ၸွမ်းၼင်ႇ ၶေႃႈမုလ်းၼႂ်းလိၵ်ႈၽိုၼ်ၶၢဝ်ႇ ဢၼ်သိုၵ်းမၢၼ်ႈၵုမ်းၵမ်ၼၼ်ႉ ပိုၼ်ၽၢဝ်ႇဢွၵ်ႇဝႆႉဝႃႈ ပႃႇတီႇၵၢၼ်မိူင်း ၸိူဝ်းတၢင်ႇသဵၼ်ႈသၢႆမၢႆ တႃႇၶဝ်ႈလိူၵ်ႈတင်ႈၸွမ်း ၼႂ်းႁၢင်ပီ 2025 ၼႆႉ မီးယူႇ 76 ၸုမ်း။
ပႃႇတီႇၸိူဝ်းတၢင်ႇမၢႆၾၢင်မႂ်ႇမႂ်ႇ ၸွမ်းၼင်ႇ ပၵ်းပိူင်ၸိုင်ႈမိူင်း (ၾိင်ႈမိူင်း) ဢၼ်သိုၵ်းမၢၼ်ႈၶူင်သၢင်ႈၶိုၼ်ႈမႃးၼၼ်ႉ မီးယူႇ 26 ၸုမ်းလႄႈ ပႃႇတီႇၵဝ်ႇၸိူဝ်းဢမ်ႇၺႃးယုၵ်ႉလိူၵ်ႈပႅတ်ႈသေ သိုပ်ႇၶဝ်ႈၸွမ်းပၢင်လိူၵ်ႈတင်ႈၼၼ်ႉ မီးယူႇ 50 ၸုမ်း။ ၼႂ်းၼၼ်ႉ ၶဝ်ႈပႃးဝႆႉ ပႃႇတီႇသၢင်ႇသီႈ (ပျီႇၶၢႆႇၽျူဝ်း) ၊ ပႃႇတီႇၸၢဝ်းၶိူဝ်းၽွမ်ႉႁူမ်ႈ (တစည) ၸိူဝ်းပဵၼ်ပႃႇတီႇလူင်သေ ၸမ်ၸႂ်ၵၼ်တင်း သိုၵ်းမၢၼ်ႈ။
ၼင်ႇႁိုဝ် တေၸတ်းႁဵတ်းပၢင်လိူၵ်ႈတင်ႈလႆႈၼၼ်ႉ သိုၵ်းမၢၼ်ႈ ၸီႉသင်ႇႁႂ်ႈၶႃႈႁၢပ်ႇၵၢၼ်ၶုၼ် ၼႂ်းႁွင်ႈၵၢၼ်ၾၢႆႇၵူတ်ႇထတ်းၶဝ်ႈဢွၵ်ႇမိူင်းလႄႈ ၵဵပ်းသဵၼ်ႈမၢႆႁူဝ်ၵူၼ်း ၾၢႆႇတႂ်ႈၽွင်းလူင်မိူင်းႁူမ်ႈတုမ် ၵဵပ်း သဵၼ်ႈမၢႆႁူဝ်ၼပ်ႉၵူၼ်းမိူင်း ၸိူဝ်းယၢၼ်ဢွၵ်ႇဝၢၼ်ႈၵိူတ်ႇမိူင်းၼွၼ်းၸဝ်ႈၵဝ်ႇဝႆႉၸူဝ်ႈၶၢဝ်းၼၼ်ႉ ဝႃႈၼႆ။
ပၢင်လိူၵ်ႈတင်ႈ ဢၼ်သိုၵ်းမၢၼ်ႈ တေၸတ်းႁဵတ်းၼႂ်းႁၢင်ပီ 2025 ႁိုဝ် ႁူဝ်ပီ 2026 ၼႆႉ ၾၢႆႇငဝ်ႈငုၼ်းတီႇ မူဝ်ႇၶရေႇၸီႇ ၸိူဝ်ႉၶိူဝ်းတႆး (SNLD) တႄႉ ပိုၼ်ၽၢဝ်ႇ တွပ်ႇလၢတ်ႈတီႈသိုဝ်ႇၶၢဝ်ႇဝႆႉဝႃႈ တႅပ်းတတ်းသဵၼ်ႈ ၸႂ်ဢမ်ႇတၢင်ႇမၢႆၾၢင်ပႃႇတီႇၶိုၼ်းယဝ်ႉ ဝႃႈၼႆ။
ဝၢႆးလင် ပၢင်လိူၵ်ႈတင်ႈ ပီ 2020 ယဝ်ႉဢမ်ႇႁိုင် သိုၵ်းမၢၼ်ႈ မၢပ်ႇၼႄးဝႃႈ ပၢင်လိူၵ်ႈတင်ႈ ဢမ်ႇမီးလွင်ႈ ပူင်ႇသႂ်ၼႆသေ ယိုတ်းဢႃႇၼႃႇ ပိုၼ်ၽၢဝ်ႇႁႂ်ႈတပ်ႉသိုၵ်းမၢၼ်ႈၵုမ်းၵမ်ဝၢၼ်ႈမိူင်းၶိုၼ်း။ ဝၢႆးလင်ၼၼ်ႉ ပႃႇတီႇၵၢၼ်မိူင်း ၸိူဝ်းမီးႁႅင်းယႂ်ႇသေ ဢွင်ႇပေႉပၢင်လိူၵ်ႈတင်ႈ လႆႈၶႅပ်းၵၢင်ၸႂ် လွင်ႈၵမ်ႉယၼ်တီႈၵူၼ်း မိူင်းၼမ်လိူဝ်ပိူၼ်ႈသုတ်း မိူၼ်ၼင်ႇ ပႃႇတီႇၼူၵ်ႉယုင်း (NLD) လႄႈ ပႃႇတီႇႁူဝ်သိူဝ် (SNLD) ဢိၵ်ႇတင်း ပႃႇတီႇၵၢၼ်မိူင်းတႃႇ 40 ၸုမ်းၵေႃႈ ၺႃးသိုၵ်းမၢၼ်ႈယႃႉသဵၼ်ႈၸိုဝ်ႈ မၢႆၾၢင်ပႃႇတီႇပႅတ်ႈ။
ပၢင်လိူၵ်ႈတင်ႈ ဢၼ်သိုၵ်းမၢၼ်ႈတေဢွၼ်ႁူဝ် ၼမ်းၼႃႈၸတ်းႁဵတ်း ႁႂ်ႈပေႃးလႆႈၼႂ်းႁၢင်ပီ 2025 ဢမ်ႇၼၼ် ႁူဝ်ပီ 2026 ၼၼ်ႉ ၾၢႆႇသိုၵ်းမၢၼ်ႈ ယင်းပႆႇပိုၼ်ၽၢဝ်ႇဢွၵ်ႇမႃး ၶေႃႈမုလ်း ၶၢဝ်ႇသၢၼ် ႁူဝ်ယွႆႈမၼ်း ႁႂ်ႈတႅတ်ႈတေႃးသေတႃႉ ၾၢႆႇၸတ်းပွင်ပၢင်လိူၵ်ႈတင်ႈ UEC တႄႉ ပိုၼ်ၽၢဝ်ႇဢွၵ်ႇဝႆႉဝႃႈ သင်ၶႂ်ႈၶဝ်ႈႁူမ်ႈၸွမ်းၼႂ်းပၢင်လိူၵ်ႈတင်ႈပွၵ်ႈၼႆႉၸိုင် ႁႂ်ႈတၢင်ႇမၢႆၾၢင်ပႃႇတီႇ ၶိုတ်းတၼ်းၸွမ်းၼင်ႇ မၵ်းမၼ်ႈဝႆႉၶၢဝ်းယၢမ်းၼၼ်ႉ ၼႆယူႇ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ