သိုၵ်းမၢၼ်ႈ ထႅမ်ႁႅင်းသိုၵ်းၶဝ်ႈၵႂႃႇတၢင်းဝၢၼ်ႈဢိူင်ႇ ၼႂ်းဝဵင်းယႂႃႇငၢၼ်ႇ ၸိုင်ႈတႆးပွတ်းၸၢၼ်း တီႉၺွပ်း ၵူၼ်းမိူင်းပိုၼ်ႉတီႈၵႂႃႇ ပေႃႈမႄႈၵူၼ်းႁိူၼ်း လႆႈၵႂႃႇထုတ်ႇဢဝ်ၶိုၼ်း 300 သႅၼ်ပျႃး ဝႃႈၼႆ။

ၵူၼ်းဝၢၼ်ႈၵုင်းသိမ်ႇ (သိမ်ကုန်း) ၸိုဝ်ႈႁွင်ႉ ၸၢႆးမွင်ႇ ဢႃယု 30 ပၢႆ ၺႃးသိုၵ်းမၢၼ်ႈ တီႉၺွပ်းၵႂႃႇ ၸဵမ်မိူဝ်ႈဝၼ်းတီႈ 10/04/2025 ၼၼ်ႉ။

မိူဝ်ႈဝႃး ဝၼ်းတီႈ 08/05/2025 ယၢမ်းၵၢင်ၶမ်ႈ 8 မူင်း ပီႈၼွင်ႉၵူၼ်းႁိူၼ်းၸၢႆးမွင်ႇ ၵႂႃႇယွၼ်းထုတ်ႇဢဝ် တူဝ်မႃးၶိုၼ်း သိုၵ်းမၢၼ်ႈယွၼ်းငိုၼ်း 300 သႅၼ်ပျႃးၵေႃႈ ၵႃႈလႆႈပၼ် – ဝႃႈၼႆ။ 

ၵူၼ်းၸမ်ၸႂ်ၸၢႆးမွင်ႇ လၢတ်ႈၽူႈတွႆႇႁွၵ်ႈဝႃႈ -“သိုၵ်းမၢၼ်ႈ ထႅမ်ႁႅင်းသိုၵ်း ၶဝ်ႈမႃးၼႂ်းဝၢၼ်ႈသေ တီႉၺွပ်းဢဝ်မၼ်းၵႂႃႇ၊ ၶဝ်ၼႄးဝႃႈ မၼ်းၵပ်းသိုပ်ႇတိတ်းတေႃႇၵၼ်တင်း PDF ၼႆ ၊ မိူဝ်ႈဝႃး လႆႈၵႂႃႇထုတ်ႇ ဢွၵ်ႇမႃးၶိုၼ်းတင်းငိုၼ်း 300 သႅၼ် ၊ ၽွင်းၵႂႃႇထုတ်ႇတူဝ်မႃးၶိုၼ်းၼႆႉ ၸွမ်းတူဝ်ၶိင်းၼႆႉ မီးႁွႆးသိုၵ်းမၢၼ်ႈ ပေႃႉဝႆႉ သမ်ႉပေႃးမၢၼ်ႉၸဵပ်းၵႂႃႇမူတ်း။ ပေႃးဢမ်ႇၶႂ်ႈလီသေဢၼ်ယဝ်ႉ”- ဝႃႈၼႆ။ 

မိူၼ်ၼင်ႇၼႆ ၼႂ်းႁူဝ်လိူၼ်မေႊၼႆႉမႃး သိုၵ်းမၢၼ်ႈ ထႅမ်ႁႅင်းသိုၵ်း 200 ပၢႆ ၶဝ်ႈၼႂ်းဝၢၼ်ႈၼပၢၼ်းၵျီး (နွားဘန်းကြီး)။ ၼၼ်ႉၵေႃႈ ႁၢမ်ႈၵူၼ်းမိူင်းပိုၼ်ႉတီႈ ၸႂ်ႉၾူၼ်းမိုဝ်းထိုဝ်ပႃး ဝႃႈၼႆ။

ၼၢင်းယိင်း ၵူၼ်းဝၢၼ်ႈၵုင်းသိမ်ႇ (သိမ်ကုန်း) လၢတ်ႈၽူႈတွႆႇႁွၵ်ႈဝႃႈ -“တေႃႈလဵဝ်ၼႆႉ ၶဝ်ထႅမ်ႁႅင်း သိုၵ်းၵႂႃႇ တၢင်းဝၢၼ်ႈၼပၢၼ်းၵျီး ၊ ၵူၼ်းဝၢၼ်ႈၵေႃႈ ဢမ်ႇလႆႈၸႂ်ႉၾူင်းၸႂ်ႉမိုဝ်းထိုဝ် ၊ ပေႃးၶဝ်ၶဝ်ႈမႃးၼႂ်း ဝၢၼ်ႈမိူဝ်ႈ လႂ်ၵေႃႈလႆႈၵူဝ်ၼႃႇ ၊ ၶဝ်ၵႆႉၼႄးဝႃႈ ပဵၼ်ၵူၼ်းပၼ်ၶၢဝ်ႇသိုၵ်း PDF ၼႆသေ တီႉၺွပ်းၵႂႃႇၼႃႇ။ လိူၼ် ထူၼ်ႈ 4 ပူၼ်ႉမႃးၼႆႉၵူၺ်းၶဝ် ၶဝ်ႈဝၢၼ်ႈၵုင်းသိမ်ႇသေ တီႉဢဝ်ၵူၼ်းဝၢၼ်ႈၵႂႃႇ 7 ၵေႃႉလူးၵွၼ်ႇ။ ပေႃႉထုပ်ႉသေႁႂ်ႈၵႂႃႇသူင်ႇတၢင်းပၼ်ၶဝ်ၼၼ်ႉၼႃႇ”- ဝႃႈၼႆ။

လိူဝ်ၼၼ်ႉ ၼႂ်းဝၼ်းတီႈ15/04/2025 မႃး ၾၢႆႇတင်းသိုၵ်းမၢၼ်ႈ ဢဝ်ဢဵၼ်ႁႅင်းသိုၵ်း 100 ပၢႆ ထူဝ်းသိုၵ်း ၶဝ်ႈၼႂ်းဝၢၼ်ႈလိၼ်းဝေး (လင်းဝေး) ၊ ၵျွၵ်ႉတေႃး (ကျောက်တော) ၊ တၽၢၼ်းပိၼ်ႇ (သဖန်းပင်) ၊ ပႄႇၵိၼ်း (ပါယ်ကင်း) ၸိူဝ်းၼႆႉ။

လိူဝ်ၼၼ်ႉ ၼႂ်းဝၼ်းတီႈ 12/04/2025 ယၢမ်းၵၢင်ၼႂ်ၸဝ်ႉ 1 မူင်း ၵူၼ်းဢမ်ႇႁူႉၾၢႆႇ ၶဝ်ႈႁႅမ်ၵူၼ်းပိုၼ်ႉတီႈ ဝၢၼ်ႈတၽၢၼ်းပိၼ်ႇ တၢႆ 4 ၵေႃႉ ၊ ၼႂ်းၼၼ်ႉ ပႃးလုၵ်ႈဢွၼ်ႇႁဵၼ်းလိၵ်ႈၸၼ်ႉ 8 ၵေႃႉၼိုင်ႈ ၊ ဝၢႆးလင်ၼႆႉ ၾၢႆႇတင်းသိုၵ်းမၢၼ်ႈ ၵႆႉထႅမ်ႁႅင်းသိုၵ်း ၶဝ်ႈမႃးယူႇၼႂ်းဝၢၼ်ႈ ႁဵတ်းႁႂ်ႈၵူၼ်းဝၢၼ်ႈယူႇယၢပ်ႇ – ၵူၼ်းပိုၼ်ႉတီႈလၢတ်ႈ။

ၽွင်းသိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်းမႃးၼႆႉ ၵူၼ်းပိုၼ်ႉတီႈ ၶဝ်ႈထိူၼ်ႇယိပ်းၵွင်ႈ ယိုဝ်းသိုၵ်းမၢၼ်ႈလႄႈ ယၢမ်းလဵဝ် သိုၵ်းမၢၼ်ႈပလိၵ်ႈမၢၼ်ႈ ဢမ်ႇပၵ်းတပ်ႉသေတႃႉ မိူဝ်းတင်ႈၵဵတ်ႉ/ လၢၼ်ႇသေ ပႂ်ႉၵူတ်ႇထတ်းၵူၼ်းၵႂႃႇမႃး ႁၢဝ်ႈႁႅင်းလႄႈ ၵႆႉထႅမ်ႁႅင်းသိုၵ်းၶိူဝ်းယႂ်း – ၵူၼ်းပိုၼ်ႉတီႈလၢတ်ႈ။

ဝဵင်းယႂႃႇငၢၼ်ႇၼႆႉ ၵွၼ်ႇသိုၵ်းမၢၼ်ႈ ပႆႇယိုတ်းဢႃႇၼႃႇၸိုင်ႈမိူင်းၼၼ်ႉ ပဵၼ်ဝဵင်းဢၼ်လိၼ်ၸမ်ႉ ၼမ်ႉလိူင်ႇ။ ဢမ်ႇမီးသိုၵ်းလုၵ်ႉၽိုၼ်ႉလႄႈ ဢမ်ႇတွၼ်ႉမီးၽေးသိုၵ်းသိူဝ်။ ၵူၼ်းမိူင်းယူႇၵျေႃႇမူၼ်ႈသႃႇ ဢမ်ႇလႆႈၶီလႆႈမႆႈသင်။ ၵူၺ်းၵႃႈ ဝၢႆးလင်သိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းမႃးၼႆႉတႄႉ ၵူၼ်းၼုမ်ႇ ဝဵင်း ယႂႃႇငၢၼ်ႇ ဢွၼ်ၵၼ်ၶဝ်ႈသိုၵ်း PDF သေ ၶိုၼ်းတေႃႇသူႈၸဝ်ႈဢႃႇၼႃႇသိုၵ်းမၢၼ်ႈၶိုၼ်း။ သိုၵ်းမၢၼ်ႈၵေႃႈ ယိင်ႈၶႅၼ်းထႅမ်ႁႅင်းသိုၵ်းသေ ၶဝ်ႈပူၼ်ႉပႅၼ်သုၼ်ႇလႆႈၵူၼ်း ၼႂ်းဝၢၼ်ႈၼႂ်းဝဵင်းမႃးဢမ်ႇထၢတ်ႇ တေႃႇထိုင်ယၢမ်းလဵဝ်။