပိုၼ်ႉတီႈၵေႃႉၼိုင်ႈတႄႉ လၢတ်ႈၼႄဝႃႈ -“ၶဝ်ၺွပ်းလႆႈ 2 ၵေႃႉ၊ တႃႇၵေႃႉၼိုင်ႈတႄႉ ၶဝ်ပၼ် တၢမ်ႇတၢႆၵမ်းလဵဝ်။ တႃႇထႅင်ႈၵေႃႉၼိုင်ႈတႄႉ ၶဝ်ပၼ်တၢမ်ႇတူၵ်းထွင်ႇပီယၢဝ်းၶၢဝ်းႁိုင်။ ၵူၼ်းၸိူဝ်းပႆႇ ၺွပ်းလႆႈၼၼ်ႉၵေႃႈ တိုၵ်ႉမီး။ ၶိူင်ႈၵွင်ႈၵၢင်ႇၸိူဝ်းၼႆႉသမ်ႉ ၶဝ်ၵႂႃႇၺွပ်းၺႃးမိူဝ်ႈၽွင်းတိုၵ်ႉ သိုဝ်ႉၶၢႆၵၼ်တင်း သိုၵ်းလွႆ”- ဝႃႈၼႆ။

လႆႈႁူႉဝႃႈ ၵူၼ်းသိုၵ်းၸိူဝ်းလၵ်ႉတေႃႉဢဝ်ၶိူင်ႈၵွင်ႈၵၢင်ႇၵႂႃႇၶၢႆၼႆႉ ယႃႉပႅတ်ႈ CCTV ဢွင်ႈတီႈဝႆႉမၢၵ်ႇမိုဝ်ႉ ၸိုၼ်းယၢမ်းသေ ယႃႉသေႃးၵႃးယဝ်ႉ တေႃႉတၢင်ႇဢဝ်ၶူဝ်းၵႂႃႇဝႆႉၼႂ်းထိူၼ်ႇတီႈၼိုင်ႈ။ ၵူၼ်းၸိူဝ်းလၵ်ႉၼႆႉ ပဵၼ်ၵူၼ်းသိုၵ်းၸိူဝ်းယူႇ ၾၢႆႇႁွင်ႈၵၢၼ်တပ်ႉတေႃႉသူင်ႇ ၼႆယဝ်ႉ။

တႅမ်ႈ – ၽူၺ်းၼုမ်ႇ