တႄႇႁူဝ်လိူၼ်မေႊၼႆႉမႃး ၾၢႆႇတင်းသိုၵ်းမၢၼ်ႈယိုတ်းမိူင်းႁူမ်ႈ ၸုမ်းပျီႇတူႉၸိတ်ႉပဢူဝ်း လၢမ်းဢဝ်ၶိူင်ႈ မိၼ်ၶိူင်ႈၵွင်ႈလူင် ပိုတ်းယိုဝ်းၶဝ်ႈၼႂ်းဝၢၼ်ႈၼမ်ႉဢုၼ်ႇလႄႈ ၺွင်ႇလေးပိၼ်ႇ(ညောင်လေးပင်) ၸႄႈဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်း ပၢင်တိုၵ်းသိုပ်ႇပဵၼ်ႁၢဝ်ႈႁႅင်း ဝႃႈၼႆ။

ၽူႈၶၢၼ်ပၢၵ်ႇပျီႇတူႉၸိတ်ႉပဢူဝ်း လၢတ်ႈၽူႈတွႆႇႁွၵ်ႈဝႃႈ -“ယၢမ်းလဵဝ် တီႈတၢင်းၸၢမ်ၵႃး ပဵၼ်ပၢင်တိုၵ်းၵၼ်ဝႆႉ၊ ၾၢႆႇတၢင်းဝၢၼ်ႈၼမ်ႉဢုၼ်ႇလႄႈ ၺွင်ႇလေးပိၼ်ႇ (ညောင်လေးပင်) PDF တင်း PNO ပဵၼ်ပၢင် တိုၵ်းဝႆႉထိုင်မိူဝ်ႈၼႆႉ”- ဝႃႈၼႆ။

ၼႂ်းၶၢဝ်းတၢင်း ဝူင်ႈလဵဝ်ၵူၺ်း သိုၵ်းမၢၼ်ႈ ထႅမ်ႁႅင်းသိုၵ်းၶဝ်ႈဢမ်ႇထၢတ်ႇ၊ ယၢမ်းလဵဝ်သမ်ႉ ပွႆႇမၢၵ်ႇသႂ်ႇ တီႈဝၢၼ်ႈၼမ်ႉဢုၼ်ႇထႅင်ႈ။ ယၢမ်းလဵဝ်ပဵၼ်ပၢင်တိုၵ်းၵၼ်ၶိုၼ်း ၵူၼ်းပိုၼ်ႉတီႈလႆႈငိူင်ႉပၢႆႈၽေးသိုၵ်းဝႆႉ။

ၵူၼ်းၸၢႆး ၼႂ်းပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ -“ပၢင်တိုၵ်းတႄႉ တေႃႈလဵဝ်ပဵၼ်ဝႆႉၵူႈဝၼ်း၊ ယၢမ်းလဵဝ် ၾၢႆႇ တင်း သိုၵ်းမၢၼ်ႈၶဝ်ထႅမ်ဢဵၼ်ႁႅင်းဝႆႉႁၢဝ်ႈႁႅင်း ၊ ပၢင်တိုၵ်းပဵၼ်ဝႆႉလႄႈ ၵူၼ်းၼႂ်းဝၢၼ်ႈဢွၼ်ၵၼ် လႆႈပၢႆႈ ဢမ်ႇပေႃးၶႆႈမီးယဝ်ႉ၊ ႁဝ်းၶႃႈ ၵူၼ်းမိူင်းတႄႉလႆႈၵူဝ်ၵူႈၾၢႆႇဢေႃႈ ၊ PNO ၵေႃႈလႆႈၵူဝ် ၾၢႆႇတင်းသိုၵ်းမၢၼ်ႈ ၵေႃႈလႆႈၵူဝ်”- ဝႃႈၼႆ။

ပၢင်တိုၵ်းၸုမ်းပျီႇတူႉၸိတ်ႉလႄႈ ၸုမ်းလုၵ်ႉၽိုၼ်ႉတီႈတၢင်းဝၢၼ်ႈၼမ်ႉဢုၼ်ႇ၊ ၽြႃးလွႆ၊ ၺွင်ႇလေးပိင်ႇ လႆႈပၢႆႈမီးၸမ် 4 လိူၼ်ပၢႆ၊ ၵူၼ်းဝၢၼ်ႈ လႆႈပၢႆႈၽေးသိုၵ်းယူႇသဝ်းၼႂ်း ႁူၺ်ႈၼႂ်းလွႆ – ၵူၼ်းပိုၼ်ႉတီႈလၢတ်ႈ။   

မိူၼ်ၼင်ႇၼႆႉ ၼႂ်းဝၼ်းတီႈ 09/05/2025 ယၢမ်းၵၢင်ၼႂ် 6 မူင်း ၾၢႆႇတင်းပျီႇတူႉၸိတ်ႉ ဢဝ်တၢင်းဢဵၼ်ႁႅင်း 200 ထူဝ်းသိုၵ်းၶဝ်ႈၼႂ်းဝၢၼ်ႈၸၢင်ႉ ၽဝ်ႁိူၼ်းၵူၼ်းပိုၼ်ႉတီႈ 20 လင်ၼႆႉ ၾၢႆႇတၢင်းၸုမ်းၵႅတ်ႇၶႄႇၵူၼ်း မိူင်းၾၢႆၶုၼ် (၁၀၀၆) ပိုၼ်ၽၢဝ်ႇဝႆႉၼင်ႇၼႆ။

ၼႂ်းၶေႃႈပိုၼ်ၽၢဝ်ႇၼၼ်ႉပႃးဝႆႉဝႃႈ ၽွင်းပဵၼ်ပၢင်တိုၵ်းယူႇၼၼ်ႉ ယူႇတီႈၸုမ်းလုၵ်ႉၽိုၼ်ႉ ယိုဝ်းတူၵ်းလႆႈ တရူၼ်ႊသိုၵ်းမၢၼ်ႈ 2 လမ်း။ ၾၢႆႇတၢင်းၸုမ်းလုၵ်ႉၽိုၼ်ႉ တုမ်ႉတိူဝ်ႉမၢတ်ႇၸဵပ်း 2 ၵေႃႉ၊ ထိုင်ယၢမ်းလဵဝ် ပၢင်တိုၵ်းသိုပ်ႇၶဵင်ႇၶႅင်ၵၼ်ဝႆႉ ဝႃႈၼႆ။

ဝၼ်းတီႈ 05/05/2025 ယၢမ်းၵၢင်ဝၼ်း 11 မူင်းၶိုင်ႈ ၾၢႆႇတင်းသိုၵ်းမၢၼ်ႈ ဢဝ်မၢၵ်ႇသႅၼ်းၼမ်ႉၼၵ်း 500 ပွၼ်ႊ ပွႆႇသႂ်ႇၼႂ်းဝၢၼ်ႈၼမ်ႉဢုၼ်ႇ 4 လုၵ်ႈ လွင်ႈတုမ်ႉတိူဝ်ႉၵူၼ်းမၢတ်ႇ ၸဵပ်းလူႉတၢႆတႄႉ ဢမ်ႇမီးဝႃႈၼႆ သေတႃႉ ယွၼ်ႉၸၢၵ်ႇမၢၵ်ႇလႄႈ ႁိူၼ်းယေးၵူၼ်းမိူင်းတႄႉလူႉၵွႆ ဝႃႈၼႆ။

ဢိင်ၼိူဝ် လွင်ႈသိုၵ်းမၢၼ်ႈတင်း PNO ယိုဝ်းမၢၵ်ႇလူင် သႂ်ႇဝၢၼ်ႈလႄႈ ၵူၼ်းဝၢၼ်ႈၵူဝ်ပဵၼ်ပၢင်တိုၵ်း၊ ဢွၼ်ၵၼ်ပၢႆႈၵႂႃႇသွၼ်ႈယူႇဝႆႉတၢင်ႇတီႈတၢင်ႇဝဵင်း ၸွမ်းပီႈၽႂ်ၼွင်ႉမၼ်း။ ယၢမ်းလဵဝ် တီႈဝၢၼ်ႈၼမ်ႉဢုၼ်ႇၼၼ်ႉ ၵူၼ်းဝၢၼ်ႈၵိုတ်းမွၵ်ႈ 3 ပုၼ်ႈ 1 ပုၼ်ႈၵူၺ်းယဝ်ႉ – ၵူၼ်းပိုၼ်ႉတီႈလၢတ်ႈၼင်ႇၼႆ။