ထဝ်ႈယိင်း ၵူၼ်းမိူင်းဝဵင်းသီႇသႅင် ၸိုင်ႈတႆးပွတ်းၸၢၼ်းၵေႃႉၼိုင်ႈ ၵႂႃႇႁႃၽၵ်းၶဵဝ်ႁိမ်းႁွင်ႈၼမ်ႉ ၵႂႃႇယဵပ်ႇၺႃးမၢၵ်ႇမႅင်းၾင်လိၼ် ထိုင်တီႈၶႃပုတ်းသေ ယၢမ်းလဵဝ်လႆႈယူတ်းယႃတူဝ်ဝႆႉ တီႈႁူင်းယႃ ။
ၼႂ်းဝၼ်းတီႈ 5/4/2026 ယၢမ်းဝၢႆးဝၼ်း 2 မူင်း ထဝ်ႈယိင်း ဢႃယု 50 ပၢႆ ယူႇၼႂ်းဢိူင်ႇတၢမ်ၽၢၵ်ႇ ဝၢၼ်ႈသူၺ်ႇတၵူႇ (ရွှေတဂူ ) ၵေႃႉၼိုင်ႈၵႂႃႇယဵပ်ႇၺႃးမၢၵ်ႇ တီႈႁိမ်းၼမ်ႉႁွင်ႈ ႁဵတ်းႁႂ်ႈၶႃပုတ်း လႆႈႁၢမ်ႇသူင်ႇယူတ်းယႃတူဝ်ဝႆႉဝႃႈၼႆ။
ၼၢင်းယိင်းဝဵင်းသီႇသႅင်ႇၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ -“ၸဵမ်မိူဝ်ႈပဵၼ်ပၢင်တိုၵ်းၼၼ်ႉ တၢင်းပွတ်းပုၼ်ႉ ဢမ်ႇမီးၵူၼ်းၵႂႃႇမႃး ၊ မႄႈထဝ်ႈဢၼ်ယဵပ်ႇၺႃးမၢၵ်ႇၼၼ်ႉ မၼ်းၵႂႃႇႁႃၽၵ်း သေၵႂႃႇယဵပ်ႇၺႃးမၢၵ်ႇ ၊ လုၵ်ႈလၢင်းမၼ်းမီး 4 ၵေႃႉ ၵမ်းၼႆႉ တေလႆႈၵႂႃႇပိုင်ႈဢိင်ၽႂ်ဢမ်ႇႁူႉ ”- ဝႃႈၼႆ ။
ဝၢႆးပၢင်တိုၵ်းယဝ်ႉ တီႈဝၢၼ်ႈသူၺ်ႇတၵူႇ ဝဵင်းသီႇသႅင်ႇၼႆႉ ၵူၼ်းဝၢၼ်ႈ ဢၼ်ယူႇ ၵိုတ်းဝႆႉၵိုတ်းဢေႇ။ ၽႂ်ၵေႃႈဢမ်ႈႁတ်းၵႂႃႇမႃးၼႂ်းဝၢၼ်ႈၼႂ်းသူၼ်လွတ်ႈလွတ်ႈလႅဝ်းလႅဝ်း။ မၢၵ်ႇမႅင်းၾင်ႇလိၼ် ဢၼ်ၵိုတ်းၶင်ႉဝႆႉ ၽွင်းပၢင်တိုၵ်းၼၼ်ႉၵေႃႈ ၶႂ်ႈႁႂ်ႈ ၽူႈမီးပုၼ်ႈၽွၼ်းၶဝ်မႃး ၽဵဝ်ႈပၼ်ၼႆ – ၵူၼ်းပိုၼ်ႉတီႈလၢတ်ႈ ။
ၵူၼ်းၸၢႆးဢႃယု 30 ပီ ယူႇၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ပၢင်တိုၵ်းတႄႉပဵၼ်ႁိုင်ယဝ်ႉ ၊ ႁိူၼ်းယေးဝၢၼ်ႈသူၼ်လူမ်ႉၵွႆၵေႃႈမီးၼမ် ။ ၵူၺ်းၼႂ်းပိုၼ်ႉတီႈပႆႇၸၢင်ႈပူၵ်းပွင်ၶိုၼ်း ၊ ၵူၼ်းပိုၼ်ႉတီႈပွၵ်ႈမႃးယူႇႁိူၼ်းၶိုၼ်းၵေႃႈတိုၵ်ႉလႆႈမႆႈၸႂ်ယူႇ ၊ ပေႃးၵႂႃႇႁႆႈၵႂႃႇသူၼ်ၵေႃႈ တိုၵ်ႉလႆႈၾၢင်ႉယူႇ ၊ ၶႂ်ႈႁႂ်ႈ ၽူႈမီးပုၼ်ႈၽွၼ်း ပျီႇတူႉၸိတ်ႉ PNO မႃးပၼ်ပိုၼ်ႉႁူႉၵဵဝ်ႇၵပ်းလွင်ႈ ၽေးမၢၵ်ႇမႅင်းတႃႇၵူၼ်းမိူင်းႁဝ်းၶႃႈဢေႃႈ”– ဝႃႈၼႆ ။
ယွၼ်ႉၼႂ်းပိုၼ်ႉတီႈ မၢၵ်ႇမႅင်းၾင်လိၼ်လိူင်ႇၼမ်လႄႈ ယူႇတီႈၵူၼ်းမိူင်း တေၵႂႃႇလႂ်မႃးလႂ်ၵေႃႈထုၵ်ႇလီ ၾၢင်ႉ ယႂ်ႇၼမ်လႄႈ ဝႆႉသတိတႃႇသေႇ ဝၢႆးသေလင်ပၢင်တိုၵ်းယဝ်ႉ မၢၵ်ႇဢၼ်ပႆႇတႅၵ်ႇ တေၸၢင်ႈ ၵိုတ်းယူႇတင်းၼမ် သင်ႁၼ်မႅၼ်ႈၸိုင်ထုၵ်ႇလီယူႇႁၢင်ႇၵႆလႄႈ ငိူင်ႉဝႄႈ ။ ႁႂ်ႈၸႅင်ႈၽူႈမီး ပုၼ်ႈၽွၼ်း ၼႂ်းပိုၼ်ႉတီႈမႃးပူတ်းပၼ်ၸဵမ်ၸိူဝ်းၼၼ်ႉၼႆႉ ၼႆယဝ်ႉ ။
ဝၼ်းတီႈ 14/08/2024 ယၢမ်းၵၢင်ၼႂ်10 မူင်းၼၼ်ႉ ဢမ်ႇပဵၼ်ပၢင်တိုၵ်းသင်သေ သိုၵ်းမၢၼ်ႈတင်း ၸုမ်းပျီႇတူႉၸိတ်ႉ ပဢူဝ်း PNO လၢမ်းလိမ်းပွႆႇမၢၵ်ႇလူင် တူၵ်းသႂ်ႇၼႂ်းသူၼ် တီႈဝဵင်းသီႇသႅင်ႇ ၸၢၵ်ႇမၢၵ်ႇတိူဝ်ႉသႂ်ႇ သွင်မႄႈလုၵ်ႈ ၵေႃႉပဵၼ်မႄႈတၢႆထင်တီႈ လုၵ်ႈၸၢႆးမၢတ်ႇၸဵပ်း ၼႆယဝ်ႉ ။
ပျီႇတူႉၸိတ်ႉပဢူဝ်း PNO လႄႈ သိုၵ်းမၢၼ်ႈ ႁူမ်ႈၵၼ်သေ ပိုတ်းယိုဝ်းတိုၵ်းတေႃးၵၼ်တင်း တပ်ႉသိုၵ်းပဢူဝ်း PNLA ၼႂ်းၸႄႈဝဵင်းသီႇသႅင်ႇ ၸဵမ်မိူဝ်ႈဝၼ်းတီႈ 12/01/2023။ တႄႇၸဵမ်မိူဝ်ႈၼၼ်ႉမႃး ၵူၼ်းမိူင်းဝဵင်းသီႇသႅင်ႇ လႆႈပၢႆႈၽေးသိုၵ်း ပႆႇၸၢင်ႈပွၵ်ႈၶိုၼ်းႁိူၼ်းယေး တေႃႇထိုင်ဝၼ်းမိူဝ်ႈၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ