ပူၼ်ႉမႃး မိူဝ်ႈဝၼ်းတီႈ 05/05/2025 ၼႆႉ ၵူၼ်းဝၢၼ်ႈမၢၼ်ႈၸၢၵ်ႈ ၸၢဝ်းၶိူဝ်းတဢၢင်း ၼႂ်းဢိူင်ႇပၢင်ယူၵ်ႇ ႁူဝ်ၵူၼ်း 100 ပၢႆ ႁူမ်ႈၵၼ်ဢွၵ်ႇၼႄၵၢင်ၸႂ် တေႃႇသိုၵ်းတဢၢင်း TNLA ၸိူဝ်းၵႂႃႇၶုတ်းဢဝ်ႁိၼ်ႁႄႈ (သီႇလီႇၵုၼ်ႇ) တီႈသၼ်လွႆမၢၼ်ႈၸၢၵ်ႉ ဢၼ်မီးၸဵင်ႇၸၢၼ်းဝၼ်းတူၵ်းလႄႈ ယၢၼ်ၵႆၵၼ်တင်း ဝဵင်းၼမ်ႉၶမ်း မွၵ်ႈ 11 လၵ်း ၸိုင်ႈတႆးပွတ်းႁွင်ႇ။

ၵူၼ်းဝဵင်းၼမ်ႉၶမ်း ၵေႃႉၼိုင်ႈ လၢတ်ႈၼႄၽူႈတွႆႇႁွၵ်ႈဝႃႈ -“ၸိူဝ်းႁိမ်းႁွမ်းၼၼ်ႉ ပဵၼ်ဝၢၼ်ႈလွႆလၢႆလၢႆ။ သီႇလီႇၵုၼ်ႇၼႆႉ ၶဝ်ၶုတ်းမႃးတႄႉႁိုင်တၢၼ်ႇတၢၼ်ႇယဝ်ႉ။ ၸိူဝ်းမီးၸၼ်ႉသမ်ႉ မီးငိုၼ်းၶဝ်ႈၼမ်လူၼ်ႉ လိူဝ်ၼၼ်ႉၼႃႇ။ ၾၢႆႇၼိုင်ႈၵေႃႈ ၶဝ်သမ်ႉတဵၵ်းၶၢၼ်းၵူၼ်းဝၢၼ်ႈ တေလႆႈၵႂႃႇထၢမ်းၼႃႈၵၢၼ်ၸိူဝ်ႉၸၢတ်ႈ ၼႆၼၼ်ႉၼႃႇ ၸင်ႇဝႃႈ မိူဝ်ႈလဵဝ် ၵူၼ်းဝၢၼ်ႈလႄႈ ၵူၼ်းသိုၵ်းၶဝ် ဢမ်ႇပေႃးႁၼ်လီၵၼ်ႁႄ ၵိူတ်ႇပၼ်ႁႃ ၸိူင်ႉၼႆဢွၵ်ႇမႃး”- ဝႃႈၼႆ။

ယွၼ်ႉၵူၼ်းဝၢၼ်ႈ ႁူမ်ႈၵၼ်ဢွၵ်ႇၼႄၵၢင်ၸႂ်တေႃႇ ၶွမ်ႊပၼီႊ ဢၼ်ၶုတ်းဢဝ်ႁိၼ်ႁႄႈ (သီႇလီႇၵုၼ်ႇ) ၼၼ်ႉလႄႈ ၽူႈမီးပုၼ်ႈၽွၼ်း ၾၢႆႇသိုၵ်းတဢၢင်း TNLA ၸင်ႇလႆႈၵႂႃႇႁၢမ်ႈသေ မီးလွင်ႈထဵင်မေႃးၽိတ်း ၽႅၵ်ႇၵၼ်မႃး။

လႆႈႁူႉဝႃႈ ဢၼ်ဢွၼ်ႁူဝ် ပၼ်ၶႂၢင်ႉၶုတ်းဢဝ်ႁိၼ်ႁႄႈ (သီႇလီႇၵုၼ်ႇ) ၼႆႉ ပဵၼ်တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA ႁူမ်ႈၵၼ်တင်း ၶွမ်ႊပၼီႊ မျၢၼ်ႇမႃႉသူၺ်ႇတီးၼၼ်ႇ (မြန်မာ့ရွှေသီးနှံ) ၸတ်းၵၢၼ်ဝႆႉ။ ၵူၼ်းႁဵတ်းၵၢၼ်ၶုတ်းႁႄႈ မီးယူႇ မွၵ်ႈ 300 ၵေႃႉ။ ၶိူင်ႈၸၢၵ်ႈၶုတ်းႁႄႈ မွၵ်ႈ 7 လမ်း၊ ၸႂ်ႉတိုဝ်းၵႃးလူင် တေႃႉတၢင်ႇဢဝ်ႁိၼ်ႁႄႈ (သီႇလီႇၵုၼ်ႇ) ၼႆႉ မီးမွၵ်ႈ 10 လမ်းပၢႆ။

ႁိၼ်ႁႄႈသီႇလီႇၵုၼ်ႇဢၼ်သိုၵ်းတဢၢင်း TNLA တင်း ၶွမ်ႊပၼီႊ ႁူမ်ႈၵၼ်ၶုတ်းဢဝ်ယူႇၼႆႉ တေႃႉၵႂႃႇ ဢဝ်ၵႂႃႇၶၢႆတၢင်း ၾင်ႇမိူင်းၶႄႇ ဝႃႈၼႆ။

ႁိၼ်ႁႄႈၼႆႉ ၸဝ်ႈပၢႆးမၢၵ်ႈမီးၶဝ် တေႃႉသူင်ႇၵႂႃႇၶၢႆ ၼႂ်းမိူင်းၶႄႇသေ ဢဝ်ၵႂႃႇၸႂ်ႉတိုဝ်းၼႂ်းႁူင်းၸၢၵ်ႈ၊ ၾၢႆႇၵၢၼ်ၵေႃႇသၢင်ႈ၊ ဝၢၼ်ႇႁိၼ်၊ ၶိူင်ႈၸႂ်ႉၾႆးၾႃႉ ၸိူဝ်းၼႆႉၵူၺ်းဢမ်ႇၵႃး ႁဵတ်း ဢွၵ်ႇလႆႈပႃး ၶိူင်ႈထွင်ၼမ်ႉ၊ ၶိူင်ႈဢိတ်ႇၵူႈမဵဝ်းမဵဝ်း၊ ၸႂ်ႉတိုဝ်းတႃႇႁဵတ်းဢွၵ်ႇလၢႆးမွၵ်ႇသိူဝ်ႈၶူဝ်း၊ ၶိူင်ႈႁပ်ႉၾႆးလႅတ်ႇ၊ ၶိူင်ႈလဵၵ်း (အလူမီနီယံ) ဢိၵ်ႇတင်း ၶိူင်းႁဵတ်းႁၢင်ႈ တၢင်းႁၢင်ႈလီယိင်းၸၢႆး ၸဵမ်ၸိူဝ်းၼႆႉ။

တႅမ်ႈ – ၽူၺ်းၼုမ်ႇ