ပိူဝ်ႈတႃႇလူတ်းယွမ်း လွင်ႈၶဵင်ႈၶႅင် ပၢင်တိုၵ်းၵၢၼ်ၵႃႉၶၢႆ ၼႂ်းၵႄႈသွင်ၸိုင်ႈမိူင်းၼႆသေ ဢမေႊရိၵၼ်ႊတင်း မိူင်းၶႄႇ တူၵ်းလူင်းလႆႈၸႂ်ၵၼ် တေလူတ်းယွမ်း လွင်ႈၵဵပ်းၶွၼ်ႇၶူဝ်းၵုၼ်ႇ တႃႇၶၢဝ်းတၢင်း 90 ဝၼ်း (3 လိူၼ်) ဝႃႈၼႆ။

ၸွမ်းၼင်ႇၶေႃႈတူၵ်းလူင်း သွင်ၸိုင်ႈမိူင်းၼၼ်ႉသေ တႄႇဝၼ်းတီႈ 14/05/2025 ၼႆႉၵႂႃႇ ဢမေႊရိၵၼ်ႊ တေလႆႈလူတ်းယွမ်း လွင်ႈၵဵပ်းၶွၼ်ႇၶူဝ်းၵုၼ်ႇမိူင်းၶႄႇ တႃႇ 30% ၊ ၾၢႆႇမိူင်းၶႄႇၵေႃႈ တေလႆႈလူတ်းယွမ်း လွင်ႈၵဵပ်းၶွၼ်ႇၶူဝ်းၵုၼ်ႇမိူင်းဢမေႊရိၵၼ်ႊ တႃႇ10% ၼႆယဝ်ႉ။

တႃႇတေလႆႈၶေႃႈတူၵ်းလူင်းၵၼ်ၼၼ်ႉ ၽွင်းလူင်ၾၢႆႇၵၢၼ်ငိုၼ်းတွင်း မိူင်းဢမေႊရိၵၼ်ႊလႄႈ တင်းၵႅမ်ၸွမ်ၽွင်းလူင် မိူင်းၶႄႇ လႆႈႁူပ်ႉဢုပ်ႇၵၼ်တီႈ ဝဵင်းၵျိၼ်ႊၼီႊပႃႊ၊ မိူင်းသုၺ်ႊၸႃႊ လႅၼ်ႊ။ လိူဝ်သေ လွင်ႈလူတ်းယွမ်းတႃႇၵဵပ်းၶွၼ်ႇယဝ်ႉ လႆႈတူၵ်းလူင်းပႃး ၶၵ်ႉတွၼ်ႈဢၼ်ၼိုင်ႈ ၼၼ်ႉတႄႉပဵၼ် တႃႇတေသိုပ်ႇဢုပ်ႇၵုမ် လွင်ႈၵၢၼ်ပၢႆးမၢၵ်ႈမီးလႄႈ ၵၢၼ်ၵပ်းသိုပ်ႇၵႃႉၶၢႆၵႂႃႇထႅင်ႈ ဝႃႈၼႆ။

တီႈၼႂ်းၶေႃႈပိုၼ်ၽၢဝ်ႇ သွင်ၸိုင်ႈမိူင်း ႁူမ်ႈၵၼ်ဢွၵ်ႇဝႆႉၼၼ်ႉ ပႃးဝႆႉဝႃႈ – ပၢင်ဢုပ်ႇၵုမ်ၵၼ်မိူဝ်းၼႃႈ တေၸတ်းႁဵတ်းၵႂႃႇတီႈမိူင်းဢမေႊရိၵၼ်ႊ ဢမ်ႇၼၼ် မိူင်းၶႄႇ။ တေသိုပ်ႇဢုပ်ႇၵုမ်ၵၼ်ၵႂႃႇ လူၺ်ႈလွင်ႈၼပ်ႉယမ်ၵၼ်၊ လွင်ႈႁူမ်ႈၵၼ်ႁဵတ်းသၢင်ႈၸိူဝ်းၼႆႉ ဝႃႈၼႆ။

ၸုမ်းၵၢၼ်ၵႃႉၶၢႆ လုမ်ႈၾႃႉၵေႃႈ တိုၵ်းသူၼ်းထိုင် တီႈသွင်ၸိုင်ႈမိူင်းဝႆႉဝႃႈ ႁႂ်ႈလူတ်းယွမ်းလွင်ႈၶဵင်ႈ ၶႅင်ၵၼ်သေ ဢဝ်လၢႆးတၢင်းလီ ၵႄႈလိတ်ႈပၼ်ႁႃၵႂႃႇ ဝႃႈၼႆ။

ဝၢႆးလင် ၻူဝ်ႊၼေႃႊ ထရမ်ႉ ၶိုၼ်ႈမႃးပဵၼ် ၸွမ်ၸိုင်ႈ မိူင်းဢမေႊရိၵၼ်ႊယဝ်ႉ လႆႈတိူဝ်းၵဵပ်းၶွၼ်ႇ ၶူဝ်းၵုၼ်ႇမိူင်းၶႄႇတႃႇ 145%။ မိူၼ်ၼႆ မိူင်းၶႄႇၵေႃႈ တုမ်ႉတွပ်ႇၵဵပ်းၶွၼ်ႇၶူဝ်းၵုၼ်ႇ ၶွင်မိူင်းဢမေႊရိၵၼ်ႊၶိုၼ်း တႃႇ 125% လႄႈ ႁဵတ်းႁႂ်ႈလွၵ်းၵၢတ်ႇ ၵၢၼ်ပၢႆးမၢၵ်ႈမီးလုမ်ႈၾႃႉ ဢမ်ႇၼိမ်သဝ်းမႃး – သိုဝ်ႇၶၢဝ်ႇ BBC ဢွၵ်ႇဝႆႉၼင်ႇၼႆ။