ၵူၼ်းမိူင်းပိုၼ်ႉတီႈၼႂ်းၸႄႈဝဵင်းၼွင်ၶဵဝ် ၵေႃႉၵႂႃႇတႅပ်းဢွႆႈ ၽွင်းၶၢဝ်းပွႆးသွၼ်းၼမ်ႉ ယဵပ်ႇၺႃးမၢၵ်ႇၽင်လိၼ်သေ လႆႈတႅပ်းပႅတ်ႈၶႃမၼ်းၸၢႆးၵႂႃႇၶွၼ်ၼိုင်ႈ ဝႃႈၼႆ။

မိူဝ်ႈဝၼ်းတီႈ 16 ယၢမ်းၵၢင်ၼႂ် 11 မူင်း ၵူၼ်းၸၢႆး ဢႃႇယု 33 ပီ ၸိုဝ်ႈႁွင်ႉၵူဝ်ႇၵျေႃႇယႄးလုၼ်ႇ ၵေႃႉယူႇဝၢၼ်ႈမၢၵ်ႇၶီႈၼူ ၵႂႃႇတႅပ်းတူၼ်ႈဢွႆႈ ၼႂ်းသူၼ်ဢွႆႈ ႁိမ်းဝၢၼ်ႈၼၼ်ႉသေ ယဵပ်ႇၺႃးမၢၵ်ႇၽင်လိၼ် ဢၼ်ၵိုတ်းဝႆႉမိူဝ်ႈပၢင်တိုၵ်းၼၼ်ႉလႄႈ မၢတ်ႇၸဵပ်းၵႂႃႇႁၢဝ်ႈႁႅင်းၼႆယဝ်ႉ။

ၸုမ်းၼၢင်းယိင်း ၸၢဝ်းၶိူဝ်းတဢၢင်းၶဝ် ပိုၼ်ၽၢဝ်ႇဢွၵ်ႇဝႆႉဝႃႈ “မၼ်းၸၢႆးၵႂႃႇယဵပ်ႇၺႃး ၽွင်းၵႂႃႇတႅပ်းဢွႆႈ။ မၢၵ်ႇဢၼ်ၸုမ်းသိုၵ်းၶဝ်ၽင်ဝႆႉၼႂ်းသူၼ်ဢွႆႈ ၽွင်းပၢင်တိုၵ်းၼၼ်ႉ ပႆႇ မူတ်းသဵင်ႈ။ လႆႈတႅပ်းပႅတ်ႈၶႃၾၢႆႇသၢႆႉ မၼ်းၸၢႆး။ မိူဝ်ႈလဵဝ်ၵႂႃႇယူတ်းယႃတူဝ်ဝႆႉတီႈ ႁူင်းယႃလူင်ဝဵင်းပၢင်ႇဢူး” ဝႃႈၼႆ။

ၽွင်းပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ၼၼ်ႉ သိုၵ်းမၢၼ်ႈ တင်း သိုၵ်းတဢၢင်း ယိုဝ်းၵၼ်ႁၢဝ်ႈႁႅင်း သေ ၸွမ်းသူၼ် ႁႆႈ တူင်ႈၼႃးၵူၼ်းမိူင်းၸိူဝ်းၼႆႉ မၢၵ်ႇမႅင်းၽင်လိၼ် တိုၵ်ႉၵိုတ်းၶင်ႉဝႆႉၼမ်ယူႇလႄႈ ၵူၼ်းမိူင်းၸိူဝ်းယူႇၼႂ်းပိုၼ်ႉတီႈ ထုၵ်ႇလီၾၢင်ႉၵၼ်တေႉတေႉ။

ၸႄႈဝဵင်းၼွင်ၶဵဝ်ၼႆႉ ပဵၼ်ဝဵင်းဢၼ် သိုၵ်းမၢၼ်ႈ တင်း သိုၵ်းတဢၢင်း ယိုဝ်းၵၼ်ႁၢဝ်ႈႁႅင်းတေႉတေႉဝႃႈဝႃႈ လႄႈ မၢၵ်ႇမႅင်းၽင်လိၼ် ၸိူဝ်းၵိုတ်းၶင်ႉဝႆႉၵေႃႈ ယင်းတိုၵ်ႉမီးၼမ်ယူႇသေ ၵူၼ်းမိူင်းပိုၼ်ႉတီႈၵႆႉၵႆႉၵႂႃႇယဵပ်ႇ ၺႃးသေ မၢင်ၸိူဝ်းထိုင်တီႈလႆႈတႅပ်းၶႃ တႅပ်းတိၼ် တႅပ်းမိုဝ်းၵူၺ်းဢမ်ႇၵႃး ၵမ်ႈၽွင်ႈၸုၼ်ႉသၢႆၸႂ်ၵႂႃႇပႃး ထႅင်ႈ ၼႆယဝ်ႉ။

ယၢမ်းလဵဝ် ၸႄႈဝဵင်းၼွင်ၶဵဝ်ၼႆႉ ပဵၼ်သိုၵ်းမၢၼ်ႈ ၵုမ်းၵမ်ပၼ်ႇၵၢၼ်ၽွင်းငမ်းဝႆႉ ပဵၼ်တၢင်းၵၢၼ် ၼႆယဝ်ႉ။