တႄႇႁူဝ်လိူၼ်တီႊသႅမ်ႊပိူဝ်ႊၼႆႉမႃး သိုၵ်းမၢၼ်ႈယိုတ်းမိူင်းၸိူဝ်းပၼ်ႇၵၢၼ်ၽွင်းငမ်းယူႇဝႆႉၼႂ်းၸႄႈဝဵင်းၼွင်ၶဵဝ် လူင်းၵူတ်ႇထတ်းသဵၼ်ႈမၢႆႁူဝ်ၼပ်ႉၵူၼ်းၸွမ်းဝၢၼ်ႈ ၸီႉသင်ႇ ႁႂ်ႈၵူၼ်းဝၢၼ်ႈၶဝ်ႈႁဵတ်းသိုၵ်းမႂ်ႇ ၼႆယဝ်ႉ။
မိူဝ်ႈဝၼ်းတီႈ 1 လႄႈ 2 ပူၼ်ႉမႃးၼႆႉ သိုၵ်းမၢၼ်ႈ လူင်းၵႂႃႇၼႂ်းဝၢၼ်ႈၸွမ်းပိုၼ်ႉတီႈၵူၼ်းမိူင်းယူႇၼၼ်ႉသေ လၢတ်ႈႁႂ်ႈၵူၼ်းဝၢၼ်ႈၶဝ်ႈႁၢပ်ႇထၢမ်းၵၢၼ်သိုၵ်း ၼိုင်ႈဝၢၼ်ႈလႂ် 5 ၵေႃႉ ၼႆယဝ်ႉ။
ၵူၼ်းမိူင်းၼႂ်းၸႄႈဝဵင်းၼွင်ၶဵဝ်ၵေႃႉႁူႉၸွမ်းပိူင်ပဵၼ်ၼႆႉလၢတ်ႈၼႄဝႃႈ “သိုၵ်းမၢၼ်ႈၶဝ်ႈမႃးၼႂ်းဝၢၼ်ႈႁႄ ႁွင်ႉၵူၼ်းဝၢၼ်ႈႁဵတ်းပၢင်ၵုမ်။ လၢတ်ႈဝႃႈၵူၼ်းၼႂ်းဝၢၼ်ႈ မီးၼမ်ၵေႃႈယဝ်ႉ ဢေႇၵေႃႈယဝ်ႉ တိုၼ်းတေလႆႈသူင်ႇၵူၼ်းၵႂႃႇၶဝ်ႈႁဵတ်းသိုၵ်း။ တႃႇၵႂႃႇၼၼ်ႉ ၵူၼ်းၼုမ်ႇၸိူဝ်းဢႃႇယု တဵမ် 18 ပီ တေလႆႈၸူၵ်းမႄး။ ၵူၼ်းၸိူဝ်းပွၵ်ႈမႄးၼၼ်ႉ တိုၼ်းတေလႆႈပၼ်ႇၵၼ်ၵႂႃႇၶဝ်ႈႁဵတ်းသိုၵ်း။ ဢမ်ႇၵႂႃႇဢမ်ႇလႆႈ” ဝႃႈၼႆ။
လႆႈႁူႉဝႃႈ ၽွင်းၵူၼ်းသိုၵ်းမၢၼ်ႈ လူင်းၵႂႃႇၼႂ်းဝၢၼ်ႈၼၼ်ႉၵေႃႈ ၶဝ်ႈသွၵ်ႈတဝ်ၸွမ်းႁိူၼ်းယေးၵူၼ်းမိူင်းသေ လွၵ်ႇငိုတ်ႈ တဵၵ်းတဵင်ႁႂ်ႈၵူၼ်းမိူင်းၶဝ်ႈႁၢပ်ႇထၢမ်းၵၢၼ်သိုၵ်းႁႂ်ႈပေႃးလႆႈလႄႈ ၵူၼ်းၼုမ်ႇၸိူဝ်းမီးယူႇၼႂ်းပိုၼ်ႉတီႈၵမ်ႈၼမ် ဢွၼ်ၵၼ်ႁၢင်ႈႁႅၼ်းတႃႇပၢႆႈဢွၵ်ႇဝၢၼ်ႈ၊ ဢွၵ်ႇၵႂႃႇႁဵတ်းၵၢၼ်မိူင်းၼွၵ်ႈ ၼမ်မႃးလိူဝ်ၵဝ်ႇ ၼႆယဝ်ႉ။
ၸႄႈဝဵင်းၼွင်ၶဵဝ်ၼႆႉ တႄႇလိူၼ်ၵျူႊလၢႆႊမႃး သိုၵ်းမၢၼ်ႈယိုတ်းမိူင်း ၶဝ်ႈၵုမ်းၵမ်ဢဝ်လႆႈၶိုၼ်းတီႈသိုၵ်းတဢၢင်း (TNLA) ။ ဝၢႆးလင်ယိုတ်းၵုမ်းပၼ်ႇၵၢၼ်ၽွင်းငမ်းဝႆႉယဝ်ႉဢမ်ႇႁိုင်သိုၵ်းမၢၼ်ႈ ႁၢင်ႈႁႅၼ်းၶိုင်ပွင်တႃႇၸတ်းႁဵတ်းပၢင်လိူၵ်ႈတင်ႈ ၼႂ်းပိုၼ်ႉတီႈၵူၺ်းဢမ်ႇၵႃး တဵၵ်းတဵင်ႁႂ်ႈၵူၼ်းမိူင်းၶဝ်ႈႁၢပ်ႇထၢမ်းၵၢၼ်သိုၵ်းထႅင်ႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ