ၼႂ်းဝၼ်းတီႈ 21/5/2026  ယၢမ်းဝၢႆးဝၼ်းမွၵ်ႈ 2မူင်းၶိုင်ႈၼႆႉ ၾႃႉၽႃႇ တီႈဝဵင်းသီႇသႅင်ႇ တိူဝ်ႉသႂ်ႇၾုင်ဝူဝ်း လူမ်ႉတၢႆ 49 တူဝ်  ။

ပဵၼ်ၾုင်ဝူဝ်း ၵူၼ်းၼႂ်းဝၢၼ်ႈမႃးပွႆႇလဵင်ႉဝႆႉ  ႁိမ်းဝၢၼ်ႈလွႆမႆႉပူၵ်ႇ  (ကောင်ဝါးတောင်) ၼႂ်းဢိူင်ႇလွႆပုတ်း ၸႄႈဝဵင်းသီႇသႅင်ႇ ။

တီႈပၢင်ႇလဵင်ႉဝူဝ်းၼၼ်ႉ ဝူဝ်းၵိၼ်ယိူဝ်ႈယႃႈ မီးဝႆႉယူႇ  မွၵ်ႈ 200 တူဝ်။ ဢၼ်ၺႃး ၾႃႉၽႃႇသေ  လူမ်ႉတၢႆၵႂႃႇၼႆႉပဵၼ်  49 တူဝ်။ ၽွင်းၾူၼ်တူၵ်းမႃးၼၼ်ႉ ၵူၼ်းလဵင်ႉဝူဝ်း ၵႂႃႇသွၼ်ႈယူႇဝႆႉၼႂ်းသုမ်ႉထဵင်လႄႈ  လွတ်ႈတၢႆၵူၺ်း ဝႃႈၼႆ။

ၵူၼ်းပိုၼ်ႉတီႈ ၼႂ်းၸႄႈဝဵင်းသီႇသႅင်ႇလၢတ်ႈဝႃႈ – “ ၸႂ်ႈယဝ်ႉၶႃႈ မိူဝ်ႈဝႃးၼႆႉ တၢင်းသီႇသႅင်ႇႁဝ်းၶႃႈ ၾူၼ်တူၵ်းႁႃႇယႂ်ႇၼႃႇ။ တင်းၾူၼ် တင်းလူမ်း  မၼ်းႁႅင်းၼႃႇ။ ၾႃႉၽႃႇသေ ဝူဝ်းတၢႆ  49 တူဝ်။ ပဵၼ်ၸွမ်း တီႈႁိမ်းပၢင်ႇပၢင်ႇၸိူင်ႉၼၼ်ၼႃႇ။ ၸွမ်းၸိူဝ်းၼႆႉသမ်ႉ ပဵၼ်တီႈႁိူၼ်းႁဵတ်းသူၼ်ယူႇသေတႃႉ ၽုၵ်ႇသင်ၵေႃႈသမ်ႉ ဢမ်ႇပေႃးပဵၼ်ၵၢၼ်ၶႃႈၼေႈတီႈဝၢၼ်ႈၼႆႉ“– ဝႃႈၼႆ ။

လိူဝ်ၼၼ်ႉ ယၢမ်းႁူဝ်ၶမ်ႈ ယွၼ်ႉလူမ်းပတ်ႉထွင်းႁႅင်း ၼႂ်းဝဵင်းသီႇသႅင်ႇ တူၼ်ႈမႆႉယႂ်ႇ လူမ်ႉတဵင်တၢင်း၊ လင်ၶႃးႁိူၼ်း ပိဝ်ၸွမ်းလူမ်း လူႉၵွႆၵႂႃႇလၢႆလၢႆလင်ထႅင်ႈဝႃႈၼႆ။

ယွၼ်ႉၵၢၼ်ႁႃၵိၼ်လဵင်ႉတွင်ႉ ၊ ၵၢၼ်ၽုၵ်ႇသွမ်ႈ ဢမ်ႇပဵၼ်ၵၢၼ်လႄႈ  ၵူၼ်းဝၢၼ်ႈၼႂ်းၸႄႈဝဵင်းသီႇသႅင်ႇ ဢွၼ်ၵၼ်ၸႂ်ယႂ်ႇ လဵင်ႉတူဝ်သတ်းမႃး  ၵူၼ်းပိုၼ်ႉတီႈၵေႃႉၼိုင်ႈ လၢတ်ႈ။

မၼ်းၸၢႆးသိုပ်ႇလၢတ်ႈထႅင်ႈဝႃႈ – “ဢၼ်ႁဝ်းၸႂ်ယႂ်ႇဝူဝ်းၼႆႉ ဢွၼ်ၵၼ်လဵင်ႉ ႁႂ်ႈပဵၼ်ၵၢၼ် ပၢႆးမၢၵ်ႈမီး။ ပိူင်လူင်မၼ်းတႄႉၵေႃႈ ႁႂ်ႈပဵၼ်ငိုၼ်းၶဝ်ႈၼၼ်ႉၼႃႇ။ ပေႃး ၵၢၼ်ၽုၵ်ႇသွမ်ႈ ဢမ်ႇပဵၼ်ၵၢၼ်ၵေႃႈ လႆႈၸႂ်ယႂ်ႇၵၢၼ်လဵင်ႉတူဝ်သတ်း မူၵႆႇဝူဝ်းၵႂၢႆးၼၼ်ႉၼႃႇ။ မိူၼ်မိူဝ်ႈလဵဝ် ပေႃးဝႃႈၾုင်ဝူဝ်းၺႃးၾႃႉၽႃႇယဝ်ႉ ၼႆၵေႃႈ  ငိုၼ်းၶဝ်ႈၼႆႉၵေႃႈ  သုမ်းၵႂႃႇထႅင်ႈသုၼ်ႇၼိုင်ႈယဝ်ႉ ။ ယွၼ်ႉဝႃႈမၼ်းၵေႃႈ ပဵၼ်ၵၢၼ်ပၢႆးမၢၵ်ႈမီးသုၼ်ႇၼိုင်ႈ တႃႇလႆႈငိုၼ်းၶဝ်ႈၼႂ်းၼႃႈႁိူၼ်းၼၼ်ႉၼႃႇၼေႃႈ ”- ဝႃႈၼႆ ။

ယၢမ်းလဵဝ် ၼႂ်းၸိုင်ႈတႆးလၢႆလၢႆၸႄႈဝဵင်းၼႆႉ မွၵ်ႇၵုမ်ႈၼမ်ၼႃဝႆႉ။ ယွၼ်ႉၼၼ် ၾူၼ်ၸၢင်ႈတူၵ်းၼမ်ႁႅင်းသေ ၸၢင်ႈပဵၼ် လွင်ႈၼမ်ႉၼွင်းၼမ်ႉထူမ်ႈ။ လိူဝ်ၼၼ်ႉ ၵႆႉပဵၼ် ၾႃႉၽႃႇၾႃႉမႅပ်ႈ၊ လူမ်းထွင်းႁႅင်း၊ မၢၵ်ႇႁဵပ်းတူၵ်းၸိူဝ်းၼႆႉပႃးလႄႈ ႁႂ်ႈလႆႈၾၢင်ႉၵၼ်ၼႆ ႁွင်ႈၵၢၼ်ၾၢႆႇလၢမ်းၶၢတ်ႈၾိင်ႈၾႃႉ ပိုၼ်ၽၢဝ်ႇပၼ်ၾၢင်ႉဝႆႉ ၼင်ႇၼႆ။