မိူဝ်ႈဝႃး ဝၼ်းတီႈ 13/11/2025 ယၢမ်းဝၢႆးဝၼ်း 4 မူင်း ၵူၼ်းမိူင်းဝၢၼ်ႈၸၢမ်ၽိူၵ်ႇ ၼႂ်းၸႄႈသီႇပေႃႉ ၸိုင်ႈတႆးပွတ်းႁွင်ႇ ယဵပ်ႇၺႃးမၢၵ်ႇ မၢတ်ႇၸဵပ်းတီႈတိၼ်ၶႂႃလႄႈ ၶႅၼ်ၶႂႃ ႁၢဝ်ႈႁႅင်း ဝႃႈၼႆ ။
ၵေႃႉဢၼ်ယဵပ်ၺႃးမၢၵ်ႇၼၼ်ႉ ပဵၼ် လုင်းၵေႃးလိယ ဢႃယု 64 ပီ ။ ပဵၼ်ပူႇပၢၼ်း ဢဝ်ပုၼ်ႈၽွၼ်းပႂ်ႉသုမ်ႉလူႇၶၢမ်ႇ ႁိမ်းမူၵ်ႉဢူး ဝၢၼ်ႈၸၢမ်ၽိူၵ်ႇ ယဵပ်ႇၺႃးမၢၵ်ႇ တုမ်ႉတိူဝ်ႉႁၢဝ်ႈႁႅင်းလႄႈ လႆႈႁၢမ်သူင်ႇ ႁူင်းယႃ ယူတ်းယႃဝႆႉ တီႈဝဵင်းလႃႈသဵဝ်ႈၼႆယဝ်ႉ ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ပဵၼ်ၽွင်း ငိုၼ်းဢၼ်လူႇၶၢမ်ႇလူမ်းထွင်းပိဝ်တူၵ်းၵႂႃႇလႄႈ ပူႇပၢၼ်း ၵႂႃႇၸွမ်းၵဵပ်းဢဝ်ၶိုၼ်းၼၼ်ႉ ၵႂႃႇယဵပ်ႇၺႃးမၢၵ်ႇဢေႃႈ ၊ တိူဝ်ႉၺႃးတီႈတိၼ်ၾၢႆႇၶႂႃ လႄႈ ၶႅၼ်ၾၢႆႇၶႂႃ မၢတ်ႇၸဵပ်း ႁၢဝ်ႈႁႅင်း လႆႈဢဝ်သူင်ႇ ယူတ်းယႃဝႆႉ ၊ မိူဝ်ႈပူၼ်ႉပႃးသွင်ဝူင်ႈ တီႈႁိမ်းၸိူဝ်းၼၼ်ႉ မီးၵူၼ်းၵႂႃႇမႃး ယူႇ။ ၵူၺ်းၵႃႈ ဢမ်ႇမီးပၼ်ႁႃသင် ” – ဝႃႈၼႆ။
ဝၢႆးလင်သိုၵ်းမၢၼ်ႈ ၵုမ်းလႆႈၶိုၼ်းၼၼ်ႉ ဝဵင်းသီႇပေႃႉၼႆႉ ၵူၼ်ႈပၢႆႈၽေးသိုၵ်းဢွၼ်ၵၼ် ပွၵ်ႈမိူဝ်းၶိုၼ်းႁိူၼ်းယေးၽႂ်မၼ်းယဝ်ႉသေတႃႉ ယွၼ်ႉဢမ်ႇမီး ၸုမ်းလႂ်မႃးၽဵဝ်ႈပၼ်မၢၵ်ႇမႅင်းဢၼ်ၵိုတ်းၶင်ႉဝႆႉၽွင်းပၢင်တိုၵ်းၼၼ်ႉလႄႈ ႁဵတ်းႁႂ်ႈၵူၼ်းပၢႆႈၽေးသိုၵ်း ပွၵ်ႈၶိုၼ်းႁိူၼ်းယေး ယဵပ်ႇၺႃးမၢၵ်ႇ မႆႈၸႂ် လွင်ႈႁူမ်ႇလူမ်ႈဝႆႉ ၼႆယဝ်ႉ ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ –“ဝၢႆးသိုၵ်းမၢၼ်ႈၵုမ်းၶိုၼ်းၼႆႉ ဢၼ်ၶဝ် ၵႂၢတ်ႇလၢင်ႉပၼ် မၢၵ်ႇမႅင်းတေႉတေႉၼႆ ပႆႇမီး ၊ ၶဝ်ဝႃႈ တႄႉတေၵႂၢတ်ႇလၢင်ႉ ပၼ်ယူႇ ၸိူဝ်းၼႃႈတီႈႁိမ်းႁွမ်း သီႇပေႃႉၼႆႉၼႆ ၵူၼ်းမိူင်းတိုၵ်ႉလႆႈမႆႈၸႂ်လွင်ႈ ၽေးမၢၵ်ႇမႅင်း ယူႇ”- ဝႃႈၼႆ။
ဝၢႆးလင်ပၢင်တိုၵ်းၽႅၼ်ယၼ်ႇသိုၵ်း 1027 ပွၵ်ႈၵမ်းသွင်မႃး သိုၵ်းတဢၢင်း လႄႈ ၸုမ်းဢူၺ်းလီၶဝ် ယိုတ်းဢဝ်လႆႈၸႄႈဝဵင်းသီႇပေႃႉ ၵမ်းၼိုင်ႈ ။ ၼႂ်းဝၼ်းတီႈ 16/10/2025 သိုၵ်းမၢၼ်ႈႁႅၼ်းသိုၵ်းလေႃႇတိုၵ်း သိုၵ်းတဢၢင်းႁၢဝ်ႈႁႅင်း ၾၢႆႇသိုၵ်းမၢၼ်ႈ ၵုမ်းလႆႈ ၼႂ်းဝဵင်းသီပေႃႉၶိုၼ်းသေ ၾၢႆႇဢွၵ်ႇဝဵင်းသီႇပေႃႉတႄႉ ပဵၼ်သိုၵ်းၵဝ်ႈၵၢင်ႉၵုမ်းၵမ်ဝႆႉ ။
မၢၵ်ႇမႅင်းၾင်လိၼ် လႄႈမၢၵ်ႇမိုဝ်ႈၸိုၼ်းယၢမ်းဢၼ်ၵိုတ်းၸွမ်းပၢင်တိုၵ်းၼႆႉ ပဵၼ်ၽေး ဢၼ်လွၵ်ႇငိုတ်ႈ သၢႆၸႂ်ၵူၼ်းဝၢၼ်ႈၵူၼ်းမိူင်းတႄႉတႄႉ။ ဢၼ်ႁၢႆႉႁႅင်းတႄႉ ၸၢင်ႈႁဵတ်းႁႂ်ႈ ထိုင်တၢႆ။ ဢမ်ႇတၢႆၵေႃႈ သုမ်းၶိူင်ႈဢင်ႇၵႃႇတူဝ်ၶိင်း ႁဵတ်းႁႂ်ႈပဵၼ်ၵူၼ်းဢမ်ႇၶႅင်ႁႅင်း။ ႁဵတ်းႁႂ်ႈတုမ်ႉတိူဝ်ႉၵၢၼ်ယူႇသဝ်းၵိၼ်သၢင်ႈၵူၼ်း။ တေဢမ်ႇၸၢင်ႈႁဵတ်းၵၢၼ် ဢမ်ႇၸၢင်ႈမီးတိုဝ်ႉတၢင်းၶဝ်ႈႁဵတ်းသၢင်ႈလႆႈၼင်ႇၸႂ် ၼႂ်းတူင်ႇဝူင်းၵူၼ်း၊ တေဢမ်ႇၸၢင်ႈတင်ႈၼႃႈႁေႃတေႃႁိူၼ်း ဢမ်ႇၸၢင်ႈမီးလုၵ်ႈမီးလၢင်း ဢမ်ႇၸၢင်ႈႁႃလဵင်ႉ ၼႃႈႁိူၼ်း တႃယေးလႆႈ။
ၵွပ်ႈၼႆ ႁဝ်းၶႃႈထုၵ်ႇလီႁူမ်ႈၵၼ်တိုၵ်းသူၼ်းၵူၼ်းႁိမ်းႁွမ်းလႄႈၵူၼ်းဢၼ်ႁဝ်းႁူႉၸၵ်း ၊ ႁႂ်ႈဢွၼ်ၵၼ်ၾၢင်ႉၽေးမၢၵ်ႇမႅင်းလႄႈမၢၵ်ႇမိုဝ်ႈၸိုၼ်းယၢမ်း ဢၼ်ၵိုတ်းၽွင်းပၢင်တိုၵ်း ၼၼ်ႉသေ ၸွႆႈႁႂ်ႈလွတ်ႈၽေးတူဝ်လႄႈၽေးသၢႆၸႂ်သေၵမ်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ