“ ၽွင်းၶႃႈဢွၵ်ႇႁွင်ႈမႃးလႆႈၼၼ်ႉ မႃးႁၼ်တႆးၵေႃႉၶႃႈ ငူပ်ႉၼႃႈၼွၼ်းယူႇတီႈၽိူၼ် တၢင်းၼႃႈႁၢၼ်ႉ ၼၼ်ႉ ၼိမ်ယူႇၸိုင်ႈၸိုင်ႈ။ ၽိူဝ်ႇၶႃႈမႃးယိပ်းတူဝ်မၼ်းတူၺ်း   ၸွမ်းၼႃႈ ၊ ၸွမ်းႁူဝ်၊ ၸွမ်းတူဝ် ၊ ၸွမ်းမိုဝ်းမၼ်းၸိူဝ်းၼႆႉ ပဵၼ်ႁွႆးၸဵပ်းမၢၼ်ႉ ၸမ်ႉလိူတ်ႈၵႂႃႇမူတ်း။ ၼိူဝ်ႉတူဝ်မၼ်းပေႃးလၢင်ႈယဝ်ႉလူး။ ၶႃႈၶွၼ်းၶဝ်ႇပူၵ်းမၼ်းၵေႃႈမၼ်းပေႃးဢမ်ႇမီးၸႂ်ယဝ်ႉၶႃႈၼႃႇ  ”

လုၵ်ႈဢွၼ်ႇယိင်းမွၵ်ႈဢႃယု 15-16 ၶူပ်ႇ ဢၼ်ႁဵတ်းၵၢၼ်တီႈႁၢၼ်ႉလဝ်ႈတီႈဝဵင်းတူၼ်ႈတီး ၵေႃႉၼိုင်ႈ ပိုတ်ႇဢူၵ်းပိုတ်ႇၸႂ်လၢတ်ႈၼေႁဝ်းၶႃႈလူၺ်ႈၼမ်ႉသဵင်သၼ်ႇ – မိူၼ်ၵူဝ်ႁႄ ၸႂ်လဵၵ်ႉ ၸႂ်လမ် – တုမ်ႉတိူဝ်ႉ ပၢႆးၸႂ်ဝႆႉ။

မိူဝ်ႈၽွင်းလိူၼ်ဢေႊပရိူဝ်ႊလ်ပူၼ်ႉမႃးၼႆႉ  မၽူးပုၼ်ႉဝေႇ လႄႈ တႆးၵေႃႉမၼ်း ၼၢင်းၼွႆႇၼွႆႇ (ၸိုဝ်ႈပွမ် ) ဝူၼ်ႉဝႃႈ ႁဵတ်းၵၢၼ်ၵဵပ်းငိုၼ်း ၽွင်းဢိုတ်းႁဵၼ်း ၼႆသေ လုၵ်ႉတီႈဝၢၼ်ႈမိၼ်းၶျွင်းလႄႇ ၸႄႈဝဵင်း ယွင်ႇႁူၺ်ႈ ၶိုၼ်ႈဝဵင်းတူၼ်ႈတီး။   တတ်းသဵၼ်ႈၸႂ် ၵႂႃႇႁဵတ်းၵၢၼ်တီႈ ႁၢၼ်ႉလဝ်ႈ   Peter Bar   ဝဵင်းတူၼ်ႈ တီး ။ ယိူင်းဢၢၼ်းဝႃႈ ပေႃးပိုတ်ႇႁူင်းႁဵၼ်းၶိုၼ်းယူဝ်မီးငိုၼ်းၸၢႆႇၵႃႈၶူဝ်းႁူင်းႁဵၼ်း ၵႃႈပပ်ႉလိၵ်ႈ ၵႃႈတၢင်းၵိၼ်ဢိတ်းဢွတ်း – ၼႆ ။

ၶႃသွင်ၵေႃႉၼႆႉၸင်ႇႁႃတွပ်ႇလိၵ်ႈၸၼ်ႉ 8 ဝႆႉသေ ပေႃးၶၢဝ်းပိုတ်ႇႁူင်းႁဵၼ်းၼႆႉ တေၶိုၼ်ႈၸၼ်ႉ 9 ။

ၽိူဝ်ႇႁဵတ်းၵၢၼ်တီႈႁၢၼ်ႉၼၼ်ႉလႆႈမွၵ်ႈ လိူၼ်ၼိုင်ႈ ထိုင်မႃးဝၼ်းတီႈ 4/5/2026  မီးၵူၼ်းမႃးၵိၼ်ၶဝ်ႈ ၵိၼ်လဝ်ႈ တီႈႁၢၼ်ႉၼၼ်ႉၵေႃႉၼိုင်ႈ တွၼ်ႈငိုၼ်း မၽူးပုၼ်ႉဝေႇ ၵႂႃႇ 5000 ပျႃး ။

 ထိုင်ၶၢဝ်းဢိုတ်းႁၢၼ်ႉ ၶႅၵ်ႇၵေႃႈပွၵ်ႈမိူဝ်းမူတ်းယဝ်ႉၼၼ်ႉ ဢွင်ႇမဵဝ်းတူႇ   (ႁွင်ႉ) ပီႇတႃႇ  ၸဝ်ႈႁၢၼ်ႉ  ( Peter Bar )   ႁွင်ႉဢဝ် ၽူႈပုၼ်ႉဝေႇ မႃးႁိမ်းမၼ်း သေပွင်ႉထႃႉလႃႇဝႃႈ  “လႆႈငိုၼ်းသူး ဢမ်ႇလၢတ်ႈမၼ်းႁႃႉ” ၼႆသေ ပေႃႉထုပ်ႉၽူးပုၼ်ႉဝေႇ ထိုင်တၢႆ  ၼႆ ၼၢင်းၼွႆႇၼွႆႇ    ဢူၺ်းၵေႃႉ ၽူးပုၼ်ႉဝေႇ ၼၼ်ႉလၢတ်ႈၼင်ႇၼႆ ။

“ၽွင်းဢူၺ်းၵေႃႉၶႃႈၺႃးပေႃႉႁႅမ်ၼၼ်ႉ ၶႃႈၶဝ်ၵႂႃႇၸွႆႈၶႄဢေႃႈ။ ၵူၺ်းၵႃႈ ပေႃႈလဵင်ႉၼၼ်ႉ ပေႃႉပႃးၶႃႈ။ ပၢပ်းပၼ်ႁူဝ်ၶႃႈ။ ၽိူဝ်ႇၶႃႈၸၼ်ဢဝ်ဢူၺ်းၵေႃႉၶႃႈၵေႃႈ ပေႃႈလဵင်ႉၼၼ်ႉ ဢီးၶႃႈလူမ်ႉႁေ လၢၵ်ႈၶႃႈၶဝ်ႈၵႂႃႇၶင်ဝႆႉၼႂ်းႁွင်ႈသေ ၶတ်းသေႃးၽၵ်းတူပႅတ်ႈ။ ၶႃႈယိၼ်းသဵင်ဢူၺ်းၵေႃႉၶႃႈ ႁွင်ႉႁႆႈသေလၢတ်ႈဝႃႈ ၸဵပ်းၼႃႇ ၼႆ။   ဢမ်ႇမီးသဵင်ၽႂ်မႃးၸွႆႈ ၶႃႈလူင်”- ဝႃႈၼႆ ။

ၸဝ်ႈႁၢၼ်ႉ ၼၼ်ႉဢဝ်ၶႅပ်းတိၼ် သွၵ်းတိၼ်သေၽတ်ႉႁူဝ်ၽတ်ႉတူဝ် – ၽူးပုၼ်ႉဝေႇ၊ ဢဝ်မိုဝ်းသေပေႃႉပေႃႉႁႅမ်ႁႅမ်ၸွမ်းလင်ၸွမ်းတူဝ်မၼ်းၼၢင်း- သဵင်ႁွင်ႉသဵင်ႁႆႈ မေႃးတင်းၶိုၼ်း။ 

ၶမ်ႈၼၼ်ႉ ၽွင်းၸဝ်ႈႁၢၼ်ႉပေႃႉႁႅမ်  ၽူးပုၼ်ႉဝေႇၼၼ်ႉ တီႈႁၢၼ်ႉၵိုတ်းၵူၼ်း 5 ၵေႃႉၵူၺ်း။ ပဵၼ် ၸဝ်ႈႁၢၼ်ႉ ၵေႃႉၼိုင်ႈ၊ ၽူးပုၼ်ႉဝေႇၵေႃႉၼိုင်ႈ ၊ ၼၢင်းၼွႆႇၼွႆႇၵေႃႉၼိုင်ႈလႄႈ ၼၢင်းယိင်းဢွၼ်ႇထႅင်ႈ 2 ၵေႃႉ ဢၼ်ပဵၼ်လုၵ်ႈယိင်းၸဝ်ႈႁၢၼ်ႉ Peter Bar    ။ ၵူၺ်းၵႃႈ ၺႃးၸဝ်ႈႁၢၼ်ႉႁွင်ႉၶဝ်ၵႂႃႇၶင်ဝႆႉၼႂ်းႁွင်ႈၵေႃႉႁွင်ႈႁွင်ႈလႄႈ ၸိူဝ်းၶဝ်ဢမ်ႇၸၢင်ႈဢွၵ်ႇမႃးၶႄ။

ဢၼ်လႆႈငိၼ်းသဵင်ဢူၺ်းၵေႃႉမၼ်းႁွင်ႉႁႆႈ -သဵင်ၸဝ်ႈႁၢၼ်ႉပွင်ႉလႃႇဢဵၵ်းသၢတ်ႈၸႂ်လမ်ဢွၵ်ႇတေႃးသ သေ ပေႃႉထုပ်ႉ၊သဵင်ပေႃႉထုပ်ႉလင်ပိုၵ်ႈပၢၵ်ႈၸိူဝ်းၼၼ်ႉ ၼၢင်းၼွႆႇၼွႆႇလႆႈငိၼ်းၵူႈၶေႃႈၵူႈၵမ်းလႄႈ ပဵၼ်ဢၼ်တူၵ်းၸႂ်ၵူဝ်ႁႄ ထိုင်တီႈႁတ်းၼွၼ်းဢမ်ႇၶႂ်ႈၼွၼ်းသေ ၼင်ႈယူႇႁိမ်းၸွၵ်ႉၽႃၼႂ်းႁွင်ႈၼၼ်ႉ ႁွင်ႉႁႆႈယူႇတင်းၶိုၼ်း- ဝႃႈၼႆ။

“မၼ်းဢမ်ႇပိုတ်ႇပၼ်ၽၵ်းတူၶႃႈလူင်။ ၶႃႈလႆႈယူႇၼႂ်းႁွင်ႈၼၼ်ႉတင်းၶိုၼ်း ၊  ၵူဝ်ၵေႃႈၵူဝ် ၊ ၼွၼ်းၵေႃႈဢမ်ႇၼွၼ်းလႆႈတၢင်းၶိုၼ်းၼင်ႈယူႇၼႂ်းႁွင်ႈၼၼ်ႉ ။ ဢီးလူဢူၺ်းၵေႃႈၶႃႈဢေႃႈ မၼ်းတေၸဵပ်းပဵၼ်ၵႃႈႁိုဝ်။ ယွၼ်းသူးႁႂ်ႈသေၵေႃႉၵေႃႉမႃးၸွႆႈႁေလႃႈ- ၼႆယူႇၵေႃႈ ယွၼ်းသူးဢမ်ႇတဵမ် – တေႃႇထိုင်မိူင်းပေႃးလႅင်း ”- ဝႃႈၼႆ ။

ထိုင်မႃးဝၼ်းတီႈ 5/6/2026 ယၢမ်းၵၢင်ၼႂ်မွၵ်ႈ 7 မူင်းၸင်ႇမီးၵူၼ်းမႃးပိုတ်ႇပၼ်ၽၵ်းတူႁွင်ႈလႄႈ ၼၢင်းၼွႆႇၼွႆႇ ၸင်ႇၸၢင်ႈဢွၵ်ႇႁွင်ႈမႃး။ ၽွင်းၼၼ်ႉ ၸင်ႇလႆႈႁၼ်ဢူၺ်းၵေႃႉမၼ်း ၽူးပုၼ်ႉဝေႇ ငူပ်ႉၼႃႈၼိူဝ်ၽိူၼ်သေတၢႆဝႆႉယူႇယဝ်ႉ။ တီႈတူဝ်ၽူးပုၼ်ႉဝေႇ ဢၼ်ၼင်ႈတင်ႇငူပ်ႉၼႃႈၼိူဝ်ၽိူၼ်ဝႆႉယူႇၼၼ်ႉတႄႉ မီးၽႃႈမႆမၢင်မၢင်ဢွၼ်ႇၽိုၼ်ၼိုင်ႈ ႁူမ်ႇဝႆႉပၼ်တီႈၵွင်းလင်မၼ်းၼၢင်း  – ၼၢင်းၼွႆႇၼွႆႇလၢတ်ႈၼင်ႇၼႆ ။

“  ၶႃႈၼႅတ်ႈမႃးပူၵ်းမၼ်းတူၺ်းယူႇၵေႃႈမၼ်းပေႃးဢမ်ႇမီးၸႂ်ယဝ်ႉၶႃႈၼႃႇ။ သဵင်ၶဝ်ထုပ်ႉပေႃႉၵၼ် သဵင်ၶဝ်လႃႇၵၼ်တႄႉယဵၼ်ၵႂႃႇမွၵ်ႈ ၵၢင်ၼႂ်ၸဝ်ႉမွၵ်ႈ 2 မူင်း 3 မူင်းၼႆႉၶႃႈၵႂႃႇ ။ ၸဝ်ႉႁၢၼ်ႉၼၼ်ႉၵေႃႈ လႆႈငိၼ်းသဵင်မၼ်းၶီႇရူတ်ႉၶိူင်ႈဢွၵ်ႇမိူဝ်းၵႂႃႇမွၵ်ႈ 3 မူင်းပၢႆပၢႆၼႆႉဢေႃႈ။ ဢၼ်ဢူၺ်းၵေႃႉၶႃႈတၢႆၵႂႃႇၼႆႉ တေတၢႆၵႂႃႇမွၵ်ႈၶၢဝ်းလႂ်တႄႉတႄႉဢမ်ႇၸၢင်ႈႁူႉၶႃႈ ”- ဝႃႈၼႆ ။

ၵူၺ်းၵႃႈ မေးၸဝ်ႉႁၢၼ်ႉလႄႈတူဝ်ၸဝ်ႈႁၢၼ်ႉဝႃႈ မၽူးပုၼ်ႉဝေႇ လူမ်ႉၼႂ်းႁွင်ႉၼမ်ႉ – ႁူဝ်ၽတ်ႉၺႃးပိုၼ်ႉသေလႄႈတၢႆၵႂႃႇယဝ်ႉ -ၼႆသေ ဢၢၼ်းဢဝ်ၶၢပ်ႈတူဝ်ၽူးပုၼ်ႉဝေႇ ၵႂႃႇၽဝ်။ ၽွင်းၼၼ်ႉပလိၵ်ႈၶိုၼ်းမႃးယွၼ်းထတ်းတူၺ်းတူဝ်တၢႆလႄႈ ၸင်ႇဢဝ်ပဵၼ်လိူင်ႈပဵၼ်လၢဝ်းသေ ၸင်ႇလႆႈႁူႉဝႃႈပဵၼ်ၵၢၼ်ၶႃႈႁႅမ်ၵၼ်တၢႆ – ဝႃႈၼႆ။

မၽူးပုၼ်ႉဝေႇ  ၵေႃႉဢၼ်ၺႃးပေႃႈလဵင်ႉၸဝ်ႉႁၢၼ်ႉတၢင်းၵိၼ် ပေႃႉႁႅမ် ထိုင်တီႈလႆႈလူႉတၢႆၵႂႃႇၼႆႉ  တိုၵ်ႉမီးဢႃယု 16 ပီ ။ မီးပီႈၼွင်ႉ 3 ၵေႃႉ ။  ပဵၼ်လုၵ်ႈယိင်းၵေႃႉၵၢင် ။ မီးပီႈဢၢႆႈၵေႃႉၼိုင်ႈလႄႈ ၼွင်ႉယိင်းၵေႃႉၼိုင်ႈ ။

ဢၼ်မၼ်းၼၢင်းၵႂႃႇႁဵတ်းၵၢၼ်တီႈႁၢၼ်ႉလဝ်ႈ ၸွမ်းတႆးၵေႃႉမၼ်းၼႆႉၵေႃႈ ယွၼ်ႉပိူဝ်ႈဝႃႈ ၸဝ်ႈႁၢၼ်ႉၼၼ်ႉပဵၼ်ၵူၼ်းၸိုဝ်ႈသဵင်ယႂ်ႇ ၵူၼ်းမိူင်းယွင်ႁူၺ်ႈႁူႉၸၵ်းၼမ် လႄႈပေႃႈမႄႈပီႈၼွင်ႉၵူၼ်းဝၢၼ်ႈၸင်ႇၽွမ်ႉၸႂ်ပၼ်ႁႅင်း ၶဝ်တင်းသွင် တႃႇၵႂႃႇႁဵတ်းၵၢၼ်တီႈတူၼ်ႈတီးၸွမ်းၸဝ်ႈႁၢၼ်ႉၼႆႉ ဝႃႈၼႆ။

ၵူၼ်းမုင်ႉႁေႃႁိူၼ်းမၽူးပုၼ်ႉဝေႇ လၢတ်ႈၽူႈတွႆႇႁွၵ်ႈဝႃႈ –“ ၸဝ်ႈႁၢၼ်ႉ ပီႇတႃႇ ၼႆႉ မၼ်းယၢမ်ႈမႃးပိုတ်ႇႁၢၼ်ႉတၢင်းၵိၼ်တီႈယွင်ႁူၺ်ႈလႄႈ ၵူၼ်းဝၢၼ်ႈၸင်ႇႁူႉၸၵ်း ယုမ်ယမ်ၸႂ်မၼ်း၊ ၵူၼ်းဝၢၼ်ႈဝႃႈ  တမ်းၸႂ်လႆႈယူႇ  တေမီးလွင်ႈႁူမ်ႇလူမ်ႈယူႇ – ၼႆလႄႈ ၸင်ႇလႆႈသူင်ႇလုၵ်ႈႁဝ်းၵႂႃႇၵူၺ်း”– ဝႃႈၼႆ ။

 ဢွင်ႇမဵဝ်းတူႇ (ပီႇတႃႇ) ၸဝ်ႈႁၢၼ်ႉတၢင်းၵိၼ်ၼႆႉ  ပဵၼ်ၵူၼ်းဝၢၼ်ႈတိုဝ်ႉလေႃး  ၸႄႈဝဵင်းယွင်ႁူၺ်ႈ ။ ဢွၼ်တၢင်းယၢမ်ႈပိုတ်ႇႁၢၼ်ႉတၢင်းၵိၼ်တီႈဝဵင်းယွင်ႇႁူၺ်ႈ ၊ တီႈဝဵင်းၵၢတ်ႇလေႃႉၸိူဝ်းၼႆႉသေ ႁၢင်ပီ 2025 ၼႆႉၸင်ႇ ၶၢႆႉၵႂႃႇပိုတ်ႇႁၢၼ်ႉတီႈဝဵင်းတူၼ်ႈတီး    ။

ၸဝ်ႈႁၢၼ်ႉသွင်ၽူဝ်မေးလၢတ်ႈတီႈပလိၵ်ႈလႄႈပီႈၼွင်ႉ ၽူးပုၼ်ႉဝေႇဝႃႈ – မၼ်းၼၢင်းလူမ်ႉၼႂ်းႁွင်ႈၼမ်ႉသေတၢႆ ဝႃႈၼႆသေတႃႉ ၾၢႆႇတၢင်းပေႃႈမႄႈၽူးပုၼ်ႉဝေႇ မီးၶေႃႈထၢမ်ဝႆႉၼမ်လႄႈၸင်ႇႁႂ်ႈတၢင်းႁူင်းယႃၽႃႇတတ်းၵူတ်ႇထတ်းတူၺ်းဝႃႈတၢႆယွၼ်ႉသင်။

လႆႈႁူႉဝႃႈတၢႆယွၼ်ႉႁွႆးပေႃႉႁႅမ်ႁႅင်းတီႈၵွၵ်းႁူဝ် ၼႆၵူၼ်းမုင်ႉႁေႃႁိူၼ်းလၢတ်ႈၽူႈတွႆႇႁွၵ်ႈၼင်ႇၼႆ ။

“ ပိူၼ်ႈလၢတ်ႈဝႃႈ သဵၼ်ႈလိူတ်ႈၼႂ်းဢွၵ်းဢေႃႇမၼ်းၶၢတ်ႇသေတၢႆၵႂႃႇၼႆၼၼ်ႉဢမ်ႇၸႂ်ႈၶႃႈ ၊ ပဵၼ်ၶၢဝ်ႇပွမ်ၵူၺ်း ။ ႁဝ်းၶႃႈ ဢဝ်ၵႂႃႇပၼ်မေႃယႃၶဝ် ၽႃႇတတ်းၵူတ်ႇထတ်းတူၺ်းတီႈႁွင်ႈယဵၼ်ၼၼ်ႉ   ။ တီႈၵွၵ်းႁူဝ်မၼ်းၵေႃႈ မီးႁွႆးၸဵပ်းမၢၼ်ႉတင်းၼမ် ။ ပဵၼ်ႁွႆးပေႃႉဝႆႉဢေႃႈ တီႈၵွၵ်းႁူဝ်မၼ်း  ၊   ၸွမ်းတူဝ်မၼ်းၵေႃႈမီးႁွႆးၸဵပ်းႁွႆးမၢၼ်ႉၵႂႃႇမူတ်း ။ ႁွႆးၸဵပ်းမၼ်းလိုၵ်ႉၼႃႇၶႃႈ လႅပ်ႈတေၺႃးပေႃႉႁႅင်းႁႅင်းယဝ်ႉဢေႃႈ”- ဝႃႈၼႆ ။

ၵူၼ်းမုင်ႉႁေႃႁိူၼ်း မၽူးပုၼ်ႉဝေႇၵေႃႈ လႆႈဢဝ်ၶၢပ်ႈတူဝ်လုၵ်ႈယိင်းၶဝ်ၵႂႃႇလုမ်းလႃး ၽဝ်ပႅတ်ႈ ၼႂ်းဝၼ်းတီႈ   6/5/2026 ၼၼ်ႉယဝ်ႉဝႃႈၼႆ။

ဝၢႆးလင်လုမ်းလႃးၽဝ်ၶၢပ်ႈတူဝ်မၽူးပုၼ်ႉဝေႇယဝ်ႉ ၽွင်းမိူဝ်ႈၵူၼ်းမုင်ႉႁေႃႁိူၼ်းပွၵ်ႈထိုင်ၶိုၼ်းဝဵင်းယွင်ႁူၺ်ႈၼၼ်ႉ မီးၶၢဝ်ႇဝႃႈ ပလိၵ်ႈၶဝ်တီႉလႆႈ ဢွင်ႇမဵဝ်းတူႇ (ပီႇတႃႇ)  တီႈ ဝဵင်းတူင်ႈတႃႈ ၸႄႈဝဵင်းမိူင်းပဵင်း(မိုင်းပျဉ်း)  ၸိုင်ႈတႆးပွတ်းဢွၵ်ႇ ၼႂ်းဝၼ်းတီႈ 6/5/2026 ယၢမ်းဝၢႆးဝၼ်း ဝႃႈၼႆသေတႃႉ  ၸွင်ႇၸႂ်ႈတႄႉႁိုဝ်ဢမ်ႇတႄႉ ၼႆတႄႉဢမ်ႇႁူႉ ဢမ်ႇမီးၽႂ်ႁၼ်သေမႃးယိုၼ်ယၼ်  ။  

  ယူႇတီႈၸုမ်းၶၢဝ်ႇၽူႈတွႆႇႁွၵ်ႈ ၶတ်းၸႂ်ၵပ်းသိုပ်ႇၸူး ႁူင်းပလိၵ်ႈ ဝဵင်းတူၼ်ႈတီးယူႇသေတႃႉ ၵပ်းသိုပ်ႇ ဢမ်ႇလႆႈ ။

ၵူၼ်းဝဵင်းတူၼ်ႈတီးၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ– “ ယိၼ်းဝႃႈ တီႉၺွပ်းလႆႈတီႈ မိူင်းပဵင်း ၊ တလဵဝ် တီႉဝႆႉတီႈႁူင်းပလိၵ်ႈ ၵဵင်းတုင် ယဝ်ႉၵေႃႈ တေၵူတ်ႇထတ်းၸွမ်းၼင်ႇမၢႆမီႈမီးဝႆႉၼၼ်ႉယဝ်ႉ တေသူင်ႇမႃး တီႈႁူင်းပလိၵ်ႈမဵဝ်ႉမ တူၼ်ႈတီး ၼႆ”- ဝႃႈၼႆ  ။

ၵူၼ်းႁူႉၸၵ်းမိုတ်ႈၵိုဝ်းၵၼ်တင်း   ဢွင်ႇမဵဝ်းတူႇ လၢတ်ႈၽူႈတွႆႇႁွၵ်ႈဝႃႈ – “ မၼ်းၸၢႆးၼႆႉပဵၼ်ၵူၼ်း ပေႃးလၢတ်ႈၵေႃႈၵႆႉပႃးတိၼ်ပႃးမိုဝ်း ၸိူင်ႉၼၼ်ၼေႈ။ တေႃႈၼင်ႇမေးမၼ်းၵေႃႈ ပေႃးလၢတ်ႈ ၵဝ်ၵမ်း မႂ်းၵမ်းၼႆတႄႉ  မၼ်းၵႆႉထုပ်ႉတွႆႇပႃးၼေႈ ။ ထိုင်တီႈ ၼႃႈႁိူၼ်းပေႃးလႆႈလူႉၼၼ်ႉၼႃႇ  ၊ လုၵ်ႈယိင်းမၼ်းသွင်ၵေႃႉ ဢၼ်မီးၸွမ်းမၼ်းယူႇၼႆႉ ပဵၼ်လုၵ်ႈတင်းမေးၵဝ်ႇမၼ်းဢေႃႈၼႆႉ ၊ မေးၵေႃႉတလဵဝ်ၼႆႉတႄႉ ၶႃတိုၵ်ႉဢဝ်ၵၼ်ပႆႇႁိုင်လူင်   ”- ဝႃႈၼႆ ။  

ၸွမ်းၼင်ႇပၵ်းပိူင် မၢႆမီႈၸိုင်ႈမိူင်းမီးဝႆႉတႄႉ သင်ၸိူဝ်ႉဝႃႈ တင်ႈၸႂ်ၶႃႈႁႅမ်လုၵ်ႈဢွၼ်ႇ ၊ တင်ႈၸႂ် ပူၼ်ႉပႅၼ်သုၼ်ႇလႆႈသုၼ်ပဵၼ်  ပေႃႉထုပ်ႉလုၵ်ႈဢွၼ်ႇထိုင်တၢႆၼႆၸိုင်  တေလႆႈဝႃႈ ပဵၼ်ၵၢၼ်ၶႃႈႁႅမ်ၵူၼ်း ၸွမ်းၼင်ႇ မၢႆမီႈ မတ်ႉတႃႇ 302  ။

ၽူႈတၢင်ႇလၢတ်ႈ ဝဵင်းတူၼ်ႈတီးလၢတ်ႈၽူႈတွႆႇႁွၵ်ႈဝႃႈ -“တႃႇတေဢဝ်လိူင်ႈၼၼ်ႉ ၸွင်ႇလႆႈပိုတ်ႇလိူင်ႈဢမူႉတီႈႁူင်းပလိၵ်ႈ  ။ တေဢိင်ႇၼိူဝ် ပီႈၼွင်ႉၸိူဝ်ႉၶိူဝ်းပိုတ်ႇလိူင်ႈဢမူႉၸိူင်ႉႁိုဝ်ႇၼႆၵွၼ်ႇ”- ဝႃႈၼႆ ။   

ဢိင်ၼိူဝ်ငဝ်းလၢႆးဢၼ်ႁဵတ်းၽိတ်းၼၼ်ႉသေ ပၼ်တၢမ်ႇတၢႆ ဢမ်ႇၼၼ်တူၵ်းၶွၵ်ႈ တေႃႇၸူဝ်ႈ ဢမ်ႇၼၼ် တီႈဢေႇသုတ်း တူၵ်းၶွၵ်ႈ 10 ထိုင် 20 ပီ ၼႆယဝ်ႉ ။

ၵူၼ်းၸၢႆးၼႂ်းၼွင်ႁၢႆးယႃႈ လၢတ်ႈဝႃႈ -“ ပေႃးတီႉလႆႈယဝ်ႉၵေႃႈ ၶႂ်ႈႁႂ်ႈဢဝ်လိူင်ႈပၼ်တူတ်ႈတၢမ်ႇၼၵ်းၼႃႇႁႂ်ႈထိုင်တီႈ ၊ ဢမ်ႇၶႂ်ႈႁႂ်ႈ တူၵ်းၶွၵ်ႈမွၵ်ႈ   ပီ 2 ပီ သေဢွၵ်ႇမႃးလႆႈၶိုၼ်းငၢႆႈလူမ်”- ဝႃႈၼႆ ။

ၶဵင်ႇတႃႉ ႁႃၵိၼ်လဵင်ႉတွင်ႉ

ဝၢႆးလင် သိုၵ်းမၢၼ်ႈယိုတ်းဢႃၼႃႇၸိုင်ႈမိူင်းမႃးၼႆႉ ၵူၼ်းဝၢၼ်ႈၵူၼ်းမိူင်း ပိုၼ်ႉတီႈပၢင်တိုၵ်း လႆႈပၢႆႈသိုၵ်းပၢႆႈသိူဝ် ၽၢတ်ႇယၢၼ်ႁိူၼ်းယေး ၊ ဢမ်ႇမီးလွင်ႈႁူမ်ႇလူမ်ႈၵူၺ်းသေဢမ်ႇၵႃး ယွၼ်ႉၵၢၼ်ပၢႆးမၢၵ်ႈမီးတူၵ်းလႄႈ ႁဵတ်းႁႂ်ႈ ၵၢၼ်ႁႃၵိၼ်လဵင်ႉတွင်ႉ ၵူၼ်းမိူင်း ယၢပ်ႇၽိုတ်ႇမႃးၵူႈမိုဝ်ႉၵူႈဝၼ်း   ။

တွၼ်ႈတႃႇႁႃၵိၼ်လဵင်ႉတွင်ႉၼၼ်ႉ ဢွၼ်ႇ ယိင်းဢႃယု ပႃႈတႂ်ႈ 18 ၸိူဝ်းၶဝ်ႈႁဵတ်းၵၢၼ် ၼႂ်းတူင်ႇဝူင်း ဢမ်ႇမီးလွင်ႈႁူမ်ႇလူမ်ႈ မိူၼ်ၼင်ႇ ႁၢၼ်ႉမူၼ်ႇပျေႃႇ KTV ၊ ႁၢၼ်ႉလဝ်ႈၸိူဝ်းၼႆႉၵေႃႈ မီးဝႆႉတင်းၼမ် ၊ ၼႂ်းၼၼ်ႉ ထုၵ်ႇပူၼ်ႉပႅၼ်သုၼ်ႇလႆႈသုၼ်ႇပဵၼ်သေ ထုၵ်ႇႁဵတ်းႁၢႆႉၶႃႈႁႅမ်တၢႆၵေႃႈ မီးတင်းၼမ်ၼႆ ၵူၼ်းႁဵတ်းၵၢၼ်တူင်ႇဝူင်းပိုၼ်ႉတီႈလၢတ်ႈၼင်ႇၼႆ။

“ ႁူႉယူႇဝႃႈဢမ်ႇၸႂ်ႈတီႈဢၼ်မီးလွင်ႈႁူမ်ႇလူမ်ႈ ၊ ႁူႉယူႇဝႃႈပဵၼ်တီႈဢမ်ႇလွတ်ႈၽေးၵေႃႈ  လုၵ်ႈဢွၼ်ႇယိင်း ၊ၼၢင်းယိင်း  ဢမ်ႇမီးတၢင်းလိူၵ်ႈ ၊ ၵႃႈလႆႈၶဵင်ႇတႃႉၵူႈလွင်ႈသေလႆႈၵႂႃႇႁဵတ်းၵၢၼ်ယူႇသဝ်းတီႈႁၢၼ်ႉ KTV ၼႆႉၵေႃႈ  ပဵၼ်ယွၼ်ႉ သိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်း ” –  ဝႃႈၼႆ။ 

လွင်ႈတၢင်းဢၼ်ၵိူတ်ႇၶိုၼ်ႈယူႇၸိူင်ႉၼႆၵေႃႈ ပဵၼ်ယွၼ်ႉ ဝၢၼ်ႈမိူင်းဢမ်ႇမီးၶွပ်ႇမီးပိူင်လႄႈ မီးလွင်ႈၶဵင်ႇတႃႉ လွင်ႈလွတ်ႈၽေး၊ တီႈၼၼ်ႉသမ်ႉမီးယႃႈမဝ်းၵမ်လိူင်ႇၼမ်လႄႈ တုမ်ႉတိူဝ်ႉၵူႈလွင်ႈ ၼႆယဝ်ႉ ။

တုၵ်းယွၼ်း လွင်ႈၽဵင်ႇပဵင်းတွၼ်ႈတႃႇ ၵူၼ်းလူႉတၢႆ

တွၼ်ႈတႃႇတေဢမ်ႇၵိူတ်ႇၶိုၼ်ႈ လွင်ႈႁဵတ်းႁၢႆႉၸႃႉၸိူင်ႉၼႆထႅင်ႈၼၼ်ႉ ၶႂ်ႈႁႂ်ႈ ၽူႈမီးပုၼ်ႈၽွၼ်းတင်းသဵင်ႈ ၶႂ်ႈႁႂ်ႈတီႉၺွပ်း ဢဝ်လိူင်ႈ ၼၵ်းၼႃႇ ၵေႃႉႁဵတ်းၽိတ်းပူၼ်ႉပႅၼ်ၼၼ်ႉသေ  ၶႂ်ႈလႆႈလွင်ႈၽဵင်ပဵၼ်းတွၼ်ႈတႃႇ  ၽူႈထုၵ်ႇပူၼ်ႉပႅၼ် – ဝႃႈၼႆ။

ၵူၼ်းၼႂ်းမုင်ႉႁေႃႁိူၼ်းမၽူးပုၼ်ႉဝေႇလၢတ်ႈဝႃႈ – “ဢဝ်ၸႂ်ၶႃႈဝႃႈတႄႉ ဢမ်ႇၶႂ်ႈႁႂ်ႈမၼ်းမီးသၢႆၸႂ်သေဢိတ်းယဝ်ႉဝႃႈ ၵူၼ်းၵေႃႉၼႆႉတႄႉ –   ၶႂ်ႈႁႂ်ႈပိူၼ်ႈပၼ်တၢမ်ႇတၢႆလူးၵွၼ်ႇယဝ်ႉ။ ပေႃးဢမ်ႇၼၼ်ႇ ပေႃးမၼ်းလွတ်ႈဢွၵ်ႇမႃးၶိုၼ်းၵေႃႈ ၼၢင်းယိင်းတၢင်ႇၵေႃႉၵေႃႈတေထုၵ်ႇႁဵတ်းႁၢႆႉၶႃႈတၢႆၸိူင်ႉၼႆထႅင်ႈ”-ဝႃႈၼႆ  ။  

ၸုမ်းတူင်ႉၼိုင်ႇတူင်ႇဝူင်းၼၢင်းယိင်းၸၢဝ်းၼွင် အင်းလေးအမျိုးသမီးသမဂ္ဂ ( IWU ) ပိုၼ်ၽဝ်ႇလၢတ်ႈဝႆႉဝႃႈ  ၸဝ်ႈၼႃႈတီႈၾၢႆႇၽွင်းငမ်းၸိုင်ႈမိူင်းထုၵ်ႇလီဢဝ်လိူင်ႈၼၵ်းၼႃ ထိုင်ႈတီႈထိုင်လႅၼ် – ထိုင်ၵေႃႉဢၼ် ႁဵတ်းႁၢႆႉပေႃႉထုပ်ႉလုၵ်ႈဢွၼ်ႇယိင်းဢႃယု 16 ၶူပ်ႇၼႆႉ ႁႂ်ႈလႆႈ ဝႃႈၼႆ။ 

ၼၢင်းယိင်းတူင်ႉၼိုင်သုၼ်ႇလႆႈသုၼ်ႇပဵၼ်ၼၢင်းယိင်းၼႂ်းၼွင်ႁၢႆးယႃႈ ၵေႃႉၼိုင်ႈလၢတ်ႈဝႃႈ –

“လူဝ်ႇႁဵတ်းသၢင်ႈ ႁႂ်ႈလႆႈလွင်ႈၽဵင်ႇပဵင်း တွၼ်ႈတႃႇဢွၼ်ႇယိင်း  ႁႂ်ႈလႆႈပၼ်တၢမ်ႇ ၵူၼ်းႁဵတ်းၽိတ်း လႄႈ ႁႂ်ႈပဵၼ်တၢမ်ႇဢၼ်ၵိုင်ႇငၢမ်ႇမၼ်း”- ဝႃႈၼႆ ။

ဢိင်ၼိူဝ်လွင်ႈၼႆႉသေ ၼင်ႇႁိုဝ် ဢွၼ်ႇယိင်း ဢၼ်ထုၵ်ႇႁဵတ်းႁၢႆႉႁႅမ်တၢႆ တေလႆႈလွင်ႈၽဵင်ႇပဵင်းပဵၼ်ထမ်းၼၼ်ႉ ႁႂ်ႈၸုမ်းၼၢင်းယိင်းမိူင်းတႆး၊ ၸုမ်းတူင်ႇဝူင်းၵူၼ်းလႄႈ ၵူၼ်းမိူင်းပိုၼ်ႉတီႈၼွင်ႁၢႆးယႃႈ ဢွၵ်ႇသဵင်တူင်ႉတိုၼ်ႇၵၼ်သေၵမ်းၼႆ ၸုမ်းၼၢင်းယိင်း ၼွင်ႁၢႆးယႃႈ IWU ပိုၼ်ၽၢဝ်ႇတိုၵ်းသူၼ်းဝႆႉ ၼင်ႇၼႆ။

ၵဵဝ်ၵပ်းလွင်ႈၼႆႉ ၵူၼ်းႁိူၼ်းမၽူးပုၼ်ႉဝေႇ ပိုတ်ႇလိူင်ႈဢဝ်ဢမူႉဝႆႉယူႇသေတႃႉ မီးလွင်ႈယၢပ်ႇၽိုတ်ႇဝႆႉလွင်ႈငိုၼ်းတွင်း ဢိၵ်ႇလၢႆလၢႆလွင်ႈ ။

“ႁဝ်းၶႃႈ ပဵၼ်ၵူၼ်းဝၢၼ်ႈၼွၵ်ႈၼႃးပၢင်ႇၵူၺ်း လွင်ႈၸွႆးတြႃး  ဢဝ်လိူင်ႈၵၼ် ၶိုၼ်ႈလုမ်းၶိုၼ်ႈၸႆး ၼႆႉၵေႃႈ ဢမ်ႇႁူႉလီလီ။  ယဝ်ႉၵေႃႈထႅင်ႈလွင်ႈၼိုင်ႈ ပဵၼ်လွင်ႈပဵၼ်တၢင်းသင်ၵေႃႈယဝ်ႉ ငိုၼ်းၵႂႃႇဢွၼ်တၢင်း တင်းမူတ်းၶႃႈလူးၼေႃႈ ။ တလဵဝ် ႁဝ်းၶႃႈ ၵႂႃႇဢဝ်တူဝ်တၢႆမၼ်းၵေႃႈ လႆႈဢဝ်ငိုၼ်းသိူဝ်ႇတၢင်းဢဝ် ၊ ပေႃးဢမ်ႇပႃးငိုၼ်းၵေႃႈဢမ်ႇယဝ်ႉ ၽွင်းတႅၼ်းၼႂ်းၼွင်ၼႆႉတႄႉၸွႆႈငိုၼ်း 10 သႅၼ်ပျႃး ”- ဝႃႈၼႆ ။

ယၢမ်းလဵဝ်ၵေႃႉပဵၼ်မႄႈ မၽူးပုၼ်ႉဝေႇ တုမ်ႉတိူဝ်ႉပၢႆးၸႂ်ဝႆႉ မုင်ႈမွင်းတႃႇတေလႆႈလွင်ႈၽဵင်ႇပဵင်းတွၼ်ႈတႃႇၵေႃႉပဵၼ်လုၵ်ႈယိင်း ဝႃႈၼႆ ။

“ ယွၼ်ႉငိုၼ်းဢွၼ်ႇ 5000 ၵူၺ်း…. ႁဵတ်းပၼ်လုၵ်ႈၶႃႈပေႃးလႆႈတၢႆ။ တေႃႇလဵဝ်ပေႃးထၢမ်ၶႃႈ ၶႂ်ႈႁဵတ်းသင်လႃႇၼႆတႄႉ   ၶႃႈၶႂ်ႈၶိုၼ်းႁႅမ်မၼ်းတၢႆၵူၺ်းယဝ်ႉ ။ မၼ်းၵေႃႈမီးလုၵ်ႈယိင်းယူႇ မၼ်းဢမ်ႇဝူၼ်ႉႁႃႉ   ပေႃးပဵၼ်လုၵ်ႈလၢင်းၸဝ်ႈၵဝ် ၺႃးပိူၼ်ႈပေႃႉထုပ်ႉႁဵတ်းသႂ်ႇသမ်ႉပေႃးတၢႆၼႆႉ ႁဝ်းတေမိူၼ်ႁိုဝ် ၼႆ”

မိူင်းမၢၼ်ႈၼႆႉယွၼ်ႉပိူဝ်ႈပၼ်ႁႃၵၢၼ်သိုၵ်းၵၢၼ်မိူင်းသေ လုၵ်ႈဢွၼ်ႇဢမ်ႇလႆႈႁဵၼ်းလိၵ်ႈ။ ၵမ်ႈၼမ် လႆႈဢွၵ်ႇႁႃငိုၼ်းလဵင်ႉလူတူၺ်းထိုင်ၵူၼ်းတၢင်းႁိူၼ်း ။ ၵွပ်ႈၼႆ တႃႇတေဢဝ်လိူင်ႈ ပၼ်ႁႃႁႅင်းၵၢၼ်လုၵ်ႈဢွၼ်ႇ ႁႂ်ႈထိုင်တီႈ – တႃႇတေပၼ်လွင်ႈႁူမ်ႇလူမ်ႈလုၵ်ႈဢွၼ်ႇၵေႃႈယၢပ်ႇၽိုတ်ႇ- ၼႆ သိုၵ်းမၢၼ်ႈယိုတ်းမိူင်းၵေႃႈယၢမ်ႈပိုၼ်ၽၢဝ်ႇၼင်ႇၼႆ။

သင်ဝႃႈ ၸဝ်ႈၵၢၼ်ပေႃႈလဵင်ႉ ႁဵတ်းႁၢႆႉတေႃႇ ႁႅင်းၵၢၼ်လုၵ်ႈဢွၼ်ႇၸိုင် တေလႆႈႁပ်ႉတူတ်ႈၶွၵ်ႈ ဢမ်ႇၼၼ် တူတ်ႈတၢမ်ႇငိုၼ်းတွင်းဝႃႈၼႆဝႆႉ။

 ၵူၺ်းၵႃႈ ႁႅင်းၵၢၼ်လုၵ်ႈဢွၼ်ႇဢၼ်ဝႃႈၼၼ်ႉၵေႃႈ သိုၵ်းမၢၼ်ႈတႄႉလၢတ်ႈဝႃႈ ဢႃယု 14 လူင်းတႂ်ႈ ဝႃႈၼႆဝႆႉ။

 ၸွမ်းၼင်ႇပၵ်းပိူင်သုၼ်ႇလႆႈလုၵ်ႈဢွၼ်ႇလုမ်ႈၾႃႉတႄႉ – ႁႅင်းၵၢၼ်လုၵ်ႈဢွၼ်ႇဢၼ်ဝႃႈၼႆႉ တေလႆႈပဵၼ် ဢႃယု 18 လူင်းတႂ်ႈ။