တႄႇႁူဝ်လိူၼ်မေႊၼႆႉမႃး ၾၢႆႇတပ်ႉသိုၵ်းမၢၼ်ႈ မူၼ်ႉမႄးၶိုၼ်းသဵၼ်ႈတၢင်းလႅၼ်ႈၶိူင်ႈမိၼ် တီႈဝၢင်းၶိူင်ႈမိၼ်ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။

ၵူၼ်းမိူင်း ဝဵင်းလႃႈသဵဝ်ႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈလဵဝ် ၶဝ်မႄးၸၼ် သဵၼ်ႈတၢင်းမၼ်း တႄႉယဝ်ႉယဝ်ႉ။ ယူႇတၢင်းၼွၵ်ႈမၼ်းတူၺ်းၵႂႃႇ ႁၼ်ၽိူၵ်ႇဝႆႉယူႇ။ ဢၼ်ပဵၼ်ႁူင်းႁေႃး ၼႂ်းဝၢင်းၶိူင်ႈမိၼ်ၼၼ်ႉတႄႉ ပႆႇႁၼ်ၶဝ်မႄး”- ဝႃႈၼႆ။

ၵဵဝ်ႇလူၺ်ႈ ဝၢင်းၶိူင်ႈမိၼ် တေပိုတ်ႇလႆႈႁိုဝ် ဢမ်ႇပိုတ်ႇလႆႈၶိုၼ်းၼၼ်ႉတႄႉ ၵူၼ်းမိူင်းၼႂ်းဝဵင်းလႃႈသဵဝ်ႈ ၵေႃႉၼိုင်ႈ ထတ်းသၢင်လၢတ်ႈၼႄတီႈၽူႈတွႆႇႁွၵ်ႈဝႆႉၼင်ႇၼႆ။

“တႃႇၶဝ်တေပိုတ်ႇၶိုၼ်းလႆႈပဵၼ်တၢင်းၵၢၼ်ၼႆႉ တေႁိုင်ယူႇ။ မိူဝ်ႈလဵဝ် ပဵၼ်ၽွင်းၶဝ်တိုၵ်ႉမႄးၶိုၼ်းၵူၺ်း။ မၢင်ၸိူဝ်း သမ်ႉပေႃးတၢင်ႇၶၢႆလၢၵ်ႈမၢတ်ႈမၼ်းၼိူဝ်ဢွၼ်ႊလၢႆႊယဝ်ႉ။ ၸိူဝ်းၼၼ်ႉပဵၼ်ဢၼ် လႅၼ်ၵၼ်ၵူၺ်း။ မိူဝ်ႈဢွၼ်တၢင်း ၵူၼ်းမိူင်းလႃႈသဵဝ်ႈၵူၺ်းဢမ်ႇၵႃး ၵူၼ်းမိူင်းပွတ်းႁွင်ႇ ၵမ်ႈၼမ် ၵႆႉၺႃးလႅၼ် ၸိူင်ႉၼၼ်ယူႇ။ ပေႃးသိုဝ်ႉလၢၵ်ႈမၢတ်ႈ ၸၢႆႇငိုၼ်းယဝ်ႉၵေႃႈ ၵူၼ်းၶၢႆမၼ်းဢိုတ်းၾူၼ်းပႅတ်ႈ။ ၵွပ်ႈၼၼ် ယႃႇလႃႈလီယုမ်ႇၼိူဝ်ဢွၼ်ႊလၢႆႊ။ ပေႃးဝၢင်းၶိူင်ႈမိၼ် တေပိုတ်ႇတႄႉၼႆ ၾၢႆႇၸဝ်ႈၼႃႈတီႈၶဝ် တေပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ယူႇ”။

ဝၢင်းၶိူင်ႈမိၼ် တီႈဝဵင်းလႃႈသဵဝ်ႈၼႆႉ လႆႈလူႉၵွႆၵႂႃႇ မိူဝ်ႈၽႅၼ်ယၼ်ႇသိုၵ်း 1027 ၼၼ်ႉသေ လႆႈဢိုတ်း ယင်ႉၵႂႃႇ ၽွင်းသိုၵ်းၵဝ်ႈၵၢင်ႉ MNDAA ၵုမ်းၵမ်ယူႇၼၼ်ႉ ဢမ်ႇမူၼ်ႉမႄးသင်။ ဝၢႆးလင် လူင်ပွင်ၸိုင်ႈမိူင်းၶႄႇ ၸွႆႈထႅမ်ပၼ်သေ သိုၵ်းမၢၼ်ႈလႆႈၵုမ်းၵမ် ၶိုၼ်းဝဵင်းလႃႈသဵဝ်ႈယဝ်ႉ ၸင်ႇတႄႇမူၼ်ႉမႄးၶိုၼ်း ဝၢင်းၶိူင်ႈမိၼ်ၼႆႉ။

တႅမ်ႈ – ၽူၺ်းၼုမ်ႇ