သိုၵ်းမၢၼ်ႈယိုတ်းဢႃႇၼႃႇဝၢၼ်ႈမိူင်းမႃးၶၢဝ်းတၢင်း 3 ပီ သိုၵ်းၸၢဝ်းၶိူဝ်းလၢႆလၢႆၸုမ်း ႁူမ်ႈၵၼ် ႁႅၼ်းသိုၵ်းလေႃႇတိုၵ်း တပ်ႉသိုၵ်းမၢၼ်ႈ ဢၼ်ပၵ်းသဝ်းဝႆႉ ၼႂ်းမိူင်းတႆးပွတ်းႁွင်ႇ လၢႆလၢႆတီႈၽွမ်ႉ ၵၼ်သေ သႂ်ႇၸိုဝ်ႈပၢင်တိုၵ်းၼၼ်ႉဝႃႈ “ ပၢင်ယၼ်ႇသိုၵ်း 1027 ” ၼႆယူႇ။

ယိူင်းဢၢၼ်းလူင် ပၢင်ယၼ်ႇသိုၵ်း 1027 တႄႉ လႆႈႁူႉဝႃႈ တႃႇၽဵဝ်ႈမူၺ်ႉၵျႃႊၽႅၼ်ႉ လႄႈ တႃႇၽဵဝ်ႈမူၺ်ႉၸဝ်ႈ ဢႃႇၼႃႇသိုၵ်း ၼႆလႄႈ ပၢင်တိုၵ်းလူင် ၵိူတ်ႇၶိုၼ်ႈပဵၼ်ၼႂ်းမိူင်းတႆးပွတ်းႁွင်ႇ ႁိုင်ၼၢၼ်းမႃး ၶၢဝ်းတၢင်းပီပၢႆ။ ၾၢႆႇသိုၵ်းၸၢဝ်းၶိူဝ်း   ယိုတ်းလႆႈ တပ်ႉသိုၵ်းမၢၼ်ႈ လၢႆလၢႆၸႄႈဝဵင်း ။

သိုၵ်းၵဝ်ႈၵၢင်ႉ MNDAA ယိုတ်းတိုၵ်းဢဝ်လႆႈ ဝဵင်းလူင်လႃႈသဵဝ်ႈ ၽွင်း ၽႅၼ်ယၼ်ႇသိုၵ်း 1027 မိူဝ်ႈလိူၼ်ဢေႃႊၵတ်ႉသ် ပီၵၢႆ 2024 သေယိုတ်းၵုမ်းဝႆႉတေႃႇထိုင်လိူၼ်ဢေႊပရိူဝ်ႊလ် 2025 ၶၢဝ်းတၢင်း 9 လိူၼ်ၼႆႉၼၼ်ႉယဝ်ႉ။

ႁဵတ်းႁႂ်ႈၵူၼ်းမိူင်းတၢႆႁၢႆ တုၵ်ႉယၢၵ်ႈယဝ်ႉသေ ယင်းပႆႇလႆႈပူၵ်းပွင်ၶိုၼ်း သိုၵ်းၵဝ်ႈၵၢင်ႉ သမ်ႉပေႃး ထွႆထွၼ် ပၼ်သိုၵ်းမၢၼ်ႈၶိုၼ်း ။

ယွၼ်ႉမိူင်းၶႄႇၶဝ်ႈၵႄႈၵၢင်ငူပ်ႉငီႉပၼ် ၼႂ်းၵႄႈ တပ်ႉသိုၵ်းမၢၼ်ႈလႄႈ တပ်ႉသိုၵ်းၵဝ်ႈၵၢင်ႉ MNDAA ၵိုတ်းတိုၵ်း ၵၼ်သေ ၊ ၾၢႆႇသိုၵ်းၵဝ်ႈၵၢင်ႉ ဢၼ်ၽွင်းငမ်းမႃးၶၢဝ်းတၢင်း 9 လိူၼ်ၼႆႉ ၼၼ်ႉ  လႆႈထွႆဢွၵ်ႇ ပၼ်ၶိုၼ်း ဝဵင်းလႃႈသဵဝ်ႈ။ ယၢမ်းလဵဝ် ပဵၼ်ၽွင်းတပ်ႉသိုၵ်းမၢၼ်ႈ   ၶဝ်ႈမႃး ဢဝ်တီႈယူႇၶိုၼ်းၼႂ်းဝဵင်း  ။

ၼႂ်းၶၢဝ်းတၢင်းသိုၵ်းၵဝ်ႈၵၢင်ႉ MNDAA ၵုမ်းၵမ်မႃး ၶၢဝ်းတၢင်းႁိုင် 9 လိူၼ် တီႈဝဵင်းလႃႈသဵဝ်ႈၼႆႉ မီး ပၢင်တေႃႇလွင်း၊ ႁူင်းမိပ်ႇၼူတ်ႈ၊ ႁူင်းပျေႃႇမူၼ်ႈ ၼမ်မႃး။   ႁဵတ်းႁႂ်ႈ ဢမ်ႇမီးမၢႆမီႈသုမ်းငမ်း သင်သေဢိတ်း။  ၽူႈလၵ်ႉၸၵ်ႉၶုတ်ႈ၊ ၵူၼ်းၸူၼ်ၵေႃႈလိူင်ႇၼမ်မႃး ထိုင်တီႈ  ယိုဝ်းၵၼ်တၢႆ ပေႃႉၵၼ် ထုပ်ႉၵၼ် တၢႆ ၸဵမ်ၸိူဝ်းၼႆႉၵေႃႈ မီးမႃး  ။

ဢၼ်လိူဝ်သေပိူၼ်ႈၼႆႉၵေႃႈ ၽွင်းသိုၵ်းၵဝ်ႈၵၢင်ႉၵုမ်းၵမ်မႃးၼႆႉ ယွၼ်ႉသိုၵ်းၵဝ်ႈၵၢင်ႉ MNDAA ပၼ်ၶႂၢင်ႉၵၢၼ်ၶၢႆတူဝ်လွတ်ႈလႅဝ်းလႄႈ ၼႂ်းၶၢဝ်းတၢင်း 9 လိူၼ်ၼႆႉၵူၺ်း ႁွင်ႈပေေႃႇမူၼ်ႈ မီးၼမ် တဵမ်ဝၢၼ်ႈတဵမ်မိူင်း-  ၼႆ ၼၢင်းယိင်း ၵူၼ်းပိုၼ်ႉတီႈလၢတ်ႈ ၼင်ႇၼႆ ။

“ၼႂ်းၶၢဝ်းတၢင်းသိုၵ်းၵဝ်ႈၵၢင်ႉသိမ်းၼႆႉၼၼ်ႉ ပၢင်တေႃႇလွင်းၼမ်မႃး ၊ ႁူင်းမႄႈမွၵ်ႈယႃႈ ၼမ် ၊ ၼႂ်းဝဵင်းလႃႈသဵဝ်ႈၵေႃႈ သိုၵ်းၵဝ်ႈၵၢင်ႉပၼ်ၶႂၢင်ႉႁဵတ်း ၊ ၸွမ်းလၵ်းၾႆးၵၢင်ဝဵင်းၼၼ်ႉ လႆႈႁၼ်ပၢႆႉသိုဝ်ႉ/ၶၢႆတူဝ် ဢၼ်ပႃးႁၢင်ႈၼၢင်းသၢဝ်လဝ်းလဝ်း၊ တႅမ်ႈဝႆႉပႃးလိၵ်ႈၶႄႇသေတိတ်းပႃႉၽႅၼ်ဝႆႉ သမ်ႉပေႃးလၢႆးၵႂႃႇသဵင်ႈ ၊ ပေႃးၶဝ်ဢမ်ႇၶႂၢင်ႉပၼ် ၽႂ်တေႁတ်းႁဵတ်း” ။  

 ၸၢႆးၾႃႉ ပၢႆႈၽေးသိုၵ်းသေ ပွၵ်ႈမိူဝ်းၶိုၼ်း ဝၢၼ်ႈၵဝ်ႇမိူင်းၼွၼ်းၸဝ်ႈၵဝ်ၼၼ်ႉလႆႈႁၼ် ပၢႆႉလႄႈ ႁူင်းမႄႈမွၵ်ႈယႃႈၸိူဝ်းၼၼ်ႉၼမ်လႄႈ ယိၼ်းပဵၼ်ၸႂ်ဢမ်ႇလီတႄႉတႄႉ မၼ်းၸၢႆးလၢတ်ႈၼင်ႇၼႆ ။

“မိူဝ်ႈၽွင်းၶႃႈၶဝ်ႈမႃးၶိုၼ်းၼႂ်းဝဵင်းၼၼ်ႉ မိူၼ်ဝဵင်းႁၢမ်းလီလီ ၊ ယွၼ်ႉပဵၼ်ပၢင်တိုၵ်း သိုၵ်းမၢၼ်ႈမႃးပွႆႇလႄႈ လႆႈႁၼ် ႁိူၼ်း ဝတ်ႉဝႃးၸိူဝ်းၼႆႉ လူႉၵွႆတင်းၼမ်  ၊ ယဝ်ႉၵေႃႈ လႆႈႁၼ်ပၢႆႉႁွင်ႉမႄႈမွၵ်ႈယႃႈလႄႈ ႁူင်းမႄႈမွၵ်ႈယႃႈ တင်းၼမ်လႄႈ ပဵၼ်ဢၼ်တူၵ်းၸႂ် ၊ ၸႂ်ဢမ်ႇလီတႄႉတႄႉ”– ဝႃႈၼႆ ။

တွၼ်ႈ တႃႇတေၶဝ်ႈႁဵတ်းတီႈႁၢၼ်ႉ KTV ၼၼ်ႉၵေႃႈ တေလႆႈၸႅတ်ႈလိူတ်ႈ ပၢႆးယူႇလီ ၸွင်ႇမီး သိပ်ႉၾလိပ်ႉ (ၵႃႇလၢင်ႇ) ၊ ၸိူဝ်ႉမႅင်း ဢၼ်ၸပ်းငၢႆႈ (မိူၼ်ၼင်ႇ  B  ပိုး     ၊ C ပိုး   HIV )  ၸိူဝ်ႈၼႆႉ ပႃး။ တေလႆႈထတ်းလိူတ်ႈ  3 လိူၼ် 1 ပွၵ်ႈယဝ်ႉ ၸင်ႇတေထုၵ်ႈပၼ်ဝႂ် ( Infection screening Card for Entertainment service) သေ ႁဵတ်းၵၢၼ်ၼႂ်းႁၢၼ်ႉလႆႈ ဝႃႈၼႆ ။   

တွၼ်ႈတႃႇၵူၼ်းမိူင်းတႄႉ ဢၼ်ၶဝ်ၵူတ်ႇထတ်းပၼ်တင်းပဵၼ်လႄႈ ပၼ်ၶႂၢင်ႉၵၢၼ်ၶၢႆတူဝ် ႁႂ်ႈလွတ်ႈလႅဝ်းၼႆႉ ပဵၼ်ဢၼ်လီယူႇသေတႃႉ ၊ ပေႃးမီးၵၢၼ်ၸိူင်ႉၼႆ ယႃႈမဝ်းၵမ်လႄႈ ၊ ၵၢၼ် ပူၼ်ႉ ပႅၼ်သုၼ်ႇလႆႈသုၼ်ႇပဵၼ်ၵူၼ်း ၸၢင်ႈၵိူတ်ႇၶိုၼ်ႈ ၼမ်မႃးႁႅင်းလႄႈ ၵၢၼ်ပူၼ်ႉ ပႅၼ်ၼိူဝ် တၢင်းၵႃႇမ ၸၢင်ႈမီးမႃးတင်းၼမ် ၼႆ -ၼၢင်းယိင်းႁွမ် ၵူၼ်းဝဵင်းလႃႈလဵဝ်ႈ လၢတ်ႈဝႆႉၼင်ႇၼႆ ။

“တွၼ်ႈတႃႇၶႃႈတႄႉ ႁၼ်ဝႃႈ ပေႃးပိုတ်ႇႁၢၼ်ႉမူၼ်ႈၵျေႃႇၵေႃႈ ႁၼ်ၵိုၵ်းပႃး  ယႃႈမဝ်းၵမ်လႄႈ ၵႃႊသီႊၼူဝ်ႊၸိူဝ်းၼႆႉ ၵမ်းလဵဝ်ယဝ်ႉ  ၊ ပၼ်ၶႂၢင်ႉၵၢၼ်ၶၢႆတူဝ် လွတ်ႈလႅဝ်းၼႆႉ  ပဵၼ်ဢၼ်လီ ယူႇသေတႃႉ  ၊ ၸွင်ႇသမ်ႉမီးပၵ်းပိူင်တႃႇၵႅတ်ႇၶႄႇ ၼၢင်းယိင်း ၸိူဝ်းႁဵတ်းၵၢၼ် ႁႃၵိၼ် လဵင်ႉတွင်ႉ ဢၼ်ၼႆႉ  လီဝူၼ်ႉပႃး။   ပေႃးဢမ်ႇၼၼ် ၸၢင်ႈမီးလွင်ႈဢဝ် ၼမ်ႉတွၼ်းၼိူဝ် ၸၢတ်ႈပၢၼ်ၵၼ်။ ၼၢင်းယိင်းၸိူဝ်းႁဵတ်းၵၢၼ်ၸိူဝ်းၼႆႉသုမ်းယဝ်ႉသုမ်းထႅင်ႈၵူၺ်းယဝ်ႉ ၊  ဢမ်ႇထုၵ်ႇလီပဵၼ်”– ဝႃႈၼႆ ။

ယွၼ်ႉသိုၵ်းၵဝ်ႈၵၢင်ႉပၼ်ၶႂၢင်ႉၸိူင်ႉၼၼ်လႄႈ ၼၢင်းယိင်း ဢႃယု ပႃႈတႂ်ႈ 18 ၵေႃႈ ၶဝ်ႈႁဵတ်း ၸိူဝ်းၼႆႉမႃးတင်းၼမ် ႁဵတ်းႁႂ်ႈ မႄႈလုၵ်ႈဢွၼ်ႇ ၊ ၵူၼ်းထဝ်ႈၵူၼ်းၵႄႇၼႂ်းပိုၼ်ႉတီႈ ဢမ်ႇယွမ်း ႁပ်ႉလႆႈၼိူဝ်လွင်ႈၼႆႉသေဢိတ်း  –  ၼၢင်းယိင်းႁွမ် လၢတ်ႈၼင်ႇၼႆ ။

“ပေႃးတေဝႃႈတႄႉမၼ်း ဢႃယု 16-17 ၼႆႉ တိုၵ်ႉပဵၼ်လုၵ်ႈဢွၼ်ႇၵူၺ်း ၊ပေႃးတေလၢတ်ႈၸွမ်း မၢႆမီႈပၵ်းပိူင်ၼႆ ၽိတ်းမၢႆမီႈလႄႈ ပူၼ်ႉပႅၼ်ပႃးသုၼ်ႇလႆႈသုၼ်ႇပဵၼ်လုၵ်ႈဢွၼ်ႇ ၊ တွၼ်ႈတႃႇ လုၵ်ႈဢွၼ်ႇယိင်းဢွၼ်ႇၸိူဝ်းၼၼ်ႉတႄႉ ၶဝ်တေဝူၼ်ႉသင်ၼမ်ၼႄႇ။ ၶဝ်ဝူၼ်ႉတႃႇတေလႆႈ ငိုၼ်း တႃႇႁႃၵိၼ်လဵင်ႉတွင်ႉၵူၺ်းၶႃႈဢိူဝ်ႈ။   ပဵၼ်ယွၼ်ႉလွင်ႈငဝ်းလၢႆးဝၢၼ်ႈမိူင်းဢမ်ႇလီ မီးၵူၼ်း ၶႂ်ႈၶိၼ်ႁဵတ်းၶုၼ်ၵူၺ်းလႄႈ ၸင်ႇမီးမႃးပၼ်ႁႃၸိူဝ်းၼႆႉၶႃႈဢိူဝ်ႈ ”– ဝႃႈၼႆ ။

မိူၼ်ၼင်ႇၼႆ တီႈတင်းသိုၵ်းဝႃႉ UWSA ၵုမ်းၵမ် တၢင်းဝဵင်းႁူဝ်ပၢင်လႄႈ တၢင်ႉယၢၼ်းၸိူဝ်း ၼၼ်ႉၵေႃႈ လုၵ်ႈဢွၼ်ႇယိင်း လႅၵ်ႈလၢႆႈၼႃႈၵၢၼ်ၵႂႃႇၶၢႆတူဝ် မီးတင်းၼမ်ၼႆ   ၸဝ်ႈၵႃး ၵေႃႉၼိုင်ႈလၢတ်ႈ ။

“မႄႈမွၵ်ႇယႃႈ တီႈႁူဝ်ပၢင်ၼႆႉ ၼမ်လိူဝ် တီႈလႃႈသဵဝ်ႈလူးၵွၼ်ႇ ၊ ပေႃးယဝ်ႉ တီႈတင်း တၢင်ႉယၢၼ်း ၵေႃႈ ႁူင်းပျေႃႇမူၼ်ႈ KTV ၸိူဝ်းၼႆႉ ၼမ်မႃးၼႃႇ ၊ Bar ၸိူဝ်းၼႆႉၵေႃႈ မီးတင်းၼမ် ၶႂ်ႈလႆႈသင်မီးမူတ်းယဝ်ႉ ၊ ယႃႈမဝ်းၵမ်ၸိူဝ်းၼႆႉၵေႃႈ သိုဝ်ႉငၢႆႈၶၢႆလီ” ဝႃႈၼႆ ။

ၸူဝ်ႈသိုၵ်းၵဝ်ႈၵၢင်ႉမႃးၽွင်းငမ်းၶၢဝ်းတၢင်း  8 လိူၼ်ၼႆႉ တီႈဝဵင်းလႃႈသဵဝ်ႈ ႁၢၼ်ႉမူၼ်ႈၵျေႃႇ KTV တင်းမူတ်း မီးၸမ် 150 ႁၢၼ်ႉ ။ ၵူၼ်းႁဵတ်းၵၢၼ်ၼႂ်းႁၢၼ်ႉၸိူဝ်းၼၼ်ႉ ပဵၼ်လုၵ်ႈဢွၼ်ႇယိင်းၸိူဝ်းမီးဢႃယု 16 ထိုင် 18 ၸိူဝ်းၼႆႉၵမ်ႈၼမ် – ၼၢင်းယိင်း ဢၼ်ၵႆႉႁဵတ်းတၢင်းၶၢႆၵႂႃႇၶၢႆႁိမ်းႁၢၼ်ႉၸိူဝ်းၼၼ်ႉလၢတ်ႈၼင်ႇၼႆ။  

“ ဢၼ်ၶႃႈႁူႉတႄႉ လုၵ်ႈဢွၼ်ႇယိင်း ဢႃယု 16 ၸိူဝ်းၼႆႉၵေႃႈပႃး ၊ ၵူၼ်းၸေးၼႃႇ ၊ တေမီး တႆး ၊ မၢၼ်ႈ ၊ ရၶႅင်ႇ ၸိူဝ်းၼႆႉ   ။ ၵူၼ်းဢၼ်ၵႂႃႇၵိၼ်ၵႂႃႇၵျေႃႇတီႈႁၢၼ်ႉၸိူဝ်းၼၼ်ႉ တေပဵၼ် ပေႃႈလဵင်ႉ ၶႄႇ ၵူဝ်းၵၢင်ႉႁႃႉ သိုၵ်းႁႃႉၸိူဝ်းၼႆႉ ၼမ်သေပိူၼ်ႈ   ၊ ယဝ်ႉၵေႃႈ လုၵ်ႈၸုမ်း  PDF ၸိူဝ်းၼႆႉ ၵေႃႈပႃး ၊ ၵူၼ်းမိူင်းပိုၼ်ႉတီႈတႄႉလူႉသုမ်းတုမ်ႉတိူဝ်ႉယွၼ်ႉပၢင်တိုၵ်းလႄႈ ၽႂ်ဢမ်ႇမီး   ငိုၼ်း ၵႂႃႇၵိၼ်ၵျေႃႇတီႈၼၼ်ႉ ”– ဝႃႈၼႆ ။

တႃႇၵူၼ်းႁဵတ်းၵၢၼ် ၼႂ်းတွၼ်ႈၵၢၼ်မူၼ်ႈၸႂ်တႄႉ ၾၢႆႇၽွင်းငမ်း ၵဝ်ႈၵၢင်ႉၶဝ် ဢႅဝ်ႇႁႃ လုၵ်ႈဢွၼ်ႇယိင်း ဢႃယုၼႂ်းၵႄႈ 16 လႄႈ 18 ။ ၽႂ်ႁႃပၼ်လႆႈၵေႃႈ မီးငိုၼ်းသူး 3 သႅၼ်ပျႃး ၼႆလူးၵွၼ်ႇ ၽူႈၸၢႆး ၵူၼ်းပိုၼ်ႉတီႈ ဢၼ်မိုတ်ႈၵိုဝ်းၸမ်ၸႂ်ၵၼ်တင်း ၾၢႆႇၽွင်းငမ်းသိုၵ်းၵဝ်ႈၵၢင်ႉၽွင်းၼၼ်ႉ  လၢတ်ႈၼင်ႇၼႆ ။

“တႃႇႁူင်းမႄႈမွၵ်ႇယႃႈၼၼ်ႉပေႃးႁွင်ႉပၼ်ၵူၼ်းလႆႈၼိုင်ႈၵေႃႉ တေလႆႈငိုၼ်း 3 သႅၼ်ပျႃး ၊ ၵူၺ်းၵႃႈ တေလႆႈႁပ်ႉပၢၵ်ႇ ၵူၼ်းဢၼ်ၶဝ်ႁႃမႃးၼၼ်ႉ တေဢမ်ႇလႅၼ်ႈပၢႆႈၼႆ။ သင်ဝႃႈၼၢင်းယိင်းဢွၼ်ႇၼၼ်ႉလႅၼ်ႈပၢႆႈၸိုင် ၵူၼ်းႁႃပၼ်ၼၼ်ႉ တေလႆႈပၼ်ၶိုၼ်း ငိုၼ်းယေႃႇမၼ်း  ”- ဝႃႈၼႆ ။

မႄႈမွၵ်ႇယႃႈၼၼ်ႉသမ်ႉ မီးသၢမ်သႅၼ်း။ သႅၼ်းယူဝ်းယူဝ်း ၊ သႅၼ်းၶိုၵ်ႉ လႄႈ သႅၼ်းၶိုၵ်ႉတွၼ်း – မၼ်းၸၢႆးလၢတ်ႈထႅင်ႈၼင်ႇၼႆ။  

“ပေႃးႁွင်ႉၼၢင်းယိင်း ပေႃးပဵၼ်ယူဝ်းယူဝ်း ၼိုင်ႈၵေႃႉလႆႈၸၢႆႇပၼ် 4 မိုၼ်ႇ ၊ ပေႃးပဵၼ်ဢၼ်ၶိုၵ်ႉ 8 မိုၼ်ႇ ၊ ပေႃးပဵၼ်ဢၼ်ၶိုၵ်ႉသုတ်း မီး 3 သႅၼ်ထိုင် 5 သႅၼ် ၊ လႆႈၵူႈမဵဝ်း ”– ဝႃႈၼႆ ။

ယၢမ်းလဵဝ် ႁူမ်ႈဝႃႈ သိုၵ်းၵဝ်ႈၵၢင်ႉထွႆထွၼ်ဢွၵ်ႇဝဵင်းလႃႈသဵဝ်ႈသေ သိုၵ်းမၢၼ်ႈၶဝ်ႈမႃးဢဝ်တီႈယူႇၽွင်းငမ်းၶိုၼ်းဝႃႈၼႆသေတႃႉ – လွင်ႈၵၢၼ်ငၢၼ်းပၢႆးမၢၵ်ႈမီး ဢၼ်ပၼ်ႇယူႇၼၼ်ႉလႄႈသင် လွင်ႈႁူမ်ႇလူမ်ႈလႄႈလွင်ႈၵေႃႇၵၢၼ်ႁၢႆႉၸိူဝ်းၼႆႉလႄႈသင် တိုၵ်ႉမိူၼ်ၵဝ်ႇၽွင်းသိုၵ်းၵဝ်ႈၵၢင်ႉယိပ်းၼၼ်ႉယူႇ။ ဢမ်ႇမီးလွင်ႈလႅၵ်ႈလၢႆႈသင်မႃး- ၵူၼ်းမိူင်းလႃႈသဵဝ်ႈလၢတ်ႈၼင်ႇၼႆ။

ၽွင်းဝၢၼ်ႈမိူင်းဢမ်ႇၼိမ်သဝ်းပဵၼ်ပၢင်တိုၵ်းယူႇၸိူင်ႉၼႆ ၊ ပၼ်ၶႂၢင်ႉပိုတ်ႇႁူင်း မႄႈမွၵ်ႈယႃႈ ၼႆႉတႄႉ ဢမ်ႇၵိုင်ႇလီပဵၼ် ၊ ယဝ်ႉၵေႃႈ လီမႆႈၸႂ်ၼပ်ႉသွၼ်ႇပႃးတႃႇလွင်ႈႁူမ်ႈလူမ်ႈ လုၵ်ႈဢွၼ်ႇ ယိင်း လႄႈ ၵၢၼ်ၵၼ်ႉၸၼ်လူလၢႆၼႆႉ ၸၢင်ႈၵိူတ်ႇၶိုၼ်ႈ ပဵၼ်မႃးၼမ် ဝႃႈၼႆ ။

ၼၢင်းယိင်းတူင်ႉၼိုင်တႃႇသုၼ်ႇလႆႈသုၼ်ႇပဵၼ်ၼၢင်းယိင်းၵေႃႉၼိုင်ႈ လၢတ်ႈဝႃႈ – “ တႃႇႁႂ်ႈ ၵူၼ်း မိူင်း မီးလွင်ႈႁူမ်ႇလူမ်ႈ လႄႈ သိူဝ်းသႃႇၵတ်းယဵၼ်ၼႆႉ တေလႆႈၶတ်းၸႂ်တႄႉတႄႉ။ ၼႂ်းၼၼ်ႉ တေလႆႈၵႄႈပၼ်ႁႃ လုၵ်ႈဢွၼ်ႇႁဵတ်းၵၢၼ် KTV  ၼႆႉ ဢွၼ်တၢင်း ပဵၼ်ပၼ်ႁႃယႂ်ႇဢၼ်ၼိုင်ႈ။  လွင်ႈၼႆႉ ၶဝ်ႈပႃးၼႂ်းလွင်ႈပူၼ်ႉပႅၼ် သုၼ်ႇလႆႈသုၼ်ႇပဵၼ်လႄႈၵူၼ်းလႄႈ သုၼ်ႇလႆႈ ၼၢင်းယိင်းပႃး ။ လွင်ႈၼႆႉ ၽႂ်မႃးၽွင်းငမ်း  တေလႆႈၵႄႈလိတ်ႈပၼ်ႁႃၼႆႉလီလီ ”  – ဝႃႈၼႆ ။

ၼၢင်းယိင်းၵူၼ်းပိုၼ်ႉတီႈတုၵ်းယွၼ်းဝႆႉဝႃႈ – ၽႂ်ၶႂ်ႈမႃးၽွင်းငမ်းၵေႃႈ ယဝ်ႉ ၶႂ်ႈႁႂ်ႈဝႆႉၼၵ်း လွင်ႈ ႁူမ်ႇလူမ်ႈၵူၼ်းမိူင်း ။ ပေႃးပဵၼ်မႃးလိူင်ႈ ၽူႈလၵ်ႉၵူၼ်းၸူၼ်လႄႈ လွင်ႈႁၢႆႉၸႃႉၸိူင်ႉၼႆ ၵူၼ်း မိူင်းဢမ်ႇမီးတီႈပိုင်ႈဢိင်  ၊  ၶႂ်ႈႁႂ်ႈသႂ်ႇၸႂ် ဢဝ်လိူင်ႈပၼ် ၼၵ်းၼၵ်းၼႃၼႃ။ ၶႂ်ႈႁႂ်ႈၸတ်းပၼ် လွင်ႈယူႇလီသိူဝ်းသႃႇၵူၼ်းမိူင်းၽႂ်းၽႂ်း။  ၵူၼ်းမိူင်းယၢပ်ႇၸႂ် ၼႃႇယဝ်ႉလႄႈ ၶႆႈႁႂ်ႈတူၺ်းထိုင် ၾၢႆႇၵူၼ်းမိူင်းပႃးၼႆ တုၵ်းယွၼ်းဝႆႉၼင်ႇၼႆ။  

ၼၢင်းယိင်းႁဝ်းၶႃႈၼႆႉ တေႁဵတ်းၵၢၼ်သင်ၵေႃႈ တၵ်းလႆႈမေႃလိူၵ်ႈၵၢၼ်ဢၼ် တေမီး ၽွၼ်းလီတႃႇတူဝ်ၵဝ်ႇလႄႈ တႃႇၵူၼ်းႁိူၼ်း၊ တႃႇတူင်ႇဝူင်းၵူၼ်း။ ႁဵတ်းၵၢၼ်တီႈလႂ် ၵေႃႈလွင်ႈလွတ်ႈၽေးၸဝ်ႈၵဝ်ႇၼႆႉ တၵ်းတေလႆႈဝႆႉပိူင်လူင်။  လိူဝ်ၼၼ်ႉ   ၵိုင်ႇလီႁူႉပႃး ဢၼ်လႂ်ပဵၼ်ၼႃႈၵၢၼ်လႄႈ ဢၼ်လႂ်ပဵၼ်လွင်ႈပူၼ်ႉပႅၼ်သုၼ်ႇလႆႈသုၼ်ႇပဵၼ် ။  ပေႃးထုၵ်ႇပူၼ်ႉပႅၼ်သုၼ်ႇလႆႈမႃးၸိုင် တၵ်းတေလႆႈမေႃတွပ်ႇထဵင်လႄႈ ႁႄႉၵင်ႈ သုၼ်ႇလႆႈၸဝ်ႈၵဝ်ႇ ႁတ်းႁတ်းႁၢၼ်ႁၢၼ် – ဝႃႈၼႆ။