ၸွမ်ၸိုင်ႈမိူင်းဢမေႊရိၵၼ်ႊ တေႃႊၼႄႊလ်ထရမ်ႉ တႅမ်ႈတၢင်ႇတီႈၼိူဝ် သိုဝ်ႇတူင်ႇဝူင်း Truth Social မၼ်းၸၢႆးဝႃႈ – ယွၼ်ႉၽူႈဢွၼ်ႁူဝ်မိူင်းၵႃႊတႃႊ၊ သေႃႊတီႊဢႃႊရေႊပီႊယႃႊ တင်း UAE ၶဝ် တုၵ်းယွၼ်းလႄႈ ၽႅၼ်ၵၢၼ်မႂ်ႇ တႃႇတေၶဝ်ႈတိုၵ်းဢီႊရၼ်ႊ ၼႂ်းဝၼ်းတီႈ 19 လိူၼ်မေႊၼႆႉ လႆႈၵိုတ်းယင်ႉဝႆႉၸူဝ်ႈၶၢဝ်း ဝႃႈၼႆ။

လိူဝ်ၼၼ်ႉ ၸွမ်ၸိုင်ႈထရမ်ႉ လၢတ်ႈၵႂႃႇတီႈၼႂ်းပၢင်သပ်းၸႅင်ႈၶၢဝ်ႇဝႃႈ – မီးတိုဝ်ႉတၢင်းလီ တႃႇတေလႆႈ ၶေႃႈတူၵ်းလူင်းၸွမ်းၵၼ်တင်း ဢီႊရၼ်ႊယဝ်ႉ ဝႃႈၼႆ။ ၵူၺ်းၵႃႈ သင်ဢမ်ႇလႆႈၶေႃႈတူၵ်းလူင်းၵၼ်ၸိုင် ဢမေႊရိၵၼ်ႊ တိုၼ်းတူဝ်ႈတၼ်း တႃႇတေၶဝ်ႈတိုၵ်းဢီႊရၼ်ႊၵႂႃႇႁၢဝ်ႈႁႅင်း ၵူႈၶၢဝ်းယၢမ်း ၼႆယဝ်ႉ။

ၾၢႆႇၼိုင်ႈၵေႃႈ ၵူၼ်းမိူင်းဢမေႊရိၵၼ်ႊၵမ်ႈၼမ် ဢမ်ႇပေႃးႁၼ်လီၼိူဝ် ပၢင်တိုၵ်းတီႈမိူင်းဢီႊရၼ်ႊ။

ၸွမ်းၼင်ႇၶေႃႈမုလ်းဢၼ်ၵဵပ်းဝႆႉ ၼႂ်းဝၼ်းတီႈ 18 လိူၼ်မေႊၼႆႉသေ ၵူၼ်းမိူင်းဢမေႊရိၵၼ်ႊမွၵ်ႈ 64% ၼႆႉယုမ်ႇယမ်ဝႃႈ ဢမေႊရိၵၼ်ႊပိုတ်ႇၼႃႈသိုၵ်းၼႆႉ ပဵၼ်ၶေႃႈတႅပ်းတတ်းၽိတ်း ဝႃႈၼႆ။

တေႃႇထိုင်ယၢမ်းလဵဝ် ဢီႊရၼ်ႊ တိုၵ်ႉၵုမ်းၵမ်ဝႆႉသဵၼ်ႈတၢင်းၼမ်ႉႁေႃႊမူတ်ႉသ်သေ ဢမေႊရိၵၼ်ႊ ၵေႃႈ တိုၵ်ႉပိၵ်ႉဢိုတ်းတႃႈႁိူဝ်း မိူင်းဢီႊရၼ်ႊဝႆႉယူႇ။

ၸွမ်းၼင်ႇလွင်ႈဢုပ်ႇၵုမ်ငူပ်ႉငီႉၵၼ်သေ ၾၢႆႇဢီႊရၼ်ႊတုၵ်းယွၼ်းဝႆႉ ႁႂ်ႈဢမေႊရိၵၼ်ႊ ၵိုတ်းပၢင်တိုၵ်း လႄႈ ပၼ်ငိုၼ်းသၢႆႈတႅၼ်းသိုၵ်း။ မိူၼ်ၼႆ ၾၢႆႇဢမေႊရိၵၼ်ႊသမ်ႉ ပိူင်လူင်မၼ်းတုၵ်းယွၼ်းဝႆႉ ႁႂ်ႈ ဢီႊရၼ်ႊ ၵိုတ်းၶူင်းၵၢၼ်ႁဵတ်းသၢင်ႈၼိဝ်ႊၶလီႊယိူဝ်ႊ ဝႃႈၼႆ။