ဝၢႆးသေ ၸွမ်ၸိုင်ႈဢမေႊရိၵၼ်ႊၵေႃႉမႂ်ႇ ၻူဝ်ႊၼေႃႊ ထရမ်ႉ ၶိုၼ်ႈမႃးဢမ်ႇႁိုင် ၼႂ်းလိူၼ်မၢတ်ႊၶျ် ၼႆႉ မၼ်းသင်ႇသိုဝ်ႇၶၢဝ်ႇယႂ်ႇ ၸၼ်ႉလုမ်ႈၾႃႉ ၸိူဝ်းယူႇတႂ်ႈ USAGM ၵမ်ႉၸွႆႈၼၼ်ႉ – လူတ်းယွမ်း ၵိုတ်းလိုဝ်ႈၵၢၼ်၊ ႁႂ်ႈလူတ်းယွမ်းပႃးၵူၼ်းႁဵတ်းၵၢၼ်။ လူတ်းလႆႈၵႃႈႁိုဝ်ၵေႃႈ ႁႂ်ႈလူတ်းၼႆလႄႈ လိုၼ်းသုတ်း ထိုင်တီႈလႆႈၵိုတ်းၵၢၼ်ပႅတ်ႈတင်းပိုၵ်း။

ၼႂ်းၼၼ်ႉ သိုဝ်ႇၶၢဝ်ႇ VOA –  RFA ဢၼ်ဢွၵ်ႇလၢႆးၵၢၼ် ဢိင်းၵလဵတ်ႈလႄႈ ၽႃသႃမၢၼ်ႈ၊ ၽႃသႃတႆး ဢိၵ်ႇလၢႆလၢႆၸၢဝ်းၶိူဝ်း ၼႂ်းၵုၼ်ၶဵဝ်ဢေႊသျႃႊၼၼ်ႉၵေႃႈ ၵိုင်ႉၵၢင်ႉလႆႈၵိုတ်းလိုဝ်ႈၵၢၼ်။ ယွၼ်ႉသိုဝ်ႇ လွတ်ႈလႅဝ်းၸိူဝ်းၼႆႉ လႆႈၵိုတ်းၵၢၼ်ပွႆႇသဵင်လႄႈ ႁဵတ်းႁႂ်ႈၵူၼ်းမိူင်းဢမ်ႇလႆႈႁပ်ႉႁူႉၶၢဝ်ႇငၢဝ်း ဢၼ်ပဵၼ်ယူႇၼႆႉၶိုတ်းတၼ်း။ တွၼ်ႈတႃႇၵူၼ်းမိူင်းႁူမ်ႈတုမ်တႄႉ တုမ်ႉတိူဝ်ႉတေႃႇၵူၼ်းၵူႈၸၼ်ႉထၢၼ်ႈ ပႃးၸဵမ်ၼႂ်းတွၼ်ႈၵၢၼ်မိူင်းလႄႈ ၵၢၼ်တူင်ႇၵူၼ်း ၼႆယဝ်ႉ။

သိုဝ်ႇၶၢဝ်ႇ RFA  Radio Free Asia ပိုၼ်ၽၢဝ်ႇၵႂႃႇ မိူဝ်ႈဝၼ်းတီႈ 15/03/2025 ၼၼ်ႉဝႃႈ -“ယွၼ်ႉလူင် ပွင်ၸိုင်ႈဢမေႊရိၵၼ်ႊ တတ်းၶၢတ်ႇငိုၼ်းၵမ်ႉထႅမ်လႄႈ ၵၢၼ်ၶၢဝ်ႇတေၵိုတ်းဝႆႉ”- ဝႃႈၼႆ။

ဝၼ်းတီႈ 16/03/2025 ၼႆႉၵေႃႈ VOA  Voice of America ပိုၼ်ၽၢဝ်ႇဝႃႈ -“သိုဝ်ႇၶၢဝ်ႇ VOA ဢၼ်ယၢမ်ႈပိုၼ်ၽၢဝ်ႇၶၢဝ်ႇငၢဝ်းပၼ်ယူႇၵူႈဝၼ်းၼႆႉ တေၵိုတ်းၵမ်းၼိုင်ႈ။ ဢမ်ႇႁိုင်တေၶိုၼ်း မႃးႁၢႆးငၢၼ်း ၶၢဝ်ႇပၼ်ၶိုၼ်းယူႇ”- ၼႆသေ ၼၼ်ႉၵေႃႈယဵၼ်ၵႂႃႇ။

လွင်ႈၸိူဝ်းၼႆႉ ၽႂ်ၵေႃႈ ဢမ်ႇထၢင်ႇဝႆႉလူင်ႈၼႃႈလႄႈ ဢဝ်ၵူၼ်းႁဵတ်းၵၢၼ် ၼႂ်းႁွင်ႈၵၢၼ်ၶၢဝ်ႇႁၢမ်း ၵၢၼ်သေဢမ်ႇၵႃး ဢၼ်တုမ်ႉတိူဝ်ႉသုတ်းၵေႃႈ ပဵၼ်ၵူၼ်းၼႂ်းမိူင်းၼွၵ်ႈမိူင်း ၸိူဝ်းပၼ်ႁႅင်းႁပ်ႉထွမ်ႇ။

သိုဝ်ႇၶၢဝ်ႇယႂ်ႇၸိူဝ်းၼႆႉ ၵိုင်ႉၵၢင်ႉၺႃးသင်ႇၵိုတ်းဝႆႉဝႃႈၼႆသေတႃႉ ၽူႈပၼ်ႁႅင်းၵမ်ႈၼမ်တႄႉ ဢွၼ် ၵၼ်မုင်ႈမွင်းဝႃႈ တေၵိုတ်းၸူဝ်ႈၵႅပ်ႉၵူၺ်းၼႆသေ မုင်ႈမွင်းယူႇၽႂ်မၼ်း။ ၽိူဝ်ႇထိုင်မႃး ဝၼ်းတီႈ 09/05/2025 ၼႆႉသမ်ႉ ၶိုၼ်းပိုၼ်ၽၢဝ်ႇထႅင်ႈဝႃႈ ၵိုတ်းၵၢၼ်ၵႂႃႇတႄႉယဝ်ႉ ဝႃႈၼႆ။

တေလႆႈဝႃႈ ၵူၼ်းမိူင်းႁူမ်ႈတုမ် ၵၢမ်ႇႁၢႆႉသုတ်းႁိုဝ်ဢမ်ႇႁူႉ ပၢႆသေလိူဝ် ၺႃးသိုၵ်းယိုတ်းဢႃႇၼႃႇ ၸိုင်ႈ မိူင်းသေ ပူၼ်ႉပႅၼ်သုၼ်ႇလႆႈၵူၼ်း၊ သမ်ႉမႃးထူပ်းၽေးသၽႃႇဝ ၽႅၼ်ႇလိၼ်ဝႆထႅင်ႈ – ၸိူဝ်းၼႆႉ ၵူၼ်း မိူင်း ဢမ်ႇလႆႈႁပ်ႉႁူႉၶၢဝ်ႇၶိုတ်းတၼ်း မိူၼ်ၵူႈပွၵ်ႈ။

VOA, RFA လႄႈ ဢိၵ်ႇပႃးသိုဝ်ႇၶၢဝ်ႇလၢႆဢၼ် ၸိူဝ်းယူႇတႂ်ႈ U.S. Agency for Global Media: USAGM  ၼႆႉ ပဵၼ်သိုဝ်ႇဢၼ်ပၼ်ႁႅင်း ၽႃသႃၵႂၢမ်းလၢတ်ႈလၢႆၸၢဝ်းၶိူဝ်း ၼႂ်းပိုၼ်ႉတီႈၽႂ်မၼ်း ။ မိူၼ်ၼင်ႇ ၼႂ်းမိူင်းႁူမ်ႈတုမ်မၢၼ်ႈၼႆႉၵေႃႈ ႁဵတ်းႁႂ်ႈၸၢဝ်းၶိူဝ်းမီးသုၼ်ႇၶဝ်ႈႁူမ်ႈႁၢႆးငၢၼ်းၶၢဝ်ႇပိုၼ်ႉတီႈ။ ၼႂ်းၼၼ်ႉ ပႃးသဵင်တႆး RFA ဢၼ်ႁၢႆးငၢၼ်း ၶၢဝ်ႇတွၼ်ႈတႃႇသုၼ်ႇလႆႈၵူၼ်းၸိုင်ႈတႆးမႃး ၶၢဝ်းတၢင်းၸမ် 19 ပီ။

တင်ႈတႄႇၸွမ်ၸိုင်ႈ ၻူဝ်ႊၼေႃႊ ထရမ်ႉ ၶိုၼ်ႈမႃး ၸွမ်းၼင်ႇၶေႃႈၸီႉသင်ႇတတ်းငိုၼ်းၵမ်ႉၸွႆႈသေ ႁွင်ႈၵၢၼ်ၶၢဝ်ႇ ဢၼ်ယူႇတႂ်ႈ RFA ၼႂ်းမိူင်းထိပႅတ်ႉ၊ မိူင်းႁူမ်ႈတုမ်မၢၼ်ႈ၊ မိူင်းဝီႊၵႃႊလႄႈ မိူင်းလၢဝ်း ၸိူဝ်းၼႆႉ လႆႈၵိုတ်းၵႂႃႇတေႃႇထိုင် ဝၼ်းမိူဝ်ႈၼႆႉ။

မိူၼ်ၼင်ႇ သိုဝ်ႇၶၢဝ်ႇပိုၼ်ႉတီႈတႃႈၶီႈလဵၵ်း Tachileik News Agency ၵေႃႈ ဝၼ်းတီႈ 03/05/2025 ၼႆႉ ပိုၼ်ၽၢဝ်ႇ ၵိုတ်းဝႆႉၸူဝ်ႈၶၢဝ်းသေ ယဵၼ်ဝႆႉယူႇႁၢၼ်ႉတေႃႇမိူဝ်ႈလဵဝ်။

ၼင်ႇႁိုဝ် သိုဝ်ႇၶၢဝ်ႇလွတ်ႈလႅဝ်း ၸိူဝ်းဢၼ်လႆႈၸႂ်ယႂ်ႇၸဝ်ႈတႃႇၼ တၢင်းမိူင်းဢမေႊရိၵၼ်ႊၼၼ်ႉ ပေႃးတေပၼ်ႇၵၢၼ်လႆႈၶိုၼ်းၼၼ်ႉ ၽူႈၵဵဝ်ႇၶွင်ႈၶဝ် ဢွၼ်ၵၼ်တုၵ်းယွၼ်းၶိုၼ်း။

တႃႇတေလႆႈငိုၼ်းၵွင်ၵၢင်တီႈ ဢေႊၵျႅၼ်ႊသီႊ မီႊတီႊယႃႊၵူႈၸၢတ်ႈၸိုင်ႈ ဢမေႊရိၵၼ်ႊ USAGM ၼႆႉသမ်ႉ ယၢပ်ႇၽိုတ်ႇလိူဝ်ႁႅင်းယဝ်ႉလႄႈ တႄႇဢဝ်ဝၼ်းတီႈ 09/05/2025 ၼႆႉၵႂႃႇ ၸင်ႇလႆႈၵိုတ်းလၢႆး ၵၢၼ်ၶၢဝ်ႇတင်းမူတ်း ပႃးၸဵမ်ၸုမ်းထတ်းၶၢဝ်ႇပွမ် Asia Fact Check Lab ၼႆ ပေႊၾၼ်ႊ ၽူႈယႂ်ႇၵူၼ်းလူင် ၼႂ်းႁွင်ႈၵၢၼ် RFA လၢတ်ႈၼင်ႇၼႆ။

ယွၼ်ႉပိူဝ်ႈၵိုတ်းလိုဝ်ႈ RFA ဝႆႉသေ ၵူၼ်းႁဵတ်းၵၢၼ် တီႈလုမ်းငဝ်ႈငုၼ်းႁိမ်းၸမ် 300 လႄႈ ၽူႈသိုဝ်ႇ ၶၢဝ်ႇၸိူဝ်းယူႇၼွၵ်ႈမိူင်း 20 ပၢႆ ဢမ်ႇမီးၵၢၼ်မီးငၢၼ်း ဢမ်ႇမီးငိုၼ်းၶဝ်ႈ။

ဢိင်ၼိူဝ်လွင်ႈၼႆႉ ၽူႈတွႆႇႁွၵ်ႈ ၵပ်းသိုပ်ႇၸူး ၵူၼ်းႁဵတ်းၵၢၼ် ၼႂ်းႁွင်ႈၵၢၼ် RFA ယူႇသေ တွပ်ႇပၼ်ဝႃႈ – လွင်ႈၵိုတ်းၶၢဝ်ႇၼႆႉ ၽူႈမီးပုၼ်ႈၽွၼ်း လႆႈပိုၼ်ၽၢဝ်ႇဝႆႉယဝ်ႉလႄႈ ပႆႇမီးတႃႇတေလၢတ်ႈသင် ထႅင်ႈ – ဝႃႈၼႆ။

ဢၼ်သိုဝ်ႇၶၢဝ်ႇၸိူဝ်းၼႆႉ လႆႈၵိုတ်းၵႂႃႇၵေႃႈ ၵမ်ႈၼမ်ႁၼ်ဝႃႈ ၽူႈဢွၼ်ႁူဝ် ႁွင်ႈၵၢၼ်ၾၢႆႇလူင်ပွင်ၸိုင်ႈ မိူင်းဢမေႊရိၵၼ်ႊ ၽူႈမၢၵ်ႈမီးလူင် ဢီႊလွၼ်ႊမၢၵ်ႉ (Elon Musk) တုၵ်းယွၼ်း ႁႂ်ႈပိၵ်ႉဢိုတ်းပႅတ်ႈ ၼႆယဝ်ႉ။

သိုဝ်ႇၶၢဝ်ႇ ဢၼ်မၼ်ႈၵိုမ်းၼႅၼ်ႈၼႃ ဢၼ်မၢၼ်ႇမႅၼ်ႈၸိုဝ်ႈၸႂ်ႈ တႃႇၵူၼ်းမိူင်းၼႂ်းမိူင်းႁူမ်ႈတုမ် ဢမ်ႇ ပေႃးမီးၼမ်။ ၶၢဝ်းၽွင်းမိူင်းႁူမ်ႈတုမ်တိုၵ်ႉတူၵ်းတၢင်းယၢပ်ႇၽိုတ်ႇ တိုၵ်ႉတူၵ်းၼႂ်းၵႄႈၽေးသိုၵ်းသိူဝ် ၽေးသၽႃႇဝ ယူႇၼႆႉ သမ်ႉမႃးသင်ႇၵိုတ်းၸိူင်ႉၼႆ မိူၼ်တင်ႈၸႂ်ပၼ်တိုဝ်ႉတၢင်း ၶုၼ်မိူၵ်ႈမႂ်ႈ ဢဝ်ၸႂ် ၵေႃႇၵၢၼ်ႁၢႆႉၵူၺ်းယဝ်ႉ ၵူၼ်းသူင်ထွမ်ႇၶၢဝ်ႇတၢင်းရေႊတီႊဢူဝ်ႊ ၶဝ်လၢတ်ႈၼင်ႇၼႆ။

ၸၢႆးသီး ၽူႈၼမ်းၼႂ်းပႃႇတီႇႁူဝ်သိူဝ် ၸႄႈမိူင်းၶၢင်ၵေႃႈ လၢတ်ႈၼႄဝႆႉၼင်ႇၼႆ – “ၸဵမ်မိူဝ်ႈပၢၼ်ၼေႇ ဝိၼ်းပုၼ်ႉယဝ်ႉ လႆႈပိုင်ႈ BBC ၊ VOA ၊ RFA ၶဝ်ၸိူဝ်းၼႆႉမႃးၵူၺ်း။ မိူၼ်ၸိူင်ႉၼင်ႇ ဝၢၼ်ႈၼွၵ်ႈၼႃး ပၢင်ႇ ၵူၼ်းဢၼ်ယူႇၼႂ်းႁူၺ်ႈၼိူဝ်လွႆၸိူဝ်းၼႆႉ လိၵ်ႈၽိုၼ်ၶၢဝ်ႇၵေႃႈ ဢမ်ႇႁွတ်ႈလႆႈလႅင်း TV ၵေႃႈ ဢမ်ႇမီးၼၼ်ႉ လႆႈၸႂ်ယႂ်ႇမႃးႁိုင်။ ၽွင်းၼႆႉၵေႃႈ VOA ၊ RFA ၵေႃႈ သမ်ႉဝႃႈၵိုတ်းၵႂႃႇယဝ်ႉၼႆလႄႈ တိူဝ်ႉၶိူၵ်ႈၵူၼ်းမိူင်းတႄႉတႄႉ”- ဝႃႈၼႆ။

တီႈတႄႉမၼ်း မိူင်းဢမေႊရိၵၼ်ႊၵေႃႈ ပဵၼ်ၸိုင်ႈမိူင်း ဢၼ်ယုမ်ႇယမ်ပၼ်ႁႅင်း ပိူင်တီႊမူဝ်ႊ ၶရေႊသီႊမိူင်းၼိုင်ႈ။ ၵူၺ်းၵႃႈ ယၢမ်းလဵဝ်သမ်ႉ ၸိုင်ႈမိူင်းၼႆႉၵူၺ်း ၶိုၼ်းႁဵတ်းႁႂ်ႈသိုဝ်ႇၶၢဝ်ႇဢမ်ႇ လွတ်ႇလႅဝ်းလႄႈ မိူၼ်တင်းပိုတ်ႇတၢင်းပၼ် ၶုၼ်မိူၵ်ႈမႂ်ႈၶဝ် ပေႉၵိၼ်လူလၢႆၵူၼ်းမိူင်းၵူၺ်း။

သိုဝ်ႇၶၢဝ်ႇ ဢၼ်ဝႃႈၼႆႉ ပဵၼ်မၢၵ်ႇတႃဢၼ်ပႂ်ႉတူၺ်း လွင်ႈၽိတ်းလွင်ႈထုၵ်ႇ၊ တြႃးႁိုဝ်ဢမ်ႇတြႃးတႃႇ ၸိုင်ႈမိူင်း တႃႇပဵၼ်ၸိုင်ႈမိူင်းတီႊမူဝ်ႊၶရေႊသီႊ။ RFA ၊ VOA ၵေႃႈ ပဵၼ်သဵင်ႁူဝ်ၸႂ်ၵူၼ်းမိူင်း၊ ပဵၼ် တီႈၵူၼ်းမိူင်းပိုတ်ႇဢူၵ်းပိုတ်ႇၸႂ် ပဵၼ်ပိုၼ်ႉတီႈ ပိူင်းၼႄလုမ်ႈၾႃႉဝႃႈ ဝၢၼ်ႈမိူင်းႁဝ်းထုၵ်ႇပူၼ်ႉပႅၼ် သုၼ်ႇလႆႈ၊ ၵူၼ်းမိူင်းႁဝ်းထုၵ်ႇၶီႇၼဵၵ်းတဵၵ်းတဵင် ဢမ်ႇလႆႈလွင်ႈၽဵင်ႇပဵင်း ၸဵမ်ၸိူဝ်းၼႆႉ။ မိူဝ်ႈလဵဝ် သမ်ႉ လႆႈၵိုတ်းၵႂႃႇၸိူင်ႉၼႆလႄႈ ပဵၼ်လွင်ႈလူႉယႂ်ႇသုမ်းလူင်တႃႇၵူၼ်းမိူင်း ပဵၼ်ဢၼ်ပိၵ်ႉႁူပိၵ်ႉတႃ တွၼ်ႈတႃႇၵူၼ်းမိူင်းတႄႉတႄႉ။   

ၸၢႆးလွႆၶမ်းပၢင်ႇ ၵူၼ်းၼုမ်ႇတူင်ႉၼိုင် ၼႂ်းၵၢၼ်တူင်ႇဝူင်းၵူၼ်း လၢတ်ႈၼႄဝႆႉၼင်ႇၼႆ – “ပေႃးဝႃႈ သႅၼ်းသိုဝ်ႇၶၢဝ်ႇၸိူဝ်းၼႆႉ လႆႈၵိုတ်းၵႂႃႇၼႆ မၼ်းပိူင်းၼႄငဝ်းလၢႆးၸိုင်ႈမိူင်းၼၼ်ႉဝႃႈ လွင်ႈပၼ်ႁႅင်း ဝႆႉၵႃႈၶၼ်ၼိူဝ်တီႊမူဝ်ႊၶရေႊသီႊ မၼ်းယူပ်ႈယွမ်းၼႆ တေလႆႈႁၼ်ၸိူင်ႉၼႆ။ တႃႇၵၢၼ်တူင်ႇၵူၼ်းလႄႈသင် တႃႇသုၼ်ႇလႆႈသုၼ်ႇပဵၼ်ၵူၼ်းလႄႈသင် တေဢမ်ႇၶႅမ်ႉလႅပ်ႈယဝ်ႉ ယွၼ်ႉသိုဝ်ႇၸိူဝ်းၼႆႉ လႆႈၵိုတ်းၵႂႃႇၼႆႉ”- ဝႃႈၼႆ။

သိုဝ်ႇၶၢဝ်ႇဢၼ်ဝႃႈၼႆႉ ပိၵ်ႉသမ်ႉဝႃႈ ၵၢၼ်လူင်းတိုၼ်းၼမ် လၢႆးၸႂ်ႉၸၢႆႇငိုၼ်းတွင်းမၼ်းၼမ်သေ ဢမ်ႇ လႆႈၶူဝ်းၶွင်ငိုၼ်းၶမ်းမိူၼ်ပၢႆးမၢၵ်ႈမီးတၢင်ႇသႅၼ်းသေတႃႉ မၼ်းသမ်ႉမီးၽွၼ်းလီ ဢၼ်ႁဵတ်း ႁႂ်ႈၵူၼ်းမိူင်းပိုတ်ႇႁူပိုတ်ႇတႃလႆႈလႄႈ ၵႅတ်ႇၵင်ႈသုၼ်ႇလႆႈသုၼ်ႇပဵၼ်ၵူၼ်းမိူင်း။

မိူဝ်ႈပၢၼ် သူဝ်ႊသျႄႊမီႊတီႊယိူဝ်ႊပႆႇႁိူင်းတႄႉ လႆႈၸႂ်ယႂ်ႇႁပ်ႉထွမ်ႇ ၶၢဝ်ႇငၢဝ်းၸိူဝ်းဢၼ် ပွႆႇသဵင်မႃး ၼႂ်းဢွမ်လူမ်းရေႊတီႊယူဝ်ႊၵူၺ်း။ မိူဝ်ႈထိုင်ပၢၼ်ဢိၼ်ႊထိူဝ်ႊၼႅတ်ႉ တူဝ်ႈထိုင်ၵူႈဝၢၼ်ႈၵူႈမိူင်းယူႇ ၼႆႉသမ်ႉ ၺႃးၽူႈပွင်မိူင်းၵမ်ႈၽွင်ႈ ဢမ်ႇပၼ်ႁႅင်းသိုဝ်ႇၶၢဝ်ႇလႄႈ မိူၼ်တၢင်း ပိၵ်ႉႁူပိၵ်ႉတႃၵူၼ်းမိူင်း၊ ႁဵတ်းႁႂ်ႈၵူၼ်းမိူင်း သုမ်းသုၼ်ႇလႆႈသုၼ်ႇပဵၼ်ထႅင်ႈၵူၺ်း။

ၵၢပ်ႈပၢၼ်မိူဝ်ႈလဵဝ် တိူၵ်ႈတီႈဝႃႈ သိုဝ်ႇၶၢဝ်ႇဢၼ်ယုမ်ႇယမ်လႆႈၵမ်ႈၽွင်ႈ ၵိုတ်းၵၢၼ်ၵႂႃႇယဝ်ႉသေတႃႉ ၵူၼ်းမိူင်းတိုၵ်ႉမီးတိုဝ်ႉတၢင်း လိူၵ်ႈထွမ်ႇငိၼ်းသိုဝ်ႇၶၢဝ်ႇ ဢၼ်ယုမ်ႇယမ်လႆႈထႅင်ႈယူႇ။

ၼႂ်းမိူင်းႁူမ်ႈတုမ် ႁိုဝ်ဢမ်ႇၼၼ် မိူင်းတႆးၼႆႉ မိူၼ်ၼင်ႇ သိုဝ်ႇၶၢဝ်ႇ Irrawaddy ၊ Mizzima  ၊ ၽူႈတွႆႇႁွၵ်ႈ ၸိူဝ်းၼႆႉ တိုၵ်ႉလိူၵ်ႈထွမ်ႇလႆႈယူႇ ၵူၼ်းမိူင်းယင်းလူဝ်ႇႁႃလၢႆးတၢင်းၵမ်ႉထႅမ်ၼမ်ၼမ်ၼႆ ၵူၼ်း တူၼ်ႈတီးၵေႃႉၼိုင်ႈလၢတ်ႈ။

သင်ဝႃႈ သိုဝ်ႇၶၢဝ်ႇယႂ်ႇ ဢၼ်ယုမ်ႇယမ်လႆႈ ယွမ်းလူင်းၵႂႃႇၼမ်သေ သမ်ႉၵႂႃႇထွမ်ႇၶၢဝ်းငၢဝ်း ဢၼ်လႆႈ မႃး တီႈၵူၼ်းတေႃႇၵူၼ်းႁိုဝ် ဢမ်ႇၼၼ် ၶၢဝ်ႇသုၼ်ႇတူဝ်တၢင်းသူဝ်ႊသျႄႊမီႊတီႊယႃႊ ဢၼ်လၢတ်ႈ ၸွမ်းလူမ်း၊ ၸုမ်းဢၼ်ၶႂ်ႈသေႃႇသူၼ်းႁႂ်ႈထၢင်ႇၽိတ်းထၢင်ႇထိူမ်ၼိူဝ်ၵၼ်ၸိူဝ်းၼႆႉတႄႉ တေယၢပ်ႇ။ ၸၢင်ႈမီးလွင်ႈတႅၵ်ႇယႅၵ်ႇၵၼ်လိူဝ်ၵဝ်ႇ ၵၢၼ်ၽွမ်ႉႁူမ်ႈၸိူဝ်ႉၸၢတ်ႈဢၼ်ဝႃႈၼၼ်ႉ ဢမ်ႇမုင်ႈႁၼ် သဵၼ်ႈတၢင်း၊ ဢၼ်မုင်ႈမွင်းဝႆႉဝႃႈ ၶႂ်ႈႁႂ်ႈဝၢၼ်ႈမိူင်းၵတ်းယဵၼ် လွတ်ႈၶဵၼ်ဢၼ်ဝႃႈၼၼ်ႉၵေႃႈ တေ ႁၢင်ႇယၢၼ်ၵႆၵႂႃႇတိၵ်းတိၵ်းယဝ်ႉၼႆ ၽူႈထတ်းၶၢဝ်ႇမိူင်းတႆးၵေႃႉၼိုင်ႈလၢတ်ႈၵႂႃႇၼင်ႇၼႆ။