ၼႂ်းၸႄႈဝဵင်းပၢင်လွင်း ၸိုင်ႈတႆးပွတ်းၸၢၼ်းၼႆႉ ၼဵင်ႈဢွၵ်ႇပူင်းႁၢင်ႈလီသေတႃႉ ပီၼႆႉၼဵင်ႈမႂ်ႇ ဢမ်ႇ ပေႃးဢွၵ်ႇၼမ် လိူဝ်ၼၼ်ႉ ၶၼ်ၼဵင်ႈႁႅင်ႈၵေႃႈ လူတ်းယွမ်းလူင်းၵူႈဝၼ်းလႄႈ ၸဝ်ႈသူၼ်ၶဝ် ဢမ်ႇ လႆႈၼမ်ႉမႅတ်ႈၼမ်ႉတွၼ်းသင်။

ယၢမ်းလဵဝ် ၶၼ်ၼဵင်ႈႁႅင်ႈၼႆႉ လုၵ်ႉတီႈ ၼိုင်ႈၸွႆႉ 2 မိုၼ်ႇပၢႆ ယွမ်းလူင်းထိုင် မိုၼ်ႇပၢႆၵူၺ်းယဝ်ႉ ဝႃႈၼႆ။

ၸဝ်ႈသူၼ်ၼဵင်ႈ ၼႂ်းၸႄႈဝဵင်းပၢင်လွင်း လၢတ်ႈတီႈၽူႈတွႆႇႁွၵ်ႈဝႃႈ -“ၵူႈပွၵ်ႈၶၼ်ၼဵင်ႈၼႆႉ လႆႈၶၢႆ 2,1000 မိူဝ်ႈလဵဝ် 15,000 -16,000 ပျႃးၵူၺ်း။ ပီၼႆႉ ၼဵင်ႈဢမ်ႇပေႃးဢွၵ်ႇပူင်းလီလႄႈ တေၸၢင်ႈသုမ်း ၶႃႈဢေႃႈ။ ၵူႈပွၵ်ႈၼႆႉ လႆႈၸၢင်ႈၵူၼ်းပိတ်းၼဵင်ႈသေတႃႉ မိူဝ်ႈလဵဝ်တႄႉ လႆႈပိတ်းဢဝ်ႁင်းၵူၺ်းၶႃႈယဝ်ႉ။ မၼ်းဢမ်ႇၸၢင်ႈၵူၼ်းလႆႈယဝ်ႉ။ ၾူၼ်လူမ်းၵေႃႈ ဢမ်ႇမိူၼ်ၸႂ်။ သင်ဢမ်ႇပေႃးမီးၼမ်ႉတွၼ်း မၼ်းၵႃႈႁိုဝ်ၵေႃႈ ၼဵင်ႈၼႆႉဢမ်ႇဢွၵ်ႇပူင်းလီယဝ်ႉ”- ဝႃႈၼႆ။

ပီၼႆႉ ၼဵင်ႈဢမ်ႇပေႃးဢွၵ်ႇၼမ်ၼႆသေတႃႉ ၼဵင်ႈတႄႉလႆႈဝႃႈၶႅမ်ႉယူႇ။ ပေႃးဝႃႈသူၼ်ၼိုင်ႈဢၼ်ၼႆႉ လႆႈၼမ်ႉၼၵ်း 200 ၸွႆႉၼႆ ပီၼႆႉ လႆႈမွၵ်ႈ 70 ၸွႆႉၵူၺ်းယဝ်ႉ။ ၼဵင်ႈၼႆႉ ပေႃးပဵၼ်ၼဵင်ႈဝၢႆးလိူၼ်ႁႃႈၼႆ မၼ်းဢမ်ႇၶႅမ်ႉပဵင်းတၢၼ်ႇ ၼဵင်ႈသူၺ်ႇၽီႇ ၼဵင်ႈမႂ်ႇ ၼႆယဝ်ႉ။

ၼဵင်ႈၼႆႉ ပေႃးပဵၼ်ၼဵင်ႈဢမ်ႇယမ်းၾူၼ် မိူဝ်ႈၼႃႈလိူၼ်ႁႃႈၼႆႉ ၶႅမ်ႉယူႇ မိူဝ်ႈလဵဝ်တႄႉ ၼဵင်ႈဢမ်ႇပေႃးၶႅမ်ႉၵႃႈႁိုဝ်ယဝ်ႉ ၼိုင်ႈၸွႆႉလႆႈ 1,3000 မွၵ်ႈၼၼ်ႉၵူၺ်း – ၸဝ်ႈသူၼ်ၼဵင်ႈလၢတ်ႈ။

ၼင်ႇႁိုဝ် ၼဵင်ႈတေဢွၵ်ႇယွတ်ႈၼုမ်ႇမႃးၼႆႉ ၸဝ်ႈသူၼ်ၶဝ် လူဝ်ႇတိုၼ်းလၢင်းတႃႇလုမ်းလႃး လၢႆၶၵ်ႉတွၼ်ႈ ပီၼႆႉ ၼဵင်ႈမႂ်ႇဢမ်ႇဢွၵ်ႇၼမ်လႄႈ ၸဝ်ႈသူၼ်ၶဝ် ထူပ်းတၢင်းယၢပ်ႇၽိုတ်ႇဝႆႉ။

“ပေႃးတေမႃးလၢတ်ႈၼႆ ဝဵင်းပၢင်လွင်းၼႆႉ ပဵၼ်ဝဵင်းၽုၵ်ႇၼဵင်ႈ ၵမ်းသိုဝ်ႈၶႃႈဢေႃႈ။ ပီၼႆႉ ၼဵင်ႈဢမ်ႇ ဢွၵ်ႇၼမ်လႄႈ ၵၢၼ်ပၢႆးမၢၵ်ႈမီးၼႆႉ မၼ်းတုမ်ႉတိူဝ်ႉတႄႉဢိူဝ်ႈ။ မိူဝ်ႈလဵဝ်ၼႆႉ ငိုၼ်းၶဝ်ႈဢၼ်လႆႈသေ ငိုၼ်းဢွၵ်ႇလႄႈ ၶၼ်ဢၼ်လူင်းထုၼ်းဝႆႉၸိူဝ်းၼႆႉသမ်ႉ ၵႃႈယႂ်ႇမူတ်းၼႃႇ။ ယဝ်ႉၵေႃႈ ပေႃးထိုင်ၶၢဝ်း လိူၼ်ႁူၵ်း – လိူၼ်ၸဵတ်းၼႆႉ သမ်ႉပေႃးလူဝ်ႇၸွၼ်ႉယိူဝ်ႈသေ လုမ်းလႃးထႅင်ႈယဝ်ႉ။ မိူဝ်ႈလဵဝ် သူၼ်တိုၵ်ႉမီးၼမ်ယူႇသေတႃႉ ၵူၼ်းၵဵပ်းၵူၼ်းႁဵတ်းၵၢၼ်ၵေႃႈ ဢမ်ႇပေႃးမီး”။

ၼွၵ်ႈလိူဝ် တီႈဝဵင်းပၢင်လွင်းယဝ်ႉ တီႈဝဵင်းယႂႃႇငၢၼ်ႇၼၼ်ႉၵေႃႈ ၶၼ်ၼဵင်ႈဢမ်ႇမီးၵႃႈၶၼ် ၼဵင်ႈ ဝႂ်ၶဵဝ်ၼိုင်ႈၸွႆႉ ယင်းလႆႈငိုၼ်းမၢၼ်ႈ 3 ႁဵင်မွၵ်ႈၼႆႉၵူၺ်း။ ယွၼ်ႉၵူၼ်းႁပ်ႉသိုဝ်ႉၼဵင်ႈ တဵၵ်းၵႃႈတဵၵ်း ၶၼ်ႁႅင်းၼႃႇလႄႈ ၸဝ်ႈသူၼ်ဢၼ်ၽုၵ်ႇၼဵင်ႈၶဝ် တုမ်ႉတိူဝ်ႉၵၢၼ်ႁႃၵိၼ်လဵင်ႉတွင်ႉ ႁၢဝ်ႈႁႅင်း ၼႆယဝ်ႉ။