ဢိတ်ႉသ်ရေႊလ် လႄႈ ဢီႊရၼ်ႊ ၸင်ႇႁႃတူၵ်းလူင်းၵိုတ်းတိုၵ်းၵၼ်ထႅင်ႈ 3 ဝူင်ႈ မိူဝ်ႈဝၼ်းတီႈ 23/04/2026 ၼႆႉၵူၺ်းသေတႃႉ ဝၼ်းတီႈ 26/04/2026 ၼႆႉ ယူႇတီႈဢိတ်ႉသ်ရေႊလ်ပိုတ်းယိုဝ်းသႂ်ႇတီႈ ၸုမ်း ႁိတ်ႉသ်ပူဝ်ႊလႃႊၶဝ်ယူႇသဝ်း – တူၵ်းသႂ်ႇတီႈ ပွတ်းၸၢၼ်းမိူင်းလႅပ်ႊပႃႊၼုၼ်ႊလႄႈ ၵူၼ်းမိူင်းတၢႆ 14 ၵေႃႉ မၢတ်ႇၸဵပ်း 37 ၵေႃႉ ႁွင်ႈၵၢၼ်ၾၢႆႇပၢႆးယူႇလီမိူင်းလႅပ်ႊပႃႊၼုၼ်ႊ ယိုၼ်ယၼ်ပိုၼ်ၽၢဝ်ႇဝႆႉၼင်ႇၼႆ။

ၼႂ်းၵူၼ်းလူႉတၢႆၼၼ်ႉပႃးတင်းလုၵ်ႈဢွၼ်ႇလႄႈၼၢင်းယိင်း။

ၵွၼ်ႇတေပိုတ်းယိုဝ်းၼၼ်ႉၵေႃႈ ၸုမ်းသိုၵ်းဢိတ်ႉသ်ရေႊလ် ပိုၼ်ၽၢဝ်ႇႁႂ်ႈၵူၼ်းပိုၼ်ႉတီႈတီႈၼၼ်ႉ ၶၢႆႉပၢႆႈယူႇဝႆႉတီႈလွတ်ႈၽေးယူႇသေတႃႉ – ၽွင်းၵူၼ်းမိူင်းၶၢႆႉပၢႆႈဢမ်ႇတၼ်းယဝ်ႉၼၼ်ႉ မၢၵ်ႇလူင်တူၵ်းလူင်းမႃးသႂ်ႇလႄႈ ၸင်ႇမီးၵူၼ်းမၢတ်ႇၸဵပ်းလူႉတၢႆၼမ် ဝႃႈၼႆ။

ၵွၼ်ႇၼႃႈၼႆႉ ၸုမ်းႁိတ်ႉသ်ပူဝ်ႊလႃႊ ဢဝ်ၶိူင်ႈၻရူၼ်ႊ ပိုတ်းယိုဝ်းလႄႈ သိုၵ်းဢိတ်ႉသ်ရေႊ တီႈလႅပ်ႊပႃႊၼုၼ်ႊ တၢႆ ၵေႃႉၼိုင်ႈ မၢတ်ႇၸဵပ်း 6 ၵေႃႉ။ ႁိတ်ႉသ်ပူဝ်ႊလႃႊ လၢတ်ႈတီႈသိုဝ်ႇၶၢဝ်ႇဝႃႈ – ပၢင်တိုၵ်းယၢမ်းလဵဝ် ယူႇၾၢႆႇသႃႇဝႆႉ ဝႃႈၼႆဢမ်ႇႁိုင်ၵေႃႈ ၺႃးဢိတ်ႉသ်ရေႊ မႃးပိုတ်းယိုဝ်းသႂ်ႇ။

ၶိူင်ႈၻရူၼ်ႊၶွင် ႁိတ်ႉသ်ပူဝ်ႊလႃႊ ဢၼ်သူင်ႇၶဝ်ႈဢၢၼ်းယိုဝ်းဢိတ်ႉသ်ရေႊလ် ၼၼ်ႉၵေႃႈ သိုၵ်းဢိတ်ႉသ်ရေႊလ် ယိုဝ်းတူၵ်းလႆႈ 3 လမ်း ဝႃႈၼႆ။

သိုၵ်းသွင်ၸုမ်းၼႆႉ တူၵ်းလူင်းၵိုတ်းတိုၵ်းၵၼ်ဝႆႉဝႃႈၼႆသေတႃႉ ၾၢႆႇၼိုင်ႈၼႄးၾၢႆႇၼိုင်ႈသေ ၸင်ႇဢမ်ႇၸၢင်ႈၵိုတ်းတိုၵ်းၵၼ်တႄႉတႄႉ။ လွင်ႈၼႆႉ ၾၢႆႇဢီႊရၼ်ႊ ယိုၼ်ႈယွၼ်းဝႆႉတီႈဢမေႊရိၵၼ်ႊ တႃႇဢုပ်ႇဢူဝ်းလွင်ႈၵိုတ်းတိုၵ်းတႄႉတႄႉ ၼႆယူႇသေတႃႉ ၾၢႆႇတၢင်းဢမေႊရိၵၼ်ႊ ဢမ်ႇပႆႇမီးၽႅၼ်ၵၢၼ် ဢမ်ႇပႆႇႁၢင်ႈႁႅၼ်းတႃႇဢုပ်ႇဢူဝ်းၵၼ်သင် – ၼႆ ႁိူၼ်းႁေႃၶၢဝ်ၵေႃႈပိုၼ်ၽၢဝ်ႇဝႆႉၼင်ႇၼႆ။